ಬಂಟ ಸಮಾಜದ ಸಮಾಜ ಕಲ್ಯಾಣ ಯೋಜನೆ ರಾಜ್ಯೊಗೇ ಮಾದರಿ : ಸ್ಪೀಕರ್ ಯು.ಟಿ.ಖಾದರ್

ಮುಲ್ಕಿಡ್ ಜಾಗತಿಕ ಬಂಟರ ಸಂಘದ ಒಕ್ಕೂಟರ್ದ್ ಸಮಾಜ ಕಲ್ಯಾಣ ಲೇಸ್

ಮುಲ್ಕಿ: ಪರಿಶ್ರಮ ಬತ್ತ್ ದ್ ಮಿತ್ತ್ ಬತ್ತಿನ ಬಂಟ ಸಮಾಜ, ಬಡಪತ್ತ್ ದಕ್ಲೆಗ್ ಸಕಾಯ ಮಲ್ಪುನ ಎಡ್ಡೆ ಮನಸ್ ದ ಮುಕೇನ ಸಂಘಟನಾತ್ಮಕವಾದ್ ಗಟ್ಟಿಯಾತ್ಂಡ್. ಸಮಾಜೊಡು ನಮ ಪುಟ್ಟುನಗ ಬಡಪತ್ತ್ ಇತ್ತ್ಂಡಲ ಸೈನಗಲ ಬಡಪತ್ತ್ ಡೇ ಸೈಯೊಡು ಪಂದ್ ದಾಲ ಇಜ್ಜಿ. ಎಡ್ಡೆ ಶಿಕ್ಷಣ ದೆತೊಂದು ಸಮಾಜನ್ ಬುಲೆಪಾದ್ ಗಟ್ಟಿ ಮಲ್ಪುಲೆ. ಸಮಾಜ ಬೊಕ್ಕ ಸಂಘಟನೆನ್ ಉಂದೆಕ್ಕ್ ಮೀಸಲು ದೀಲೆ. ಬಂಟ ಸಮಾಜದ ಸಮಾಜ ಕಲ್ಯಾಣ ಯೋಜನೆ ರಾಜ್ಯೊಡೇ ಮಾದರಿ ಆವಡ್ ಪಂದ್ ವಿಧಾನಸಭೆತ್ತ ಪೊಸ ಸ್ಪೀಕರ್ ಯು.ಟಿ.ಖಾದರ್ ಪಂಡೆರ್.

ಆರ್ ಮುಲ್ಕಿಡ್ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಸಂಯೋಜನೆಡ್ ಸೋಮಾರ ಒಕ್ಕೂಟದ ಕಚೇರಿದ ಜಾಲ್ ಡ್ ನಡತಿನ ಸಮಾಜ ಕಲ್ಯಾಣ ಯೋಜನೆ ಪಟ್ಟುನ ಲೇಸ್ ಡ್ ಮಲ್ಲ ಬಿನ್ನೆರಾದ್ ಬತ್ತ್ ದ್ ಪಾತೆರಿಯೆರ್.

ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ರ್ ಲೇಸ್ ದ ಗುರ್ಕಾರ್ಮೆ ಒಯಿಸ್ ದ್ ಬಿನ್ನೆರೆನ್ ಎದ್ಕೊಂಡೆರ್. ಕಾಂಗ್ರೆಸ್ ಸರ್ಕಾರೊರ್ದು ಬಂಟ ಸಮಾಜ ಅಭಿವೃದ್ಧಿ ನಿಗಮ, 2 ಎ ಸೇರ್ಸಾವುನಂಚಿನ ಬೇಲೆ ಆವೊಡು ಪಂದ್ ಸಭಾಪತಿಲೆಡ ಬಿನ್ನಾಪು ಮಲ್ತೆರ್. ಎಂಆರ್ ಜಿ ಗ್ರೂಪ್ ದ ಚೇರ್ಮನ್ ಪ್ರಕಾಶ್ ಶೆಟ್ಟಿ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್.

