ತೋಕೂರು: ಶ್ರೀ ಸುಬ್ರಾಯ ದೇವೆರ್ನ ಪುಣ್ಯದ ನಡೆ ಶ್ರೀ ತೋಕೂರು ಸುಬ್ರಹ್ಮಣ್ಯ ದೇವಲ್ಯಡ್ ಮೇ 23 ಕ್ಕ್ ಭಾರಿ ಶ್ರದ್ಧಾ ಭಕ್ತಿಡ್ ನಾಗಮಂಡಲ ಉಚ್ಚಯ ನಡತ್ಂಡ್.
ತುಳುನಾಡ ಪುಗರ್ತೆದ ನಾಗಪಾತ್ರಿ ಸಗ್ರಿ ಗೋಪಾಲಕೃಷ್ಣ ಸಾಮಗೆರ್ ಬೊಕ್ಕ ಮುದ್ದೂರು ಕೃಷ್ಣಪ್ರಸಾದ್ ವೈದ್ಯೆರ್ನ ಕೂಟದಕುಲು ನಾಗ ದೇವೆರ್ ಬೊಕ್ಕ ನಾಗಕನ್ನಿಕೆ ನರ್ತನದ ಒರುಟ್ಟು ಉಚ್ಚಯೊನು ನಡಪಾದ್ ಕೊರಿಯೆರ್.
ಬೊಲ್ಪುಗು ದೇವಲ್ಯದ ನಾಗಸನ್ನಿಧಿಡ್ ಪ್ರಾಯಶ್ಚಿತ್ತ ಪೂರ್ವಕ ಕಲಶಾಧಿವಾಸ, ಅಧಿವಾಸ ಹೋಮ, ಕಲಶಾಭಿಷೇಕ ಹೋಮ, ಮಹಾಪೂಜೆ, ಬ್ರಾಹ್ಮಣ ಸುವಾಸಿನಿ ವಟು ಆರಾಧನೆ, ಅನ್ನಸಂತರ್ಪಣೆ ನಡತ್ಂಡ್. ಬಯ್ಯಡ್ ದೀಪಾರಾಧನೆ, ನಾಗಸನ್ನಿಧಿಡ್ ಹಾಲ್ಹಿಟ್ಟು ಸೇವೆ ನಡತ್ಂಡ್.
ಈ ಪೊರ್ತುಡು ಕ್ಷೇತ್ರದ ತಂತ್ರಿಲು ಶಿಬರೂರು ಗೋಪಾಲಕೃಷ್ಣ ತಂತ್ರಿಲು, ಅರ್ಚಕೆರ್ ಟಿ.ಕೆ. ಮಧುಸೂದನ ಆಚಾರ್ಯ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಡಾ.ಹರಿಕೃಷ್ಣ ಪುನರೂರು, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್ ಕುಮಾರ್ ಹೆಗ್ಡೆ, ಕಾರ್ಯದರ್ಶಿ ರಾಮಣ್ಣ ದೇವಾಡಿಗ ಬೊಕ್ಕ ಮಾತ ಸಮಿತಿದ ಸರ್ವ ಸದಸ್ಯೆರ್, ಊರು ಪರವೂರುದ ಭಕ್ತೆರ್ ಭಾರಿ ಸಂಖ್ಯೆಡ್ ಸೇರ್ದ್ ಕ್ಷೇತ್ರಡ್ 36 ವರ್ಷೊರ್ದು ಬೊಕ್ಕ ನಡತಿನ ನಾಗಮಂಡಲ ಉಚ್ಚಯೊಗು ಸಾಕ್ಷಿ ಆಯೆರ್.
pallavi shetty