May 16, 2023

ದುಬೈಡ್ 33 ಕೋಟಿ ರೂ. ಲಾಟರಿ ಗೆಂದಿನ ಭಾರತದ ಜವನೆ

ಜೀವನೋಪಾಯಗಾದ್ ದುಬೈಗ್ ಪೋದಿತ್ತಿನ ಭಾರತದ ಜವನಗ್ ಅದೃಷ್ಟ ಒಲಿದ್ಂಡ್. ತೆಲಂಗಾಣದ ಕರೀಂನಗರ ಕೈತಲ್ ದ ಜಗ್ತಿಯಾಲ್ ಮೂಲದ ಅಜಯ್ ಒಕುಲಾ ಪನ್ಪುನಾರೆಗ್ ದುಬೈ ಲಾಟ್ರಿಡ್ 33 ಕೋಟಿ ರೂ. ಇನಾಮು ಬೈದ್ಂಡ್.

ನಾಲ್ ವರ್ಷದ ಪಿರವು ಅಜಯ್ ಬೇಲೆಗ್ ಪಂದ್ ಯುಎಇಗ್ ಪೋದು ಅಲ್ಪ ಬಂಗಾರ್ ದಂಗಡಿಡ್ ಡ್ರೈವರಾದ್ ಬೇಲೆ ಮಲ್ತೊಂದು ಇತ್ತೆರ್. ಮುಲ್ಪ ಮೆರೆಗ್ ದೇಶದ ಬಿಲೆತ್ತ ಪ್ರಕಾರ ತಿಂಗೊಲ್ ಗ್ 3,200 ದಿರ್ಹಮ್ ಆದಾಯ ಇತ್ಂಡ್. ಇಂಚಿಪ್ಪ, ಮೇರ್ 15 ಮಿಲಿಯನ್ ದಿರ್ಹಮ್ ಬಿಲೆತ್ತ ರಡ್ಡ್ ದುಬೈ ಲಾಟರಿ ಇನಾಮುದ ಟಿಕೆಟ್ ನ್ ದೆತ್ತೊಂದೆರ್. ಮೇರ್ ದೆತ್ತೊನ್ನ ಲಾಟರಿ ಟಿಕೆಟ್ ಇನಾಮುಡ್ ಗೆಂದ್ ದೆರ್. ಅತ್ತಂದೆ ಒಂಜೇ ದಿನಟ್ 33 ಕೋಟಿ ರೂ.ದ ಒಡೆಯ ಆತೆರ್.

ಅಂಚೆನೆ ಇನಾಮುದ ಕಾಸ್ ರ್ದ್ ಸುರುಕು ಎನ್ನ ಹಳ್ಳಿಡ್ ಇಲ್ಲ್ ಕಟ್ಟುವೆ. ಬೊಕ್ಕ ಹಳ್ಳಿಡೇ ನಿರ್ಮಾಣ ಕಂಪನಿನ್ ಸ್ಥಾಪನೆ ಮಲ್ಪುವೆ. ಬೊಕ್ಕ ಈ ಕಾಸ್ ದ ಒಂಜಿ ಭಾಗಡ್ ತನ್ನ ಗ್ರಾಮ, ಕೈತಲ್ ದ ಗ್ರಾಮಲೆನ ಅಭಿವೃದ್ಧಿಗ್ ಕೊರ್ಪೆ ಪಂದ್ ಪಂಡೆರ್. ಅಂಚೆನೆ ದುಬೈರ್ದ್ ಪಿದಾಡುನ ದುಂಬು ಎನ್ನ ಕುಟುಂಬನ್ ದುಬೈಗ್ ಲೆತ್ತ್ ದ್ ತಿರ್ಗವೆ ಪಂದ್ ಪಂಡೆರ್.

