ಬೆದ್ರ: ತುಳು ಕೂಟ (ರಿ.) ಬೆದ್ರ ನೆತ್ತ ಕಾರ್ಯಾಲಯನ್ ಸ್ಕೌಟ್ ಗೈಡ್ಸ್ ದ ಕನ್ನಡಭವನಡ್ ಅಖಿಲ ಭಾರತ ತುಳು ಕೂಟ (ರಿ.) ಕುಡ್ಲ ನೆತ್ತ ಅಧ್ಯಕ್ಷೆರ್ ಎ.ಸಿ.ಭಂಡಾರಿ ಐತಾರ ಉದಿಪನ ಮಲ್ತೆರ್.
ಬೊಕ್ಕ ಪಾತೆರ್ನ ಮೇರ್ ತುಳುನಾಡ್ ದಕಲೆಗ್ ರಡ್ಡ್ ಅಪ್ಪೆನಕುಲು. ಒಂಜಿ ಕನ್ನಡ ಅಮ್ಮ, ಕುಡೊಂಜಿ ತುಳುಅಪ್ಪೆ. ಭಾಷೆಗ್ ಒವ್ವೇ ಜಾತಿ-ಭೇದ, ಪಕ್ಷ-ಭೇದ ಇಜ್ಜಿ. ಏರ್ ತುಳು ಪಾತೆರುವೆರಾ, ಏರೆಗ್ ತುಳುತ್ತ ಮಿತ್ತ್ ಅಭಿಮಾನ ಉಂಡ ಅಕುಲು ತುಳುವೆರ್ ಪಂದ್ ಪಂಡೆರ್.
ಮೂಲು ತುಳು ಸಂಸ್ಕೃತಿ ಗ್ರಾಮನ್ ಮಲ್ಪರೆ ಅಖಿಲ ಭಾರತ ತುಳು ಒಕ್ಕೂಟ ಬೆನೊಂದುಂಡು. ಇತ್ತೆನೇ 1 ಎಕ್ರೆ ಜಾಗನ್ ದೆತೊಂದುಂಡು. ಆಂಡ ತುಳು ಗ್ರಾಮಡ್ ನನದ ಪೀಳಿಗೆಗ್ ತುಳುನಾಡ್ ದ ಚರಿತ್ರೆ, ಆಚಾರ ಇಚಾರದ ಬಗೆಟ್ ತೆರಿಪಾವುನ ಬೇಲೆ ಆವೊಡು. ಅಯಿಕ್ಕಾದ್ 10 ಎಕ್ರೆದಾತ್ ಜಾಗೆ ಬೋಡು ಪಂದ್ ಪಂಡೆರ್. ಅತ್ತಂದೆ ಭಾಷೆ ಒರಿಂಡ ಸಂಸ್ಕೃತಿ ಒರಿಪುಂಡು. ಅಂಚೆನೆ ಸಂಸ್ಕೃತಿ ಒರಿಂಡ ಭಾಷೆ ಒರಿಪುಂಡು. ಈ ದಿಟ್ಟಿಡ್ ತುಳು ಭಾಷೆದಕ್ಲೆನ್ ಒಟ್ಟು ಸೇರ್ಸಾದ್ ತುಳು ಭಾಷೆನ್ ಗಟ್ಟಿ ಮಲ್ಪೊಡು ಪಂದ್ ಪಂಡೆರ್.
ಈ ಲೇಸ್ ದ ಗುರ್ಕಾರ್ಮೆನ್ ತುಳುಕೂಟ ಬೆದ್ರದ ಅಧ್ಯಕ್ಷೆರ್ ಧನಕೀರ್ತಿ ಬಲಿಪ ಒಯಿಸ್ ದಿತ್ತೆರ್. ಈ ಪೊರ್ತುಡು ಅಖಿಲ ಭಾರತ ತುಳು ಕೂಟ(ರಿ.) ಕುಡ್ಲ ನೆತ್ತ ಕೋಶಾಧಿಕಾರಿ ಚಂದ್ರಹಾಸ ದೇವಾಡಿಗ, ಬೆದ್ರ ತುಳುಕೂಟದ ಕಾರ್ಯದರ್ಶಿ ವೇಣುಗೋಪಾಲ ಶೆಟ್ಟಿ, ತುಳು ಸಾಹಿತಿ ಜಯಂತಿ ಎಸ್ ಬಂಗೇರ, ಬೊಕ್ಕ ರಾಜೇಶ್ ಆಳ್ವ ಇತ್ತೆರ್. ಜತೆ ಕಾರ್ಯದರ್ಶಿ ಸದಾನಂದ ನಾರಾವಿ ಲೇಸ್ ನ್ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.
pallavi shetty