ಮೇ19: ಒಮಾನ್ ಡ್ “ಸ್ವಾಮಿ ಕೊರಗಜ್ಜ”, “ಶ್ರೀ ಶನೀಶ್ವರ ಮಹಾತ್ಮೆ” ತುಳು ಯಕ್ಷಗಾನ ತಾಳ ಮದ್ದಳೆ

ಬಿರುವ ಜವನೆರ್ ಮಸ್ಕತ್ ಮೊಕುಲು ಮೇ19 ಸುಕ್ರಾರ ಮಸ್ಕತ್ ಒಮಾನ್ ಡ್ “ಸ್ವಾಮಿ ಕೊರಗಜ್ಜ ” ಬೊಕ್ಕ ” ಶ್ರೀ ಶನೀಶ್ವರ ಮಹಾತ್ಮೆ ” ತುಳು ಯಕ್ಷಗಾನ ತಾಳ ಮದ್ದಳೆನ್ ಆಯೋಜನೆ ಮಲ್ದೆರ್.

ದಾರ್ ಸೈಟ್ ಶ್ರೀ ಕೃಷ್ಣ ದೇವಲ್ಯಡ್ ಶ್ರೀ ಶನೀಶ್ವರ ಭಕ್ತ ವೃಂದ ಪಕ್ಷಿಕೆರೆ ಕುಡ್ಲ ಮೊಕ್ಲೆರ್ದ್ ನವರಸ ಇಪ್ಪುನ ರಡ್ಡ್ ತುಳು ಯಕ್ಷಗಾನ ಪ್ರಸಂಗಲು ಒಂಜೇ ದಿನ ಪ್ರದರ್ಶನ ಅವೆರೆ ಉಂಡು ಪಂದ್ ಬಿರುವ ಜವನೆರ್ ಸಂಘಟನೆದ ಮಾಧುರಿ ಸುವರ್ಣ ಸುದ್ದಿಗೋಷ್ಠಿಡ್ ತೆರಿಪಾದೆರ್.

ಮಸ್ಕತ್ ದ ಬಿರುವ ಜವನೆರ್ ಸಂಘಟನೆ ಕರಿನ ಒಂಜಿ ದಶಕರ್ದ್ ಮಸ್ಕತ್ ಡ್ ಸಾಮಾಜಿಕ, ಧಾರ್ಮಿಕ, ಸೇವಾ ಚಟುವಟಿಕೆನ್ ನಡಪಾವೊಂದು ಬೈದೆರ್. ನೇರ್ದ್ ದುಂಬು ಉಂದುವೇ ಕೂಟನ್ ಲೆತ್ತ್ ದ್, ಒಮಾನ್ ರಾಷ್ಟ್ರಡ್ ಸುರುತ್ತ ಪೂಜೆದೊಟ್ಟಿಗೆ “ಶನೀಶ್ವರ ಮಹಾತ್ಮೆ ” ಯಕ್ಷಗಾನ ತಾಳಮದ್ದಳೆನ್ ಆಯೋಜನೆ ಮಲ್ತಿನ ಕೀರ್ತಿಗ್ ಪಾತ್ರರಾತೆರ್.

ಒಮಾನ್ ಬಿಲ್ಲವಾಸ್, ಬಂಟ್ಸ್ ಓಮನ್, ವಿಶ್ವಕರ್ಮ, ಗೌಡ ಸಾರಸ್ವತ ಬ್ರಾಹ್ಮಣ, ಮೊಗವೀರ ಒಮಾನ್ ಬೊಕ್ಕ ತುಳು ಭಾಷಾ ಸಂಘಟನೆದ ಸಹಕಾರ, ಸಹಭಾಗಿತ್ವಡ್ ಈ ಲೇಸ್ ನ್ ಸಂಯೋಜನೆ ಮಲ್ಪೆರೆ ಆತ್ಂಡ್.

ಮೇ19 ಕ್ಕ್ ಬೊಲ್ಪುಗು 8.30 ರ್ದ್ 12.30 ಮುಟ್ಟ ಹರೀಶ್ ಶೆಟ್ಟಿ ಸೂಡ ರಚನೆದ “ಅಜ್ಜ ಕೊರಗಜ್ಜ” ತುಳು ತಾಳಮದ್ದಳೆ, ಬೊಕ್ಕ ಪ್ರಸಾದ ಭೋಜನ, ಅವೆರ್ದ್ ಬೊಕ್ಕ ಮಧ್ಯಾಹ್ನ 2.30 ರ್ದ್ ಬಯ್ಯ 7ಗಂಟೆ ಮುಟ್ಟ ಚಿನ್ಮಯ ದಾಸ ವಿರಚಿತ “ಶ್ರೀ ಶನೀಶ್ವರ ಮಹಾತ್ಮೆ” ವಿಕ್ರಮಾದಿತ್ಯ ಚರಿತ್ರೆ ಪನ್ಪುನ ಪುಣ್ಯ ಪ್ರಸಂಗ ಪೂಜೆದೊಟ್ಟಿಗೆ ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು.