ಕುಡ್ಲಡ್ ಬಸ್ ಕ್ಕ್ ಬಸ್ ಗುದ್ದುದು ರಡ್ಡ್ ಜನಕ್ಕ್ ಪೆಟ್ಟ್

ಕುಡ್ಲ: ಮೂಜಿ ಸಿಟಿ ಬಸ್ಸ್ ಲು ಗುದ್ದೊಂದು ರಡ್ಡ್ ಜನಕ್ಕ್ ಪೆಟ್ಟಾಯಿನ ಘಟನೆ ಕುಡ್ಲದ ಹಂಪನಕಟ್ಟೆಡ್ ಸೋಮಾರ ಮಧ್ಯಾಹ್ನ ನಡತ್ಂಡ್.

ಸ್ಟೇಟ್‌ಬ್ಯಾಂಕ್‌ ರ್ದ್ ಕುಂಜತ್ತಬೈಲ್ ದಂಚಿ ಪೋವೊಂದು ಇತ್ತಿನ 13 ನಂಬರ್ ದ ಬಸ್ಸೊಂಜಿ ತಲಪಾಡಿದಂಚಿ ಪೋವೊಂದು ಇತ್ತಿನ 42 ನಂಬರ್ ದ ಬಸ್ಸ್ ತ್ತ ಪಿರವುಗ್ ಗುದ್ದುಂಡು.

ಈ ಬಸ್ ಗುದ್ದಿನ ಬಿರ್ಸ್ ಗ್ ತಲಪಾಡಿಗ್ ಪೋವೊಂದು ಇತ್ತಿನ ಬಸ್, ಆಯಿತ್ತ ಎದುರುಡಿತ್ತಿನ‌ ನೀರ್ ಮಾರ್ಗಗ್ ಪೋವೊಂದಿತ್ತಿನ 21 ನಂಬರ್ ದ ಬಸ್ಸ್ ತ್ತ ಪಿರವುಗ್ ಗುದ್ದುದುಂಡು.

ಈ ಘಟನೆಡ್ ಮೂಜಿ ಬಸ್ಸ್ ಲ ನಕ್ಕೆ ಆತ್ಂಡ್. ಅತ್ತಂದೆ ಕುಂಜತ್ತಬೈಲ್ ಬಸ್ಸ್ ತ್ತ ಡ್ರೈವರ್ ಬೊಕ್ಕ ಈ ಬಸ್ಸ್ ಟ್ ಪ್ರಯಾಣ ಮಲ್ತೊಂದು ಇತ್ತಿನ ಪೊಂಜೋವ್ ಗ್ ಪೆಟ್ಟಾತ್ಂಡ್.

ಊರುಡು ತಯಾರಾಪಿನ ಸೊತ್ತುಲೆಗ್ ಬೆರಿಬಲ ಕೊರ್ರೆ ರೈಲ್ವೆ ಇಲಾಖೆ ಯೋಜನೆ

ಡೆಲ್ಲಿ: ಭಾರತೀಯ ರೈಲ್ವೇ ಸಚಿವಾಲಯ ಇಂಚಿಪ್ಪ ಊರುಡು ತಯಾರಾಪಿನ ಸೊತ್ತುಲೆಗ್ ಉತ್ತೇಜನ ಮಲ್ಪೆರೆ ‘ವನ್ ಸ್ಟಾಪ್ ವನ್ ಪ್ರಾಡಕ್ಟ್ ’ (OSOP) ಯೋಜನೆ ಸುರು ಮಲ್ದ್ಂಡ್.

ಎಲ್ಯ ಮಟ್ಟ್ ದ ಉದ್ಯಮಿಲು ಬೊಕ್ಕ ಕುಶಲಕರ್ಮಿಲೆಗ್ ಆದಾಯ ಎಚ್ಚ ಮಲ್ಪರೆ ಅವಕಾಶ ಮಲ್ತ್ ಕೊರ್ಪಿನ ಮುಖೇನ ದೇಶ ಇಡೀ ರೈಲ್ವೆ ನಿಲ್ದಾಣಲೆಡ್ ಊರ್ದ ಸೊತ್ತುಲೆನ್ ಮಾರಿಯೆರೆ ಯೋಜನೆ ಪಾಡ್ದ್ಂಡ್.

