May 10, 2023

ಒಡಿಪು ಜಿಲ್ಲೆಡ್ ಶೇ.73.75% ವೋಟು

ಒಡಿಪು : ಒಡಿಪು ಜಿಲ್ಲೆಡ್ ಬಯ್ಯ 5 ಗಂಟೆ ಮುಟ್ಟ ಶೇ.73.75% ದಾತ್ ವೋಟು ಪಾಡ್ದೆರ್ ಪಂದ್ ಚುನಾವಣಾ ಆಯೋಗ ಪೊಲಬು ಕೊರ್ತುಂಡು.

ಬೈಂದೂರ್-71.83%,

ಕುಂದಾಪುರ-75.61%,

ಒಡಿಪು- 71.26%,

ಕಾಪು- 71.16%,

ಕಾರ್ಲ-75.54%, ದಾತ್ ಮತದಾನ ಆತ್ಂಡ್.

ಮೇ 14-24: ಕುಲಶೇಖರ ಶ್ರೀ ವೀರನಾರಾಯಣ ದೈವೊಲ್ಯಡ್ ಬ್ರಹ್ಮಕಲಶ ಉಚ್ಚಯ

ಕುಡ್ಲ: ಕುಲಶೇಖರ ಶ್ರೀ ವೀರನಾರಾಯಣ ದೈವೊಲ್ಯಡ್ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶ ಉಚ್ಚಯ ಮೇ14-24 ಮುಟ್ಟ ನಡಪರೆ ಉಂಡು.

ಕ್ಷೇತ್ರದ ತಂತ್ರಿಲು ಅನಂತ ಉಪಾಧ್ಯಾಯ ಮೆರೆನ ಮುತಾಲಿಕೆಡ್ ಈ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನ ನಡಪರೆ ಉಂಡು.

ಮೇ14 ಐತಾರ ಬೊಲ್ಪುಗು ಗಣಯಾಗ, ಉಗ್ರಾಣ ಮೂರ್ತ, ಬಯ್ಯಗ್ ಪುದೆಕಾಣಿಕೆ ಮೆರೆವಣಿಗೆಡ್ ಕೊನೊಯೆರೆ ಉಂಡು.

ಮೇ21 ಐತಾರ ಬೊಲ್ಪುಗು ಶ್ರೀ ವೀರನಾರಾಯಣ ದೇವೆರೆನ ಪ್ರತಿಷ್ಠೆ, 108 ತಾರಾಯಿದ ಗಣಪತಿ ಹೋಮ, ಶ್ರೀ ಮಹಾಗಣಪತಿ ದೇವೆರೆನ ಪ್ರತಿಷ್ಠೆ, ಕಲಶಾಭಿಷೇಕ, ಮಹಾಪೂಜೆ, ಮಧ್ಯಾಹ್ನ ಪುತ್ತೂರ್ ಜಗದೀಶ್ ಆಚಾರ್ಯ ಬೊಕ್ಕ ಕೂಟದಕ್ಲೆರ್ದ್ ಸಂಗೀತ ಗಾನ ಸಂಭ್ರಮ, ಬಯ್ಯಗ್ ಕವಾಟ ಬಂಧನ, ಸಭಾ ಲೇಸ್ ನಡಪರೆ ಉಂಡು.

ಮೇ 22 ಸೋಮಾರ ಬೊಲ್ಪುಗು ಆಶ್ಲೇಷಾ ಬಲಿ, ನಾಗಪ್ರತಿಷ್ಠೆ, ದೈವ ಪ್ರತಿಷ್ಠೆ, ಗಣಪತಿ ದೇವೆರೆಗ್ 108 ಪರಿಕಲಶದ ಬ್ರಹ್ಮಕಲಶಾಭಿಷೇಕ, ಮಧ್ಯಾಹ್ನ ಭಜನೆ, ಬಯ್ಯಗ್ ನಾಗತನುತರ್ಪಣ ಪ್ರಸನ್ನ ಪೂಜೆ, ಬೊಕ್ಕ ಮಸ್ಕಿರಿ ಕುಡ್ಲ ಕೂಟದ ತುಳುನಾಡ ಕಲಾಬಿರ್ಸೆ ದೀಪಕ್ ರೈ ಪಾಣಾಜೆ, ಜೆ.ಪಿ ತುಮಿನಾಡ್, ಪಿಕ್ಚರ್ ನಟೆ ಪ್ರಕಾಶ್ ತುಮಿನಾಡ್, ರಾಜೇಶ್ ಮುಗುಳಿ ಅಭಿನಯದ ತೆಲಿಕೆ ಬಂಜಿನಿಲಿಕೆ ಕಾಮಿಡಿ ಶೋ, ಅವೆರ್ದ್ ಬೊಕ್ಕ ಸಭಾ ಲೇಸ್ ನಡಪರೆ ಉಂಡು.

