ರಾಮಕುಂಜ ಇಂಗ್ಲಿಷ್ ಶಾಲೆಡ್ ತುಳುವೆರೆ “ತುಡರ್ ಪರ್ಬ”
ರಾಮಕುಂಜ: ಶ್ರೀ ರಾಮಕುಂಜೇಶ್ವರ ಆಂಗ್ಲ ಮಾಧ್ಯಮ ಶಾಲೆಡ್ ನ.18 ದಾನಿ ’ತುಡರ್ ಪರ್ಬ’ ಆಚರಣೆ ಮಲ್ತೆರ್.
ಸಂಸ್ಥೆದ ಶಿಕ್ಷಕ-ರಕ್ಷಕ ಸಂಘದ ಗುರ್ಕಾರ್ಲು ಉಮೇಶ್ ಶೆಟ್ಟಿ ಸಾಯಿರಾಂ ಅತ್ಯಾರ್ ಮೇರ್ ಪೂಜೆದ ಪ್ರಾತ್ಯಕ್ಷಿಕೆದೊಟ್ಟಿಗೆ, ದೀಪಾವಳಿ ಪರ್ಬದ ಆಚರಣೆದ ದುಂಬುದ ಸತ್ವನ್ ಮನಮುಟ್ಟುನಂಚ ಜೋಕ್ಲೆಗ್ ತೆರಿಪಾಯೆರ್. ಸಭೆತ ಗುರ್ಕಾರ್ಮೆನ್ ಸಂಸ್ಥೆದ ಕಾರ್ಯದರ್ಶಿ ಕೆ.ಸೇಸಪ್ಪ ರೈ ವಹಿಸ್ದ್ ಪಾತೆರ್ದ್ ತುಳು ಸಂಸ್ಕೃತಿದ ಆಚಾರ ವಿಚಾರಲೆನ್ ಯುವ ಜನತೆಗ್ ಮುಟ್ಟಾವುನ ಕಾರ್ಯನ್ ಸಂಸ್ಥೆ ನಡಪಾವೊಂದು ಬೈದ್ಂಡ್. ಪಂದ್ ಪಂಡೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಕುಡ್ಲ ನೆತ್ತ ಮಾಜಿ ರಿಜಿಸ್ಟ್ರಾರ್ ಚಂದ್ರಹಾಸ ರೈ ಬಿ ಬಲೀಂದ್ರ ಪೂಜೆ ಬೊಕ್ಕ ಗೋಪೂಜೆದ ಮಹತ್ವನ್ ತೆರಿಪಾಯೆರ್. ತುಳು ಭಾಷೆ ಬೊಕ್ಕ ಸಂಸ್ಕೃತಿನ್ ಜಗತ್ತ್ಡ್ ಪಸೆರರೆ ತುಳು ಸಂಸ್ಕೃತಿದ ಕೇಂದ್ರವಾಯಿನ ರಾಮಕುಂಜ ಮಹತ್ತರ ಪಾತ್ರ ವಹಿಸ್ದ್ ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ಜೈ ತುಳುನಾಡು ಕೇಂದ್ರ ಸಮಿತಿದ ಗುರ್ಕಾರ್ಲು ವಿಶು ಶ್ರೀಕೇರ ತುಳು ಭಾಷೆನ್ ಒರಿಪಾವೆರೆ ನಮ ಮಾತ ಒಗ್ಗಟ್ಟಾದ್ ಪೊರ್ಂಬಾಟ ಮಲ್ಪೊಡು ಪಂಡೆರ್. ವಿದ್ಯಾರ್ಥಿಲೆರ್ದ್ ತುಳು ಸಂಸ್ಕೃತಿನ್ ತೋಜಿಪಾವುನ ಬೇತೆ ಬೇತೆ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್ಂಡ್. ಸಭೆಟ್ ಜೈ ತುಳುನಾಡು ಸಂಘದ ಸದಸ್ಯೆರ್, ಸಂಸ್ಥೆದ ಆಡಳಿತಾಧಿಕಾರಿ ಆನಂದ್ ಎಸ್.ಟಿ., ಪ್ರಾಥಮಿಕ ಶಾಲಾ ವಿಭಾಗದ ಮುಖ್ಯಗುರು ಲೋಹಿತಾ ಎ, ವಿದ್ಯಾರ್ಥಿನಿಲಯದ ವ್ಯವಸ್ಥಾಪಕೆರ್ ರಮೇಶ್ ರೈ ಆರ್.ಬಿ ಈ ಪೊರ್ತುಡು ಇತ್ತೆರ್.
ಸಹಶಿಕ್ಷಕಿ ಸರಿತಾ ರಾಮಕುಂಜ ಬಿನ್ನೆರೆನ್ ಎದ್ಕೊಂದು, ಪ್ರೌಢಶಾಲಾ ವಿಭಾಗದ ಮುಖ್ಯಗುರು ಗಾಯತ್ರಿ ಯು.ಎನ್ ಸೊಲ್ಮೆ ಸಂದಾಯ ಮಲ್ತೆರ್. ಸಹಶಿಕ್ಷಕಿ ಸಂಚಿತಾ ಬೊಕ್ಕ ಅಕ್ಷತಾ ಟಿ ಲೇಸ್ದ ಸುದಾರಿಕೆ ಮಲ್ತೆರ್.