2022ನೇ ಇಸ್ವಿ ಮಾರ್ಚ್ 25ಕ್ಕ್ ಪ್ರಾಯೋಗಿಕವಾದ್ ಸುರು ಆತಿನ ಈ ಯೋಜನೆ 728 ಸ್ಟೇಷನ್‌ ಲು, 785 OSOP ಔಟ್‌ಲೆಟ್‌ ದೊಟ್ಟಿಗೆ 21 ರಾಜ್ಯ ಬೊಕ್ಕ 3 ಕೇಂದ್ರಾಡಳಿತ ಪ್ರದೇಶಡ್ ಉಂಡು. OSOP ಸ್ಟಾಲ್‌ ನ್ ಏಕರೂಪತೆಗಾದ್ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಡಿಸೈನ್ ವಿನ್ಯಾಸ ಮಲ್ದ್ಂಡ್. ಮಾರ್ಚ್ 2022 ರ್ದ್ ಮೇ 2023 ಮುಟ್ಟ ನೇರ ಫಲಾನುಭವಿಲೆನ ಸಂಚಿತ ಸಂಖ್ಯೆ 25,109. ಮುಟ್ಟ ಉಂಡು.

ಈ ಮಳಿಗೆಡ್ ಮಾರುನ ಉತ್ಪನ್ನಲೆಡ್ ಕರಕುಶಲ ಸೊತ್ತುಲು, ಜವುಳಿ, ಸಾಂಪ್ರದಾಯಿಕ ಡ್ರೆಸ್, ಕೈತಲ್ ದ ಕೃಷಿ ಉತ್ಪನ್ನಲು ಬೊಕ್ಕ ಸಂಸ್ಕರಣೆ ಮಲ್ತಿನ ಅತ್ತಂಡ ಅರೆ-ಸಂಸ್ಕರಣೆ ಮಲ್ತಿನ ತೆನಸುಲು ಉಂಡು.

ಮಲ್ಪೆ ಬೀಚ್: ಪ್ರವಾಸಿ ಬೋಟ್ ಸವಾರಿ ಬಂದ್

ಮಲ್ಪೆ ಬಂದರು ವ್ಯಾಪ್ತಿದ ಮಲ್ಪೆ ಬೀಚ್‌ ಬೊಕ್ಕ ಸೀ ವಾಕ್‌ ಪ್ರದೇಶಡ್ ಮರಿಯಾಲದ ನಿಲೆಟ್ಟ್ ಜಾಗ್ ರ್ತೆದ ಕ್ರಮವಾದ್ ಪ್ರವಾಸಿ ಬೋಟ್‌ ಚಟುವಟಿಕೆ ಬೊಕ್ಕ ಸೈಂಟ್‌ ಮೇರೀಸ್‌ ದ್ವೀಪಗ್ ಪೋಪಿನ ಪ್ರವಾಸಿ ಬೋಟ್‌ ದ ಸವಾರಿನ್ ಹಾರ್ಬರ್‌ ಕ್ರಾಫ್ಟ್ ನಿಯಮದ ಪ್ರಕಾರ ಮೇ16ರ್ದ್ ಸೆ.15 ಮುಟ್ಟ ಉಂತಾದ್ಂಡ್.

ಅತ್ತಂದೆ ಜಲಸಾಹಸ ಕ್ರೀಡಾ ಚಟುವಟಿಕೆನ್ ನಿಷೇಧ ಮಲ್ದ್ಂಡ್ ಪಂದ್ ತೆರಿದ್ ಬೈದ್ಂಡ್. ನೆಕ್ಕ್ ಸಾರ್ವಜನಿಕೆರ್ ಬೊಕ್ಕ ಪ್ರವಾಸಿಗೆರ್ ಸಹಕಾರ ಮಲ್ಪೊಡು ಪಂದ್ ನಗರಸಭೆ ಪೌರಾಯುಕ್ತೆರ್ ಬೊಕ್ಕ ಮಲ್ಪೆ ಅಭಿವೃದ್ಧಿ ಸಮಿತಿ ಕಾರ್ಯದರ್ಶಿ ಪ್ರಕಟಣೆಡ್ ತೆರಿಪಾದೆರ್.

