May 6, 2023

ಕನ್ನಡದ ಒಟ್ಟುಗೆ ತುಳು ಅಪ್ಪೆನ ಬೇಲೆ ಮಲ್ತೊಂದಿತ್ತೆ : ಡಾ.ಹರಿಕೃಷ್ಣ ಪುನರೂರು

ಮುಲ್ಕಿಡ್ ಕನ್ನಡ ಸಾಹಿತ್ಯ ಪರಿಷತ್ ಸಂಸ್ಥಾಪನೆದ ದಿನಾಚರಣೆ

ಮುಲ್ಕಿ : ದಕ್ಷಿಣಕನ್ನಡ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ದ ಮಾರ್ಗ ದರ್ಶನೊಡು ಮುಲ್ಕಿ ತಾಲೂಕು ಘಟಕದ ವತಿರ್ದ್ ಕಸಾಪ ಸ್ಥಾಪನೆ ಆತಿನ ದಿನದ ಆಚರಣೆ ಮೇ 5 ಕ್ಕ್ ಮುಲ್ಕಿದ ಪುನರೂರು ಟೂರಿಸ್ಟ್ ಹೋಮ್ ಚಾವಡಿಡ್ ನಡತ್ಂಡ್.

ಕಸಾಪದ ಮಾಜಿ ರಾಜ್ಯಾಧ್ಯಕ್ಷೆರ್ , ಧರ್ಮದರ್ಶಿ ಹರಿಕೃಷ್ಣ ಪುನರೂರು ಮಲ್ಲ ಬಿನ್ನೆರಾದ್ ಬತ್ತಿತ್ತ್ ದ್ ಪಾತೆರ್ದ್, ತಾನ್ ರಾಜ್ಯಾಧ್ಯಕ್ಷೆ ಆದಿತ್ತ್ಂಡಲ ಕನ್ನಡದ ಕೆಲಸದ ಜಬದಾರಿದ ಒಟ್ಟುಗು ತುಳು ಬಾಸೆದ ಬಗೆಟ್ಟ್ ಬೇಲೆ ಮಲ್ತೊಂದಿತ್ತೆ. ಕನ್ನಡ ಶಾಲೆನ್ ಒರಿಪಾವರೆ ಪ್ರಯತ್ನ ಮಲ್ದೆ ಪಂದ್ ನೆಂಪು ಮಲ್ತೆರ್.

ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತಿನ ಕಸಾಪ ಮುಲ್ಕಿ ತಾಲೂಕು ಘಟಕದ ಅಧ್ಯಕ್ಷೆರ್ ಮಿಥುನ್ ಕೊಡೆತ್ತೂರು ಪಾತೆರ್ದ್, ಮೂಲ್ಕಿ ತಾಲೂಕುಡು ಸದ್ಯೊಡೇ ಸುರೂತ್ತ ಕನ್ನಡ ಸಾಹಿತ್ಯ ಸಮ್ಮೇಳನ ನಡಪರೆ ಉಂಡು. ಅಯಿಕ್ಕ್ ಮಾತೆರ್ನಲ ಸಹಕಾರ ಬೋಡು ಪಂಡೆರ್.

ಈ ಪೊರ್ತುಡು ದಕ ಜಿಲ್ಲಾ ಕಸಾಪದ ಮಾಜಿ ಅಧ್ಯಕ್ಷೆರ್ , ಪತ್ರಕರ್ತೆರ್ ಸರ್ವೋತ್ತಮ ಅಂಚನ್ ಮೆರೆನ್ ಮಾನಾದಿಗೆ ಮಲ್ತೆರ್.

ಹೊಸ ಅಂಗಣ ಪತ್ರಿಕೆದ ಸಂಪಾದಕೆರ್ ಡಾ.ಹರಿಶ್ಚಂದ್ರ ಪಿ.ಸಾಲ್ಯಾನ್, ವೆಂಕಟೇಶ್ ಹೆಬ್ಬಾರ್ ಇತ್ತೆರ್. ಸ್ವರಾಜ್ ಶೆಟ್ಟಿ ಬಿನ್ನೆರೆನ್ ಎದ್ಕೊಂಡೆರ್. ಧನಲಕ್ಷ್ಮಿ ಸೊಲ್ಮೆ ಸಂದಾಯೆರ್. ರಾಜಶೇಖರ್ ಲೇಸ್ ಸುಧಾರಿಕೆ ಮಲ್ತೆರ್.

