May 26, 2023

Little Flower School Puttur- closing ceremony of ‘ Kalarava’ summer camp held ಲಿಟ್ಲ್ ಫ್ಲವರ್ ಶಾಲೆಡ್ ಕಲರವ ಜೋಕುಲೆನ ಬೇಸಿಗೆ ಶಿಬಿರದ ಸಮಾರೋಪ ಲೇಸ್

ಪುತ್ತೂರ್: ದರ್ಬೆಡ್ ಇಪ್ಪುನ ಮೇಘ ಕಲಾ ಆರ್ಟ್ಸ್ ಮೇಘ ಡಾನ್ಸ್ ಸ್ಟುಡಿಯೋ ಬೊಕ್ಕ ಮುರಳಿ ಬ್ರದರ್ಸ್ ಡಾನ್ಸ್ ಕ್ರೂ ಪುತ್ತೂರ್ ನೆತ್ತ ಒಟ್ಟುಸೇರಿಗೆಡ್ 7 ದಿನತ್ತ ಕಾಲ ದರ್ಬೆ ಲಿಟ್ಲ್ ಫ್ಲವರ್ ಶಾಲೆಡ್ ನಡತಿನ `ಕಲರವ’ ಜೋಕುಲೆನ ಬೇಸಿಗೆ ಶಿಬಿರದ, ಸಮಾರೋಪ ಸಮಾರಂಭ ಲೇಸ್ ಮೇ.20ಕ್ಕ್ ನಡತ್ಂಡ್.

ಈ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತಿನ ನಗರ ಠಾಣೆದ ಎಸ್.ಐ ಸರಸ್ವತಿ ಪಾತೆರ್ದ್, ಸಾಮಾಜಿಕ ಜಾಲತಾಣದ ಸಾಧಕ, ಬಾಧಕದ ಬಗ್ಗೆ ವಿವರಿಸಾಯಿನ ಮೇರ್ ಜೋಕುಲೆಡ ಮೊಬೈಲ್ ಗಲಸುನ ಬಗ್ಗೆ ಪೋಷಕೆರ್ ಮುಂಜಾಗ್ರತೆ ದೆತೊನೊಡು ಪಂದ್ ಪಂಡೆರ್.

ಬೊಕ್ಕ ಲೇಸ್ ದ ಸಂಪನ್ಮೂಲ ವ್ಯಕ್ತಿ ಚೇತನಾ ಹಾಸ್ಪಿಟಲ್ ದ ವೈದ್ಯೆರ್ ಡಾ.ಜೆ.ಸಿ ಅಡಿಗ ಪಾತೆರ್ದ್, ಡಾನ್ಸ್ ಸಂಗೀತರ್ದ್ ಪ್ರತಿಯೊರಿನ ಆರೋಗ್ಯನ್ ಕಾಪಾಡೊಲಿ. ಆರೋಗ್ಯ ರಕ್ಷಣೆನೇ ಪ್ರಾಮುಖ್ಯವಾಯಿನವು. ಸಕ್ಕರೆ ಸೀಕ್ ನ್ ಆಯಿನಾತ್ ನಿಯಂತ್ರಣಡ್ ದೀವೊಲಿ ಪಂದ್ ಪಂಡೆರ್.

ಸಮ್ಮರ್ ಕ್ಯಾಂಪ್‌ದ ಸಂಪನ್ಮೂಲ ವ್ಯಕ್ತಿ ದಿನೇಶ್ ರೈ ಕಡಬ ಪಾತೆರ್ದ್, ಸಮ್ಮರ್ ಕ್ಯಾಂಪ್‌ದ ವಿಶೇಷತೆದ ಬಗ್ಗೆ ತೆರಿಪಾಯೆರ್.

