December 2023

ಡಿ.27: ಮುಲ್ಕಿ ತಾಲೂಕ್ ಸುರೂತ್ತ ಕನ್ನಡ ಸಾಹಿತ್ಯ ಸಮ್ಮೇಳನ

ಮುಲ್ಕಿ : ದಕ್ಷಿಣ ಕನ್ನಡ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ಮುಲ್ಕಿ ತಾಲೂಕ್ ಘಟಕದ ಸುರೂತ್ತ ಕನ್ನಡ ಸಾಹಿತ್ಯ ಸಮ್ಮೇಳನ ಡಿ.27 ಬುಧಾರ ಕಾರ್ನಾಡ್ ದ ಮುಲ್ಕಿ ಸರಕಾರಿ ಪದವಿ ಪೂರ್ವ ಕಾಲೇಜ್ ಡ್ ನಡಪರೆ ಉಂಡು.

ಬೊಲ್ಪುಗು ಕಾರ್ನಾಡ್ ಮೈದಾನಡ್ ಕನ್ನಡ ಭುವನೇಶ್ವರಿನ ಮೆರವಣಿಗೆ, ಸಮ್ಮೇಳನ ಉದಿಪನ, ಬೊಕ್ಕ ಕಾಲೇಜಿದ ವೇದಿಕೆಡ್ ವಿಚಾರಗೋಷ್ಠಿ, ಮಧ್ಯಾಹ್ನ ಸನ್ಮಾನ ನಡಪರೆ ಉಂಡು.

ಅಂಚೆನೆ ಕನ್ನಡ ಸಾಹಿತ್ಯ ಪರಿಷತ್ತುದ ಸದಸ್ಯತ್ವ ಪಡೆಪುನಕುಲು ಕನ್ನಡ ಸಾಹಿತ್ಯ ಸಮ್ಮೇಳನದ ದಿನ ಸ್ವಾಗತ ಕೌಂಟರ್ ಡ್ ಪಾಸ್ ಪೋರ್ಟ್ ಸೈಜ್ ಪೋಟೋ, ಆಧಾರ್ ಕಾರ್ಡ್ ಜೆರಾಕ್ಸ್, 410 ರೂ. ಕೊರ್ದು ನೊಂದಣಿ ಮಲ್ಪೊಲಿ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಮುಲ್ಕಿ ಅರಸು ಕಂಬುಲಡ್ ಗೆಂದಿನಕುಲು

ಪುಗರ್ತೆದ ಮುಲ್ಕಿ ಅರಸು ಕಂಬುಲದ “ಮೂಡು-ಪಡು” ಜೋಡುಕರೆ ಕಂಬುಲ ಕೂಟಡ್ ಗೆಂದಿನಕ್ಲೆನ ಪೊಲಬು ಇಂಚ ಉಂಡು:

ಕನೆಪಲಯಿ: 6 ಜತೆ
ಅಡ್ಡಪಲಯಿ: 2 ಜತೆ
ಬಲ್ಲ್ ದ ಮಲ್ಲ: 20 ಜತೆ
ನಾಯೆರ್ ದ ಮಲ್ಲ: 24 ಜತೆ
ಬಲ್ಲ್ ದ ಎಲ್ಯ: 27 ಜತೆ
ನಾಯೆರ್ ದ ಎಲ್ಯ: 73 ಜತೆ
ಒಟ್ಟು ಎರ್ಲೆನ ಸಂಖ್ಯೆ: 152 ಜತೆ ಇತ್ತ್ಂಡ್.

ಕನೆಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ
ರಡ್ಡನೇ ಇನಾಮು: ಮುಲ್ಕಿ ಕಕ್ವಗುತ್ತು ರಂಗನಾಥ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ

ಅಡ್ಡಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ
ರಡ್ಡನೇ ಇನಾಮು: ನಾರಾವಿ ರಕ್ಷಿತ್ ಯುವರಾಜ್ ಜೈನ್
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್

ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ಮಾಳ ಆನಂದ ನಿಲಯ ಶೇಖರ ಎ ಶೆಟ್ಟಿ
ಗಿಡತಿನಾರ್: ಪಟ್ಟೆ ಗುರುಚರಣ್
ರಡ್ಡನೇ ಇನಾಮು: ಕೊಳಕೆ ಇರ್ವತ್ತೂರು ಭಾಸ್ಕರ ಎಸ್ ಕೋಟ್ಯಾನ್ “ಎ”
ಗಿಡತಿನಾರ್: ಕೊಳಕೆ ಇರ್ವತ್ತೂರು ಆನಂದ್