ಮುಲ್ಕಿಡ್ ಎಲ್ಲೆ ಪ್ರಿಯಾಂಕಾ ಗಾಂಧಿ ಭಾಷಣ: ಮಿಥುನ್ ರೈ

ಕಿನ್ನಿಗೋಳಿ : ದೇಶದ ಸುರೂತ್ತ ಮಹಿಳಾ ಪ್ರಧಾನಿ ದಿ.ಇಂದಿರಾ ಗಾಂಧಿನ ಪ್ರತಿರೂಪದಂಚ ಉಪ್ಪುನ ಎಐಸಿಸಿದ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ಎಲ್ಲೆ ( ಮೇ 7) ಕಾಂಡೆ 12 ಗಂಟೆದ ಪೊರ್ತುಗು ಮುಲ್ಕಿ ಕೃಷಿ ಸಿರಿ ಮೇಳದ ಮೈದಾನಡ್ ಸಾರ್ವಜನಿಕ ಸಭೆಟ್ಟ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಮುಲ್ಕಿ- ಬೆದ್ರ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಮಿಥುನ್ ರೈ ತೆರಿಪಾಯೆರ್.

ಆರ್ ಕಿನ್ನಿಗೋಳಿದ ತನ್ನ ಇಲ್ಲ್ ” ರಮಾ ವಿಹಾರ” ಡ್ ಶನಿಯಾರ ನಡತಿನ ಸುದ್ದಿಗೋಷ್ಠಿಡ್ ಈ ವಿಷಯ ಪಂಡೆರ್.

ಪ್ರಿಯಾಂಕಾ ಗಾಂಧಿ ಕಾಂಗ್ರೆಸ್ ಅಭ್ಯರ್ಥಿಲೆನ ಪರವಾದ್ ಪ್ರಚಾರ ಭಾಷಣ ಮಲ್ಪರೆ ಉಲ್ಲೆರ್. ಕಾಂಡೆ ಕಾರ್ನಾಡ್ ದ ನಗರಸಭೆ ಮೈದಾನಡ್ 11.30 ಗಂಟೆಗ್ ಹೆಲಿಕಾಪ್ಟರ್ ಡ್ ಬತ್ತ್ ದ್ ಅವೆರ್ದ್ ಬೊಕ್ಕ ಕಾರ್ ಡ್ ಕೊಲ್ನಾಡ್ ಕೃಷಿ ಸಿರಿ ಮೈದಾನಗ್ ಪೋದು ಜನಕ್ಲೆನ್ ಉದ್ದೇಶಿಸಾದ್ ಪಾತೆರಿಯರೆ ಉಲ್ಲೆರ್. ಅಂದಾಜಿ 30 ಸಾರ ಜನ ಲೇಸ್ ಡ್ ಪಾಲ್ ಪಡೆಯರೆ ಉಲ್ಲೆರ್. ಅಯಿಟ್ಟ್ ಲ ಪೊಂಜೊವುಲು ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆವೆರ್. ಕೇಂದ್ರ ಬೊಕ್ಕ ರಾಜ್ಯದ ಮಲ್ಲ ಮಲ್ಲ ನಾಯಕೆರ್ ಬರಿಯರೆ ಉಲ್ಲೆರ್ ಪಂದ್ ಆರ್ ಪಂಡೆರ್.

ಮೇ 10 ಕ್ಕ್ ನಡಪುನ ಓಟುದ ಕಲಟ್ಟ್ ಬಿರ್ಸ್ ಜೋರಾತ್ಂಡ್. ಈ ಪೊರ್ತುಡು ಕೈತಲ್ದ ಶಾಸಕೆರ್ ಬೊಕ್ಕ ಬಿಜೆಪಿ ನಾಯಕೆರ್ ಸೋಪುನ ಪೋಡಿಗೆಡ್ ಹತಾಶೆರಾದ್ ಎನ್ನ ಮಿತ್ತ್ ಅಪಪ್ರಚಾರ ಮಲ್ತೊಂದುಲ್ಲೆರ್. ಜನಕ್ಲೆನ್ ದಿಕ್ಕ್ ತಪ್ಪಾವೊಂದುಲ್ಲೆರ್. ಆಂಡ ಯಾನ್ ಅರೆನ ತೇಜೋವಧೆ ಮಲ್ಪರೆ ಪೋತುಜಿ ಪಂಡೆರ್.

