ರಂಗಸ್ಥಳಡೇ ದೇವೆರೆ ಪಾದೊ ಸೇರಿಯೆರ್ ಕಟೀಲ್ ಮೇಳದ ಕಲಾವಿದೆ ಗುರುವಪ್ಪ ಬಾಯಾರು

ಕಿನ್ನಿಗೋಳಿ : ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಮೇಳದ ಕಲಾವಿದೆರ್ ಗುರುವಪ್ಪ ಬಾಯಾರು(58) ಮೇರ್ ರಂಗಸ್ಥಳೊಡೇ (58) ತಿಗಲೆ ಬೇನೆ ಬತ್ತ್ ದ್ ತೀರ್ ಪೋಯೆರ್. ಕಟೀಲ್ ದ ಸರಸ್ವತಿ ಸದನಡ್ ಗುರುವಾರ ರಾತ್ರೆ ನಾಲ್ ನೇ ಮೇಳದ ಆಟ ತ್ರಿಜನ್ಮ ಮೋಕ್ಷ ಪ್ರಸಂಗ ನಡತೊಂದು ಇತ್ತಿನ ಪೊರ್ತುಡು ಈ ದುರಂತ ನಡದ್ಂಡ್.

ಮೇರ್ ತ್ರಿಜನ್ಮ ಮೋಕ್ಷ ಪ್ರಸಂಗಡ್ ಶಿಶುಪಾಲನ ಪಾತ್ರ ಮಲ್ತೊಂದು ಇತ್ತೆರ್. ಪ್ರಸಂಗದ ಅಕೇರಿದ ಭಾಗ ಪ್ರದರ್ಶನ ಆವೊಂದು ಇಪ್ಪುನಗ ರಂಗಸ್ಥಳಟ್ ಉಂತುದು ಇತ್ತಿನ ಮೇರ್ ರಂಗಸ್ಥಳರ್ದ್ ತೀರ್ತ್ ಬೂರಿಯೆರ್. ಮೇಳದಕುಲು ಮೆರೆನ್ ಆಸ್ಪತ್ರೆಗ್ ಲೆತೊಂದು ಪೋಯೆರ್. ಅಲ್ಪ ಆರ್ ತೀರ್ ಪೋಯಿನೆನ್ ತೆರಿಪಾದೆರ್.

ಅಷ್ಟಮಂಗಲ ಪನ್ಪಿನ ಯಕ್ಷಗಾನ ಪ್ರಸಂಗನ್ ಬರೆದ್ ಇತ್ತಿನ ಗುರುವಪ್ಪ ಬಾಯಾರು ಕರಿನ ಬರ್ಸದ ಪೊರ್ತುಡು ಕುಡ್ಲ ಪುರಭವನಡ್ ಆಟ ಗೊಬ್ಬಾದಿತ್ತೆರ್. ಬೇತೆ ಬೇತೆ ಮೇಳಲೆಡ್ ತಿರ್ಗಾಟ ಮಲ್ತ್ ದಿತ್ತಿನ ಮೇರ್ 2013ಟ್ ಕಟೀಲ್ ಮೇಳಗ್ ಸೇರ್ದೆರ್. ಮಧುಕೈಟಭ ಇಂಚಿನ ಕಿರೀಟ ವೇಷ ಮಲ್ತೊಂದು ಇತ್ತಿನ ಮೆರೆಗ್ ಸುಮಾರ್ ಕಡೆಟ್ ತಮ್ಮನ ಆತ್ಂಡ್.