ಕುಡ್ಲ: ಮೀನುಗಾರೆರೆನ ಜೋಕುಲೆನ ಭವಿಷ್ಯದ ದೃಷ್ಟಿರ್ದ್ ತುಳುನಾಡ್ ಡ್ ಸುರು ಆಯಿನ ಸುರುತ ಮೀನುಗಾರಿಕೆ ಶಾಲೆ ಸ್ಯಾಂಡ್ಸ್ ಪಿಟ್ ಬೆಂಗ್ರೆ. 1919ಟ್ ಸ್ಥಾಪನೆ ಆದ್, ಇತ್ತೆ ಶತಮಾನನ್ ಮುಗಿತ್ ಡ್ ಪಂದ್ ತೆರಿಪಾಯೆರೆ ಪೆರ್ಮೆ ಆಪುಂಡು. ನಮ್ಮೂರುದ ಶಾಲೆ ಶಿಕ್ಷಣದ ದೇವಲ್ಯ ಆತ್ಂಡ್. ಜೋಕುಲೆನ ಸರ್ವಾಂಗೀಣ ಅಭಿವೃದ್ಧಿಗ್ ಬೆಂದೊಂದು ಉಂಡು. ಇತ್ತೆದ ಶಾಲೆದ ಪರತ್ ಕಟ್ಟಡ ಶಿಥಿಲಾವಸ್ಥೆಡ್ ಇತ್ತ್ಂಡ್.
ಉಪಯೋಗ ಮಲ್ಪೆರೆ ಯೋಗ್ಯ ಇಜ್ಜಂದಿನ ಪೊಸ ಕಟ್ಟಡಡ್ ನಾಲ್ ತರಗತಿ ಕೋಣೆಲು ಮಾತ್ರ ಉಂಡು. ಶಾಲೆಡ್ ಕ್ಲಾಸ್ ಗ್ ಒಂಜಿ ರೂಮ್ ದಲೆಕ್ಕ ನನ ನಾಲ್ ರೂಮ್ ದ ಅವಶ್ಯಕತೆ ಉಂಡು. ಒಂಜಿ ಸಭಾಂಗಣ, ಅಶ್ವತ್ಥ ಕಟ್ಟೆ ನವೀಕರಣ ಬೊಕ್ಕ ಆವರಣ ಗೋಡೆದ ವ್ಯವಸ್ಥೆಲ ಆವೊಡಾಪುಂಡು. ನೆಕ್ 75 ಲಕ್ಷ ರೂ. ಆಪುಂಡು. ಅಂಚನೆ ನೆಕ್ ಹೆಚ್ಚದ ಶಿಕ್ಷಕೆರೆನ್ ಕೊರಿಯೆರೆ ಉಂಡು. ಹೆಚ್ಚದ ಸಂಖ್ಯೆಡ್ ಜೋಕುಲು ಶಾಲೆಗ್ ಪೋಪುನ ಬೇಲೆನ್ಲಾ ಮಲ್ಪೊಡು. ಕನ್ನಡ ಮಾಧ್ಯಮದೊಟ್ಟಿಗೆ ಇಂಗ್ಲಿಷ್ ಶಿಕ್ಷಣಲ ತಿಕ್ಕೊಡು. ಉಂದು ಮಾತ ಸಾಧ್ಯ ಆವೊಡಾಂಡ ಶಾಲೆಡ್ ಮೂಲಭೂತ ಸೌಕರ್ಯಲು ಇಪ್ಪೊಡು.
2022-23 ನೇ ಸಾಲ್ ಡ್ ಹಳೆ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್, ಪದಾಧಿಕಾರಿಲು ಬೊಕ್ಕ ಮಾತ ಸದಸ್ಯೆರ್ ಶಾಲೆನ್ ಅಭಿವೃದ್ಧಿ ಮಲ್ಪೆರೆ ಬೆಂದೊಂದು ಉಲ್ಲೆರ್. ಪರತ್ ಕಲ್ಪಾರ್ಥಿಲು ಮಾತೆರ್ಲಾ ಸಂಘದ ಸದಸ್ಯೆರಾದ್ ಇಜ್ಜಿಂಡ ಆಜೀವ ಸದಸ್ಯೆರಾದ್ ಸಂಘದ ಬಲನ್ ಹೆಚ್ಚ ಮಲ್ಪೊಡಾಪುಂಡು. ಶತಮಾನ ಉಚ್ಚಯನ್ ಆಚರಣೆ ಮಲ್ಪುನ ಮಹತ್ವಾಕಾಂಕ್ಷೆ ಇಪ್ಪುನ ಸ್ಯಾಂಡ್ಸ್ ಪಿಟ್ ಬೆಂಗ್ರೆ ಶಾಲೆದ ಬುಲೆಚ್ಚಿಲ್ ಗ್ ಬೊಕ್ಕ ಜೋಕುಲೆನ ಶ್ರೇಯೋಭಿವೃದ್ಧಿಗಾದ್ ಸಮಾನ ಮನಸ್ಕ ಸಂಘಟನೆಲು, ಊರ ಪರವೂರುದ ದಾನಿಲೆನ ಸಹಕಾರ ಅತೀ ಅಗತ್ಯ. ವಿದ್ಯಾಭಿಮಾನಿಲಾಯಿನ ನಿಕುಲು ಮಾತ ಸಕಾಯ ಮಲ್ಪೊಡು ಪಂದ್ ಹಳೆ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್, ಬೊಕ್ಕ ದ.ಕ.ಜಿ.ಪ.ಹಿ.ಪ್ರಾ. ಶಾಲೆ ಸ್ಯಾಂಡ್ಸ್ ಪಿಟ್ ಬೆಂಗ್ರೆದ ಮುಖ್ಯೋಪಾಧ್ಯಾಯೆರ್, ಶಿಕ್ಷಕೆರ್, ಪೋಷಕೆರ್, ಅಡಿಗೆ ಸಿಬ್ಬಂದಿಲು, ಕಲ್ಪಾರ್ಥಿಲು ಬೊಕ್ಕ ಎಸ್.ಡಿ.ಎಮ್.ಸಿ ಸ್ಯಾಂಡ್ಸ್ಪಿಟ್ ಬೆಂಗ್ರೆದ ಅಧ್ಯಕ್ಷೆರ್ ಬೊಕ್ಕ ಸದಸ್ಯೆರ್ ತೆರಿಪಾದೆರ್.
pallavi shetty