May 2, 2023

ಪ್ರಧಾನಿ ಮೋದಿನ್ ಎದ್ಕೊನರೆ ತಯಾರಾತ್ಂಡ್ ಮುಲ್ಕಿ

ಮುಲ್ಕಿ : ಪ್ರಧಾನಿ ನರೇಂದ್ರ ಮೋದಿ ಮೇರ್ ವೋಟುದ ಪ್ರಚಾರ ಬಗೆಟ್ ಎಲ್ಲೆ (ಮೇ 3) ದಕ್ಷಿಣ ಕನ್ನಡ ಜಿಲ್ಲೆಗ್ ಬರೊಂದು ಉಲ್ಲೆರ್.

ಮುಲ್ಕಿ ಕಾರ್ನಾಡ್ ಕೈತಲ್ ದ ಗುಂಡಾಲು ಮೈದಾನಡ್ ಮಲ್ಲ ಸಮಾವೇಶಗ್ ಮಾತ ತಯಾರ್ ಆತ್ಂಡ್.

ನೇರ್ದಾವೆರ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆರ್ದ್ ಲಕ್ಷರ್ದ್ ಎಚ್ಚ ಜನ ಬರಿಯೆರೆ ಅನುಕೂಲ ಆಪುಂಡು. 2.5 ಲಕ್ಷ ಜನ ಸೇರುನ ಅಂದಾಜಿ ಉಂಡು ಪಂದ್ ತೆರಿದ್ ಬೈದ್ಂಡ್.

ಇತ್ತೆ ವೇದಿಕೆ ಬೊಕ್ಕ ಪೆಂಡಾಲ್ ದ ಬೇಲೆ ಮುಗಿದ್ಂಡ್. ಪಾರ್ಕಿಂಗ್‌ ಮಲ್ಪರೆ ಜಾಗೆದ ವ್ಯವಸ್ಥೆಲ ಆತ್ಂಡ್. ಇನಿ ಮಧ್ಯಾಹ್ನ ಮಾತ ಬೇಲೆಲ ಮುಗಿತ್ ದ್ ಇಡೀ ಪ್ರದೇಶನ್ ಭದ್ರತಾ ಸಿಬ್ಬಂದಿಗ್ ಬೂರ್ದು ಕೊರ್ತೆರ್.

ಪ್ರಧಾನಿ ಮೋದಿ ಮೆರೆನ ಸಾರ್ವಜನಿಕ ಸಭೆ ಬೊಲ್ಪುಗು 10 ಗಂಟೆಗ್ ನಿಘಂಟ್ ಆತ್ಂಡ್. ಸಭೆಕ್ಕ್ ಬರ್ಪಿನ ಅಭಿಮಾನಿಲು, ಕಾರ್ಯಕರ್ತೆರ್, ಸಾರ್ವಜನಿಕೆರ್ ಬೊಲ್ಪುಗು 9 ಗಂಟೆದ ಉಲಯಿ ಸಮಾವೇಶದ ಜಾಗೆಗ್ ಬರೊಡು ಪಂದ್ ಬಿಜೆಪಿ ಮುಖಂಡೆರೆಗ್ ಕಾರ್ಯಕರ್ತೆರೆಗ್ ತೆರಿಪಾದೆರ್. ಭದ್ರತೆದ ಕಾರಣರ್ದ್ ಪ್ರಧಾನಿ ನರೇಂದ್ರ ಮೋದಿ ಬರ್ಪಿನ ಪೊರ್ತುಗು ಸಮಾವೇಶದ ಪರಿಸರಡ್ ಸಾರ್ವಜನಿಕೆರೆನ ಸಂಚಾರ ಬಂದ್ ಆಪುಂಡು.

ಮೋದಿ ನೇರವಾದ್ ಕುಡ್ಲಗ್ ಬರ್ಪುನೆರ್ದಾವರ ಅರೆಗ್ ಇಮಾನ ನಿಲ್ದಾಣಡ್ ಉಪಹಾರಗ್ ಉಪ್ಪಿಟ್ಟು ಬಜಿಲ್, ಮೂಡೆ, ನೀರ್‌ದೋಸೆ ಬೊಕ್ಕ ಬೇತೆ ಬೇತೆ ಬಗೆತ್ತ ತೆನಸ್ ತಯಾರ್ ಆಪುಂಡು. ಬೊಕ್ಕ ಬಜಪೆರ್ದ್ ಹೆಲಿಕಾಪ್ಟರ್ ಮುಖೇನ ಸಮಾವೇಶದ ಜಾಗೆಗ್ ಬರಿಯೆರೆ ಉಲ್ಲೆರ್. ಅವೆರ್ದ್ ಬೊಕ್ಕ ಹೆಲಿಕಾಪ್ಟರ್‌ ರ್ದ್ ಜಪ್ಪರೆ ಪಣಂಬೂರುದ ಎನ್‌ಎಂಪಿಎ, ಸುರತ್ಕಲ್‌ದ ಎನ್‌ಐಟಿಕೆ, ಬೊಕ್ಕ ಮುಲ್ಕಿ ಸಮಾವೇಶದ ಜಾಗೆದ ಕೈತಲ್ ಹೆಲಿಪ್ಯಾಡ್‌ಲೆನ್ ನಿರ್ಮಾಣ ಮಲ್ದೆರ್. ಬಸ್ ಬೊಕ್ಕ ಬೇತೆ ಗಾಡಿಲೆನ ಸಂಚಾರಗ್ ಬೇತೆ ತಾದಿ ತೊಜಪಾದೆರ್. ಹಳೆಯಂಗಡಿ ಜಂಕ್ಷನ್ ರ್ದ್ ಬಪ್ಪನಾಡ್ ಚೆಕ್ ಪೋಸ್ಟ್ ಮುಟ್ಟ ಬಿಗಿ ಭದ್ರತಾ ವ್ಯವಸ್ಥೆ ಉಂಡು.