ಜನಕುಲು ಇತ್ತೆ ಬದಲಾವಣೆ ಬಯಕೊಂದುಲ್ಲೆರ್. ಯಾನ್ ಬಳ್ಕುಂಜೆ ಬೊಕ್ಕ ಕೈತಲ್ದ ಜನಕ್ಲೆನ ಜಾಗೆ ಒರಿಪಾವರೆ ಪೊರ್ಂಬಾಟ ಮಲ್ತೊಂದುಲ್ಲೆ. ಅಕ್ಲೆನಲ ಆಶೀರ್ವಾದ ಎನ್ನ ಮಿತ್ತ್ ಉಂಡು. ಅಂಚಾದ್ ತಾನ್ ಗೆಂದ್ ದ್ ಬರ್ಪಿನ ಪೂರ್ಣ ವಿಶ್ವಾಸ ಉಂಡು ಪಂದ್ ಮಿಥುನ್ ರೈ ಪಂಡೆರ್.

ದಿ.ಅಮರನಾಥ ಶೆಟ್ರೆನ ಆಶೀರ್ವಾದಲ ಎಂಕ್ ಉಂಡು. ಅಂಚಾದ್ ಎಂಕ್ ಸಮುದಾಯದ ಓಟು ತಿಕ್ಕುಂಡು ಪನ್ಪಿನ ವಿಶ್ವಾಸ ಉಂಡು ಪಂಡೆರ್.
ಪ್ರಶ್ನೆಯೊಂಜೆಕ್ಕ್ ಉತ್ತರ ಕೊರಿನ ಆರ್, ಹಿಂದುತ್ವದ ಮಿತ್ತ್ ಎಂಕ್ ಗೌರವ ಉಂಡು. ಭಜರಂಗ ದಳತ್ತಕುಲು ಎಡ್ಡೆ ಕೆಲಸ ಮಲ್ತ್ಂಡ ಬೆಂಬಲ ಕೊರ್ಪೆ. ಕಾಂಗ್ರೆಸ್ ದ ಪ್ರಣಾಳಿಕೆಡ್ ಭಜರಂಗದಳ ನಿಷೇಧ ಮಲ್ಪುವ ಪಂದ್ ಪನ್ತ್ ಜಿ. ಕಾನೂನು ಉಲ್ಲಂಘನೆ ಮಲ್ತ್ಂಡ ನಿಷೇಧ ಮಲ್ಪುವ ಪಂದ್ ಎಚ್ಚರಿಕೆ ಕೊರ್ತಿನಿ ಮಾತ್ರ ಪಂದ್ ಮಿಥುನ್ ರೈ ಪಂಡೆರ್.

ಸುದ್ದಿಗೋಷ್ಠಿಡ್ ಕೆಪಿಸಿಸಿ ಕೋ ಆರ್ಡಿನೇಟರ್ ವಸಂತ ಬೆರ್ನಾಡ್, ಆದಿ ದ್ರಾವಿಡ ಸಮಾಜದ ಮುಖಂಡೆರ್ ಗಣೇಶ್ ಪ್ರಸಾದ್ ಇತ್ತೆರ್.

ರಾಜ್ಯಡ್ 2 ದಿನ ಬರ್ಸದ ಅಂದಾಜಿ

ರಾಜ್ಯಡ್ ಚಂಡಮಾರುತದ ಪರಿಣಾಮ ಮೇ8 ಬೊಕ್ಕ 9 ಕ್ಕ್ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.

ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಕೊಡಗು, ಮೈಸೂರ್ ಬೊಕ್ಕ ಚಾಮರಾಜನಗರ ಜಿಲ್ಲೆಡ್ 2 ದಿನ ಯೆಲ್ಲೋ ಅಲರ್ಟ್ ಘೋಷಣೆ ಆತ್ಂಡ್. ಉತ್ತರ ಒಳನಾಡ್ ಬೊಕ್ಕ ತುಳುನಾಡ್ ಭಾಗಡ್ ಸಾಧಾರಣ ಬರ್ಸ ಬರ್ಪುಂಡು. ಬಂಗಾಲಕೊಲ್ಲಿಡ್ ಮೇಲ್ಮೈ ಸುಳಿಗಾಳಿ ಮೇ8 ಕ್ಕೆ ಚಂಡಮಾರುತವಾದ್ ಪರಿವರ್ತನೆ ಆಪುಂಡು. ಕರ್ನಾಟಕ, ತಮಿಳುನಾಡ್, ಪುದುಚೇರಿ ಬೊಕ್ಕ ಆಂಧ್ರಡ್ ಬರ್ಸ ಬರ್ಪುಂಡು ಪಂದ್ ಐಎಮ್ ಡಿ ತೆರಿಪಾದ್ಂಡ್.