ಚುನಾವಣೆ ರಾಜಕೀಯಗ್ ನಿವೃತ್ತಿ ಘೋಷಣೆ ಮಲ್ತಿನ ಮಾಜಿ ಸಚಿವೆರ್ ರಮಾನಾಥ ರೈ

ಕುಡ್ಲ: ಮಾಜಿ ಸಚಿವೆರ್ ರಮಾನಾಥ ರೈ ಚುನಾವಣೆ ರಾಜಕೀಯಗ್ ನಿವೃತ್ತಿ ಘೋಷಣೆ ಮಲ್ದೆರ್.

ಕುಡ್ಲಡ್ ಸುದ್ದಿಗೋಷ್ಠಿಡ್ ಪಾತೆರ್ದ್ ಮೇರ್, ಪ್ರಾಯದ ಕಾರಣರ್ದ್ ಎನ್ನ ಸ್ಪರ್ಧೆದ ಬಗ್ಗೆ ಪಕ್ಷದಕುಲೇ ಕೊಂಕು ಪಾತೆರ್ನೆದಾವೆರ ನನ ವೋಟುಗು ಉಂತುಜಿ ಪಂದ್ ನಿರ್ಧಾರ ಮಲ್ದೆ. ಆಂಡ ಕಾಂಗ್ರೆಸ್ ಗ್ ಶಕ್ತಿ ಕೊರ್ಪಿನ ಬೇಲೆಡ್ ಏಪಲ ಇಪ್ಪುವೆ. ಅಂಚೆನೆ ಹೈಕಮಾಂಡ್ ಪಂಡಿನಂಚೆನೆ ಕೇನುವೆ. ಅತ್ತಂದೆ ದುಂಬುಲ ಹೈಕಮಾಂಡ್ ದ ಮಾತ ಆದೇಶದ ತಪ್ಪಂದೆ ಪಾಲಿಸೊಂದು ಬೈದೆ. ಈ ಸರ್ತಿ ಎನ್ನ ಸೋಲುದ ವೋಟುದ ಅಂತರ ಕಮ್ಮಿ ಆತ್ಂಡ್. ಗೆಂದುನ ವಿಶ್ವಾಸ ಇತ್ತ್ಂಡ್. ಆಂಡಲ ಸೋತುದೆ ಪಂದ್ ಪಂಡೆರ್.

ಜನಕುಲೆಗಾದ್ ಏಪಲ ಬೇಲೆ ಮಲ್ಪುವೆ. ಜಿಲ್ಲೆಡ್ ಪಕ್ಷಗ್ ಹಿನ್ನಡೆ ಆತ್ಂಡ್. ಆಂಡಲ ನೇರ್ದ್ ಕಾರ್ಯಕರ್ತೆರ್ ಪೋಡ್ಯೊಡು ಪಂದ್ ಇಜ್ಜಿ. ಲೋಕಸಭೆ ವೋಟು, ತಾ.ಪಂ, ಜಿ.ಪಂ ವೋಟುಡು ಕಾಂಗ್ರೆಸ್ ಗ್ ಜಿಲ್ಲೆಡ್ ಎಚ್ಚದ ತಾನ ತಿಕುನ ವಿಶ್ವಾಸ ಉಂಡು ಪಂದ್ ರಮಾನಾಥ ರೈ ಪಂಡೆರ್.‌

ಗೂಡ್ಸ್ ರೈಲ್ ದಡಿಕ್ಕ್ ಬೂರ್ದು ತೀರ್ ಪೋಯಿನ 20ರ್ದ್ ಎಚ್ಚ ಎರ್ಮೆ

ಕುಡ್ಲ: ಗೂಡ್ಸ್ ರೈಲ್ ದಡಿಕ್ಕ್ ಬೂರ್ದು ಸುಮಾರ್ 20 ರ್ದ್ ಎಚ್ಚ ಎರ್ಮೆಲು ತೀರ್ ಪೋಯಿನ ಘಟನೆ ಬೈಕಂಪಾಡಿದ ಅಂಗರಗುಂಡಿ ಕೈತಲ್ ನಡತ್ಂಡ್.