ದ.ಕ. ಜಿಲ್ಲೆದ 8 ಸೀಟ್ ಲ ಕಾಂಗ್ರೆಸ್ ಗೆಂದುಂಡು: ಪದ್ಮರಾಜ್ ಆರ್

ಹಳೆಯಂಗಡಿ : 2023ನೇ ಇಸ್ವಿದ ವಿಧಾನಸಭೆ ವೋಟು ಭಾರಿ ಬದಲಾವಣೆದ ದಿಕ್ಸೂಚಿ ಆದುಂಡು. ಇಡೀ ರಾಜ್ಯೊಡು ಕಾಂಗ್ರೆಸ್ ಗೆಂದುಂಡು ಪಂದ್ ಸಮೀಕ್ಷೆ ಪನೊಂದುಂಡು. ದಕ್ಷಿಣಕನ್ನಡ ಜಿಲ್ಲೆಡ್ ಲ ಭಾರಿ ಬದಲಾವಣೆದ ಗಾಳಿ ಬೀಜೊಂದುಂಡು. ಅಂಚಾದ್ ಜಿಲ್ಕೆದ 8 ಸೀಟ್ ಲ ಕಾಂಗ್ರೆಸ್ ಗೆಂದುಂಡು. ಅಯಿಟ್ಟ್ ಲ ಮುಲ್ಕಿ-ಬೆದ್ರ ಕ್ಷೇತ್ರದ ಅಭ್ಯರ್ಥಿ ಮಿಥುನ್ ರೈ 10,000 ಲೀಡ್ ವೋಟುಡು ಗೆಂದುವೆರ್ ಪಂದ್ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಪ್ರಧಾನ ಕಾರ್ಯದರ್ಶಿ, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್. ಪಂಡೆರ್.

ಆರ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಸಮಿತಿದ ಕಚೇರಿಡ್ ಅಂಗಾರೆ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿಯೆರ್.

2018 ನೇ ಇಸ್ವಿದ ವೋಟುದ ಪೊರ್ತುಡು ಬಿಜೆಪಿಗ್ ಅಭಿವೃದ್ಧಿನ್ ತೊಜಪಾವರೆ ದಾಲಾ ಇಜ್ಜಾಂದಿನೆಕ್ಕ್ ಕಾಂಗ್ರೆಸ್ ದ ಮಿತ್ತ್ ಅಪಪ್ರಚಾರ ಮಲ್ತ್ ದ್ ಭಾವನಾತ್ಮಕವಾದ್ ಜನಕುಲೆನ್ ಮನಸ್ ಬದಲ್ತ್ ದ್ ಅಧಿಕಾರೊಗು ಬೈದ್ಂಡ್. ಅಂಚೆನೆ ಜನಕ್ಲೆಗ್ ಕೊರ್ತಿನ ಭರವಸೆನ್ ಈಡೇರಿಸಾದ್ ಜಿ. ಆಂಡ ಸಿದ್ದರಾಮಯ್ಯ ಮುತಾಲಿಕೆದ ಕಾಂಗ್ರೆಸ್ ಸರ್ಕಾರ ಕೊರ್ತಿನ165 ಭರವಸೆಡ್ 158 ಭರವಸೆನ್ ನಡಪಾದ್ ಕೊರ್ತುಂಡು ಪಂಡೆರ್.