ಬಲ್ಲ್ ದ ಎಲ್ಯ:
ಸುರುತ್ತ ಇನಾಮು: ಬೆದ್ರ ಹೊಸಬೆಟ್ಟು ಏರಿಮಾರು ಬರ್ಕೆ ಚೇತನ್ ಚಂದ್ರಹಾಸ ಸಾಧು ಸನಿಲ್
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ ಗೌಡ
ರಡ್ಡನೇ ಇನಾಮು: ಬೆಳುವಾಯಿ ಪೆರೋಡಿ ಪುತ್ತಿಗೆಗುತ್ತು ಕಾಳಿಕ್ ದಿನಕರ್ ಶೆಟ್ಟಿ “ಎ”
ಗಿಡತಿನಾರ್: ಕಾವೂರು ದೋಟ ಸುದರ್ಶನ್

ನಾಯೆರ್ ದ ಮಲ್ಲ:
ಸುರುತ್ತ ಇನಾಮು: ಬೋಳದಗುತ್ತು ಸತೀಶ್ ಶೆಟ್ಟಿ “ಎ”
ಗಿಡತಿನಾರ್: ಬೈಂದೂರು ವಿಶ್ವನಾಥ ದೇವಾಡಿಗ
ರಡ್ಡನೇ ಇನಾಮು: ಬೋಳದಗುತ್ತು ಸತೀಶ್ ಶೆಟ್ಟಿ “ಬಿ”
ಗಿಡತಿನಾರ್: ಬೈಂದೂರು ವಿಶ್ವನಾಥ ದೇವಾಡಿಗ

ನಾಯೆರ್ ದ ಎಲ್ಯ:
ಸುರುತ್ತ ಇನಾಮು: ಕಟೀಲ್ ಕೊಡೆತ್ತೂರು ಕಿನ್ನಚ್ಚಿಲ್ ಲತಾ ಪ್ರಸಾದ್ ಶೆಟ್ಟಿ “ಎ”
ಗಿಡತಿನಾರ್: ಪಟ್ಟೆ ಗುರುಚರಣ್
ರಡ್ಡನೇ ಇನಾಮು: ಕೋಟ ಮನೂರು ಪಡುಕೆರೆ ದಿ.ಶೀನ ಪೂಜಾರಿ
ಗಿಡತಿನಾರ್: ರಾಘವೇಂದ್ರ ಕೋಟ ಗಿಳಿಯಾರು

ಡಿ.30: ಸುರತ್ಕಲ್ ಗೋವಿಂದ ದಾಸ ಕಾಲೇಜ್ ಡ್ ರಘು ಇಡ್ಕಿದು ಮೆರೆನ 30ನೇ ತುಳು ಬೂಕು ಎನ್ನ ನಲಿಕೆ ಬುಡುಗಡೆ

ದ.ಕ ಜಿಲ್ಲಾ ಚುಟುಕು ಸಾಹಿತ್ಯ ಪರಿಷತ್ತು, ಕುಡ್ಲ ತಾಲೂಕ್ ಚುಟುಕು ಸಾಹಿತ್ಯ ಪರಿಷತ್ತು, ಕುಡ್ಲ ವಿದ್ಯಾ ಪ್ರಕಾಶನದ ಒಟ್ಟುಸೇರಿಗೆಡ್ ರಘು ಇಡ್ಕಿದು ಮೆರೆನ 30ನೇ ತುಳು ಬೂಕು ಎನ್ನ ನಲಿಕೆ ಬುಡುಗಡೆ ಬೊಕ್ಕ ತುಳು ಕಬಿಗೋಷ್ಠಿ ಡಿ.30 ಕ್ಕ್ ಸುರತ್ಕಲ್ ಗೋವಿಂದ ದಾಸ ಕಾಲೇಜ್ ಡ್ ನಡಪರೆ ಉಂಡು.

ಈ ಲೇಸ್ ಡ್ ಹಿರಿಯ ದೈವ ನರ್ತಕೆರ್ ಲೋಕಯ್ಯ ಸೇರ, ಮಾಣಿ ಬೂಕು ಬುಡುಗಡೆ ಮಲ್ಪುವೆರ್. ಲೇಸ್ ದ ಗುರ್ಕಾರ್ಮೆನ್ ಸುರತ್ಕಲ್ ಗೋವಿಂದ ದಾಸ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ.ಪಿ ಕೃಷ್ಣಮೂರ್ತಿ ಒಯಿಸೊನ್ವೆರ್.

