June 2023

ಗೃಹಜ್ಯೋತಿ ಯೋಜನೆ: ಇನಿ ನಡುರಾತ್ರೆರ್ದೆ ಸುರು

ಇನಿ ನಡುರಾತ್ರೆರ್ದೆ ಸುರು ಆಪಿನ ಗೃಹಜ್ಯೋತಿ ಯೋಜನೆರ್ದ್ ರಾಜ್ಯದ ಮಾತ ಜನಕುಲೆಗ್ ಜುಲೈಡ್ ಫ್ರೀ ಕರೆಂಟ್ ತಿಕ್ಕುಂಡು.

ಇತ್ತೆನೇ ಈ ಯೋಜನೆದ ನೊಂದಣಿ ಸುರು ಆತ್ಂಡ್. ಸರ್ವರ್ ಸಮಸ್ಯೆ, ಬೇತೆ ಬೇತೆ ತಾಂತ್ರಿಕ ಕಾರಣಲೆರ್ದ್ ರಾಜ್ಯದ ಮಾತ ಜನಕುಲು ನೋಂದಣಿ‌ ಮಲ್ಪೆರೆ ಆತಿಜಿ.

ರಾಜ್ಯಡ್ 2.84 ಕೋಟಿ ಕರೆಂಟ್ ಗಲಸುನಕುಲು ಉಲ್ಲೆರ್. ನೆಟ್ಟ್ 80 ಲಕ್ಷ ಜನತ್ತ ಮಾತ್ರ ನೊಂದಣಿ ಆತ್ಂಡ್. ಇಂಚಾದ್ ಜುಲೈಡ್ ಮಾತೆರೆಗ್ಲಾ ಫ್ರೀ ಕರೆಂಟ್ ತಿಕ್ಕುಂಡು. ಆಂಡ ಆಗಸ್ಟ್ ಡ್ ನೊಂದಣಿ ಮಲ್ತಿನಕ್ಲೆಗ್ ಮಾತ್ರ ಧರ್ಮೊಗು ಕರೆಂಟ್ ಕೊರಿಯೆರೆ ಸರ್ಕಾರ ನಿರ್ಧಾರ ಮಲ್ದ್ಂಡ್.

ಕಾರ್ಲ ಅಗ್ನಿಶಾಮಕ ಠಾಣೆದ ದಪೇದಾರ್ ಅಚ್ಚುತ ಕರ್ಕೇರ ಮೆರೆಗ್ ಬಂಗಾರ್ ದ ಪದಕ

ಒಡಿಪು: 2023ನೇ ಸಾಲ್ ದ ಮಾನ್ಯ ಮುಖ್ಯ ಮಂತ್ರಿಲೆನ ಬಂಗಾರ್ ದ ಪದಕಗ್ ಕಾರ್ಲ ಅಗ್ನಿಶಾಮಕ ಠಾಣೆದ ದಪೇದಾರ್ ಅಚ್ಚುತ ಕರ್ಕೇರ ಮೇರ್ ಪಡೆತೆರ್.

ಅಗ್ನಿಶಾಮಕ ಬೊಕ್ಕ ತುರ್ತು ಸೇವೆ ಇಲಾಖೆದ ಮೇರ್ ಅಗ್ನಿ ಶಮನ, ರಕ್ಷಣಾ ಕಾರ್ಯ ಬೊಕ್ಕ ಬೇತೆ ಬೇತೆ ತೊಂದರೆದ ಪೊರ್ತುಡು ಸೇವೆ ಸಂದಾಯಿನೇರ್ದಾವೆರ ಈ ಪ್ರಶಸ್ತಿಗ್ ಆಯ್ಕೆ ಆತೆರ್.

ಮೂಲತಃ ಮಲ್ಪೆದ ತೊಟ್ಟಂಡ್ 1997 ಕ್ಕ್ ಅಗ್ನಿಶಾಮಕ ಬೊಕ್ಕ ತುರ್ತು ಸೇವೆದ ಇಲಾಖೆಗ್ ಸೇರ್ಪಡೆ ಆದ್ ಮೇರ್ ಸುಮಾರ್ 26 ವರ್ಷೊದಿಂಚ ಸೇವೆ ಸಂದಾವೊಂದು ಉಲ್ಲೆರ್.