ಕೋವಿಡ್ ಬತ್ತಿ ಬೊಕ್ಕ ಕೇಂದ್ರ ಸರ್ಕಾರ ಕೋಟಿ ಕೋಟಿ ರೂ.ದ ಪ್ಯಾಕೇಜ್ ಘೋಷಣೆ ಮಲ್ದ್ಂಡ್. ಆಂಡ ಏರೆಗ್ ಲ 1000 ರೂ. ತಿಕ್ ದಿನಕುಲು ಇಜ್ಜೆರ್.ಕೊರೊನಾ ಲಾಕ್ ಡೌನ್ ದ ಪೊರ್ತುಡು ಜನಕ್ಲೆಗ್ ಸರಿಯಾಯಿನ ವನಸ್ ತೆನಸ್ ತಿಕ್ ದಿಜಿ. ಆಸ್ಪತ್ರೆದ ಬಿಲ್ ಎಚ್ಚಾವೊಂದಿತ್ತ್ಂಡಲ ಸರ್ಕಾರ ಅವೆನ್ ತಡೆತ್ ಜಿ. ಸರ್ಕಾರೊಡು ಭ್ರಷ್ಟಾಚಾರ ಆತ್ಂಡ್, 40 % ಕಮಿಷನ್ ದೆತೊನುವೆರ್ ಪಂದ್ ಬಿಜೆಪಿ ಪಕ್ಷದ ಗುತ್ತಿಗೆದಾರೆರೇ ಪ್ರಧಾನಿ ಮೋದಿಗ್ ಪತ್ರ ಬರೆತಿನ ಉದಾರ್ಮೆ ಉಂಡು. ಬಿಜೆಪಿ ದ ಲೀಡರ್ ನಕುಲು ಹಿಂದುಳಿದ ವರ್ಗದ ಜವನೆರೆನ್ ಕಾನೂನುಬಾಹಿರ ಕೆಲಸ ಮಲ್ಪಾದ್ ಜೈಲ್ ಗ್ ಕಡಪುಡ್ದೆರ್. ಆಂಡ ಅಕಲ್ನ ಜೋಕುಲೆಗ್ ಎಡ್ಡೆ ಶಿಕ್ಷಣ ಕೊರ್ಪಾದ್, ಎಡ್ಡೆ ಕಡೆಟ್ಟ್ ಕೆಲಸ ಕೊರ್ಪಾದೆರ್. ಉಂದುವೇ ಬಿಜೆಪಿದ ಸಾಧನೆ. ಅಂಚಾದ್ ಮತದಾರೆರ್ ಬಿಜೆಪಿಗ್ ಈ ಸರ್ತಿ ಸರಿಯಾಯಿನ ಪಾಠ ಕಲ್ಪಾವೆರ್ ಪಂದ್ ಆರ್ ಪಂಡೆರ್.

ಮುಲ್ಕಿ ಬೆದ್ರ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಮಿಥುನ್ ರೈ ಅಧಿಕಾರೊಡು ಇತ್ತಿಜೆರ್ಡಲ ಕೆಲಸ ಮಲ್ತ್ ದ್ ಜನಕ್ಲೆನ ಮನಸ್ ಗೆಂದ್ ದೆರ್. ಕ್ಷೇತ್ರದ ಅಭಿವೃದ್ಧಿ ದ ಬಗೆಟ್ಟ್ ಕೆಲವು ಯೋಜನೆಲೆನ್ ಪಾಡ್ದೆರ್. ಕುಡ್ಲದ ವಿಮಾನ ನಿಲ್ದಾಣೊಗು ಕೋಟಿ ಚೆನ್ನಯೆರ್ನ ಪುದರ್ ದೀವೊಡು ಪನ್ಪಿನ ಪೊರ್ಂಬಾಟೊಗು ಆರ್ ಬೆರಿಬಲ ಕೊರ್ತೆರ್.ಬಳ್ಕುಂಜೆ, ಕೊಲ್ಲೂರು ಕೈತಲ್ದ ಜಾಗೆನ್ ಸರ್ಕಾರ ಸ್ವಾಧೀನ ಮಲ್ಪುನಗ ಅವೆನ್ ವಿರೋಧ ಮಲ್ತ್ ದ್ ಪಾಪದಕ್ಲೆನ ಜಾಗೆ ಒರಿಪಾದೆರ್ . ಅಂಚಾದ್ ಅರೆನ್ ಮತದಾರೆರ್ ಈ ಸರ್ತಿ 10 ಸಾರ ಲೀಡ್ ವೋಟುಡು ಗೆಂದಾವೆರ್ ಪನ್ಪಿನ ವಿಶ್ವಾಸ ಉಂಡು ಪಂದ್ ಪದ್ಮರಾಜ್ ಆರ್. ಪಂಡೆರ್.

ಸುದ್ದಿಗೋಷ್ಠಿಡ್ ಪಕ್ಷದ ಯುವ ನಾಯಕೆರಾಯಿನ ಗುರುರಾಜ್ ಪೂಜಾರಿ, ಪ್ರವೀಣ್ ಬೊಳ್ಳೂರು, ಪ್ರಮೋದ್ ಕುಮಾರ್, ಮೋಹನ್ ಕೋಟ್ಯಾನ್, ದೀಪಕ್ ಪೆರ್ಮುದೆ, ಯೋಗೀಶ್ ಕೋಟ್ಯಾನ್, ಜನಾರ್ದನ ಬಂಗೇರ ಮೊಕುಲು ಇತ್ತೆರ್.

