November 13, 2023

ತಿಗಲೆ ಬೇನೆಡ್ ತೀರ್ ಪೋಯಿನ ನಾಗಸ್ವರ ವಾದಕೆ ಜಲೀಲ್ ಸಾಹೇಬ್

ಕಾಪು: ನಾಗಸ್ವರ ವಾದಕೆರ್ ಶೇಖ್ ಜಲೀಲ್ ಸಾಹೇಬ್ (56) ಮೇರ್ ಸೋಮಾರ ತಿಗಲೆ ಬೇನೆಡ್ ತೀರ್ ಪೋಯೆರ್.

ಇನಿ ಬೊಲ್ಪುಗು ನಾಗಸ್ವರ ಪುಗೆಲ್ ದೀವೊಂದು ಇಲ್ಲರ್ದ್ ಪಿದಯಿ ಬೈದೆರ್. ಬೊಕ್ಕ ಹೋಟೇಲ್ ಡ್ ಚಾ ಪರಿಯೆರೆ ಕುಲ್ಲುನಗ ತಿಗಲೆ ಬೇನೆ ಬೈದ್ಂಡ್. ಆಂಡ, ಆಸ್ಪತ್ರೆಗ್ ಲೆತೊಂದು ಪೋನಗ ಮೇರ್ ತಾದಿಡ್ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.

ಮೇರ್ ಸನಿಯಾರ ಕೊಪ್ಪಲಂಗಡಿಡ್ ನಡತಿನ ಮುಳ್ಳಮುಟ್ಟೆ, ಐತಾರ ಕಾಪು ಶ್ರೀ ಲಕ್ಷ್ಮೀ ಜನಾರ್ದನ ದೇವಲ್ಯಡ್ ತುಡರ್ ಪರ್ಬ ಬೊಕ್ಕ ಬಲಿ ಪಿದಾಡುನ ಪೊರ್ತುಡು ನಾಗಸ್ವರ ಸೇವೆ ಕೊರ್ತೆರ್. ಮೇರ್ ಕಾಪು ಸಾರ ಸೀಮೆದ ಒಡೆಯೆ ಶ್ರೀ ಲಕ್ಷ್ಮೀ ಜನಾರ್ದನ ದೇವೆರೆನ ಸನ್ನಿಧಿ, ಕಾಪು ಮೂಜಿನೇ ಮಾರಿಗುಡಿ, ಕಾಪು ಮಾರಿಯಮ್ಮ ದೇವಿ ಸನ್ನಿಧಿ ಬೊಕ್ಕ ಕಾಪು ಸಾರ ಸೀಮೆದ ಸುಮಾರ್ ದೇವಲ್ಯ, ಗರಡಿಡ್ ನಾಗಸ್ವರ ವಾದಕೆರಾದ್ ಸೇವೆ ಕೊರೊಂದು ಇತ್ತೆರ್. ಮೆರೆಗ್ ಬೊಡೆದಿ, ಮಗಲ್, ಸಹೋದೆರೆಗ್, ಬಂಧು ಮಿತ್ತೆರ್, ಅಭಿಮಾನಿಲು ಉಲ್ಲೆರ್.

ಗಂಗೊಳ್ಳಿಡ್ ಏಳ್ ಬೋಟ್ ಗ್ ತೂ: ಕೋಟಿರ್ದ್ ಎಚ್ಚ ರೂ. ನಷ್ಟ

ಬೈಂದೂರು: ತಾಲೂಕ್ ದ ಗಂಗೊಳ್ಳಿಡ್ ಲಂಗರು ಪಾಡಿನ ಬೋಟ್ ಗ್ ಆಕಸ್ಮಿಕವಾದ್ ತೂ ಪೊತ್ತ್ ದ್ ಕರೆಂಚಿದ್ಂಡ್.

ತುಡರ್ ಪರ್ಬದ ಲೆಕ್ಕೊಡು ಮೀನುಗಾರೆರ್ ಪೂಜೆ ಮಲ್ಪುನಗ ತೂ ಪೊತ್ತ್ ದ್ಂಡ್ ಪಂದ್ ಪ್ರತ್ಯಕ್ಷದರ್ಶಿಲು ತೆರಿಪಾದೆರ್.