ಮೇರ್ ಒಡಿಪು, ಮಲ್ಪೆ ಅಗ್ನಿಶಾಮಕ ಠಾಣೆಡ್ ಬೇಲೆ ಮಲ್ದೆರ್. ಇತ್ತೆ ಕಾರ್ಲ ಅಗ್ನಿಶಾಮಕ ಠಾಣೆಡ್ ಬೇಲೆ ಮಲ್ತೊಂದು ಉಲ್ಲೆರ್.

ಜು.3 : ವಿಧಾನ ಪರಿಷತ್ ಸದಸ್ಯೆರ್ನ ಪ್ರಮಾಣವಚನ

ರಾಜ್ಯ ವಿಧಾನಪರಿಷತ್ ಗ್ ಅವಿರೋಧ ಆಯ್ಕೆ ಆಯಿನ ಕಾಂಗ್ರೆಸ್ ಸದಸ್ಯೆರ್ ಸೋಮಾರ ಪ್ರಮಾಣ ವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್.

ಸಚಿವೆರ್ ಎಸ್ ಎನ್ ಬೋಸರಾಜು, ಮಾಜಿ ಸಿಎಂ ಜಗದೀಶ್ ಶೆಟ್ಟರ್ ಬೊಕ್ಕ ತಿಪ್ಪಣ್ಣಪ್ಪ ಕಮಕನೂರ್‌ ಮೊಕುಲು ವಿಧಾನಸೌಧಡ್ ‌ಪ್ರಮಾಣವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್. ಸಭಾಪತಿ ಪ್ರಮಾಣ ವಚನ ಬೋಧನೆ ಮಲ್ಪೆರೆ ಉಲ್ಲೆರ್.

ಜುಲೈ 2: ಬಿಜೆಪಿದ ಶಾಸಕಾಂಗ ಸಭೆ

ವಿಪಕ್ಷ ನಾಯಕನ ಆಯ್ಕೆಗ್ ಸಂಬಂಧಪಟ್ಟಿನಂಚೆನೆ ಬಿಜೆಪಿ ಜುಲೈ 2 ಕ್ಕ್ ಶಾಸಕಾಂಗ ಪಕ್ಷದ ಸಭೆನ್ ನಡಪಾಯೆರೆ ಉಂಡು ಪಂದ್ ವರದಿ ಆತ್ಂಡ್.

ಈ ಸಭೆಟ್ಟ್ ಪಾಲ್ ಪಡೆಯೆರೆ ಮಾತ ಶಾಸಕೆರೆಗ್ಲಾ ಸೂಚನೆ ಕೊರ್ತುಂಡು. ಈ ಸಭೆಟ್ಟೆ ವಿಪಕ್ಷ ನಾಯಕೆರೆನ ಆಯ್ಕೆಲ ನಡಪರೆ ಉಂಡು. ಪಕ್ಷ ವಿರೋಧಿ ಹೇಳಿಕೆ ಕೊರ್ನ ನಾಯಕೆಯೊರಿ ಈ ರೇಸ್ ರ್ದ್ ಪಿದಯಿ ಬೂರ್ದೆರ್. ಜುಲೈ 3 ಕ್ಕ್ ಅಧಿವೇಶನ ಸುರು ಆಪಿನೇರ್ದಾವೆರ ಬಿಜೆಪಿ ಪ್ರತಿಪಕ್ಷ ನಾಯಕನ್ ಆಯ್ಕೆ ಮಲ್ಪೊಡಾಪುಂಡು.