ಬಿಲ್ಲವ ಅಭಿವೃದ್ಧಿ ನಿಗಮಗ್ 100 ರೂಪಾಯಿಲ ಕೊರ್ತುಜೆರ್!

ಬಿಲ್ಲವ ಸಮುದಾಯದ ಬೇಡಿಕೆ ಬೊಕ್ಕ ಪ್ರತಿಭಟನೆನ್ ತೂದು ವೋಟುಗು ರಡ್ಡ್ ತಿಂಗೊಲು ಉಪ್ಪುನಗ ಬಿಲ್ಲವ ಅಭಿವೃದ್ಧಿ ನಿಗಮ ಘೋಷಣೆ ಮಲ್ದಿನ ಬಿಜೆಪಿ ಸರ್ಕಾರ, ಬಜೆಟ್ ಡ್ 100 ರೂ. ಲ ಅನುದಾನ ಘೋಷಣೆ ಮಲ್ದಿಜಿ. ನಿಗಮದ ಬೇಲೆ ಮಲ್ಪರೆ ಆಪುಜಿ ಪಂದ್ ಗೊತ್ತಿತ್ತ್ ದ್ ಲ ಸರ್ಕಾರ ಬಿಲ್ಲವ ನಿಗಮ ಘೋಷಣೆ ಮಲ್ತ್ ದ್ ಬಿಲ್ಲವ ಇಡೀ ಸಮುದಾಯನ್ ಏಮಾರಿಸಾದ್ಂಡ್ ಪಂದ್ ಪದ್ಮರಾಜ್ ಆರ್. ಆರೋಪ ಮಲ್ತೆರ್.

Shri Subramanya temple Tokur – Golden ” Velayudha ” offered to the Lord ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವೆರೆಗ್ ಬಂಗಾರ್ದ ವೇಲಾಯುಧ ಸಮರ್ಪಣೆ

ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಪ್ರಧಾನ ದೇವೆರಾಯಿನ ಸುಬ್ರಾಯ ದೇವೆರೆಗ್ ಕೊಡುಗೈ ದಾನಿ, ಅಮೆರಿಕದ ಉದ್ಯಮಿ ಸತೀಶ್ ವಿ. ಅಂಚನ್ ಮೇರ್ ಸುಬ್ರಹ್ಮಣ್ಯ ದೇವೆರೆನ ಆಯುಧ ಆಯಿನ ಬಂಗಾರ್ದ ಲ ವೇಲಾಯುಧನ್ ಮಸ್ತ್ ಭಕ್ತೆರೆನ ಸಮೂಹದೊಟ್ಟಿಗೆ ದೇವೆರೆಗ್ ಸಮರ್ಪಣೆ ಮಲ್ತೆರ್.

ಈ ಪೊರ್ತುಡು ದೇವಲ್ಯದ ಪ್ರಧಾನ ಅರ್ಚಕೆರ್ ಮಧುಸೂದನ್ ಆಚಾರ್, ಅನಂತರಾಮ ಭಟ್ ತೋಕೂರು, ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಸಮಿತಿ ಸದಸ್ಯೆರ್ ವಿಜಯಕುಮಾರ್ ರೈ, ಪುರುಷೋತ್ತಮರಾವ್, ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರ್ ಮೋಹನ್ ದಾಸ್, ಬ್ರಹ್ಮಕಲಶ ಉಚ್ಚಯ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮಣ್ಣ ಬಿ. ದೇವಾಡಿಗ, ಶೇಖರ್ ಪೂಜಾರಿ, ಸ್ವರ್ಣ ವೇಲಾಯುಧ ತಯಾರಕೆರ್ ಶ್ರೀ ದುರ್ಗಾ ಜ್ಯುವೆಲ್ಲರ್ಸ್ ಮಾಲಕೆರ್ ಬಿ. ಸೂರ್ಯಕುಮಾರ್, ದೇವಲ್ಯದ ಸಿಬ್ಬಂದಿ ವರ್ಗ, ಬೊಕ್ಕ ಊರುದ ಪರವೂರುದ ಭಕ್ತೆರ್ ಇತ್ತೆರ್.

Congress releases its manifesto for the Vidhana sabha elections ಕಾಂಗ್ರೆಸ್ ಪ್ರಣಾಳಿಕೆ ಬುಡುಗಡೆ

ಕರ್ನಾಟಕ ವಿಧಾನಸಭೆ ವೋಟುಗು ಇತ್ತೆ ಐನ್ ಗ್ಯಾರಂಟಿನ್ ಘೋಷಣೆ ಮಲ್ತಿನ ಕಾಂಗ್ರೆಸ್ ಪಕ್ಷ ಇನಿ (ಅಂಗಾರೆ) ಪ್ರಣಾಳಿಕೆ ಬುಡುಗಡೆ ಮಲ್ದ್ಂಡ್.