ಗೂಡ್ಸ್ ರೈಲ್ ಕಂಕನಾಡಿದಂಚಿರ್ದ್ ಎಂಸಿಎಫ್ ದಂಚಿ ಪೊವೊಂದಿತ್ಂಡ್. ಕದ್ರಿ ಅಗ್ನಿಶಾಮಕ ದಳತ್ತಕುಲು ಮೂಜಿ ಎರ್ಮೆನ್ ರಕ್ಷಣೆ ಮಲ್ದೆರ್. ಸುಮಾರ್ ಮೂಜಿ ಗಂಟೆ ಕಾರ್ಯಾಚರಣೆ ನಡಪಾದೆರ್. ಕೆಲವು ಎರ್ಮೆಲು ಸುಮಾರ್ 25 ಅಡಿ ಗುಂಡಿಗ್ ಬೂರ್ದು ತೀರ್ ಪೋತ್ಂಡ್.

ಜಾತಿ ರಾಜಕೀಯ ಮೀರ್ ದ್ ಹಿಂದುತ್ವಡ್ ಗೆಂದ್ ದ್ ಬತ್ತಿನ ಹರೀಶ್ ಪೂಂಜೆರ್!

ಬೊಲ್ತೇರ್ (ಬೆಳ್ತಂಗಡಿ) ವಿಧಾನಸಭೆ ಕ್ಷೇತ್ರದ ಬಗೆಟ್ಟ್ ಇಡೀ ರಾಜ್ಯಡೇ ಚರ್ಚೆ ಆವೊಂದಿತ್ತ್ಂಡ್. ದಾಯೆ ಪಂಡ ಅಲ್ತ ಜಾತಿ ರಾಜಕಾರಣ, ರಾಜಕೀಯಲೆಕ್ಕಾಚಾರನ್ ಅದಲ್ ಬದಲ್ ಮಲ್ಪುಂಡಾ ಪನ್ಪಿನ ಚರ್ಚೆ ಆವೊಂದಿತ್ತ್ಂಡ್. ಆಂಡ ಈ ಸರ್ತಿ ಅಂಚ ಆತಿಜಿ. ಹಿಂದುತ್ವದ ಎದುರುಡು ಜಾತಿ ರಾಜಕಾರಣ ಸೋತುದುಂಡು.

ಬೊಲ್ತೇರ್ ಡ್ ಹರೀಶ್ ಪೂಂಜೆರ್ ರಡ್ಡನೇ ಸರ್ತಿಗ್ ಶಾಸಕೆರಾದ್ ಆಯ್ಕೆ ಆತೆರ್. ಆರ್ ಒಟ್ಟು 18, 216 ವೋಟುದ ಅಂತರೊಡು ಜಯಶಾಲಿಯಾತೆರ್. ಆರೆಗ್ ಬೈದಿನ ವೋಟು 1,01,004. ಅರೆನ ಪ್ರತಿಸ್ಪರ್ಧಿ ಕಾಂಗ್ರೆಸ್ ಅಭ್ಯರ್ಥಿ ರಕ್ಷಿತ್ ಶಿವರಾಮ್ ಗ್ 82,788 ವೋಟು ಬೈದ್ಂಡ್.

ಒಂಜಿ ವೇಳೆ ಮೂಲು ಜಾತಿ ರಾಜಕಾರಣ ನಡತ್ ದ್ಂ ಡ್ಂದಾಂಡ ರಕ್ಷಿತ್ ಶಿವರಾಮ್ ಗೆಂದುದುವೆರ್. ದಾಯೆ ಪಂಡ ಮೂಲು ಬಿರುವೆರ್ ಬೊಕ್ಕ ಒಕ್ಕಲಿಗೆರ್ನ ವೋಟು ಜಾಸ್ತಿ ಉಂಡು. ಆಂಡ ಮೂಲು ಮತದಾರೆರ್ ಒಂಜಿ ಜಾತಿ ಪತೊಂದು ಪೋತುಜೆರ್. ಮಾತಾ ಜಾತಿದಕುಲುಲ ಹಿಂದುತ್ವದ ಅಡಿಟ್ಟ್ ಸೇರ್ದ್ ವೋಟು ಪಾಡ್ದೆರ್ ಪನ್ಪಿನ ಸ್ಪಷ್ಟ.