ಕಬಿಗೋಷ್ಠಿದ ಗುರ್ಕಾರ್ಮೆನ್ ಕರಾವಳಿ ಲೇಖಕಿಯರ ವಾಚಕಿಯರ ಸಂಘದ ಗುರ್ಕಾರ್ದಿ ಡಾ. ಜ್ಯೋತಿ ಚೇಳ್ಯಾರು ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಕುಡ್ಲ ಪ್ರಕಾಶನದ ಕಲ್ಲೂರು ನಾಗೇಶ, ಕಬಿ, ಪತ್ರಕರ್ತೆರ್ ರಾಜೇಶ್ ಶೆಟ್ಟಿ ದೋಟ ಪಾಲ್ ಪಡೆಯೆರೆ ಉಲ್ಲೆರ್. ಬೊಕ್ಕ ದ.ಕ ಜಿಲ್ಲಾ ಚುಟುಕು ಸಾಹಿತ್ಯ ಪರಿಪತ್ತುದ ಜಿಲ್ಲಾಧ್ಯಕ್ಷೆರ್ ಹರೀಶ ಸುಲಾಯ ಒಡ್ಡಂಬೆಟ್ಟು, ಕುಡ್ಲ ತಾಲೂಕ್ ಚುಟುಕು ಸಾಹಿತ್ಯ ಪರಿಷತ್ತುದ ಗುರ್ಕಾರೆ ಗೋಪಾಲಕೃಷ್ಣ ಶಾಸ್ತ್ರಿ ಉಪಸ್ಥಿತಿಡ್ ಉಲ್ಲೆರ್.

ಈ ಲೇಸ್ ಡ್ ಡಾ.ಸುರೇಶ ನೆಗಳಗುಳಿ, ಡಾ.ಸಂತೋಷ ಆಳ್ವ, ಚೆನ್ನಪ್ಪ ಆಳಿಕೆ, ರೇಮಂಡ್ ಡಿಕುನ್ನಾ ತಾಕೊಡೆ, ಸುಮಂಗಲಾ ದಿನೇಶ್ ಶೆಟ್ಟಿ ಕುಂಪಲ, ಅಶೋಕ ಎನ್‌ ಕಡೇಶಿವಾಲಯ, ಉಮೇಶ್ ಶಿರಿಯ, ಜೀವಪರಿ, ರೇಖಾ ಸುದೇಶ್ ರಾವ್, ಸೌಮ್ಯ ಆರ್ ಶೆಟ್ಟಿ, ಅನುರಾಧಾ ರಾಜೀವ್ ಸುರತ್ಕಲ್, ಭಾಸ್ಕರ್ ವರ್ಕಾಡಿ, ಎಸ್ ಕೆ ಕುಂಪಲ, ಎಂ.ಎಸ್ ವೆಂಕಟೇಶ್ ಗಟ್ಟಿ, ಗೀತಾ ಲಕ್ಷೀಶ್, ಸೌಮ್ಯಾ ಗೋಪಾಲ್, ರಶ್ಮಿ ಸನಿಲ್, ಹಿತೇಶ್ ಕುಮಾರ್, ರಾಜೇಶ್ವರಿ ಎಚ್. ಬಜ್ಪೆ ಪಾಲ್ ಪಡ್ಪೆರ್.

ತುಳುನಾಡ್ ದ ಕಂಬುಲ ಭಾರತೀಯ ಸಂಸ್ಕೃತಿ, ಕೃಷಿ ಸಂಸ್ಕೃತಿದ ಪ್ರತಿಬಿಂಬ: ಮೈಸೂರು ಒಡೆಯರ್

ಮೂಲ್ಕಿ: ತುಳುನಾಡ್ ದ ಕಂಬುಲ ಕಾಲಿ ಒಂಜಿ ಗೊಬ್ಬು ಅತ್ತ್ .ಅವು ಮುಲ್ತ ಕೃಷಿ ಪರಂಪರೆದ ಪ್ರತಿಬಿಂಬ. ಅಂಚೆನೆ ಅವು ಭಾರತೀಯ ಸಂಸ್ಕೃತಿನ್ ತೊಜಪಾದ್ ಕೊರ್ಪಿನ ಕ್ರೀಡೆ ಪಂದ್ ಮೈಸೂರು ಅರಮನೆತ್ತ ಮಹಾರಾಜ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್ ತೆರಿಪಾಯೆರ್.

ಆರ್ ಐತಾರ ಮುಲ್ಕಿ ಸೀಮೆದ ಅರಸು ಕಂಬುಲೊಗು ಚಾಲನೆ ಕೊರ್ದು ಬೊಕ್ಕ ನಡತಿನ ಸಭಾ ಕಾರ್ಯಕ್ರಮ ಡ್ ಮಲ್ಲ ಬಿನ್ನೆರಾದ್ ಪಾತೆರಿಯೆರ್.