ಬೆಂಗ್ಲೂರ್ ದ ಕೆಪಿಸಿಸಿ ಕಚೇರಿಡ್ ಎಐಸಿಸಿ ಅಧ್ಯಕ್ಷೆರ್ ಮಲ್ಲಿಕಾರ್ಜುನ ಖರ್ಗೆ ಸೇರಿನಂಚೆನೆ ಪ್ರಮುಖ ನಾಯಕೆರ್ ಸಿದ್ದರಾಮಯ್ಯ, ಡಿ ಕೆ ಶಿವಕುಮಾರ್, ರಂದೀಪ್ ಸಿಂಗ್ ಸುರ್ಜೆವಾಲಾ, ಡಾ ಜಿ ಪರಮೇಶ್ವರ್ ಮೊಕ್ಲೆನ ಸಮ್ಮುಖಡ್ ಪ್ರಣಾಳಿಕೆ ಬಿಡುಗಡೆ ಆಂಡ್.

ಮೇ10ಕ್ಕ್ ರಾಜ್ಯಡ್ ವೋಟು ನಡಪರೆ ಉಂಡು. ಸುಮಾರ್ ಜನಪ್ರಿಯ ಯೋಜನೆದೊಟ್ಟಿಗೆ ಪ್ರಣಾಳಿಕೆ ಬುಡುಗಡೆ ಮಲ್ಪೊಂಡು ಪಂದ್ ಪಂತ್ಂಡ್.

ಪ್ರಣಾಳಿಕೆಡ್ ಘೋಷಣೆ ಆಯಿನ ಮಲ್ಲ ಯೋಜನೆಲು:

ಗೃಹಜ್ಯೋತಿ ಯೋಜನೆಡ್ 200 ಯೂನಿಟ್​ ಧರ್ಮೊಗು ಕರೆಂಟ್, ಅನ್ನ ಭಾಗ್ಯ ಯೋಜನೆದಡಿಟ್ಟ್ ಪ್ರತಿ ಒರಿಯಗ್ 10 ಕೆಜಿ ಧರ್ಮೊಗ್ ಅರಿ, ಗೃಹಲಕ್ಷ್ಮೀ ಯೋಜನೆಡ್ ಇಲ್ಲದ ಯಜಮಾನಿಗ್ 2 ಸಾರ ರೂ, ಯುವನಿಧಿ ಯೋಜನೆಡ್ ನಿರುದ್ಯೋಗಿ ಜವನೆರೆಗ್ ಸಕಾಯ, ಪದವೀಧರೆರೆಗ್ 3 ಸಾರ ರೂ., ಡಿಪ್ಲೊಮಾ ಪದವೀಧರೆರೆಗ್ 1,500 ರೂ, ಸರ್ಕಾರಡ್ ಒಂಜಿ ವರ್ಷಡ್ ಖಾಲಿ ಇಪ್ಪುನ ಮಾತ ಬೇಲೆಗ್ ಭರ್ತಿ, ಗುತ್ತಿಗೆ ಆಧಾರಡ್ ಬೇಲೆ ಮಲ್ತೊಂದು ಇಪ್ಪುನ ನೌಕರರೆಗ್ ಖಾಯಂ, ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆದ ನೌಕರೆರೆಗ್ ಖಾಯಂ ಇಂಚ ಸುಮಾರ್ ಲೇಸ್ ಡ್ ಕಾಂಗ್ರೆಸ್ ದ ಪ್ರಣಾಳಿಕೆ ಉಂಡು.

ನನ ಕಾಂಗ್ರೆಸ್ ಅಧಿಕಾರಗ್ ಬತ್ತ್ಂಡ ಬಜರಂಗದಳ, ಪಿಎಫ್ಐ ನಿಷೇಧ ಮಲ್ಪುವ ಪಂದ್ ಪಂತ್ಂಡ್. ಅಂಗನವಾಡಿ ಕಾರ್ಯಕರ್ತೆರೆನ ಸಂಬಳ 11,500 ರ್ದ್ 15 ಸಾರ ರೂ ಎಚ್ಚ, ಆಶಾ ಕಾರ್ಯಕರ್ತೆರೆನ ಗೌರವಧನ 8 ಸಾರ ರೂ. ಎಚ್ಚ, ಬಿಸಿಯೂಟ ನೌಕರೆರೆನ ಮಾಸಿಕ ಗೌರವಧನ 6 ಸಾರ ರೂ. ಎಚ್ಚ, ರಾತ್ರೆ ಪಾಳಿಯ ಪೊಲೀಸ್​ ಸಿಬ್ಬಂದಿಗ್ 5 ಸಾರ ರೂ. ಇಸೇಸ ಭತ್ಯೆ, ಮತ ಪೊಲೀಸೆರೆಗ್ ವರ್ಷಗ್ ಒಂಜಿ ತಿಂಗೊಲ್ದ ಸಂಬಳ ಎಚ್ಚ ಕೊರ್ಪ, ಅತ್ತಂದೆ ಆದ್ಯತೆದ ಮಿತ್ತ್ ಕಾಲ ಕಾಲಗ್ ಮತ ಖಾಲಿ ಬೇಲೆಗ್ ಭರ್ತಿ, ನಾಲ್ ವರ್ಷದೊಲಯಿ ಮತ ಪೊಲೀಸ್ ಸಿಬ್ಬಂದಿಗ್ ವಸತಿ ಸೌಲಭ್ಯ, ಪ್ರತಿ ಜಿಲ್ಲೆಡ್ ಸೈಬರ್ ಪೊಲೀಸ್ ಠಾಣೆದ ನಿರ್ಮಾಣ, ಕನಕಪುರಡ್ ವಿಶ್ವದರ್ಜೆದ ವಿಧಿವಿಜ್ಞಾನ ವಿಶ್ವವಿದ್ಯಾಲಯ ಸ್ಥಾಪನೆ ಮಲ್ಪುನ ಭರವಸೆನ್ ಕಾಂಗ್ರೆಸ್ ಕೊರ್ತುಂಡು.