ಮೇ19: ಮಸ್ಕತ್ ಒಮಾನ್ ಡ್ “ಸ್ವಾಮಿ ಕೊರಗಜ್ಜ” ಬೊಕ್ಕ “ಶ್ರೀ ಶನೀಶ್ವರ ಮಹಾತ್ಮೆ” ತುಳು ಯಕ್ಷಗಾನ ತಾಳಮದ್ದಳೆ

ಬಿರುವ ಜವನೆರ್ ಮಸ್ಕತ್ ಮೊಕುಲು ಮೇ19 ಕ್ಕ್ ಸುಕ್ರಾರ ಮಸ್ಕತ್ ಒಮಾನ್ ಡ್ “ಸ್ವಾಮಿ ಕೊರಗಜ್ಜ” ಬೊಕ್ಕ “ಶ್ರೀ ಶನೀಶ್ವರ ಮಹಾತ್ಮೆ” ತುಳು ಯಕ್ಷಗಾನ ತಾಳಮದ್ದಳೆನ್ ಆಯೋಜನೆ ಮಲ್ದೆರ್.

ದಾರ್ ಸೈಟ್ ಶ್ರೀ ಕೃಷ್ಣ ದೇವಸ್ಥಾನಡ್ ಶ್ರೀ ಶನೀಶ್ವರ ಭಕ್ತ ವೃಂದ ಪಕ್ಷಿಕೆರೆ ಕುಡ್ಲ ಮೊಕ್ಲೆರ್ದ್ ನವರಸ ಇಪ್ಪುನ ರಡ್ಡ್ ತುಳು ಆಟದ ಪ್ರಸಂಗಲು ಒಂಜೇ ದಿನ ಪ್ರದರ್ಶನ ಅವೆರೆ ಉಂಡು ಪಂದ್ ಬಿರುವ ಜವನೆರ್ ಸಂಘಟನೆದ ಮಾಧುರಿ ಸುವರ್ಣ ಸುದ್ದಿಗೋಷ್ಠಿಡ್ ತೆರಿಪಾದೆರ್.

ಮಸ್ಕತ್ ದ ಬಿರುವ ಜವನೆರ್ ಸಂಘಟನೆ ಕರಿನ ಒಂಜಿ ದಶಕರ್ದ್ ಮಸ್ಕತ್ ಡ್ ಸಾಮಾಜಿಕ, ಧಾರ್ಮಿಕ, ಸೇವಾ ಚಟುವಟಿಕೆಲೆನ್ ನಡಪಾವೊಂದು ಬೈದ್ಂಡ್. ನೇರ್ದ್ ದುಂಬು ಈ ಕೂಟನ್ ಲೆತ್ತಿನ ಒಮಾನ್ ರಾಷ್ಟ್ರಡ್ ಸುರುತ್ತ ಪೂಜೆದೊಟ್ಟಿಗೆ “ಶನೀಶ್ವರ ಮಹಾತ್ಮೆ” ಯಕ್ಷಗಾನ ತಾಳಮದ್ದಳೆನ್ ಆಯೋಜ ಮಲ್ತ್ ದಿತ್ತೆರ್. ಒಮಾನ್ ಬಿಲ್ಲವಾಸ್, ಬಂಟ್ಸ್ ಒಮಾನ್, ವಿಶ್ವಕರ್ಮ, ಗೌಡ ಸಾರಸ್ವತ ಬ್ರಾಹ್ಮಣ, ಮೊಗವೀರ ಒಮಾನ್ ಬೊಕ್ಕ ತುಳು ಭಾಷೆ ಸಂಘಟನೆದ ಸಹಕಾರದ ಒಟ್ಟುಸೇರಿಗೆಡ್ ಈ ಲೇಸ್ ನ್ ಆಯೋಜನೆ ಮಲ್ದೆರ್.

