ಸೆ.30 ಮುಟ್ಟ ವಿನಿಮಯ ಮಲ್ಪೆರೆ ಅವಕಾಶ
ರಡ್ಡ್ ಸಾರ ರೂಪಾಯಿ ಬಿಲೆತ್ತ ನೋಟುಲೆನ್ ಚಲಾವಣೆರ್ದ್ ಪಿರದೆಪ್ಪರೆ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ ಬಿಐ) ನಿರ್ಧಾರ ಮಲ್ದ್ಂಡ್.
ಈ ಕರೆನ್ಸಿ ನೋಟುಲು ಕಾನೂನಾತ್ಮಕವಾದ್ ಸಿಂಧುವಾದ್ ದುಂಬರಿಯೆರೆ ಉಂಡು ಪಂದ್ ಆರ್ ಬಿಐ ಸುಕ್ರಾರ ಪಂತ್ಂಡ್.
ನನ 2 ಸಾರ ರೂ. ನೋಟು ಇತ್ತಿನಕುಲು ಅವೆನ್ ಪಿರ ಮಲ್ಪರೆ ಸಮಯಾವಕಾಶ ಕೊರ್ತುಂಡು. ಆರ್ ಬಿಐ ಕೊರ್ನ ಪೊಲಬು ಪ್ರಕಾರ 2023 ಸೆಪ್ಟೆಂಬರ್ 30ದ ಉಲಯಿ 2 ಸಾರ ಮುಖಬಿಲೆತ್ತ ನೋಟುನ್ ವಾಪಸ್ ಕೊರ್ದು ವಿನಿಮಯ ಮಲ್ಪೊಲಿ.
ರಷ್ಯಾದ ಕ್ಷಿಪಣಿ ದಾಳಿಗ್ ಉಕ್ರೇನ್ ಪ್ರತಿದಾಳಿ ಎಚ್ಚಾತ್ಂಡ್.
ರಷ್ಯಾ ಉಡಾವಣೆ ಮಲ್ತಿನ 30 ಕ್ಷಿಪಣಿಲೆಡ್ 29 ನ್ ಪುಡಾತ್ ಪಾಡ್ದ್ಂಡ್ ಪಂದ್ ಉಕ್ರೇನ್ ಅಧಿಕಾರಿಲು ತೆರಿಪಾದೆರ್. ರಷ್ಯಾದ ಕ್ಷಿಪಣಿ ದಾಳಿರ್ದ್ ಒಂಜಿ ಜನ ತೀರ್ ಪೋತೆರ್. ರಡ್ಡ್ ಜನಕ್ಕ್ ಪೆಟ್ಟಾತ್ಂಡ್.
ರಷ್ಯಾದ ಪಡೆಲು ಸೋವಿಯತ್ ಯುಗಡ್ ಅಭಿವೃದ್ಧಿ ಮಲ್ತಿನ ಕ್ಷಿಪಣಿನ್ ಉಡಾವಣೆ ಮಲ್ದ ಪಂದ್ ತೆರಿದ್ ಬೈದ್ಂಡ್.
ಕರ್ನಾಟಕದ 31 ನೇ ಸಿಎಂ ಆದ್ ಸಿದ್ದರಾಮಯ್ಯ ಎಲ್ಲೆ ಮಧ್ಯಾಹ್ನ 12.30 ಕ್ಕ್ ಕಂಠೀರವ ಕ್ರೀಡಾಂಗಣಡ್ ಪ್ರಮಾಣ ವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್.
ಈ ಲೇಸ್ ಗ್ ಬಿಜೆಪಿ ಇಜ್ಜಂದಿನ ರಾಜ್ಯದ ಸಿಎಂ ನಕುಲು ಬೊಕ್ಕ ರಾಜ್ಯದ ಬೇತೆ ಬೇತೆ ಕಡೆರ್ದ್ 1 ಲಕ್ಷರ್ದ್ಲ ಎಚ್ಚ ಅಭಿಮಾನಿಲು ಬರಿಯೆರೆ ಉಲ್ಲೆರ್. ಸಿದ್ದರಾಮಯ್ಯೆರ್ನ ಒಟ್ಟುಗು ಡಿಕೆಶಿವ ಕುಮಾರ್ ಲ ಡಿಸಿಎಂ ಆದ್ ಪ್ರಮಾಣವಚನ ಸ್ವೀಕಾರ ಮಲ್ಪೆರೆ ಉಲ್ಲೆರ್. ಮೆರೆನ ಅಭಿಮಾನಿಲು ಕಂಠೀರವ ಕ್ರೀಡಾಂಗಣಗ್ ಬರಿಯೆರೆ ಉಲ್ಲೆರ್ ಪಂದ್ ವರದಿ ಆತ್ಂಡ್.
