ಏಪಮುಟ್ಟ ನಮ ಧರ್ಮೊನು ಒರಿಪಾವನ ಅದಮುಟ್ಟ ನಮನ್ ಧರ್ಮ ಒರಿಪಾವುಂಡು: ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮೀಜಿ

ತೋಕೂರು ಬ್ರಹ್ಮಕಲಶ, ನಾಗಮಂಡಲ ಉಚ್ಚಯದ ಅಕೇರಿದ ಧರ್ಮ ಸಭೆ

ಧರ್ಮ ಪನ್ಪಿನವು ಶ್ರೇಷ್ಠ. ಅಯಿಕ್ಕಾದೇ ಸುರೂತ್ತ ಮುಟ್ಟು. ಅರ್ಥ, ಕಾಮ ಇಂಚಿನೆಕ್ಕ್ ಮಾತ ತಿರ್ತ್ ದ ಮುಟ್ಟು. ಏತ್ ಸಮಯ ನಮ ಧರ್ಮೊನ್ ಒರಿಪಾವನ ಅದಮುಟ್ಟ ನಮನ್ ಧರ್ಮ ಒರಿಪಾವುಂಡು ಪಂದ್ ಶ್ರೀ ಕ್ಷೇತ್ರ ಸುಬ್ರಹ್ಮಣ್ಯ ಮಠತ್ತ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮೀಜಿ ಪಂಡೆರ್.

ಆರ್ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ಉಚ್ಚಯದ ಅಕೇರಿದ ಧರ್ಮಸಭೆಟ್ಟ್ ಅನುಗ್ರಹ ಸಂದೇಶ ಕೊರ್ದು ಪಾತೆರಿಯೆರ್.

ಶಿಸ್ತುಬದ್ಧ ಬದ್ ಕ್ ಒಂಜಿ ಕಡೆಟ್ಟ್ ಆಂಡ ಹೈಫೈ ಬದ್ ಕ್ ಬೊಕ್ಕೊಂಜಿ ಕಡೆಟ್ಟ್ ಆವೊಂದುಪ್ಪುಂಡು. ಆಂಡ ಹೈಫೈ ಬದ್ ಕ್ ಎಚ್ಚ ದಿನ ಬರ್ಪುಜಿ. ಭಾರತೀಯ ಸಂಸ್ಕೃತಿ ಪಂಡ ನೀರ್ ಇತ್ತಿಲೆಕ. ಹೈಫೈ ಸಂಸ್ಕೃತಿ ಪಂಡ ಪೇರ್ ದ ಲೆಕ್ಕ. ಮೀನ್ ನ್ ಪೇರ್ ಪಾಡ್ಂಡ ಬದುಕುಜಿ, ನೀರ್ ಗೇ ಪಾಡೊಡು. ಮರೆ ದಾಂತೆ ಇರೆ ಇಜ್ಜಿ. ಇರೆ ದಾಂತೆ ಮರೆ ಇಜ್ಜಿ . ಅಂಚೆನೆ ಧರ್ಮ ದಾಂತೆ ನಮ ಉಪ್ಪರೆ ಸಾಧ್ಯ ಇಜ್ಜಿ. ನಮ ದಾಂತೆ ಧರ್ಮ ಒರಿಪುಜಿ ಪಂದ್ ಆರ್ ಪಂಡೆರ್.

ಜ್ಯೋತಿಷಿ ವೇದಮೂರ್ತಿ ಕೊಲೆಕಾಡಿ ವಾದಿರಾಜ ಉಪಾಧ್ಯಾಯ ಮೇರ್ ನಾಗಮಂಡಲ- ನಾಗಾರಾಧನೆ ವಿಚಾರೊಡು ಉಪನ್ಯಾಸ ಕೊರ್ದು ಸರ್ಪೆ ಬೇತೆ ನಾಗೆ ಬೇತೆ ಪಂದ್ ಪೊಲಬು ಕೊರಿಯೆರ್.

ನಾಗಪಾತ್ರಿ ಸಗ್ರಿ ಶ್ರೀ ಗೋಪಾಲಕೃಷ್ಣ ಸಾಮಗೆರ್ ವಿಶೇಷ ಬಿನ್ನೆರಾದ್ ಬತ್ತಿತ್ತೆರ್.

ಈ ಪೊರ್ತುಡು ಪಾಕತಜ್ಞೆರ್ ಪಾವಂಜೆ ವೆಂಕಟೇಶ್ ಭಟ್, ಬ್ರಹ್ಮವಾಹಕೆರ್ ಪಾವಂಜೆ ಅಚ್ಯುತ ಭಟ್, ಎಲ್ಲೂರು ವಿಷ್ಣುಮೂರ್ತಿ ಭಟ್,ಕುಲಾಲ್ ಕುಟುಂಬಸ್ಥೆರ್ ಮೊಕ್ಲೆನ ಮಾನಾದಿಗೆ ನಡತ್ಂಡ್. ಹಿಂದೂ ಮುಖಂಡ ಅರುಣ್ ಪುತ್ತಿಲ ಮೆರೆಗ್ ನೆಂಪು ಕಾಣಿಕೆ ಕೊರಿಯೆರ್.

ಮಲ್ಲ ಬಿನ್ನೆರಾದ್ ಮಾಜಿ ಸಚಿವೆರ್ ನಾಗರಾಜ್ ಶೆಟ್ಟಿ, ಕಬಡ್ಡಿ ಆಟಗಾರೆ ರಿಷಾಂತ್ ದೇವಾಡಿಗ, ವಕೀಲೆರ್ ಶಶಿರಾಜ್ ಕಾವೂರು, ಡಾ.ವಿಶಾಲ್, ಉದ್ಯಮಿ ರವಿ ದೇವಾಡಿಗ ಮುಂಬೈ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಕನ್ನಡಸಾಹಿತ್ಯ ಪರಿಷತ್ ದ ಮಾಜಿ ಜಿಲ್ಲಾಧ್ಯಕ್ಷೆರ್ ಪ್ರದೀಪ್ ಕುಮಾರ್ ಕಲ್ಕೂರ, ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ವ್ಯವಸ್ಥಾಪನ ಸಮಿತಿದ ಸದಸ್ಯೆರ್ ಪುರುಷೋತ್ತಮ ರಾವ್, ವಿಜಯಕುಮಾರ್ ರೈ, ಯೋಗೀಶ್ ಕೋಟ್ಯಾನ್,
ಎಲ್. ಕೆ. ಸಾಲ್ಯಾನ್ ಇತ್ತೆರ್.

ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್ ಹೆಗ್ಡೆ ಬಿನ್ನೆರೆನ್ ಎದ್ಕೊಂಡೆರ್. ಕಾರ್ಯದರ್ಶಿ ರಾಮಣ್ಣ ದೇವಾಡಿಗ ಪ್ರಸ್ತಾವಿಕವಾದ್ ಪಾತೆರಿಯೆರ್. ಹೇಮಂತ್ ಸಭೆ ಸುಧಾರಿಕೆ ಮಲ್ತೆರ್. ವ್ಯವಸ್ಥಾಪನ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಸೊಲ್ಮೆ ಸಂದಾಯೆರ್.