ಕರಿನ ಮೂಜಿ ದಶಕರ್ದ್ ಶನಿ ಪೂಜೆದೊಟ್ಟಿಗೆ ತಾಳಮದ್ದಳೆನ್ ಮಸ್ಕತ್, ದುಬೈ, ಅಬುದಾಬಿ, ಬೊಂಬೈ, ಸಾಂಗ್ಲಿ ಸೇರಿನಂಚೆನೆ ದೇಶ ವಿದೇಶಡ್ ನೂದೆರ್ದ್ ಎಚ್ಚ ಲೇಸ್ ನ್ ಕೊರಿನ ಕರಾವಳಿದ ಪುಗರ್ತೆದ ಯಕ್ಷಗಾನ ಕೂಟ ಶ್ರೀ ಶನೀಶ್ವರ ಭಕ್ತ ವೃಂದ ಪಕ್ಷಿಕೆರೆ ಇತ್ತೆ ರಡ್ಡನೇ ಸರ್ತಿ ಮಸ್ಕತ್ ಡ್ ಖ್ಯಾತ ಅರ್ಥಧಾರಿಲೆನ ಸಮ್ಮಿಲನದೊಟ್ಟಿಗೆ ಲೇಸ್ ಕೊರಿಯೆರೆ ತಯಾರ್ ಆತ್ಂಡ್.

ತೆಂಕು ತಿಟ್ಟುದ ಪುಗರ್ತೆದ ಭಾಗವತೆರ್ ರವಿಚಂದ್ರ ಕನ್ನಡಿಕಟ್ಟೆ ಮೆರೆನ ಭಾಗವತಿಕೆಡ್ ರಡ್ಡ್ ಪ್ರಸಂಗಲು ಬರಿಯೆರೆ ಉಂಡು. ಹಿಮ್ಮೆಳಡ್ ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ, ಭಾಸ್ಕರ ಭಟ್ ಕಟೀಲ್ ಸಹಕಾರ ಮಲ್ಪೆರೆ ಉಲ್ಲೆರ್. ಪಕ್ಷಿಕೆರೆ ಪದ್ಮನಾಭ ಶೆಟ್ಟಿಗಾರ್ ಮೇರ್ ಕೂಟದ ಪ್ರಧಾನ ಸಂಚಾಲಕೆರಾತೆರ್.

ಅರ್ಥಧಾರಿಲಾದ್ ಕದ್ರಿ ನವನೀತ ಶೆಟ್ಟಿ, ಶ್ರೀಪತಿ ಭಟ್ ಸಸಿಹಿತ್ಲು, ವಿಜಯ ಕುಮಾರ್ ಶೆಟ್ಟಿ ಮೊಯಿಲೊಟ್ಟು, ಸೀತಾರಾಮ್ ಕುಮಾರ್ ಕಟೀಲ್, ಸದಾಶಿವ ಆಳ್ವ ತಲಪಾಡಿ, ಕಾವಳಕಟ್ಟೆ ದಿನೇಶ್ ಶೆಟ್ಟಿ, ದಯಾನಂದ ಜಿ ಕತ್ತಲ್ ಸಾರ್, ಪ್ರಸನ್ನ ಶೆಟ್ಟಿ ಅತ್ತೂರು, ಪುಷ್ಪರಾಜ ಕುಕ್ಕಾಜೆ, ರಾಮಚಂದ್ರ ಮುಕ್ಕ ಪಾಲ್ ಪಡೆಯೆರೆ ಉಲ್ಲೆರ್.

ಉಂದು ತುಳು ಭಾಷೆದ ಸೊಗಡು, ಅಜ್ಜ ಕೊರಗಜ್ಜನ ಸಂದಿ ಪಾರ್ದನದ ತಿರ್ಲ್, ಪುರಾಣ ಪುಣ್ಯ ಕತೆಕ್ಕ್ ಪೊಸ ದೇಖಿ ಕೊರ್ಪಿನ ಲೇಸ್ ಉಂದಾತ್ಂಡ್. ‌ಮಸ್ಕತ್ ಡ್ ವಾಸ ಇಪ್ಪುನ ಮಾತ ಸಮುದಾಯದ ಕಲಾಸಕ್ತೆರ್ ಪಾಲ್ ಪಡೆದ್ ಸಹಕಾರ ಮಲ್ಪೊಡು ಪಂದ್ ಬಿರುವ ಜವನೆರ್ ಮಸ್ಕತ್ ಬಿನ್ನಾಪು ಮಲ್ದೆರ್.

ದಾಮೋದರ್ ಕುಂದರ್ ಮಸ್ಕತ್, ಸುಹಾನ್ ಸುವರ್ಣ ಮಸ್ಕತ್, ಕದ್ರಿ ನವನೀತ ಶೆಟ್ಟಿ, ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ ಸುದ್ದಿಗೋಷ್ಠಿಡ್ ಇತ್ತೆರ್.

ದಾಮೋದರ್ ಕುಂದರ್ 9353141939

ಕದ್ರಿ ನವನೀತ ಶೆಟ್ಟಿ
944813061

ವರದಿ: ಮುಲ್ಕಿ ಕರುಣಾಕರ ಶೆಟ್ಟಿ