ಮೇ19 ಕ್ಕ್ ಬೊಲ್ಪುಗು 8.30 ರ್ದ್ 12.30 ಮುಟ್ಟ ಹರೀಶ್ ಶೆಟ್ಟಿ ಸೂಡ ರಚನೆದ “ಅಜ್ಜ ಕೊರಗಜ್ಜ” ತುಳು ತಾಳಮದ್ದಳೆ, ಬೊಕ್ಕ ಪ್ರಸಾದ ಭೋಜನ ಆದ್ ಮಧ್ಯಾಹ್ನ 2.30 ರ್ದ್ ಬಯ್ಯ 7 ಗಂಟೆ ಮುಟ್ಟ ಚಿನ್ಮಯ ದಾಸ ವಿರಚಿತ “ಶ್ರೀ ಶನೀಶ್ವರ ಮಹಾತ್ಮೆ” ವಿಕ್ರಮಾದಿತ್ಯ ಚರಿತ್ರೆ ಪನ್ಪುನ ಪುಣ್ಯ ಪ್ರಸಂಗ, ಪೂಜೆದೊಟ್ಟಿಗೆ ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು.

ಕರಿನ ಮೂಜಿ ದಶಕರ್ದ್ ಶನಿ ಪೂಜೆದೊಟ್ಟಿಗೆ ತಾಳಮದ್ದಳೆನ್ ಮಸ್ಕತ್, ದುಬೈ, ಅಬುದಾಬಿ, ಬೊಂಬೈ, ಸಾಂಗ್ಲಿ ಸೇರಿನಂಚನೆ ದೇಶ ವಿದೇಶಡ್ ನೂದೆರ್ದ್ ಎಚ್ಚ ಲೇಸ್ ನ್ ಕೊರಿನ ತುಳುನಾಡ್ ದ ಪುಗರ್ತೆದ ಯಕ್ಷಗಾನ ಕೂಟ ಶ್ರೀ ಶನೀಶ್ವರ ಭಕ್ತ ವೃಂದ ಪಕ್ಷಿಕೆರೆ ಇತ್ತೆ ರಡ್ಡನೇ ಸರ್ತಿ ಮಸ್ಕತ್ ಡ್ ಖ್ಯಾತ ಅರ್ಥಧಾರಿಲೆನ ಸಮ್ಮಿಲನದೊಟ್ಟಿಗೆ ಲೇಸ್ ಕೊರಿಯೆರೆ ತಯಾರ್ ಆತ್ಂಡ್.

ತೆಂಕು ತಿಟ್ಟುದ ಪುಗರ್ತೆದ ಭಾಗವತೆರ್ ರವಿಚಂದ್ರ ಕನ್ನಡಿಕಟ್ಟೆ ಮೆರೆನ ಭಾಗವತಿಕೆಡ್ ರಡ್ಡ್ ಪ್ರಸಂಗಲು ನಡಪರೆ ಉಂಡು. ಹಿಮ್ಮೆಳಡ್ ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ, ಭಾಸ್ಕರ ಭಟ್ ಕಟೀಲ್ ಸಹಕಾರ ಮಲ್ಪರೆ ಉಲ್ಲೆರ್. ಪಕ್ಷಿಕೆರೆ ಪದ್ಮನಾಭ ಶೆಟ್ಟಿಗಾರ್ ಮೆರೆನ ಕೂಟದ ಪ್ರಧಾನ ಸಂಚಾಲಕೆರಾದುಲ್ಲೆರ್.

ಅರ್ಥಧಾರಿಯಾದ್ ಕದ್ರಿ ನವನೀತ ಶೆಟ್ಟಿ, ಶ್ರೀಪತಿ ಭಟ್ ಸಸಿಹಿತ್ಲು, ವಿಜಯ ಕುಮಾರ್ ಶೆಟ್ಟಿ ಮೊಯಿಲೊಟ್ಟು, ಸೀತಾರಾಮ್ ಕುಮಾರ್ ಕಟೀಲ್, ಸದಾಶಿವ ಆಳ್ವ ತಲಪಾಡಿ, ಕಾವಳಕಟ್ಟೆ ದಿನೇಶ್ ಶೆಟ್ಟಿ, ದಯಾನಂದ ಜಿ ಕತ್ತಲ್ ಸಾರ್, ಪ್ರಸನ್ನ ಶೆಟ್ಟಿ ಅತ್ತೂರು, ಪುಷ್ಪರಾಜ ಕುಕ್ಕಾಜೆ, ರಾಮಚಂದ್ರ ಮುಕ್ಕ ಪಾಲ್ ಪಡೆಯೆರೆ ಉಲ್ಲೆರ್.