ಅಂಚೆನೆ ಮೇ16-24‌ ಮುಟ್ಟ ಪ್ರತೀ ದಿನಲ ಬೊಲ್ಪುಗು ಗಣಹೋಮ ಮಧ್ಯಾಹ್ನ ಮಹಾಪೂಜೆ, ಬೊಕ್ಕ ಬಯ್ಯಗ್ ಶ್ರೀ ದುರ್ಗಾ ನಮಸ್ಕಾರ ಪೂಜೆ ನಡಪರೆ ಉಂಡು.

ಬೊಕ್ಕ ಮೇ15-24 ಮುಟ್ಟ ಪ್ರತೀ ದಿನಲ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನಸಂತರ್ಪಣೆ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಪ್ರಸಾದ ದೆತೊಂದು, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಬಿ.ಪ್ರೇಮಾನಂದ ಕುಲಾಲ್ ಕೋಡಿಕಲ್, ಗೌರವಾಧ್ಯಕ್ಷೆರ್ ಮಯೂರ್ ಉಳ್ಳಾಲ್, ಗೌರವ ಸಲಹೆಗಾರೆರ್ ಪುರುಷೋತ್ತಮ ಕುಲಾಲ್ ಕಲ್ಬಾವಿ, ದಾಮೋದರ ಎ., ಸಂಚಾಲಕೆರ್ ಕೆ.ಸುಂದರ ಕುಲಾಲ್ ಶಕ್ತಿನಗರ, ಗೀತಾ ಮನೋಜ್ ಮರೋಳಿ ಲೆಪ್ಪೋಲೆಡ್ ತೆರಿಪಾದೆರ್.

ಬೆಂದೂರ್ ದ ಸಂತ ಸಬೆಸ್ಟಿಯನ್ ಹಿ.ಪ್ರಾ. ಶಾಲೆಡ್ ವೋಟು ಪಾಡಿನ ಕಾಂಗ್ರೆಸ್ ಅಭ್ಯರ್ಥಿ ಜೆ.ಆರ್ ಲೋಬೊ

ರಾಜ್ಯ ವಿಧಾನಸಭೆತ್ತ ಸಾರ್ವತ್ರಿಕ ವೋಟುಗು ಸಂಬಂಧಪಟ್ಟಿನಂಚೆನೆ ಜಿಲ್ಲೆದ 8 ವಿಧಾನಸಭೆ ಕ್ಷೇತ್ರಡ್ ವೋಟು ಇನಿ ಬೊಲ್ಪುಗು ಸುರು ಆತ್ಂಡ್.

ಕುಡ್ಲ ದಕ್ಷಿಣ ವಿಧಾನಸಭೆ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಜೆ.ಆರ್ ಲೋಬೊ ಪೇಂಟೆದ ಬೆಂದೂರ್ ದ ಸಂತ ಸಬೆಸ್ಟಿಯನ್ ಹಿ.ಪ್ರಾ. ಶಾಲೆಡ್ ವೋಟು ಪಾಡಿಯೆರ್.

ಲೇಡಿಹಿಲ್‌ ಉರ್ವ ಶಾಲೆಡ್ ವೋಟು ಪಾಡಿನ ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್‌ ಕುಮಾರ್‌ ಕಟೀಲ್

ಕುಡ್ಲ: ರಾಜ್ಯ ಇಡೀ ಇನಿ ವಿಧಾನಸಭೆ ವೋಟು ನಡತ್ಂಡ್.

ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್‌ ಕುಮಾರ್‌ ಕಟೀಲ್‌ ಮೇರ್ ಲೇಡಿಹಿಲ್‌ ಉರ್ವಡ್ ಇಪ್ಪುನ ಸಂತ ಅಲೋಶಿಯಸ್‌ ಆಂಗ್ಲ ಮಾಧ್ಯಮ ಹಿರಿಯ ಪ್ರಾಥಮಿಕ ಶಾಲೆಡ್ ವೋಟು ಪಾಡಿಯೆರ್.

ಬೊಡೆದಿ, ಮಗಲೆನೊಟ್ಟಿಗೆ ವೋಟು ಪಾಡಿನ ಸಚಿವೆರ್ ಸುನಿಲ್‌ ಕುಮಾರ್

ಒಡಿಪು: ರಾಜ್ಯ ಇಡೀ ವಿಧಾನಸಭೆ ವೋಟು ಇನಿ ಬೊಲ್ಪುಗು ಸುರು ಆತ್ಂಡ್.

ಸಚಿವೆರ್ ಸುನಿಲ್‌ ಕುಮಾರ್‌ ಮೇರ್ ಬೊಡೆದಿ, ಮಗಲೆನೊಟ್ಟಿಗೆ ನಿಟ್ಟೆ ಗ್ರಾಮದ ಕಲಂಬಾಡಿ ಪದವು ಶಾಲೆಡ್ ವೋಟು ಪಾಡಿಯೆರ್.

ಕುಟುಂಬಸ್ಥೆರೆನೊಟ್ಟಿಗೆ ಬತ್ತ್ ದ್ ವೋಟು ಪಾಡಿನ ವಿನಯ್ ಕುಮಾರ್ ಸೊರಕೆ

ಒಡಿಪು: ರಾಜ್ಯ ಇಡೀ ಇನಿ ವಿಧಾನಸಭೆ ವೋಟು ನಡತ್ಂಡ್.

ಕಾಪು‌ ಕ್ಷೇತ್ರದ‌ ಕಾಂಗ್ರೆಸ್ ಅಭ್ಯರ್ಥಿ ವಿನಯ್ ಕುಮಾರ್ ಸೊರಕೆ ಕುಟುಂಬಸ್ಥೆರೆನೊಟ್ಟಿಗೆ ಇಲ್ಲಲ್ ರ್ದ್ ಅಜ್ಜರಕಾಡು ಬೂತ್ ಮುಟ್ಟ ನಡತೊಂದು ಬತ್ತ್ ದ್ ಸಾಲ್ ಡ್ ಉಂತುದು ವೋಟು ಪಾಡಿಯೆರ್.

ಬೊಕ್ಕ ಮೇರ್ ಪಾತೆರ್ದ್, ಯಾನ್ ಕಾಪು ಕ್ಷೇತ್ರಗ್ ಮಲ್ತಿನ ಪ್ರಾಮಾಣಿಕ ಸೇವೆ ಅಭಿವೃದ್ಧಿಲು ಎನ್ನ ಕೈ ಪತ್ತ್ ದ್ಂಡ್. ಕಾಪು ಕ್ಷೇತ್ರಡ್ ಪ್ರಜ್ಞವಂತ ಮತದಾರೆರ್ ಉಲ್ಲೆರ್. ಈ ಸರ್ತಿ ಜನಕುಲು ಯಾನನ್ ಆಯ್ಕೆ ಮಲ್ಪುವೆರ್ ಪನ್ಪುನ ನಂಬಿಕೆ ಉಂಡು ಪಂದ್ ಪಂಡೆರ್.

ಕುಟುಂಬ ಸಮೇತೆರಾದ್ ವೋಟು ಪಾಡಿನ ಸಿಎಂ ಬೊಮ್ಮಾಯಿ

ಶಿಗ್ಗಾಂವಿ: ರಾಜ್ಯ ಇಡೀ ಇನಿ ವಿಧಾನಸಭೆ ವೋಟುಗು ಬೊಲ್ಪುಗು ಸುರು ಆತ್ಂಡ್.