ಎಸ್.ಐ ಸರಸ್ವತಿ ಪಾತೆರ್ದ್, ಸುರುತ್ತ ಸರ್ತಿ ನಮ್ಮ ಶಾಲೆಡ್ ಇಂಚಿನ ಲೇಸ್ ನಡತಿನವು ಅರ್ಥಪೂರ್ಣವಾದ್ ನಡತ್ಂಡ್. ಕ್ಯಾಂಪ್ ಮುಖೇನ ಜೋಕುಲೆಗ್ ಎಡ್ಡೆ ಸಂದೇಶ ದೆತೊನೊಲೆಕ್ಕ ಆಂಡ್ ಪಂದ್ ಪಂಡೆರ್.

ಈ ಪೊರ್ತುಡು ಎಎಸ್‌ಐ ಕೃಷ್ಣಪ್ಪ, ಮುರಳಿ ಟೀಮ್ ಮೇಘ ಕಲಾ ಆರ್ಟ್ಸ್‌ದ ಶಾರದಾ ದಾಮೋದರ್ ಚಾವಡಿಡ್ ಇತ್ತೆರ್. ಅತ್ತಂದೆ ಟೈಮ್ಸ್ ಆಫ್ ಕುಡ್ಲ ಸುದ್ದಿ ನ್ಯೂಸ್ ಬೊಕ್ಕ ಡಿ.ಕೆ ಟಿವಿ ಐ ಟ್ಯೂಬ್ ಚಂದನ್ ಇತ್ತೆರ್. ಈ ಲೇಸ್ ಡ್ ಹರೀಶ್ ಪಿ ಪಡುಮಲೆ ಬೊಕ್ಕ ಸಂದೇಶ್ ರೈ ಕೊಸ್ಟ್ ಲ್ ಹೋಮ್ ಮೊಕುಲು ಶಿಬಿರಡ್ ಪಾಲ್ ಪಡೆಯಿನ ಜೋಕುಲೆಗ್ ಪ್ರಶಸ್ತಿ ಪ್ರಧಾನ ಮಲ್ತೆರ್. ಶಿಕ್ಷಕೆರ್ ಬಾಲಕೃಷ್ಣ ರೈ ಪೊರ್ದಾಳ್ ಲೇಸ್ ದ ಸುಧಾರಿಕೆ ಮಲ್ತೆರ್.

Radio Manipal to air ” Sangeeta Patha ” series program ರೇಡಿಯೊ ಮಣಿಪಾಲಡ್ ‘ಸಂಗೀತ ಪಾಠ’ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ಮೇರ್ ನಡಪಾದ್ ಕೊರ್ಪಿನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 9ನೇ ಸಂಚಿಕೆ ಮೇ26 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ವಿದ್ಯಾರ್ಥಿನಿ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್.‌ ನನ ಮೇ27 ಸನಿಯಾರ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.

Traditional ” Pattanaje” rituals for Sri Kalkuda Daiva ,Kallega , Puttur ಕಲ್ಲೇಗ ಶ್ರೀ ಕಲ್ಕುಡ ದೈವೊಲ್ಯಡ್ ಪತ್ತನಾಜೆ ಅಗೇಲ್

ಪುತ್ತೂರ್: ಕಲ್ಲೇಗ ಕಲ್ಕುಡ ದೈವೊಲ್ಯಡ್ (ಮೇ25) ಕೋಡೆ ಕಲ್ಲುರ್ಟಿ ದೈವಗ್ ಪತ್ತನಾಜೆ ಅಗೇಲ್ ಸೇವೆ ನಡತ್ಂಡ್.

ಬಯ್ಯಗ್ ಕಲ್ಲುರ್ಟಿ ದೈವೊದ ತಾನಡ್ ದೈವೊಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಅಜಿತ್ ಕುಮಾರ್ ಜೈನ್ ಕಲ್ಲೇಗ, ನಗರಸಭೆ ಸದಸ್ಯೆರ್ ಕೆ.ಜೀವಂಧರ್ ಜೈನ್, ಕಲ್ಲೇಗ ರೂರಲ್ ಡೆವೆಲಪ್‌ಮೆಂಟ್ ಟ್ರಸ್ಟ್‌ ದ ಅಧ್ಯಕ್ಷೆರ್ ಸಂಜೀವ ನಾಯಕ್ ಕಲ್ಲೇಗ ಬೊಕ್ಕ ದೈವೊಲ್ಯದ ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ದೈವ ಪಾತ್ರಿ ಜಿನ್ನಪ್ಪ ಗೌಡ ಮೇರ್ ಪ್ರಾರ್ತನೆ ಮಲ್ತೆರ್.