ಉಂದು ತುಳು ಭಾಷೆದ ಸೊಗಡು, ಅಜ್ಜ ಕೊರಗಜ್ಜದ ಸಂದಿ ಪಾರ್ದನದ ತಿರ್ಲ್, ಪುರಾಣ ಪುಣ್ಯ ಕಥಾನಗ್ ಪೊಸ ದೇಖಿ ಕೊರ್ಪಿನ ನವರಸ ಇಪ್ಪುನ ಲೇಸ್ ಆತ್ಂಡ್. ಮಸ್ಕತ್ ಡ್ ಇಪ್ಪುನ ಮಾತ ಸಮುದಾಯದ ಕಲಾ ಆಸಕ್ತೆರ್ ಪಾಲ್ ಪಡೆದ್ ಸಹಕಾರ ಮಲ್ಪೊಡು ಪಂದ್ ಬಿರುವ ಜವನೆರ್ ಮಸ್ಕತ್ ಬಿನ್ನಾಪು ಮಲ್ದೆರ್.

ಈ ಪೊರ್ತುಡು ದಾಮೋದರ್ ಕುಂದರ್ ಮಸ್ಕತ್, ಸುಹಾನ್ ಸುವರ್ಣ ಮಸ್ಕತ್, ಕದ್ರಿ ನವನೀತ ಶೆಟ್ಟಿ, ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ ಸುದ್ದಿಗೋಷ್ಠಿಡ್ ಇತ್ತೆರ್.

ದಾಮೋದರ್ ಕುಂದರ್ 9353141939
ಕದ್ರಿ ನವನೀತ ಶೆಟ್ಟಿ
944813061

ವರದಿ: ಮುಲ್ಕಿ ಕರುಣಾಕರ ಶೆಟ್ಟಿ

ನ್ಯೂಜಿಲೆಂಡ್ ದ ಎದುರು ಗೆಂದಿನ ಪಾಕಿಸ್ತಾನ

ನ್ಯೂಜಿಲೆಂಡ್ ದ ಎದುರು ಪಾಕಿಸ್ತಾನ ನಾಲ್ ನೇ ಒಂಜಿದಿನತ್ತ ಪಂತೊನ್ ಗೆಂದ್ ದ್ಂಡ್.

335 ರನ್ ದ ಗುರಿ ಪಡೆಯಿನ ಕಿವೀಸ್ 235 ರನ್ ಡ್ ಆಲೌಟ್ ಆಂಡ್. ಕಿವೀಸ್ ಬ್ಯಾಟ್ಸ್‌ಮನ್ ಲೆಡ್ ಲಾಥಮ್ 60 ಬೊಕ್ಕ ಚಾಪ್ ಮನ್ 46 ರನ್ ಮಲ್ತೆರ್. ನೆರ್ದ್ ದುಂಬು ಬ್ಯಾಟ್ ಮಲ್ತಿನ ಪಾಕಿಸ್ತಾನ ಬಾಬರ್ ಅಜಮ್ 107, ಅಘಾ ಸಲ್ಮಾನ್ 58 ಬೊಕ್ಕ ಮಸೂರ್ 44 ರನ್ ದೊಟ್ಟಿಗೆ 334/6 ರನ್ ಮಲ್ತೆರ್. 5 ಒಂಜಿದಿನತ್ತ ಪಂತೊಡು ಪಾಕಿಸ್ತಾನ 4-0 ಡ್ ಗೆಂದ್ ದ್ಂಡ್.

ಮೇ20-23: ದಂಡ್ಯೊಟ್ಟು ಬ್ರಹ್ಮಶ್ರೀ ಮುಗೇರ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ, ನೇಮ

ಬೊಲ್ತೇರ್: ಬಡಕೋಡಿ ಗ್ರಾಮದ ದಂಡ್ಯೊಟ್ಟು ಬ್ರಹ್ಮಶ್ರೀ ಮುಗೇರ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನೇಮ ಮೇ20-23 ಮುಟ್ಟ ನಡಪರೆ ಉಂಡು.