ಎಸ್ ಎಸ್ ಎಲ್ ಸಿ ಪೂರಕ ಪರೀಕ್ಷೆದ ರಿಸಲ್ಟ್ ಪ್ರಕಟ

ಬೆಂಗ್ಲೂರ್: ಕರ್ನಾಟಕ ಶಾಲಾ ಪರೀಕ್ಷೆ ಬೊಕ್ಕ ಮೌಲ್ಯಮಾಪನ ಮಂಡಳಿ 2023 ತ್ತ ಎಸ್ ಎಸ್ ಎಲ್ ಸಿ ಪೂರಕ ಪರೀಕ್ಷೆದ ರಿಸಲ್ಟ್ ನ್ ಪ್ರಕಟ ಮಲ್ದ್ಂಡ್.

ಕಲ್ಪಾರ್ಥಿಲು ಪೂರಕ ಪರೀಕ್ಷೆದ ರಿಸಲ್ಟ್ ನ್ ಅಧಿಕೃತ ವೆಬ್‌ಸೈಟ್- karresults.nic.in ಡ್ ತೂವೊಲಿ. ಜೂನ್ 12 ರ್ದ್ 19 ಮುಟ್ಟ ನಡತಿನ 10ನೇ ಕ್ಲಾಸ್ ದ ಪೂರಕ ಪರೀಕ್ಷೆಗ್ ಒಟ್ಟು 1.34 ಲಕ್ಷ ಕಲ್ಪಾರ್ಥಿಲು ಹಾಜರಾತೆರ್.

ಈ ವರ್ಷ ಒಟ್ಟು 7 ಲಕ್ಷ ಕಲ್ಪಾರ್ಥಿಲು ಎಸ್‌ಎಸ್‌ಎಲ್‌ಸಿ ಪರೀಕ್ಷೆಡ್ ಉತ್ತೀರ್ಣರಾತೆರ್. ಉತ್ತೀರ್ಣ ಆಯಿನಕ್ಲೆನ ಪ್ರಮಾಣ ಶೇಕಡಾ 83 ಮುಟ್ಟ ಉಂಡು. ಎಸ್‌ಎಸ್‌ಎಲ್‌ಸಿ ಪರೀಕ್ಷೆಡ್ ಪೊಣ್ಣುಲು ಶೇ.87ದಾತ್ ಉತ್ತೀರ್ಣರಾತೆರ್. ಆನುಲು ಶೇ. 80 ದಾತ್ ಉತ್ತೀರ್ಣರಾತೆರ್. ಮೇ 8 ಕ್ಕ್ ಎಸ್‌ಎಸ್‌ಎಲ್‌ಸಿ ಫಲಿತಾಂಶ ಪ್ರಕಟ ಆದಿತ್ತ್ಂಡ್. ಇನಿ ಪೂರಕ ಪರೀಕ್ಷೆದ ರಿಸಲ್ಟ್ ಪ್ರಕಟ ಆತ್ಂಡ್.

ಒಂಟಿ ಸನ್ಯಾಸಿ ಇಲ್ಲಡ್ ಲಕ್ಷರ್ದ್ ಎಚ್ಚ ರೂ. ಕಾಸ್

ಚಿತ್ರದುರ್ಗ ಜಿಲ್ಲೆದ ಹೊಳಲ್ಕೆರೆಡ್ ಸನ್ಯಾಸಿಯಾದ್ ಒಂಟಿ ಜೀವನ ನಡಪಾವೊಂದು ಇತ್ತಿನ ಗಂಗಾಧರ ಶಾಸ್ತ್ರಿ ಕೋಡೆ ತೀರ್ ಪೋಯೆರ್. ಮೆರೆನ ಇಲ್ಲಲ್ ಲಕ್ಷರ್ದ್ ಎಚ್ಚ ಕಾಸ್ ಪತ್ತೆ ಆತ್ಂಡ್.