Congress releases its manifesto for the Vidhana sabha elections

The manifesto of the Congress for the upcoming Vidhana Sabha elections of Karnataka with its five guarantees was released by the party on Tuesday.

Radio Manipal to air ” Hombelaku”- A series of program on Personality development (Vayktitva Vikasana) ರೇಡಿಯೊ ಮಣಿಪಾಲ್ ಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 5ನೇ ಸಂಚಿಕೆ ಮೇ2 ಅಂಗಾರೆ ಬಯ್ಯಗ್ 5.30ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನನ ಮೇ3 ಕ್ಕ್ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.

Russia loses 20,000 soldiers since last December ಡಿಸೆಂಬರ್ ರ್ದ್ 20 ಸಾರ ಸೈನಿಕೆರೆನ್ ಕಳೆವೊನ್ನ ರಷ್ಯಾ

ಉಕ್ರೇನ್ ಮಿತ್ತ್ ದ ಯುದ್ಧಡ್ ಕರಿನ ವರ್ಷ ಡಿಸೆಂಬರ್ ರ್ದ್ ರಷ್ಯಾ 20 ಸಾರರ್ದ್ ಎಚ್ಚ ಸೈನಿಕೆರೆನ್ ಕಳೆವೊಂದುಂಡು ಪಂದ್ ಯುನೈಟೆಡ್ ಸ್ಟೇಟ್ಸ್ ತೆರಿಪಾದ್ಂಡ್.

ಅತ್ತಂದೆ ನೆಟ್ಟ್ ಒಂಜಿ ಲಕ್ಷ ಜನಕ್ಕ್ ಪೆಟ್ಟಾತ್ಂಡ್. ಶ್ವೇತಭವನದ ವಕ್ತಾರೆ ಜಾನ್ ಕಿರ್ಬಿ ಪಾತೆರ್ದ್, ರಷ್ಯಾ ಸೇನೆ ದುರ್ಬಲ ಆತ್ಂಡ್. ಶಸ್ತ್ರಾಸ್ತ್ರ ಬೊಕ್ಕ ಪಡೆಕ್ಲೆನ ಕೊರತೆ ಉಂಡು. ಆಂಡ ಉಕ್ರೇನ್ ಸೇನೆಗ್ ಆಯಿನ ತೊಂದರೆನ್ ಪನಿಯೆರೆ ನಿರಾಕರಿಸಾಯೆರ್.

Russia loses 20,000 soldiers since last December

The Ukraine war has cost Russia more than 20,000 soldiers since last December said United States.More than one lakh persons were injured.

Jhon Kerbi spokesperson for the White House said that the Russian army has weakened and there was shortage of arms and ammunition. But they refused to comment on the damages suffered by Ukraine.

7,500 job vacancies in Soft Selection Commission ಸ್ಟಾಫ್ ಸೆಲೆಕ್ಷನ್ ಕಮಿಷನ್ ಡ್ 7500 ಬೇಲೆ

ಸ್ಟಾಫ್ ಸೆಲೆಕ್ಷನ್ ಕಮಿಷನ್ ಡ್ (ಗ್ರೂಪ್-ಬಿ, ಗ್ರೂಪ್-ಸಿ) ಖಾಲಿ ಇಪ್ಪುನ 7500 ಬೇಲೆಗ್ ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಮೇ3 ಮಧ್ಯಾಹ್ನ 11 ಗಂಟೆದುಲಯಿ ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ.