ಹಳೆಯಂಗಡಿ : ಮೂಲತಃ ತುಳುನಾಡ್ ದಾರ್ ಆಯಿನ ಕಾಂಗ್ರೆಸ್ ಪಕ್ಷದ ಹಿರಿಯ ನಾಯಕೆರ್ ಬಿ.ಕೆ.ಹರಿಪ್ರಸಾದ್ ಮೆರೆಗ್ ರಾಜ್ಯ ಸಚಿವ ಸಂಪುಟೊಡು ಗೃಹ ಸಚಿವ ಸ್ಥಾನ ಕೊರ್ದು , ದ.ಕ. ಜಿಲ್ಲೆದ ಉಸ್ತುವಾರಿ ಸಚಿವೆರ್ ಮಲ್ಪೊಡು. ಅಂಚೆನೆ ಸಮಾಜಸೇವೆಡ್ ಬೊಕ್ಕ ಪಕ್ಷ ಸಂಘಟನೆಡ್ ಪುಗರ್ತೆ ಪಡೆದಿನ ಯುವ ನಾಯಕೆ ಮಿಥುನ್ ರೈ ಮೆರೆನ್ ಎಂಎಲ್ ಸಿ ಮಲ್ಪೊಡು ಪಂದ್ ಮಾಜಿ ಸಚಿವೆರ್, ಕಾಂಗ್ರೆಸ್ ದ ಹಿರಿಯ ನಾಯಕೆರ್ ಅಭಯಚಂದ್ರ ಜೈನ್ ಬಿನ್ನಾಪು ಮಲ್ತೆರ್.
ತುಳುನಾಡ್ ಜಿಲ್ಲೆಡ್ ಕಾಂಗ್ರೆಸ್ ಗ್ ಹಿನ್ನಡೆ ಆದಿತ್ತ್ಂಡಲ ಜನಕುಲು ರಾಜ್ಯೊಡು ಸ್ಪಷ್ಟ ಬಹುಮತ ಕೊರ್ದು ಪಕ್ಷೊನು ಗೆಂದಾದ್ ರಾಜ್ಯದ ಆಡಳಿತ ಮಲ್ಪರೆ ಅವಕಾಶ ಕೊರ್ತೆರ್. ಸಿಎಂ ಸಿದ್ದರಾಮಯ್ಯೆರ್ ಅಂಚೆನೆ ಡಿಸಿಎಂ ಡಿಕೆ ಶಿವ ಕುಮಾರ್ ಮೆರೆನ ಆಡಳಿತ ದ ಸರ್ಕಾರ, ವೋಟುದ ಪೊರ್ತುಡು ಘೋಷಣೆ ಮಲ್ದಿನ ಗ್ಯಾರಂಟಿ ಲೆನ್ ನಡಪಾದ್ ಕೊರ್ಪುಂಡು. ಕಾಂಗ್ರೆಸ್ ಸರ್ಕಾರದ ಯೋಜನೆಲೆನ್ ಜನಕ್ಲೆಗ್ ಮುಟ್ಟಾವರೆ ಹರಿಪ್ರಸಾದ್ ಬೊಕ್ಕ ಮಿಥುನ್ ರೈ ಗ್ ಸಚಿವ ಸಂಪುಟೊಡು ತಾನಮಾನ ಕೊರೊಡು. ಎಂಕ್ ಅಂಚಿನ ಒವ್ವೇ ಸ್ಥಾನಮಾನ ಬೊಡ್ಚಿ, ಯಾನ್ ಅವೆನ್ ಬಯಕುಜಿ ಪಂದ್ ಆರ್ ಪಂಡೆರ್.