ಶಿಗ್ಗಾಂವಿ ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ, ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮೇರ್ ಹಾವೇರಿ ಜಿಲ್ಲೆದ ಶಿಗ್ಗಾಂವಿ ಸರಕಾರಿ ಕನ್ನಡ ಹಿರಿಯ ಮಾದರಿ ಪ್ರಾಥಮಿಕ ಶಾಲೆಡ್ ಕುಟುಂಬ ಸಮೇತೆರಾದ್ ವೋಟು ಪಾಡಿಯೆರ್.

ಉರ್ವದ ಗಾಂಧಿನಗರ ಶಾಲೆಡ್ ವೋಟು ಪಾಡಿನ ಬಿಜೆಪಿ ಅಭ್ಯರ್ಥಿ ವೇದವ್ಯಾಸ್ ಕಾಮತ್

ಕುಡ್ಲ: ವಿಧಾನಸಭೆ ವೋಟು ಇನಿ ರಾಜ್ಯ ಇಡೀ ಬೊಲ್ಪುರ್ದೆ ನಡತೊಂದು ಉಂಡು.

ಕುಡ್ಲ ದಕ್ಷಿಣ ಬಿಜೆಪಿ ಅಭ್ಯರ್ಥಿ ವೇದವ್ಯಾಸ್ ಕಾಮತ್ ಮೇರ್ ಉರ್ವದ ಗಾಂಧಿನಗರ ಶಾಲೆಡ್ ವೋಟು ಪಾಡಿಯೆರ್.

ತೋಕೂರು ಬ್ರಹ್ಮಕಲಶ ಉಚ್ಚಯೊಗು ಚಾಲನೆ, ಉಗ್ರಾಣ ಮೂರ್ತ, ಪುದೆ ಕಾಣಿಕೆ ಸಮರ್ಪಣೆ

ಶ್ರೀ ಸುಬ್ರಹ್ಮಣ್ಯನ ಶಕ್ತ್ಯಾಯುಧರ್ದ್ ಗ್ರಾಮದ ರಕ್ಷಣೆ : ವಿದ್ಯಾಧೀಶ ತೀರ್ಥ ಸ್ವಾಮೀಜಿ

ತೋಕೂರು : ದೇವೆರ್ನ ಪ್ರಗತಿ ಗ್ರಾಮದ ಅಭಿವೃದ್ಧಿದ ಸಂಕೇತವಾದುಂಡು. ಪತ್ತೆರ್ ಶ್ರದ್ಧೆ ಭಕ್ತಿಡ್ ಸಂದಾವುನ ಸೇವೆರ್ದ್ ಭಗವಂತನ ಕೃಪೆ ಆಯಿನಾತ್ ಬೇಗ ತಿಕ್ಕುಂಡು. ಶ್ರೀ ಸುಬ್ರಹ್ಮಣ್ಯನ ಶಕ್ತ್ಯಾಯುಧ ಗ್ರಾಮದ ರಕ್ಷಣೆಗಾದ್ ಉಪ್ಪುನವು. ಸುಭಿಕ್ಷೆರ್ದ್ ದಿಂಜಿದಿಪ್ಪುನ ಸಮಾಜ ನಿರ್ಮಾಣ ಮಲ್ಪುನ ಜಬದಾರಿ ಧಾರ್ಮಿಕ ಕ್ಷೇತ್ರಲೆರ್ದ್ ನಿರಂತರ ನಡತ್ ಬರೊಡು. ಭಕ್ತೆರ್ ಲ ದೇವಳದ ಪ್ರಗತಿಗ್ ಪ್ರಾಮಾಣಿಕವಾದ್ ಬೇಲೆ ಮಲ್ಪೊಡು ಪಂದ್ ಒಡಿಪು ಪಲಿಮಾರು ಶ್ರೀ ಹೃಷಿಕೇಶ ತೀರ್ಥ ಮೂಲ ಮಹಾ ಸಂಸ್ಥಾನದ ವಿದ್ಯಾಧೀಶ ತೀರ್ಥ ಸ್ವಾಮೀಜಿ ತೆರಿಪಾಯೆರ್.

ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ದೇವಸ್ಥಾನದ ಪುನಃಪ್ರತಿಷ್ಠೆ ಬ್ರಹ್ಮಕುಂಭಾಭಿಷೇಕ ಅಂಚೆನೆ ನಾಗಮಂಡಲ ಉಚ್ಚಯದ ನಿಲೆಟ್ಟ್ ಬುಧಾರ (ಮೇ 10) ನಡತಿನ ತೋರಣ ಮೂರ್ತಗ್ ಚಾಲನೆ ಕೊರ್ದು ಆರ್ ಪಾತೆರಿಯೆರ್.

ಕಟೀಲು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಅನುವಂಶಿಕ ಮೊಕ್ತೇಸರೆರ್ ವೇದಮೂರ್ತಿ ವಾಸುದೇವ ಆಸ್ರಣ್ಣ ಮೇರ್ ಅನ್ನಸಂತರ್ಪಣೆಗ್ ಉಗ್ರಾಣ ಮೂರ್ತ ಮಲ್ತ್ ದ್ ಆಶೀರ್ವಚನ ಕೊರಿಯೆರ್.

ಮೂಲ್ಕಿ ಸೀಮೆದ ಅರಸೆರ್ ಎಂ. ದುಗ್ಗಣ್ಣ ಸಾವಂತೆರ್ ಗುರ್ಕಾರ್ಮೆ ಒಯಿಸ್ ದಿತ್ತೆರ್.

ಈ ಪೊರ್ತುಡು ಸಾಮೂಹಿಕ ದೇವತಾ ಪ್ರಾರ್ಥನೆ, ಪುಣ್ಯಾಹ ವಾಹನ, ದೇವನಾಂದಿ, ಅಚಾರ್ಯಾದಿ ಋತ್ವಿಗ್ವರಣ, ಅರಣಿಮಥನ, ಭದ್ರದೀಪ ಪ್ರತಿಷ್ಠೆ, ಗಣಯಾಗ, ಕಂಕಣಬಂಧ, ಚತುರ್ವೇದ ನಾರಾಯಣ ಸುರುವಾದ್ , ಮಹಾಪೂಜೆ, ಪ್ರಸಾದ ವಿತರಣೆ ನಡತ್ಂಡ್.

ದೇವಸ್ಥಾನದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲು ಪಾತೆರ್ದ್, ಧಾರ್ಮಿಕ ಚಿಂತಕೆರ್ ವಿದ್ವಾನ್ ಪಂಜ ಭಾಸ್ಕರ ಭಟ್, ಅರ್ಚಕೆರ್ ಮಧುಸೂಧನ ಆಚಾರ್ಯ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಉಪಾಧ್ಯಕ್ಷೆರ್ ಮೋಹನ್‌ದಾಸ್, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾಯಿನ ವಿಜಯಕುಮಾರ್ ರೈ, ಟಿ. ಪುರುಷೋತ್ತಮ ರಾವ್, ಲೋಕಯ್ಯ ಕೆ. ಸಾಲ್ಯಾನ್, ವಿಪುಲ ಡಿ. ಶೆಟ್ಟಿಗಾರ್, ಶಾರದಾ ಜಿ. ಬಂಗೇರ, ವಿಶ್ವನಾಥ್, ಯೋಗೀಶ್ ಆರ್. ಕೋಟ್ಯಾನ್, ಬ್ರಹ್ಮಕಲಶೋತ್ಸವ ಸಮಿತಿದ ಅನಂತರಾಮ ಶಿಮಂತ್ರಾಯ, ಪಿ.ಸಿ.ಕೋಟ್ಯಾನ್, ಆರ್.ಎನ್.ಶೆಟ್ಟಿಗಾರ್, ಗಂಗಾಧರ ಶೆಟ್ಟಿ, ಗುರುರಾಜ್ ಎಸ್. ಪೂಜಾರಿ, ರತ್ನಾಕರ ಶೆಟ್ಟಿಗಾರ್, ಮಧವ ಶೆಟ್ಟಿ, ಪೀತಾಂಬರ ಶೆಟ್ಟಿಗಾರ್, ಸಂಪತ್ ದೇವಾಡಿಗ, ದೀಪಕ್ ಸುವರ್ಣ, ಧನಂಜಯ ಶೆಟ್ಟಿಗಾರ್, ರಮೇಶ್ ದೇವಾಡಿಗ ಇತ್ತೆರ್.
ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ಕುಮಾರ್ ಹೆಗ್ಡೆ ಮಾತೆರೆನ್ಲ ಎದ್ಕೊಂಡೆರ್.