ಪೂಂಜೆರ್ನ ಗೆಲ್ಮೆಗ್ ಕುಡೊಂಜಿ ಕಾರಣ ಪಂಡ ಆರ್ ಮಲ್ತ್ ದಿನ ಬೇಲೆ. ಕ್ಷೇತ್ರದ ಅಭಿವೃದ್ಧಿಗಾದ್ ಆರ್ ಜಪುಡಾಯಿನ ಬೆಗರ್ ಇತ್ತೆ ಫಲ ಕೊರ್ತುಂಡು. ಏತೋ ಕಡೆಟ್ಟ್ ಮೂಲಸೌಕರ್ಯದ ಅಭಿವೃದ್ಧಿದ ಬೇಲೆ ಮಲ್ತ್ ದ್ ತೋಜಾದೆರ್. ಅಯಿಕ್ ಸರಿಯಾಯಿನ ಗೌರವೊನು ಮತದಾರೆರ್ ಕೊರ್ತೆರ್ ಪಂದ್ ಜನಕುಲು ಪನೊಂದುಲ್ಲೆರ್.

ಪ್ರಜಾಪ್ರಭುತ್ವ ವ್ಯವಸ್ಥೆಡ್ ಒಂಜಿ ಜಾತಿ, ಒಂಜಿ ವ್ಯಕ್ತಿರ್ದಾತ್ರಂದ್ ಆವರೆ ಬಲ್ಲಿ. ಅಯಿಕ್ಕ್ ಈ ವ್ಯವಸ್ಥೆ ಡ್ ಅವಕಾಶ ಇಜ್ಜಿ. ಮಾತಾ ಜಾತಿಧರ್ಮದಕ್ಲೆನ್ಲ ಒಟ್ಟು ಪಾಡೊಂದು ಬೇಲೆ ಮಲ್ತ್ಂಡ ಇಂಚಿನ ಗೆಲ್ಮೆ ತಿಕ್ಕುಂಡು ಪನ್ಪಿನವು ಸ್ಪಷ್ಟ.

ಕಾಂಗ್ರೆಸ್ ಅಭ್ಯರ್ಥಿ ರಕ್ಷಿತ್ ಶಿವರಾಮ್ ಪರವಾದ್ ಅರೆನ ಬಾವೆ, ಸಿನಿಮಾ ನಟೆ ವಿಜಯ ರಾಘವೇಂದ್ರ ‌ ವೋಟುದ ಪ್ರಚಾರ ಮಲ್ತೆರ್ಡ, ಹರೀಶ್ ಪೂಂಜೆರ್ನ ಪರವಾದ್ ಬಿರುವೆರೆ ಕುಡ್ಲದ ಉದಯ ಪೂಜಾರಿ ಪ್ರಚಾರ ಮಲ್ತಿತ್ತೆರ್.

ಉಂದು ಜಾತಿ ರಾಜಕಾರಣ ಅತ್ತ್ ಪನ್ಪಿನೆಕ್ಕ್ ಲ ಒಂಜಿ ಉದಾರ್ಮೆ.

ಹರೀಶ್ ಪೂಂಜೆರ್ ತುಳು ಲಿಪಿ, ತುಳು ಬಾಷೆಗ್ ಎಚ್ಚ ಮನ್ನಣೆ ಕೊರ್ತೆರ್.ಎಚ್ಚಿನ ಕಡೆಟ್ಟ್ ತುಳುಟ್ಟೇ ಬಾಷಣ ಮಲ್ದೆರ್.ರಾಜ್ಯದ ಮಂತ್ರಿಲು, ಮುಖ್ಯಮಂತ್ರಿಲೆಡಲ ತುಳು ಬಾಷೆದ ಬಗೆಟ್ಟ್ ಎಚ್ಚಿನ ಒಲವು ಕೊರ್ತಿನ ವ್ಯಕ್ತಿತ್ವ ಅರೆನ. ತುಳುನಾಡ್ ದ ದೈವದ ಬಾಷೆನ್ ಲ ಒರಿಪುನ ಬೇಲೆನ್ ಲ ಆರ್ ಮಲ್ತ್ ದೆರ್.