ಮುಲ್ಕಿ ಬೆದ್ರ ಕ್ಷೇತ್ರಡ್ ಕರಿನ ನಾಲ್ ವರ್ಷೊಡು ಎಚ್ಚಿನ ಅಭಿವೃದ್ಧಿ ಆತಿಜಿ.ಕೆಲವು ಶಾಲೆಲು ಮುಚ್ಚುನ ಪರಿಸ್ಥಿತಿ ಬೈದ್ಂಡ್. ಅವೆನ್ ಪುನಶ್ಚೇತನ ಮಲ್ಪೊಡು. ಜವನೆರೆಗ್ ಉದ್ಯೋಗ ದೆಪ್ಪಾದ್ ಕೊರ್ಪಿನ ಬೇಲೆ ಆವೊಡು ಪಂದ್ ಆರ್ ಪಂಡೆರ್.
ಕ್ಷೇತ್ರೊಡು ನನ ದುಂಬಗ್ ಕಲ್ವಸಾದಿಡ್ ಪೊಯ್ಯೆ ದೆತ್ತ್ ದ್ ಮಾರುನೆನ್ ಸಂಪೂರ್ಣ ಬಂದ್ ಮಲ್ಪಾವ ಪಂದ್ ಅಭಯಚಂದ್ರ ಪಂಡೆರ್.
ಸುದ್ದಿಗೋಷ್ಠಿಡ್ ಕೆಪಿಸಿಸಿ ಕೋ ಆರ್ಡಿನೇಟರ್ ವಸಂತ ಬೆರ್ನಾಡ್, ಮುಖಂಡೆರಾಯಿನ ಪದ್ಮಾವತಿ ಶೆಟ್ಟಿ, ಮೋಹನ್ ಕೋಟ್ಯಾನ್, ಅಶೋಕ್ ಪೂಜಾರ್, ಶಮೀರ್ ಎ., ಅಬ್ದುಲ್ ಅಜೀಜ್ ಇತ್ತೆರ್.
ಕುಡ್ಲ: ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಕುಡ್ಲ ನಗರ ವಲಯ ಸಮಿತಿ ಮುತಾಲಿಕೆಡ್ ಯುವವಾಹಿನಿ ಕುಡ್ಲ ಘಟಕ ಬೊಕ್ಕ ಕಂಕನಾಡಿ ಘಟಕದ ಸಹಕಾರಡ್, ಶ್ರೀ ಆದಿ ಧೂಮಾವತಿ, ಶ್ರೀ ದೇಯಿ ಬೈದೆತಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಮೂಲಸ್ಥಾನ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಮೇ20 ರಾತ್ರೆ 7 ಗಂಟೆಗ್ ನಗರದ ಪುರಭವನಡ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಪ್ರಸಂಗದ 150 ನೇ ಪ್ರದರ್ಶನ ಆಯೋಜನೆ ಮಲ್ದೆರ್ ಪಂದ್ ಸಮಿತಿದ ಪ್ರಧಾನ ಸಂಚಾಲಕೆರ್ ಹರೀಶ್ ಕೆ. ಪೂಜಾರಿ ಪತ್ರಿಕಾಗೋಷ್ಠಿಡ್ ತೆರಿಪಾದೆರ್.
2022-23 ನೇ ಸಾಲ್ ಡ್ ತಿರ್ಗೆರೆ ಸುರು ಮಲ್ತಿನ ಮೇಳ ಇತ್ತೆ 170 ಪ್ರದರ್ಶನನ್ ಕೊರ್ತುಂಡು. ನೆಟ್ಟ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ 149 ಪ್ರದರ್ಶನ ಆತ್ಂಡ್. ಕರಾವಳಿಡ್ ಈ ವರ್ಷ ಸಂಚಲನ ಮೂಡಿಸಾಯಿನ ಪ್ರಸಂಗ ಉಂದಾತ್ಂಡ್. ಪುರಭವನಡ್ ಯಕ್ಷಗಾನ ಪ್ರದರ್ಶನದ ಪೊರ್ತುಡು ಮೇಳದ ಕಲಾವಿದೆರೆಗ್ ಅಭಿನಂದನೆ ಮಲ್ಪೆರೆ ಉಂಡು ಪಂದ್ ಪಂಡೆರ್.