ಪ್ರಧಾನ ಸಂಚಾಲಕೆರ್ ಸೋಂದಾ ಭಾಸ್ಕರ ಭಟ್ ಪ್ರಸ್ತಾವನೆ ಮಲ್ದೆರ್.

ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಸೊಲ್ಮೆ ಸಂದಾಯೆರ್. ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ ಲೇಸ್ ಸುಧಾರಿಕೆ ಮಲ್ತೆರ್.

ಭಾರಿ ಗೌಜಿಡ್ ಪುದೆ ಕಾಣಿಕೆ ಸಮರ್ಪಣೆ

ದೇವಸ್ಥಾನಡ್ ನಡಪುನ ಅನ್ನಸಂತರ್ಪಣೆಗ್ ತೋಕೂರು ಗ್ರಾಮಸ್ಥೆರೆರ್ದ್ ಮಲ್ಲ ಮಟ್ಟ್ ದ ಪುದೆ ಕಾಣಿಕೆದ ಸಂದಾಯೆರ್. ಮಲ್ಲ ಸಂಖ್ಯೆಡ್ ಬತ್ತಿನ ಭಕ್ತೆರ್ 3.5 ಕ್ವಿಂಟಾಲ್ ಅರಿ, ಒಂಜಿ ಕ್ವಿಂಟಾಲ್ ಬೆಲ್ಲ, 1700 ತಾರಾಯಿ, 100 ಕೆ.ಜಿ. ಸಕ್ಕರೆ, 150 ಕೆ.ಜಿ ತೊಗರಿ ಬೇಳೆ ಅತ್ತಾಂದೆ ಗುಜ್ಜೆ, ಬಾರೆದ ಇರೆ, ಬಾರೆದ ಪರ್ಂದ್, ಕರ್ ಕುಂಬುಡ, ಕೆರೆಂಗ್ , ಸಿಹಿ ಕುಂಬಳ,ತುರೆ, ಬದನೆ, ಪದೆಂಗಿ ಬೇಳೆ, ದ್ರಾಕ್ಷಿ, ಗೋಡಂಬಿ, ದೀಪದ ಎಣ್ಣೆ,ಉಪ್ಪು ಇಂಚ ಬೇತೆ ಬೇತೆ ಬಗೆತ್ತ ಪುದೆ ಕಾಣಿಕೆನ್ ಗೌಜಿದ ಮೆರವಣಿಗೆಡ್ ಕನತ್ ಕೊರಿಯೆರ್.

ದಕ್ಷಿಣ ಕನ್ನಡ ಜಿಲ್ಲೆಡ್ ಶೇ.57.48%,ವೋಟು

ಕುಡ್ಲ: ಇನಿ ವೋಟುದ ಪ್ರಕ್ರಿಯೆ ಬೊಲ್ಪುಗೇ ಸುರು ಆತ್ಂಡ್. ರಾಜ್ಯದ 224 ವಿಧಾನಸಭೆ ಕ್ಷೇತ್ರಡ್ ವೋಟು ನಡತೊಂದು ಉಂಡು.

ದಕ್ಷಿಣಕನ್ನಡಡ್ ಮಧ್ಯಾಹ್ನ 3 ಗಂಟೆ ಮುಟ್ಟ ಶೇ.57.48% ದಾತ್ ವೋಟು ಪಾಡ್ದೆರ್ ಪಂದ್ ಚುನಾವಣಾ ಆಯೋಗ ಪೊಲಬು ಕೊರ್ತುಂಡು.

ಬೊಲ್ತೇರ್-59.26%, ಕುಡ್ಲ-57.32%, ಕುಡ್ಲ ಉತ್ತರ- 55.15%, ಕುಡ್ಲ ದಕ್ಷಿಣ 49.29%, ಬೆದ್ರ-57.12%, ಬಂಟ್ವಾಳ- 61.63%, ಸುಳ್ಯ-59.95%, ಪುತ್ತೂರ್-61.45% ದಾತ್ ಮತದಾನ ಆತ್ಂಡ್.