ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಗ್ ಜಿಲ್ಲಾ ಗವರ್ನರ್ ಭೇಟಿ

ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಗ್ ರೋಟರಿ ಜಿಲ್ಲೆ 31 81 ತ್ತ ಜಿಲ್ಲಾ ಗವರ್ನರ್ ಎಚ್.ಆರ್. ಕೇಶವ ಮೇರ್ ಸನಿಯಾರ ಭೇಟಿ ಕೊರ್ದು ಬೇತೆ ಬೇತೆ ಕೊಡುಗೆನ್ ಬೊಕ್ಕ ಸಹಾಯಧನ ಕೊರಿಯೆರ್.

ಸನಿಯಾರ ಬೊಲ್ಪುಗು ಪಂಜ ಸಿ.ಎ. ಬ್ಯಾಂಕ್ ದಲ್ಪ ಜಿಲ್ಲಾ ಗವರ್ನರ್ ನ್ ಸುಬ್ರಹ್ಮಣ್ಯ ರೋಟರಿ ಕ್ಲಬ್ ದಕುಲು ಎದ್ಕೊಂಡೆರ್. ಅಲ್ಪರ್ದ್ ಬಳ್ಳಕ್ಕ ಅಂಗನವಾಡಿ ಕೇಂದ್ರಗ್ ಭೇಟಿ ಕೊರ್ದು ಅಲ್ಪ ರೊ. ಮೈಲಪ್ಪ ಸಂಕೇಶ್ ಮೇರ್ ಕೊರ್ಪುನ 9 ಅಂಗನವಾಡಿ ಕೇಂದ್ರಲೆಗ್ ಅಡಿಗೆ ಸ್ಟೌ ನ್ ಧರ್ಮೊಗು ಕೊರಿಯೆರ್.

ಬೊಕ್ಕ ಬಳ್ಪ ಎಡೋಣ ಶಿಶುಮಂದಿರಗ್ ಭೇಟಿ ಕೊರ್ದು ಅಲ್ಪ ಎಲ್ಯ ಜೋಕ್ಲೆಗ್ ಚೇರ್ ಬೊಕ್ಕ ಅಡಿಗೆ ಪರಿಕರನ್ ಕೊರಿಯೆರ್. ಅಲ್ಪರ್ದ್ ಏನೇಕಲ್ಲು ಶಾರದಾ ಗುಡ್ಡೆ ಅಂಗನವಾಡಿ ಕೇಂದ್ರಗ್ ಭೇಟಿ ಕೊರ್ದು ಅಲ್ಪ ಮಲ್ಪುನ ವರ್ಲಿ ಚಿತ್ರ ಅನಾವರಣ ಮಲ್ತೆರ್. ಅವೆರ್ದ್ ಬೊಕ್ಕ ಏನೇ ಕಲ್ಲು ಬಾನಡ್ಕಡ್ ಡಾ.ರವಿ ಕಕ್ಕೆಪದವು ಮೇರ್ ದಾನ ರೂಪಡ್ ಕೊರ್ಪಿನ, ತನ್ನ ಸ್ವಂತ ಜಾಗೆಡ್ ಫಲಾನುಭವಿಗ್ ಕಟ್ಟ್ ದ್ ಕೊರ್ನ ಇಲ್ಲ್ ನ್ ಹಸ್ತಾಂತರ ಮಲ್ತೆರ್. ಅಲ್ಪರ್ದ್ ಏನೇಕಲ್ಲು ಬಸ್ ನಿಲ್ದಾಣದ ಕೈತಲ್ದ ರೋಟರಿ ಕ್ಲಬ್ ಅಧ್ಯಕ್ಷೆರ್ ರೊ. ಪ್ರಶಾಂತ ಕೋಡಿಬೈಲ್ ತನ್ನ ಸ್ವಂತ ಕರ್ಚಿಡ್ ದಾನವಾದ್ ಕೊರ್ಪಿನ ಆಟೋರಿಕ್ಷಾ ನಿಲ್ದಾಣನ್ ಲೋಕಾರ್ಪಣೆ ಮಲ್ತೆರ್.

ಬಯ್ಯಗ್ ಏನೆಕಲ್ಲು ಡಿ.ಇ. ರಾಯಲ್ ಹೋಟೆಲ್ ಡ್ ನಡತಿನ ಸಾರ್ವಜನಿಕ ಸಮಾರಂಭಡ್ ಸಾಧನೆ ಮಲ್ತಿನ ಸಾಧಕೆರೆಗ್ ಸನ್ಮಾನ ನಡತ್ಂಡ್. ಅಂಚೆನೆ ಬೇತೆ ಬೇತೆ ಕಡೆಟ್ಟ್ ಕೊಡುಗೆಯಾದ್ ಕೊರ್ನ ರೋಟರಿ ಕ್ಲಬ್ ದ ದಾನಿಲೆಗ್ ಮಾನಾದಿಗೆ ನಡತ್ಂಡ್.

ಈ ಮಾತ ಪೊರ್ತುಡು ರೋಟರಿ ಅಸಿಸ್ಟೆಂಟ್ ಗವರ್ನರ್ ಪುರಂದರ ರೈ, ಸುಬ್ರಹ್ಮಣ್ಯ ರೋಟರಿ ಕ್ಲಬ್ ದ ಅಧ್ಯಕ್ಷೆರ್, ಪದುಕೆರ್, ಇನ್ನರ್ ವೇಲ್ ಕ್ಲಬ್ ದ ಅಧ್ಯಕ್ಷೆರ್, ಸದಸ್ಯೆರ್ ಬೊಕ್ಕ ರೋಟರಿ ಕ್ಲಬ್ ದ ಮಾತ ಸದಸ್ಯೆರ್ ಪಾಲ್ ಪಡೆದಿತ್ತೆರ್.