ಅಭ್ಯರ್ಥಿಲೆನ್ ಕಂಪ್ಯೂಟರ್ ಆಧಾರದ ಪರೀಕ್ಷೆದ ಮಿತ್ತ್ ಆಯ್ಕೆ ಮಲ್ಪರೆ ಆಪುಂಡು. ಅರ್ಜಿ ಪಾಡಿಯೆರೆ 100 ರೂ. ಫೀಸ್ ಅಯಿಟ್ಟ್ ಪೊಂಜೋವ್ ನಕ್ಲೆಗ್, SC, ST, ಅಂಗವಿಕಲೆರೆಗ್, ಅರ್ಜಿದ ಫೀಸ್ ಇಜ್ಜಿ. ಜುಲೈಡ್ ಟೈರ್-1 ಪರೀಕ್ಷೆ ನಡಪರೆ ಉಂಡು. ಎಚ್ಚದ ಪೊಲಬುಗಾದ್ ವೆಬ್‌ಸೈಟ್: ssc.nic.in ಗ್ ಭೇಟಿ ಕೊರೊಲಿ.

7,500 job vacancies in Soft Selection Commission

Online Applications are invited from eligible and interested candidates for 7,500 vacancies ( group B, group C ) in Soft Selection Commission .
For more details log on to:
ssc.nic.in

Srinivasa Kalyana festival at Shri Lakshmi Venkatramana temple , Ubaar ಉಬಾರ್ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಲ್ಯಡ್ ಶ್ರೀನಿವಾಸ ಕಲ್ಯಾಣ ಉಚ್ಚಯ

ಉಬಾರ್ ದ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಲ್ಯಡ್ ಶ್ರೀನಿವಾಸ ಕಲ್ಯಾಣ ಉಚ್ಚಯ ಗೌಜಿಡ್ ನಡತ್ಂಡ್.

ಈ ಲೇಸ್ ದ ಪೂಜಾ ವಿಧಿ ವಿಧಾನಲೆನ್ ಕೆ.ನರಸಿಂಹ ಭಟ್, ರವೀಂದ್ರ ಭಟ್, ಸುಬ್ರಹ್ಮಣ್ಯ ಭಟ್, ತ್ರಿವಿಕ್ರಮ ಭಟ್ ಮಲ್ತ್ ಕೊರಿಯೆರ್.

ಈ ಪೊರ್ತುಡು ದೇವಲ್ಯದ ಆಡಳಿತ ಮೊಕ್ತೇಸೆರ್ ಬಿ.ಗಣೇಶ ಶೆಣೈ, ಡಾ.ಎಂ ರತ್ನಾಕರ ಶೆಣೈ, ಕೆ ದೇವಿದಾಸ್ ಭಟ್, ಕೆ ಅನಂತರಾಮ್ ಭಟ್, ಯು ಕೃಷ್ಣ ಭಟ್, ಶ್ರೀ ದೇವಲ್ಯದ ಭಜನಾ ಮಂಡಳಿದ ಅಧ್ಯಕ್ಷೆರ್ ಹರೀಶ ಪೈ, ಗೋಕುಲ್ ದಾಸ್ ಭಟ್, ಪ್ರಮುಖೆರ್ ವಿವೇಕಾನಂದ ಪ್ರಭು, ಕೆ.ಗಣೇಶ ಭಟ್, ರಾಜೇಶ್ ಪೈ, ಪ್ರದೀಪ್ ನಾಯಕ್, ಕೆ.ಗಣೇಶ ನಾಯಕ್ ಇತ್ತೆರ್.

Hearing today at Gujarat high guys on Rahul Gandhi’s appeal ಇನಿ ರಾಹುಲ್ ಗಾಂಧಿ ಅರ್ಜಿದ ವಿಚಾರಣೆ

ಮೋದಿ ಉಪನಾಮ ಮಾನನಷ್ಟ ಕೇಸ್ ಗ್ ಸಂಬಂಧ ಪಟ್ಟಿನಂಚೆನೆ ರಾಹುಲ್ ಗಾಂಧಿ ಸಂದಾಯಿನ ಅರ್ಜಿನ್ ಗುಜರಾತ್ ಹೈಕೋರ್ಟ್ ಇನಿ ವಿಚಾರಣೆ ಮಲ್ಪರೆ ಉಂಡು.

ಶಿಕ್ಷೆಗ್ ತಡೆ ಕೊರ್ಪಿಲೆಕ್ಕ ರಾಹುಲ್ ಹೈಕೋರ್ಟ್ ಗ್ ಅರ್ಜಿ ಸಂದಾದಿತ್ತೆರ್. ನೆರ್ದ್ ದುಂಬು ಎಪ್ರಿಲ್ ‌30 ಕ್ಕ್ ನಡತಿನ ವಿಚಾರಣೆದ ಪೊರ್ತುಡು ರಾಹುಲ್ ಗಾಂಧಿ ಪರ ವಕೀಲೆರ್ ಅಭಿಷೇಕ್ ಮನು ಸಿಂಘ್ವಿ ವಾದ ಮಲ್ತಿತ್ತೆರ್. ಇಂಚಿನ ಕೇಸ್ ರಾಜಕೀಯ ದ್ವೇಷಗ್ ಪ್ರೇರಣೆ ಆತ್ಂಡ್ ಪಂದ್ ಕೋರ್ಟುದ ಎದುರು ವಾದಿಸಾದಿತ್ತೆರ್.