ಶಾಸ್ತ್ರಿಲೆನ ಪುದರ್ ಡ್ 16 ಎಕರೆ ಜಮೀನ್ ಬೊಕ್ಕ 4 ಎಕರೆ ತಾರಾಯಿದ ತೋಟ ಉಂಡು. ಮೆರೆನ ಅಕೇರಿದ ಕ್ರಿಯೆ ಆಯಿ ಬೊಕ್ಕ ಮೇರ್ ವಾಸ ಇತ್ತಿನ ಇಲ್ಲ್ ನ್ ಕೈತಲ್ ದಕುಲು ಸ್ವಚ್ಛ ಮಲ್ಪುನಗ ಸುಮಾರ್ 30 ಲಕ್ಷ ರೂ. ದಾತ್ ನಗದು ತಿಕ್ ದ್ಂಡ್. ಭಕ್ತೆರ್ ಕೊರ್ನ‌ ಕಾಣಿಕೆಲ ನೆಟ್ಟ್ ಸೇರ್ದ್ಂಡ್.

70 ವರ್ಷ ಪ್ರಾಯ ಆಯಿನ‌ ಶಾಸ್ತ್ರಿ ಎಲ್ಯ ಎಲ್ಯ ಪ್ಲಾಸ್ಟಿಕ್ ಬೊಕ್ಕ ಕುಂಟುದ ಚೀಲಡ್ ಕಾಸ್ ನ್ ಕಟ್ಟ್ ದ್ ದೀದಿತ್ತೆರ್.‌ ಆಂಡ ಮೇರ್ ಅತ್ ಕಾಸ್ ನ್ ದಾಯೆಗ್ ದೀವೊಂದು ಇತ್ತೆರ್ ಪನ್ಪುನವೇ ನಿಗೂಢ ಆತ್ಂಡ್.

ಕಲ್ವ ನೋಟು: ಬ್ಯಾಂಕ್ ಮ್ಯಾನೇಜರ್ ನ ಮಿತ್ತ್ ಕೇಸ್ ದಾಖಲ್ ಮಲ್ತಿನ RBI

ಬೆಂಗ್ಲೂರ್: ಕರ್ನಾಟಕಡ್ ಕಲ್ವ ನೋಟುಲು ದಿನರ್ದ್ ದಿನ ಎಚ್ಚಾವೊಂದು ಉಂಡು. 100 ರೂಪಾಯಿದ 30 ಕಲ್ವ ನೋಟುಲು ಪತ್ತೆ ಆತ್ಂಡ್. ಈ ಕೇಸ್ ಗ್ ಸಂಬಂಧ ಪಟ್ಟಿನಂಚೆನೆ 2 ದಿನಟ್ಟ್ 4 FIR ದಾಖಲ್ ಆತ್ಂಡ್.

ಒಡಿಪು, ಮಣಿಪಾಲ, ಹುಬ್ಬಳ್ಳಿ ಬೊಕ್ಕ ಮಲ್ಲೇಶ್ವರ ಬ್ರಾಂಚ್ ದ ಬ್ಯಾಂಕ್’ ಡ್ ಕಲ್ವ ನೋಟು ಪತ್ತೆ ಆತ್ಂಡ್. RBI ಗ್ ರೆಮಿಟ್ ಮಲ್ಪುನಗ ಪೊರ್ತುಡು ಈ ಕಲ್ವ ನೋಟುಲು ಪತ್ತೆ ಆತ್ಂಡ್.

RBI ಮ್ಯಾನೇಜರ್ ಆನಂದ್ ಮೇರ್ ಬ್ಯಾಂಕ್ ಆಫ್ ಬರೋಡಾ, ಕೆನರಾ, ಯುಬಿಐ ಬ್ಯಾಂಕ್ ಮ್ಯಾನೇಜರ್ ನ ಮಿತ್ತ್ ಬೆಂಗ್ಲೂರ್ ದ ಹಲಸೂರು ಗೇಟ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ದೆರ್. ಬ್ಯಾಂಕ್ ಮ್ಯಾನೇಜರ್’ ನ್ ಆರೋಪಿಯಾದ್ ಮಲ್ದೆರ್. ಈ ಬಗ್ಗೆ ಪೊಲೀಸೆರ್ ಕಲ್ವ ನೋಟುದ ತನಿಖೆ ಮಲ್ತೊಂದು ಉಲ್ಲೆರ್.