ಮೇಳದ ಸಂಚಾಲಕೆರ್ ನವೀನ್ ಸುವರ್ಣ ಪಾತೆರ್ದ್, ಪತ್ತನಾಜೆದಾನಿ ಕಲಾವಿದೆರ್ ಗೆಜ್ಜೆ ಬಿಚ್ಚಿಂಡಲ ಪೆರಿಯೆರೆನ ಮಾರ್ಗದರ್ಶನಡ್ ಬೊಂಬೈ, ಗುಜರಾತ್, ಹೊಸದಿಲ್ಲಿ, ಗೋವಾ, ಬೆಂಗ್ಲೂರ್, ಮೈಸೂರ್ ಡ್ ಪ್ರದರ್ಶನ ದುಂಬಾರಿಯೆರೆ ಉಂಡು. ನನದ ತಿರುಗಾಟಗಾದ್ ಸಮಗ್ರ ಕೋಟಿ ಚೆನ್ನಯ ಪ್ರಸಂಗ ರಡಿ ಆವೊಂದು ಉಂಡು ಪಂದ್ ಪಂಡೆರ್.
ಈ ಪೊರ್ತುಡು ಯುವವಾಹಿನಿ ಕುಡ್ಲ ಘಟಕದ ಅಧ್ಯಕ್ಷೆರ್ ಗಣೇಶ್ ಸುವರ್ಣ, ಯುವವಾಹಿನಿ ಕಂಕನಾಡಿ ಘಟಕದ ಅಧ್ಯಕ್ಷೆರ್ ಪೃಥ್ವಿರಾಜ್, ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಮಾಧ್ಯಮ ವಕ್ತಾರೆರ್ ರಾಜೇಂದ್ರ ಚಿಲಿಂಬಿ ಇತ್ತೆರ್.
ಅಜೆಕಾರು: ಡೆಲ್ಲಿದ ಇಂಡಿಯಾ ಇಂಟರ್ ನ್ಯಾಶನಲ್ ಸೆಂಟರ್ ಡ್ ಮೇ21 ಕ್ಕ್ ನಡಪುನ ಲೇಸ್ ಡ್ ಶಿಕ್ಷಕಿ, ಅಜೆಕಾರ್ ದ ಬಿಂದು ಕೆ.ಎ ಮೇರ್ ರಾಷ್ಟ್ರೀಯ ಶಿಕ್ಷಕ ರತ್ನ ಪ್ರಶಸ್ತಿನ್ ಸ್ವೀಕಾರ ಮಲ್ಪೆರೆ ಉಲ್ಲೆರ್.
ಡೆಲ್ಲಿದ ದಿ ಜರ್ನಿ ಸೊಸೈಟಿ ಬೊಕ್ಕ ಸುಜ್ಞಾನ ವಿದ್ಯಾಪೀಠ ಒಟ್ಟುಸೇರಿಗೆಡ್ ಲೇಸ್ ನ್ ಆಯೋಜನೆ ಮಲ್ದ್ಂಡ್. ಇತ್ತೆನೇ ಕರ್ನಾಟಕ ಸರಕಾರದ ಶಿಕ್ಷಣ ಇಲಾಖೆ ಪ್ರಶಸ್ತಿ ಸೇರಿನಂಚೆನೆ ಸುಮಾರ್ ಗೌರವಲೆಗ್ ಬಿಂದು ಆಯ್ಕೆ ಆತೆರ್. ಮೇರ್ ಆದಿಗ್ರಾಮೋತ್ಸವ ಸಮಿತಿದ ಸದಸ್ಯೆರಾತೆರ್.
ತೋಕೂರು: ಧಾರ್ಮಿಕ ಕ್ಷೇತ್ರನ್ ಕಾಲಿ ದೇವೆರ್ನ ಸೇವೆಗಾದೇ ಮೀಸಲು ದೀವೊಡ್ಚಿ, ಶಿಕ್ಷಣಗು ಬೋಡಾದ್, ಸಮಾಜದ ಸೇವೆ ಗ್ ಅಂಚೆನೆ ಸಾಂಸ್ಕೃತಿಕ ಕಲಾ ಪ್ರಕಾರಲೆನ್ ಒರಿಪುನ ಕಜ್ಜೊಗು ಬೋಡಾದ್ ಗಲಸ್ ದ್, ಸ್ವಾಮಿ ವಿವೇಕಾನಂದೆರ್ ಪನ್ತಿಲೆಕನೆ ಸಮಾಜೊಡು ಧಾರ್ಮಿಕ ಜಾಗೃತಿ ಪುಟ್ಟಾವುನ ಮುಕೇನ ಧರ್ಮದ ರಕ್ಷಣೆ ಮಲ್ಪೊಡು ಪಂದ್ ಪೊಳಲಿ ತಪೋವನದ ರಾಮಕೃಷ್ಣ ಮಠದ ವಿವೇಕ ಚೈತನ್ಯಾನಂದ ಸ್ವಾಮೀಜಿ ಪಂಡೆರ್.