Hearing today at Gujarat high guys on Rahul Gandhi’s appeal

The appeal against the defamation case with regard to Modi Surname by Rahul Gandhi will be heard at the Gujrat High court today

Mijar Tulunada Porlu Charitable trust (R)-Help rendered to a downtrodden family ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ವತಿರ್ದ್ ಬಡಪತ್ತ್ ಕುಟುಂಬಗ್ ಪನವುದ ಸಕಾಯ

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ವತಿರ್ದ್ ರಡ್ಡ್ ಬಡಪತ್ತ್ ಕುಟುಂಬಗ್ 15 ಸಾರ ರೂ.ದ ಪನವುದ ಸಕಾಯನ್ ಮಲ್ತೆರ್.

ಕೇರಳದ ಕಾಸ್ರೋಡು ತಾಲೂಕ್ ದ ಬಂದ್ರಡ್ಕ ಬೇಳ ನಿವಾಸಿ ಪದ್ಮನಾಭ ಮೇರ್ ನೆತ್ತೆರ್ ದ ಕ್ಯಾನ್ಸರ್ ಸೀಕ್ ರ್ದ್ ನರೆಲೊಂದು ಇತ್ತೆರ್. ಬೊಕ್ಕ ಮೇರ್ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್. ಮೆರೆನ ಬೊಡೆದಿನ ಸಾಲ ಬೊಕ್ಕ ಜೋಕುಲೆನ ನನದ ವಿದ್ಯಾಭ್ಯಾಸಗ್ ಕಾಸ್ ಒಟ್ಟು ಮಲ್ಪರೆ ಆವಂದೆ ಈ ಕೂಟಗ್ ಬಿನ್ನಾಪು ಮಲ್ದೆರ್. ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ ತನ್ನ ವತಿರ್ದ್ 15 ಸಾರ ರೂ. ದ ಚೆಕ್ಕ್ ನ್ ಪದ್ಮನಾಭ ಮೆರೆನ ಇಲ್ಲಡ್ ಕೊರಿಯೆರ್.

ಈ ಪೊರ್ತುಡು ಈ ಕೂಟದ ಸದಸ್ಯೆರ್ ದೀಕ್ಷಿತ್ ಬಾಡೂರು, ಸತೀಶ್ ಬಾಡೂರು, ಅಭಿತ್ ಬಾಡೂರು ಇತ್ತೆರ್.

ನವಜೀವನ ಕಾಲನಿ ನೆಟ್ಟಣ ಗ್ರಾಮದ ನಿವಾಸಿ ಆಯಿನ ದೇವಸಾಹಯಂ ಮೇರ್ ಕರಿನ ಒಂಜಿ ತಿಂಗೊಲ್ದ ಪಿರವು ರೈಲ್ ಆಕ್ಸಿಡೆಂಟ್ ಡ್ ಒಂಜಿ ಕಾರ್ ಕಳೆವೊಂದು ಕೆ.ಎಂ.ಸಿ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದಿತ್ತೆರ್. ಮೆರೆಗ್ ಇಡೇ ಮುಟ್ಟ ಸುಮಾರ್ 3 ಲಕ್ಷ ಮುಟ್ಟ ಕರ್ಚಿ ಆತ್ಂಡ್. ಕೂಲಿ ಬೇಲೆ ಮಲ್ತ್ ದ್ ಜೀವನ ಸಾಗವೊಂದು ಇತ್ತಿನ ಮೆರೆನ ನನದ ಎಚ್ಚದ ಚಿಕಿತ್ಸೆಗ್ ಹಣ ಒಟ್ಟು ಮಲ್ಪರೆ ಆವಂದೆ ಈ ಕೂಟಗ್ ಬಿನ್ನಾಪು ಮಲ್ದೆರ್ ಮೆರೆನ ಬಿನ್ನಾಪು ಗ್ ಸ್ವಂದಿಸಾಯಿನ ಈ ಕೂಟ ತನ್ನ ವತಿರ್ದ್ 15 ಸಾರ ರೂ. ದ ಚೆಕ್ಕ್ ನ್ ನವಜೀವನ ಕಾಲನಿ ನೆಟ್ಟಣ ಕಡಬಡ್ ಕೊರಿಯೆರ್.

ಈ ಪೊರ್ತುಡು ಕೂಟದ ಸದಸ್ಯೆರ್ ಬಾಲ ತಿರುಪತಿ, ಒಬಲೇಶ್ ರೆಡ್ಡಿ, ರಮೇಶ್, ವಿಲ್ಸನ್ ಇತ್ತೆರ್.