ಒಂಜಿ ಬೋಟ್ ಗ್ ಪತ್ತಿನ ತೂ ಬೊಕ್ಕ ಪತ್ತೊಂದು, ಪತ್ತೊಂದು ಏಳ್ ಮೀನುಗಾರಿಕಾ ಬೋಟುಗ್ ಪತ್ತ್ ದ್ಂಡ್. ನೆರ್ದ್ ಕೋಟಿರ್ದ್ ಎಚ್ಚ ರೂ. ನಷ್ಟ ಆತ್ಂಡ್.

ಅಕ್ಷಯ್ ಕಲ್ಲೇಗನ ಇಲ್ಲಗ್ ಸಂಸದೆರ್ ನಳಿನ್ ಕುಮಾರ್ ಭೇಟಿ

ಪುತ್ತೂರು: ಕೆಲವು ದಿನತ್ತ ಪಿರವು ಕೊಲೆ ಆಯಿನ ಅಕ್ಷಯ್ ಕಲ್ಲೇಗ ಮೆರೆನ ಇಲ್ಲಗ್ ಸಂಸದೆರ್ ನಳಿನ್ ಕುಮಾರ್ ಭೇಟಿ ಕೊರ್ದು ಕುಟುಂಬಸ್ಥೆರೆಗ್ ಸಾಂತ್ವನ ಪಂತೆರ್.

ಈ ಪೊರ್ತುಡು ಅಕ್ಷಯ್ ನ ಅಮ್ಮೆರ್ ಚಂದ್ರಶೇಖರ್, ಕೊಲೆ ಕೇಸ್ ದ ಆರೋಪಿಲೆಗ್ ಶಿಕ್ಷೆ ಕೊರೊಡು ಪಂದ್ ನಳಿನ್ ಕುಮಾರ್ ಡ ಆಗ್ರಹ ಮಲ್ತೆರ್. ಮೆರೆನೊಟ್ಟಿಗೆ ಮಾಜಿ ಶಾಸಕೆರ್ ಸಂಜೀವ ಮಠಂದೂರು ಇತ್ತೆರ್.

ನವೆಂಬರ್ 6 ಕ್ಕ್ ಬಯ್ಯಗ್ ಪುತ್ತೂರುದ ನೆಹರು ನಗರಡ್ ಕಲ್ಲೇಗ ಟೈಗರ್ಸ್ ಪಿಲಿಏಸ ಕೂಟದ ಮುಖ್ಯಸ್ಥೆ ಅಕ್ಷಯ್ ಕಲ್ಲೇಗ‌ನ ಕೊಲೆ ಆತ್ಂಡ್.

ಪಟಾಕಿ ಪುಡಪುನಗ 26 ಜನತ್ತ ಕಣ್ಣ್ ಗ್ ಪೆಟ್ಟ್

ಬೆಂಗ್ಲೂರು: ತುಡರ್ ಪರ್ಬದ ಲೆಕ್ಕೊಡು ಕೋಡೆ ರಾತ್ರೆ ಪಟಾಕಿ ಬುಡುನಗ ಬೆಂಗ್ಲೂರ್ ಡ್ 26 ಜನಕ್ಕ್ ಪೆಟ್ಟಾಯಿನ ಘಟನೆ ನಡತ್ಂಡ್.

ಪೆಟ್ಟಾಯಿನಕ್ಲೆನೆಟ್ಟ್ 22 ಜನ ನಾರಾಯಣ ನೇತ್ರಾಲಯಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ನೆಟ್ಟ್ 10 ಜನತ್ತ ಸ್ಥಿತಿ ಗಂಭೀರ ಆತ್ಂಡ್ ಪಂದ್ ಆಸ್ಪತ್ರೆದ ಮುಖ್ಯಸ್ಥೆರ್ ರೋಹಿತ್ ಶೆಟ್ಟಿ ತೆರಿಪಾದೆರ್. ಒರಿನ 4 ಜನ ಬೆಂಗ್ಲೂರ್ ದ ಮಿಂಟೋ ಆಸ್ಪತ್ರೆಡ್ ಚಿಕ್ಸಿತ್ಸೆ ಪಡೆವೊಂದು ಉಲ್ಲೆರ್.