ಆನ್ ಲೈನ್ ಬೇಲೆನ್ ನಂಬುದು ಲಕ್ಷರ್ದ್ ಎಚ್ಚ ಪನವು ಕಳೆವೊನ್ನ ಪೊಂಜೋವ್

ಒಡಿಪು: ಆನ್ ಲೈನ್ ಡ್ ಪಾರ್ಟ್ ಟೈಮ್ ಬೇಲೆನ್ ನಂಬುದು ಪೊಂಜೋವ್ ಒರ್ತಿ ಲಕ್ಷರ್ದ್ ಎಚ್ಚ ಪನವು ಕಳೆವೊನ್ನ ಘಟನೆ ನಡತ್ಂಡ್.

ಸಂಧ್ಯಾ ಎಸ್. ಪನ್ಪುನಾರೆ ಕಾಸ್ ಕಳೆವೊನ್ನಾರ್. ಮೇರ್ ಬೇಲೆ ಸಾಮಾಜಿಕ ಜಾಲತಾಣಡ್ ನಡೊಂದು ಇಪ್ಪುನಗ ಫೇಸ್ಬುಕ್ ಡ್ ಅಮೆಝಾನ್ ವರ್ಕ್ ಫ್ರಮ್ ಹೋಮ್ ಪನ್ಪುನ ವೆಬ್ ಸೈಟ್ ಲಿಂಕ್ ತಿಕ್ ದ್ಂಡ್. ಆಯಿಟ್ಟ್ ಮೊಬೈಲ್ ಗ್ ಪೋನ್ ಮಲ್ಪುನಗ ಕೊರ್ನ ಟಾಸ್ಕ್ ನ್ ನಂಬುದು ಗೂಗಲ್ ಪೇ, ಪೇಟಿಎಂ ಮುಖೇನ ಒಟ್ಟು 2,88,991ರೂ. ಕಾಸ್ ನ್ ಕಡಪಾದೆರ್. ಆಂಡ ಆರೋಪಿಲು ಟಾಸ್ಕ್ ಆಯಿನ ಬೊಕ್ಕ ಕಾಸ್ ಕೊರಂದೆ, ತಾನ್ ಕಡಪಾಯಿನ ಕಾಸ್ ನ್ಲಾ ವಾಪಾಸ್ ಕೊರಂದೆ ವಂಚನೆ ಮಲ್ದೆರ್ ಪಂದ್ ಸಂಧ್ಯಾ ಮೇರ್ ಪೇಂಟೆದ ಸೆನ್ ಅಪರಾಧ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ದೆರ್.

ರಕ್ತ ಚಂದನ ಮರತ್ತ ತುಂಡುನ್ ಸಾಗಾವೊಂದು ಇತ್ತಿನ ಮೂಜಿ ಆರೋಪಿಲು ಅರೆಸ್ಟ್

ಮಡಿಕೇರಿ: ತಮಿಳುನಾಡ್ ಡ್ ಮಾರಿಯೆರೆ ಬೆಂಗ್ಲೂರ್ ರ್ದ್ ರಕ್ತ ಚಂದನ ಮರತ್ತ ತುಂಡುನ್ ಕಾರ್ ಡ್ ಕೊನೊಂದು ಇತ್ತಿನ ಮೂಜಿ ಜನನ್ ಕೊಳ್ಳೆಗಾಲ ಪೇಂಟೆದ ಪೊಲೀಸ್ ಅರಣ್ಯ ಸಂಚಾರಿ ದಳ ಅರೆಸ್ಟ್ ಮಲ್ದೆರ್.

ಬೆಂಗ್ಲೂರ್ ದ ವಿಜಯನಗರದ ನಿವಾಸಿ ಅರುಣ್ ಕುಮಾರ್ (26), ಪಂಡಿತರ ಪಾಳ್ಯ ನಿವಾಸಿ ಆನಂದ್ (46) ಬೊಕ್ಕ ತುಮಕೂರುದ ಸೋಮೇಶ್ವರಪುರಂದ ಮುಸ್ತಫ (52) ಅರೆಸ್ಟ್ ಆಯಿನ ಆರೋಪಿಲು.