ಮೇ 18 : ರುದ್ರ ಮಾಲೆ ಭಕ್ತಿ ಸುಗಿಪು ಬುಡುಗಡೆ

ಬೈಲಂಗಡಿ ಶ್ರೀ ಸೋಮನಾಥೇಶ್ವರ ದೇವೆರೆನ ಪ್ರತಿಷ್ಠಾ ಅಷ್ಠಬಂಧ ಬ್ರಹ್ಮಕಲಶ ಉಚ್ಚಯದ ನಿಲೆಟ್ಟ್ ತುಳುನಾಡ್ ದ ಪೆರ್ಮೆದ ಕಲಾವಿದೆರ್ ನವರಸ ರಾಜೆ ಭೋಜರಾಜ್ ವಾಮಂಜೂರು ಮೆರೆನ ಸಿರಿ ಕಂಠೊಡು ಭಕ್ತಿ ಸುಗಿಪು ಉಂದುವೇ ಮೇ 18 ಗುರುವಾರ ಶ್ರೀ ಸೋಮನಾಥೇಶ್ವರ ದೇವೆರೆನ ನಡೆಟ್ಟ್ ಬುಡುಗಡೆ ಆವರೆ ಉಂಡು.

ರುದ್ರಮಾಲೆ ಭಕ್ತಿ ಸುಗಿಪುದ ಸಾಹಿತ್ಯೊನು ಅಜಯ್ ರಾಜ್ ಶೆಟ್ಟಿ ಮೇರ್ ಬರೆತೆರ್. ನಿರ್ಮಾಣ ಬೊಕ್ಕ ಸಹಕಾರ ಕಲಾ ಷೋಷಕೆರಾಯಿನ ರಂಜು ತುಳು ರಂಗಪ್ರೇಮಿ ವಹಿಸೊಂದೆರ್.

ಅಂಚೆನೆ ಬೈಲಂಗಡಿ ಶ್ರೀ ಸೋಮನಾಥೇಶ್ವರ ದೇವಸ್ಥಾನ, ಬೈಲಂಗಡಿ ನಡಪುನ ಪ್ರತಿಷ್ಠ ಅಷ್ಟಬಂಧ ಬ್ರಹ್ಮಕಲಶೋತ್ಸವ ತೇದಿ ಮೇ 17- 22 ಮುಟ್ಟ ಗೌಜಿಡ್ ನಡಪರೆ ಉಂಡು. ಈ ಉಚ್ಚಯೊಗುಲ ಮಾತೆರ್ಲ ಬತ್ತ್ ದ್ ದೇವೆರೆನ ಅನುಗ್ರಹ ಪಡೆಯೊಡು ಪಂದ್ ರಂಜು ತುಳುರಂಗ ಪ್ರೇಮಿ ಮೇರ್ ಬಿನ್ನಯ ಮಲ್ದೆರ್.

ಯಾದವ ಎಸ್ ಕಲ್ಲಾಪು

ಮೆಗ್ದಿ ಪಲಿನ್ ಒಂಜೇ‌ ಮಂಟಪ್ ಮದಿಮೆ ಆಯಿನ ಮದಿಮಾಯೆ!

ರಾಜಸ್ಥಾನ: ಜವನೆಯೊರಿ ಮೆಗ್ದಿ ಪಲಿ ಮದಿಮಾಲೆಲ್ಲೆನ್ ಒಂಜೇ ಮಂಟಪಡ್ ಮದಿಮೆ ಆಯಿನ ಘಟನೆ ಟೋಂಕ್ ಜಿಲ್ಲೆದ ಉನಿಯಾರಾ ಪನ್ಪಿನಲ್ಪ ನಡತ್ಂಡ್.