ಆರ್ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ನಡಪುನ ಬ್ರಹ್ಮಕುಂಭಾಷೇಕ ಬೊಕ್ಕ ನಾಗಮಂಡಲೋತ್ಸವದ ಧರ್ಮ ಸಭೆಟ್ಟ್ ಪಾತೆರ್ದ್ ಅನುಗ್ರಹ ಸಂದೇಶ ಕೊರಿಯೆರ್.
ಹೊಸದಿಗಂತ ಪತ್ರಿಕೆದ ಸಂಪಾದಕೆರ್ ಪಿ.ಎಸ್.ಪ್ರಕಾಶ್ ಅಧ್ಯಕ್ಷತೆ ಒಯಿಸ್ ದ್ , ದೇವೆರ್ನ ಸಾಂಗತ್ಯನ್ ಪ್ರಾಣಿ, ಪಕ್ಕಿಲೆಡ್ ತೂಪುನ ಮನುಷ್ಯ ಜೀವನಡ್ ಪ್ರಕೃತಿನ್ ಆರಾದನೆ ಮಲ್ಪುನ ಗುಣ ಬೈದಿನೆರ್ದಾವರ ಸನಾತನ ಸಂಸ್ಕೃತಿ ಒರಿದಂಡ್ ಪಂಡೆರ್.
ಧಾರ್ಮಿಕ ಚಿಂತಕೆರ್ ಶ್ರೀಕಾಂತ್ ಶೆಟ್ಟಿ ಕಾರ್ಲ ಮೇರ್ ದೇವಸ್ಥಾನ ಬೊಕ್ಕ ಸಮಾಜದ ಬಗೆಟ್ಟ್ ಧಾರ್ಮಿಕ ಉಪನ್ಯಾಸ ಕೊರಿಯೆರ್.
ಈ ಪೊರ್ತುಡು ದೇವಲ್ಯಗ್ ವಿಶೇಷ ಸಾಕಾರ ಕೊರ್ತಿನ ಗಾಯತ್ರಿ ರಾಘವೇಂದ್ರ ದೇವಾಡಿಗ ಮೆರೆನ್ ಮಾನಾದಿಗೆ ಮಲ್ತೆರ್.
ಬೊಂಬೈ ಬಂಟ್ಸ್ ಸಂಘದ ಸಾಂಸ್ಕೃತಿಕ ವಿಭಾಗದ ಅಧ್ಯಕ್ಷೆರ್ ಸುರೇಶ್ ಶೆಟ್ಟಿ ಯೆಯ್ಯಾಡಿ, ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು, ಉಪಾಧ್ಯಕ್ಷೆರ್ ಮೋಹನ್ದಾಸ್, ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ ಮುಂಬೈ, ಸಂಚಾಲಕೆರ್ ಡಾ.ಸೋಂದಾ ಭಾಸ್ಕರ ಭಟ್, ಸಮಿತಿದ ಕೆ.ಭುವನಾಭಿರಾಮ ಉಡುಪ, ಹರಿಪ್ರಸಾದ್ ಶೆಟ್ಟಿ ಮಿತ್ತರ್ಮೆಡ್ ಇತ್ತೆರ್.
ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್ಕುಮಾರ್ ಹೆಗ್ಡೆ ಸ್ವಾಗತ ಮಲ್ತೆರ್. ಸತೀಶ್ ಭಟ್ ಪ್ರಸ್ತಾವನೆ ಮಲ್ತೆರ್. ಮಹೇಶ್ ಕಲ್ಲಾಪು ಸೊಲ್ಮೆ ಸಂದಾಯೆರ್. ಅಂಜನ್ಕುಮಾರ್ ಕಲ್ಲಾಪು ಸಭೆ ಸುಧಾರಿಕೆ ಮಲ್ತೆರ್.