ಶ್ರೀ ಕ್ಷೇತ್ರ ಪಡ್ಯಾರಬೆಟ್ಟುದ ಅನುವಂಶಿಕ ಆಡಳಿತ ಮೊಕ್ತೇಸರೆರ್, ಧರ್ಮದರ್ಶಿಲು ಎ.ಜೀವಂಧರ್ ಕುಮಾರ್ ಮೆರೆನ ಮಾರ್ಗದರ್ಶನಡ್, ಸಂಪಿಗೆದಡಿ ಎಸ್ ಗೋಪಾಲಕೃಷ್ಣ ಉಪಾಧ್ಯಾಯ, ಅಸ್ರಣ್ಣೆರ್ ಬಂಗಾಡಿ ಮೆರೆನ ಪೌರೋಹಿತ್ಯಡ್ ಈ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನಲು ನಡಪರೆ ಉಂಡು.

ಮೇ20 ಸನಿಯಾರ ಬೊಲ್ಪುಗು ಶ್ರೀ ಕ್ಷೇತ್ರ ಪಡ್ಯಾರಬೆಟ್ಟದ ದ್ವಾರದ ಕೈತಲ್ ರ್ದ್ ಪುದೆಕಾಣಿಕೆ ಪಿದಡುಂಡು. ರಾತ್ರೆ ವಾಸ್ತು ಪೂಜೆ, ವಾಸ್ತು ಬಲಿ ನಡಪರೆ ಉಂಡು.

ಮೇ21 ಐತಾರ ಬೊಲ್ಪುಗು ಗಣಹೋಮ, 108 ಕಲಶ ಪ್ರತಿಷ್ಠೆ, ಕ್ಷೇತ್ರಗ್ ದೈವೊಲೆನ ಭಂಡಾರ ಬರಿಯೆರೆ, ಬ್ರಹ್ಮಕಲಶಾಭಿಷೇಕ, ಮಹಾಪೂಜೆ, ಮಧ್ಯಾಹ್ನ ಸಾರ್ವಜನಿಕ ಅನ್ನಸಂತರ್ಪಣೆ, ರಾತ್ರೆ ಮನೀಶ್ ಬೊಕ್ಕ ಕೂಟದಕ್ಲೆರ್ದ್ ಕಾಮಿಡಿ ಶೋ, ಧಾರ್ಮಸಭೆ, ಧರ್ಮರಸು ನೆಲ್ಲರಾಯ ದೈವೊದ ನೇಮ, ಶ್ರೀ ಮಹಾಕಾಳಿ ದೈವೊದ ನೇಮ ನಡಪರೆ ಉಂಡು.

ಮೇ22 ಸೋಮಾರ ರಾತ್ರೆ ಕಿಶೋರ್ ಡಿ ಶೆಟ್ಟಿ ಕುಡ್ಲ ನಿರ್ದೇಶನದ ಗರುಡ ಪಂಚೆಮಿ ನಾಟಕ, ಬೊಕ್ಕ ಬ್ರಹ್ಮಶ್ರೀ ಮುಗೇರ, ತನ್ನಿಮಾನಿಗ ದೈವೊಲೆನ ನೇಮ ನಡಪರೆ ಉಂಡು.

ಮೇ23 ಅಂಗಾರೆ ಬೊಲ್ಪುಗು ಅಲೇರ ಪಂಜುರ್ಲಿ ದೈವೊದ ನೇಮ, ಮಧ್ಯಾಹ್ನ ಶ್ರೀ ಕೊರಗಜ್ಜ ದೈವೊದ ನೇಮ, ಬಯ್ಯಗ್ ಕುರುಸಂಬಿಲ ಸೇವೆ, ಭಂಡಾರ ಜಪ್ಪೆರೆ ಉಂಡು. ‌