ಕೊಡಗು: ದೇವಲ್ಯದ ಜಾಲ್ ಡ್ ನಿಧಿ ಪತ್ತೆ

ಕೊಡಗು: ದೇವಲ್ಯದ ಜಾಲ್ ಡ್ ನಿಧಿ ಪತ್ತೆ ಆಯಿನ ಘಟನೆ ಕೊಡಗು ಜಿಲ್ಲೆ ವಿರಾಜಪೇಟೆ ತಾಲೂಕ್ ದ ಆನಂದಪುರ ಗ್ರಾಮಡ್ ನಡತ್ಂಡ್.

ಟಾಟಾ ಕಾಫಿ ಸಂಸ್ಥೆಗ್ ಸೇರಿನ ಕಾಫಿತೋಟಡ್ ಇಪ್ಪುನ ಪಿರಾಕ್ ದ ಈಶ್ವರ ದೇವಲ್ಯದ ಜಾಲ್ ಡ್ ನಿಧಿ ಪತ್ತೆ ಆತ್ಂಡ್. ಉಂದು ದೇವಲ್ಯದ ಜಾಲ್ ಡ್ ಕೆಲಸ ಮಲ್ತೊಂದು ಇತ್ತಿನ ಕಾರ್ಮಿಕೆರೆಗ್ ಭೂಮಿದಡಿಟ್ಟ್ ಇತ್ತಿನ ಮಣ್ಣ್ ದ ಮಡಿಕೆ ತಿಕ್ ದ್ಂಡ್. ಕೂಡ್ಲೆ ಟಾಟಾ ಕಾಫಿ ತೋಟದ ವ್ಯವಸ್ಥಾಪಕೆರ್ ಪೊಲೀಸೆರೆಗ್ ಪೊಲಬು ಕೊರ್ತೆರ್. ವಿರಾಜಪೇಟೆ ತಹಶೀಲ್ದಾರ್‌ ಸಮ್ಮುಖಡ್ ಮಹಜರು ಮಲ್ತ್ ದ್ ಬೊಕ್ಕ ಕೊಡಗು ಜಿಲ್ಲಾಧಿಕಾರಿ ವಶಕ್ಕ್ ನಿಧಿನ್ ಕೊರ್ತೆರ್. ಈ ಬಗೆಟ್ಟ್ ತನಿಖೆ ನಡತೊಂದು ಉಂಡು.

ಅಮೆರಿಕದ ಸೇನಾ ಹೆಲಿಕಾಪ್ಟರ್ ಬೂರ್ದು 5 ಜನ ತೀರ್ ಪೋಯೆರ್

ಅಮೆರಿಕದ ಸೇನಾ ಹೆಲಿಕಾಪ್ಟರ್ ಮೆಡಿಟರೇನಿಯನ್ ಕಡಲ್ ಗ್ ಬೂರ್ದು 5 ಜನ ತೀರ್ ಪೋಯೆರ್ ಪಂದ್ ಅಮೆರಿಕದ ಅಧಿಕಾರಿಲು ತೆರಿಪಾದೆರ್.

ನ.10 ಕ್ಕ್ ಟೇಕಾಫ್ ಆಯಿನ ಹೆಲಿಕಾಪ್ಟರ್ ತಾಂತ್ರಿಕ ದೋಷರ್ದ್ ಕಡಲದ ಗ್ ಬೂರ್ದುಂಡು. ಈ ಘಟನೆದ ಬಗೆಟ್ಟ್ ಅಧ್ಯಕ್ಷೆರ್ ಬಿಡೆನ್ ಸಂತಾಪ ತೆರಿಪಾದೆರ್. ಅಂಚೆನೆ ತೀರ್ ಪೋಯಿನ ಯೋಧೆರೆನ ಸೇವೆನ್ ಮೆಚ್ಚಿದೆರ್. ಪಶ್ಚಿಮ ಏಷ್ಯಾದ ಮಿತ್ತ್ ನಿಗಾ ದೀಯೆರೆ ಅಮೆರಿಕ ಈ ಪ್ರದೇಶಡ್ ಪಡೆನ್ ನಿಯೋಜನೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್.