ಅಗೇಲ್ ಸೇವೆ ಮಲ್ತಿನಕ್ಲೆಗ್ ದೈವೊಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಅಜಿತ್ ಕುಮಾರ್ ಜೈನ್ ಗಂಧ ಪ್ರಸಾದ ಕೊರಿಯೆರ್.

ಈ ಪೊರ್ತುಡು ಕಲ್ಲೇಗ ದೈವೊಲ್ಯದ ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ರಾಘವೇಂದ್ರ ಪ್ರಭು, ಮಾದವ ಪಟ್ಲ, ಪ್ರಶಾಂತ್ ಎಸ್.ಎನ್, ರವಿಕಿರಣ್, ಮೀನಾಕ್ಷಿ ಡಿ ಗೌಡ, ಸುನಿತಾ, ಪ್ರಸಾದ್ ಬೀಟಿಗೆ, ಮೀನಾಕ್ಷಿ ಡಿ ಗೌಡ, ಸುನಿತಾ, ಮನೋಹರ್ ಕಲ್ಲೇಗ, ಸತೀಶ ಶೆಟ್ಟಿ ಕಲ್ಲೇಗ, ಬಿ. ಅಣ್ಣಿ ಪೂಜಾರಿ ಪಟ್ಲ, ಚಂದ್ರಶೇಖರ ಕಲ್ಲೇಗ, ಮೋನಪ್ಪ ಮಡಿವಾಳ, ಕಬಕ ಗ್ರಾ.ಪಂ ಅಧ್ಯಕ್ಷೆರ್ ವಿನಯ ಕಲ್ಲೇಗ, ಸಂತೋಷ್ ಶೆಟ್ಟಿ, ಗೋವರ್ಧನ ಕುಮೇರಡ್ಕ, ನಾರಾಯಣ ಮುಗೇರ, ಜಿನ್ನಪ್ಪ ಪೂಜಾರಿ ಮುರ, ಪ್ರಕಾಶ್ ಕಲ್ಲೇಗ, ಪ್ರಾಶಾಂತ್ ಮುರ ಬೊಕ್ಕ ಸಾರರ್ದ್ ಎಚ್ಚ ಭಕ್ತೆರ್ ಇತ್ತೆರ್.

24 MLA’s to take oath as ministers of the state cabinet tomorrow ಎಲ್ಲೆ ಪೊಸ ಸಚಿವೆರೆನ ಪ್ರಮಾಣವಚನ ಲೇಸ್

ಬೆಂಗ್ಲೂರ್: 24 ಜನ ಶಾಸಕೆರ್ ಪೊಸ ಸಚಿವೆರಾದ್ ಎಲ್ಲೆ (ಮೇ27) ಬೊಲ್ಪುಗು ರಾಜಭವನಡ್ ಪ್ರಮಾಣ ವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್.

ಸರ್ಕಾರದ ಬಿನ್ನಾಪುದ ಮಿತ್ತ್ ಪ್ರಮಾಣ ವಚನ (ಪದಗ್ರಹಣ) ಲೇಸ್ ಗ್ ರಾಜ್ಯಪಾಲೆರ್ ಒಪ್ಪಿಗೆ ಕೊರ್ತೆರ್. ಆಯಿನಾತ್ ಬೇಗಡೇ ಕಾಂಗ್ರೆಸ್ ದ 24 ಜನ ಪೊಸ ಸಚಿವೆರೆನ ಪಟ್ಟಿ ಬುಡುಗಡೆ ಆವೆರೆ ಉಂಡು.

27 thousand temporary teachers to be appointed in the state ರಾಜ್ಯಡ್ 27 ಸಾರ ತಾತ್ಕಾಲಿಕ ಶಿಕ್ಷಕೆರೆನ ನೇಮಕ

ರಾಜ್ಯಡ್ ಮೇ29 ರ್ದ್ ಪ್ರಾಥಮಿಕ ಶಾಲೆ ಸುರು ಆವೆರೆ ಉಂಡು.