ಮೊಕ್ಲೆನ ಕಾರ್ ಡ್ ಇತ್ತಿನ 17.04 ಲಕ್ಷ ರೂ. ಬಿಲೆತ್ತ ರಕ್ತ ಚಂದನ ಮರತ್ತ ತುಂಡು, 3 ಮೊಬೈಲ್, 1
ಕಾರ್ ಬೊಕ್ಕ (ನಗದು) ಕಾಸ್ ನ್ ವಶಕ್ಕ್ ದೆತೊಂದೆರ್.

2023 ನೇ ಸಾಲ್ ಡ್ ಸರ್ಕಾರಿ ರಜೆತ್ತ ಪಟ್ಟಿ ಪೊಲಬು

ಸರ್ಕಾರ 2023 ನೇ ವರ್ಷದ ಸಾರ್ವತ್ರಿಕ ರಜೆ ದಿನತ್ತ ಪಟ್ಟಿ ಪ್ರಕಟ ಮಲ್ದ್ಂಡ್.

ಮಾತ 2-4 ನೇ ಸನಿಯಾರ, ಮಾತ ಐತಾರ ಸೇರ್ದ್ ಕೆಲವು ಪರ್ಬಲೊಗ್ ರಜೆ ಉಂಡು.

ಈ ವರ್ಷದ ರಜೆತ್ತ ದಿನ

•ಜನವರಿ 26 ಗುರುವಾರ ಗಣರಾಜ್ಯೋತ್ಸವ
•ಫೆಬ್ರವರಿ 16 ಸನಿಯಾರ ಮಹಾಶಿವರಾತ್ರಿ
•ಮಾರ್ಚ್ 22 ಬುಧಾರ ಯುಗಾದಿ
•ಎಪ್ರಿಲ್ 3 ಸೋಮಾರ ಮಹಾವೀರ ಜಯಂತಿ, 7 ಸುಕ್ರಾರ ಗುಡ್ ಫ್ರೈಡೆ, 14 ಸುಕ್ರಾರ ಅಂಬೇಡ್ಕರ್ ಜಯಂತಿ
•ಮೇ 1 ಸೋಮಾರ ಕಾರ್ಮಿಕೆರೆ ದಿನ
•ಜೂನ್ 29 ಗುರುವಾರ ಬಕ್ರೀದ್
(ಕರಿದ್ಂಡ್)

•ಜುಲೈ 29 ಸನಿಯಾರ ಮೊಹರಂ ಕಡೆತ್ತ ದಿನ
•ಆಗಸ್ಟ್ 15 ಅಂಗಾರೆ ಸ್ವಾತಂತ್ರ್ಯ ದಿನ
•ಸೆಪ್ಟೆಂಬರ್ 18 ಸೋಮಾರ ಚೌತಿ, 28 ಈದ್ ಮಿಲಾದ್
•ಅಕ್ಟೋಬರ್ 2 ಸೋಮಾರ ಗಾಂಧಿ ಜಯಂತಿ, 23 ಸೋಮಾರ ಮಹಾನವಮಿ, ಆಯುಧಪೂಜೆ, 24 ಅಂಗಾರೆ ವಿಜಯದಶಮಿ
•ನವೆಂಬರ್ 1 ಬುಧಾರ ಕನ್ನಡ ರಾಜ್ಯೋತ್ಸವ, 14 ಅಂಗಾರೆ ಬಲಿಪಾಡ್ಯಮಿ, ತುಡರ್ ಪರ್ಬ, 30 ಗುರುವಾರ ಕನಕದಾಸ ಜಯಂತಿ
•ಡಿಸೆಂಬರ್ 25 ಸೋಮಾರ ಕ್ರಿಸ್ ಮಸ್.