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಸಮಿತಿ, ಜೀರ್ಣೋದ್ಧಾರ ಸಮಿತಿ, ಬ್ರಹ್ಮಶ್ರೀ ಮುಗೇರ ಸಮಿತಿ, ಬ್ರಹ್ಮಶ್ರೀ ಮುಗೇರ ಮಹಿಳಾ ಸಮಿತಿದ ಅಧ್ಯಕ್ಷೆರ್, ಪದಾಧಿಕಾರಿಲು, ಸರ್ವಸದಸ್ಯೆರ್ ಬೊಕ್ಕ ಬಡಕೋಡಿಗುತ್ತು, ಬರ್ಕೆ ಗುರಿಕಾರೆರ್, ಮುಗೇರ ಗುರಿಕಾರೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಜುಲೈಡ್ ಮೋದಿ ಫ್ರಾನ್ಸ್ ಗ್ ಭೇಟಿ

ಪ್ರಧಾನಿ ಮೋದಿ ಜುಲೈಡ್ ಫ್ರಾನ್ಸ್ ಗ್ ಭೇಟಿ ಕೊರಿಯೆರೆ ಉಲ್ಲೆರ್.

ಜುಲೈ 14 ಕ್ಕ್ ಪ್ಯಾರಿಸ್ ಡ್ ನಡಪರೆ ಇಪ್ಪುನ ಬಾಸ್ಟಿಲ್ ಡೇ ಪರೇಡ್ ಗ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆವೊಡು ಪಂದ್ ಅಧ್ಯಕ್ಷೆರ್ ಮ್ಯಾಕ್ರನ್, ಪ್ರಧಾನಿ ಮೋದಿನ್ ಲೈದೆರ್.

ಫ್ರೆಂಚ್ ಸೇನೆದೊಟ್ಟಿಗೆ ಭಾರತದ ಸೇನೆ ಪರೇಡ್ ಡ್ ಪಾಲ್ ಪಡೆಪುಂಡು ಪಂದ್ ಭಾರತೀಯ ವಿದೇಶಾಂಗ ಸಚಿವಾಲಯ ಪ್ರಕಟ ಮಲ್ದ್ಂಡ್. ಈ ಭೇಟಿ ಭಾರತ ಬೊಕ್ಕ ಫ್ರಾನ್ಸ್ ನಡುತ್ತ ಸಂಬಂಧ ಗಟ್ಟಿ ಮಲ್ಪರೆ ಕಾರಣ ಆಪುಂಡು.

ಇನಿ ಬ್ರಿಟನ್ ದೊರೆ 3ನೇ ಚಾರ್ಲ್ಸ್ ಗ್ ಪಟ್ಟಾಭಿಷೇಕ

1952 ತ್ತ ಬೊಕ್ಕ ಉಂದುವೇ ಸುರುತ್ತ ಸರ್ತಿ ಬ್ರಿಟನ್ ರಾಜೆಯೊರಿ ಸಿಂಹಾಸನ ಏರೊಂದು ಉಲ್ಲೆರ್.

6ನೇ ಜಾರ್ಜ್ ತೀರ್ ಪೋಯಿನ ಬೊಕ್ಕ 70 ವರ್ಷದ ಕಾಲ ರಾಣಿ ಎಲಿಜಬೆತ್ ಪಾರುಪತ್ಯದ ಬೊಕ್ಕ ಇತ್ತೆ ಆರೆನ ಮಗೆ 3ನೇ ಚಾರ್ಲ್ಸ್ ದೊರೆ ಇನಿ ಪಟ್ಟಗ್ ಏರೊಂದು ಉಲ್ಲೆರ್. ಭಾರತದ ಕಾಲಮಾನ ಪ್ರಕಾರ ಮಧ್ಯಾಹ್ನ 3 ಗಂಟೆಗ್ ರಾಜ ಬೊಕ್ಕ ರಾಣಿಯೆರೆನ ಮೆರವಣಿಗೆ ಸುರು ಆಪುಂಡು. ಬಯ್ಯಗ್ 6 ಗಂಟೆರ್ದ್ ಪಟ್ಟಾಭಿಷೇಕ ಲೇಸ್ ಸುರು ಆಪುಂಡು. ಪಟ್ಟಾಭಿಷೇಕದ ಲೆಕ್ಕೊಡು ಬಿಟ್ರನ್ ಸಶಸ್ತ್ರ ಪಡೆಲೆಗ್ ಚಾರ್ಲ್ಸ್ 4 ಲಕ್ಷ ಮೆಡಲ್ ಕೊರಿಯೆರೆ ಉಲ್ಲೆರ್.