ಮದಿಮಾಯೆ ಹರಿ ಓಂ ಡಿಗ್ರಿ ಕಲ್ತ್ ದೆರ್.‌ ಮದಿಮಾಲ್ ಕಾಂತಾ ಉರ್ದುಡು ಸ್ನಾತಕೋತ್ತರ ಡಿಗ್ರಿ ಮಲ್ತ್ ದೆರ್. ಮೆರೆನ ಮೆಗ್ದಿ 8ನೇ ಕ್ಲಾಸ್ ಕಲ್ತ್ ದೆರ್.

ಸುರುಕು ಹರಿ ಓಂ ಮೀನಾ ಕಟುಂಬಸ್ಥೆರೆಗ್ ಕಾಂತಾ ಪನ್ಪುನ ಪೊಣ್ಣನ್ ಮದಿಮೆ ಆಪಿನ ಬಗೆಟ್ ತೆರಿಪಾದೆರ್. ಈ ಪೊರ್ತುಡು ಕಾಂತ ಆನಗ್ ಷರತ್ತ್ ಪಾಡ್ದೆರ್. ಎನ್ನ ಮೆಗ್ದಿ ಒಂತೆ ಹುಷಾರ್ ಇಜ್ಜಂದಿನಾಲ್, ಆಲ್ ಏಪಲ ಎನ್ನೊಟ್ಟಿಗೆ ಇಪ್ಪುವಲ್, ಇಂಚಾದ್ ಆಲೆನ್ಲಾ ಮದಿಮೆ ಆವೊಡು ಪಂದ್ ಮದಿಮಾಲ್ ಪನ್ನೆಕ್ಕ್ ಆಣ್ ಬೊಕ್ಕ ಆಣನ ಕುಟುಂಬಸ್ಥೆರ್ ಒಪ್ಪುದೆರ್. ಬೊಕ್ಕ ಈ ಮದಿಮೆ ಆಂಡ್.

ಬಿಜೆಪಿ ವಿಜಯೋತ್ಸವಡ್ ಕಾಂಗ್ರೆಸ್ ಕಾರ್ಯಕರ್ತನ ಮಿತ್ತ್ ಪೆಟ್ಟ್ ಹಾಕಿನ ಆರೋಪ: ಕೇಸ್ ದಾಖಲ್

ಬೊಲ್ತೇರ್: ಕಾಂಗ್ರೆಸ್ ಕಾರ್ಯಕರ್ತನ ಮಿತ್ತ್ ಬಿಜೆಪಿದ ವಿಜಯೋತ್ಸವಡ್ ಪೆಟ್ಟ್ ಹಾಕಿನ ಆರೋಪ ಕೇಂದ್ ಬರೊಂದುಂಡು.

ಈ ಘಟನೆ ಪೆರಾಡಿಡ್ ಬಿಜೆಪಿದ ವಿಜಯೋತ್ಸವಡ್ ನಡತ್ ದ್ಂಡ್.

ಪೆಟ್ಟಾಯಿನ ಜನ ಕಾಂಗ್ರೆಸ್ ದ ಕಾರ್ಯಕರ್ತೆ ದಯಾನಂದ ಪೂಜಾರಿ ಪಂದ್ ತೆರಿದ್ ಬೈದ್ಂಡ್. ಮೆರೆನ್ ಬೊಲ್ತೇರ್ ಸರಕಾರಿ ಆಸ್ಪತ್ರೆಗ್ ದಾಖಲ್ ಮಲ್ದೆರ್.

ಈ ಇಸಯ ತೆರಿದ್ ಮಾಜಿ ಶಾಸಕೆರ್ ವಸಂತ ಬಂಗೇರ, ರಕ್ಷಿತ್ ಶಿವರಾಂ ಸೇರಿನಂಚೆನೆ ಸುಮಾರ್ ಮುಖಂಡೆರ್, ಕಾಂಗ್ರೆಸ್ ಕಾರ್ಯಕರ್ತೆರ್ ಆಸ್ಪತ್ರೆಗ್ ಭೇಟಿ ಕೊರ್ದು ವಿಚಾರಿಸಾದೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಕುರಿತು ವೇಣೂರು ಪೊಲೀಸ್‌ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.