ಇಂಚಾದ್ ಶಾಲೆಡ್ ಖಾಲಿ ಇಪ್ಪುನ 27ಸಾರ ಶಿಕ್ಷಕೆರೆನ ಬೇಲೆಗ್ ತಾತ್ಕಾಲಿಕ ಶಿಕ್ಷಕೆರೆನ್ ನೇಮಕ ಮಲ್ಪೆರೆ ರಾಜ್ಯ ಶೈಕ್ಷಣಿಕ ಇಲಾಖೆ ದುಂಬಾತ್ಂಡ್. ಆದ್ಯತೆದ ಮಿತ್ತ್ ತಾತ್ಕಾಲಿಕ ಶಿಕ್ಷಕೆರೆನ ನೇಮಕಾತಿಗ್ ಜಿಲ್ಲಾ ಉಪನಿರ್ದೇಶಕೆರ್ ತಾಲೂಕುದಲೆಕ್ಕ ಬೇಲೆದ ಕುಡೊರ ಹಂಚಿಕೆ ಮೇ26 (ಇನಿ) ತ್ತ ಉಲಯಿ ಮಲ್ಪೊಡು ಪಂದ್ ಆದೇಶ ಕೊರ್ತುಂಡು. ತಾತ್ಕಾಲಿಕ ಶಿಕ್ಷಕೆರಾದ್ ಆಯ್ಕೆ ಆಯಿನಕ್ಲೆಗ್ ತಿಂಗೊಲ್ ಗ್ 10 ಸಾರ ರೂ‌. ಸಂಬಳ ತಿಕ್ಕುಂಡು.

Faisal Nagara: Police raid places of illegal sand mining ಫೈಸಲ್‌ ನಗರ: ಕಲ್ವ ತಾದಿಡ್ ಪೊಯ್ಯೆ ದೆತ್ತೊಂದು ಇತ್ತಿನ ಜಾಗೆಗ್ ಪೊಲೀಸ್‌ ರೈಡ್

ಕುಡ್ಲ: ಫೈಸಲ್‌ ಪೇಂಟೆದ ನೇತ್ರಾವತಿ ತುದೆ ಬರಿಟ್ಟ್ ಕಲ್ವ ತಾದಿಡ್ ಪೊಯ್ಯೆ ದೆತ್ತೊಂದು ಇತ್ತಿನ ಬಗ್ಗೆ ತಿಕಿನ ಪೊಲಬುದ ಮಿತ್ತ್ ಕಂಕನಾಡಿ ನಗರ ಠಾಣೆ ಪೊಲೀಸೆರ್ ಜಾಗೆಗ್ ರೈಡ್ ಮಲ್ತ್ ದ್ 10 ಲೋಡ್‌ ಪೊಯ್ಯೆ, ಒಂಜಿ ಜೆಸಿಬಿನ್ ವಶಕ್ಕ್ ಪಡೆತೆರ್.

ಈ ಘಟನೆ ಕೋಡೆ ರಾತ್ರೆ 3 ಗಂಟೆಗ್ ಕಂಕನಾಡಿ ನಗರ ಪೊಲೀಸ್‌ ಠಾಣೆದ ಪೊಲೀಸ್‌ ಉಪನಿರೀಕ್ಷಕಿ ಜ್ಯೋತಿ ಎನ್‌.ಎ. ಮೇರ್ ರೌಂಡ್ಸ್‌ಡ್ ಇಪ್ಪುನಗ ನಡತ್ಂಡ್.

ವಶಕ್ಕ್ ಪಡೆಯಿನ ಸೊತ್ತುದ ಬಿಲೆ ಸುಮಾರ್ 3.70 ಲಕ್ಷ ರೂ. ಪಂದ್ ಅಂದಾಜ್ ಮಲ್ಪೊಲಿ. ಈ ಬಗೆಟ್ ಕಂಕನಾಡಿ ನಗರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.