ಈ ಪೊರ್ತುಡು ಸಾಧಕೆರಾಯಿನ ಚೇರ್ಕಾಡಿ ಸಚ್ಚಿದಾನಂದ ಶೆಟ್ಟಿ, ಸತೀಶ್ ಶೆಟ್ಟಿ ಉಡುಪಿ, ಡಾ. ನಿರಂಜನ್ ಶೆಟ್ಟಿ ಕೆದೂರು, ದಯಾಮಣಿ ಶೆಟ್ಟಿ ಎಕ್ಕಾರು, ನೀತಾ ರಾಜೇಶ್ ಶೆಟ್ಟಿ ಹಿರಿಯಡ್ಕ, ಅರ್ಪಿತಾ ಶೆಟ್ಟಿ ಕಟಪಾಡಿ, ಪತ್ರಕರ್ತೆರಾಯಿನ ಆರ್. ರಾಮಕೃಷ್ಣ, ಮುಹಮ್ಮದ್ ಆರೀಫ್ ಪಡುಬಿದ್ರೆ, ನಿತಿನ್ ಸಾಲ್ಯಾನ್ ಮೊಕ್ಲೆನ್ ಮಾನಾದಿಗೆ ಮಲ್ತೆರ್.

ಅಂಚೆನೆ ಸಭಾಪತಿ ಯು.ಟಿ.ಖಾದರ್, ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಮಹಾದಾನಿ ಕನ್ಯಾನ ಸದಾಶಿವ ಶೆಟ್ರೆನ್ ಮಾನಾದಿಗೆ ಮಲ್ತೆರ್. ಅಶೋಕ್ ಶೆಟ್ಟಿ ಪಕ್ಕಳ ಮೇರ್ ಯು.ಟಿ.ಖಾದರ್ ರೆನ ಪೊಲಬು ಮಲ್ತ್ ಕೊರಿಯೆರ್. ಮಂಜುಳಾ ಶೆಟ್ಟಿ, ಶರತ್ ಶೆಟ್ಟಿ ಕಿನ್ನಿಗೋಳಿ,ಆರ್. ಜೆ ನಯನಾ ಮಾನಾದಿಗೆದ ಓಲೆ ಓದಿಯೆರ್.

ಸಮಾಜ ಕಲ್ಯಾಣ ಯೋಜನೆಡ್ ಅಂದಾಜಿ 30 ಲಕ್ಷ ರೂ. ಮುಟ್ಟದ ಪನವುದ‌ ಸಕಾಯೊನು ಪ್ರತಿಭಾವಂತ ವಿದ್ಯಾರ್ಥಿಲೆಗ್ ಅಂಚೆನೆ ವೈದ್ಯಕೀಯ ಕರ್ಚಿದ ಅಗತ್ಯ ಇತ್ತಿನಕ್ಲೆಗ್ ಪಟ್ಟಿಯೆರ್.

ಒಕ್ಕೂಟದ ಪೋಷಕೆರಾಯಿನ ಆನಂದ ಶೆಟ್ಟಿ ತೋನ್ಸೆ, ಪ್ರವೀಣ್ ಭೋಜ ಶೆಟ್ಟಿ, ಶಶಿಧರ್ ಶೆಟ್ಟಿ ಬರೋಡ, ರಾಜೇಶ್ ಶೆಟ್ಟಿ ರಾಕ್ಷಿ ಬಿಲ್ಡರ್ಸ್, ರವಿನಾಥ್ ಶೆಟ್ಟಿ ಅಂಕಲೇಶ್ವರ್, ವಕ್ವಾಡಿ ಪ್ರವೀಣ್ ಶೆಟ್ಟಿ ದುಬೈ, ಎಂ. ಕರುಣಾಕರ ಶೆಟ್ಟಿ, ಮನೋರಮಾ ಶೆಟ್ಟಿ, ಚೈತ್ರಾ ಶೆಟ್ಟಿ, ವೇಣುಗೋಪಾಲ ಶೆಟ್ಟಿ, ಅಶೋಕ್ ಶೆಟ್ಟಿ, ರತ್ನಾಕರ ಶೆಟ್ಟಿ, ಆದರ್ಶ ಶೆಟ್ಟಿ, ಅಜಿತ್ ಶೆಟ್ಟಿ, ಒಕ್ಕೂಟದ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ, ಗೌರವ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ, ಕೋಶಾಧಿಕಾರಿ ಉಳ್ತೂರು ಮೋಹನ್ ದಾಸ ಶೆಟ್ಟಿ ಮೊಕುಲು ಮಾತ ಇತ್ತೆರ್. ಪ್ರಿಯಾ ಹರೀಶ್ ಶೆಟ್ಟಿ ಬೊಕ್ಕ ನಿತೇಶ್ ಶೆಟ್ಟಿ ಎಕ್ಕಾರ್ ಲೇಸ್ ಸುಧಾರಿಕೆ ಮಲ್ತೆರ್.