ತುಳುನಾಡ್ ದ ಮಣ್ಣ್ ದ ಗುಣವಿಶೇಷತೆನ್ ಕಂಬುಲ ತೊಜಪಾದ್ ಕೊರ್ಪುಂಡು. ನಮ್ಮ ಪೂರ್ವಜೆರ್ ಮುಲ್ಕಿ ಅರಸು ಕಂಬುಲಡ್ ಪಾಲ್ ಪಡೆದಿತ್ತೆರ್ ಪನ್ಪಿನ ವಿಶೇಷ. ನಮ ಮಾತೆರ್ಲ ಸ್ವಚ್ಚತೆದ ತತ್ವೊನು ದೀವೊಂದು ಬೇಲೆ ಮಲ್ಪೊಡು.ಸ್ವಚ್ಛತೆದ ಪಾಠ ಇಲ್ಲರ್ದೇ ಸುರು. ಆವೊಡು. ಕಂಬುಲ ಉಂದೆತ್ತ ಜಾಗೃತಿನ್ ಪುಟ್ಟಾವಡ್ ಪಂದ್ ಆರ್ ಪಂಡೆರ್.

ಸುಮಾರ್ 400 ವರ್ಷದ ಪರಪೋಕು ಉಪ್ಪುನ ಮೂಲ್ಕಿ ಸೀಮೆದ ಅರಸು ಕಂಬುಲಗ್ ಸೀಮೆದ ಅರಸೆರಾಯಿನ ಎಂ.ದುಗ್ಗಣ್ಣ ಸಾವಂತೆರ್ ಕಾಂತಾಬಾರೆ ಬೂದಾಬಾರೆ ಧರ್ಮ ಚಾವಡಿಡ್ ಕಂಬುಲ ನಡಪಾವರೆ ಸಮಿತಿದ ಅಧ್ಯಕ್ಷೆರ್ ಕೊಲ್ನಾಡುಗುತ್ತು ಕಿರಣ್ ಕುಮಾರ್ ಶೆಟ್ಟಿ ಮೆರೆಗ್ ಅನುವು ಕೊರ್ಪಿನ ಮುಕೇನ ಅಂಚೆನೆ ಧಾರ್ಮಿಕ ವಿಧಿ ವಿಧಾನದ ಮುಕೇನ ಮೂಲ್ಕಿ ಸೀಮೆ ಅರಸು ಕಂಬುಲಗ್ ಚಾಲನೆ ಕೊರಿಯೆರ್.

ಸುರುಕ್ಕು ಅರಮನೆತ್ತ ನಾಗದೇವೆರೆಗ್ ಅರಮನೆತ್ತ ಪುರೋಹಿತೆರ್ ಅತ್ತೂರು ಬೈಲು ಉಡುಪೆರ್ ಪ್ರಾರ್ಥನೆ ಮಲ್ತ್ ದ್ ಶ್ರೀ ಚಂದ್ರನಾಥ ಸ್ವಾಮಿ ಬಸದಿ,ಶ್ರೀ ಪದ್ಮಾವತಿ ಅಮ್ಮನವರ ಬಸದಿಡ್ ವಿಧಿ ಪೂಜೆ ಮಲ್ತ್ ದ್ ವಿಧಾನ ನಡೆಸಿ, ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನೊಡು ಪ್ರಾರ್ಥನೆ ಮಲ್ತೆರ್. ಬೊಕ್ಕ ಪರಂಪರೆದಂಚ ಬಪ್ಪನಾಡು ಬಡುಗುಹಿತ್ಲು ದಿ.ಕಾಂತು ಪೂಜಾರಿ ಯಾನೆ ಸೇವೆಗಾರ್ ಮನೆತನದ ಕಂಬುಲದ ಎರ್ಲೆನ್ ಕರೆಕ್ಕ್ ಜಪುಡಾರೆ ಅಂಚೆನೆ ಎರ್ಲೆಗ್ ಪೂಜರೆ ಅರಮನೆರ್ದ್ ಎಣ್ಣೆ ಕೊರ್ಪಿನ ಸಂಪ್ರದಾಯ ಮಲ್ತೆರ್. ಕಂಬುಲದ ಕರೆಟ್ಟ್ ಮೂಜಿ ಸರ್ತಿ ಬಾರಿ ಸಾಂಪ್ರದಾಯಿಕವಾದ್ ಎರ್ಲು ಗಿಡತಿ ಬೊಕ್ಕ ಎರ್ಲೆಗ್ ಪೂಜೆ ನಡತ್ಂಡ್. ಬೊಕ್ಕ ಎರುಬಂಟ ದೈವಲೆನ ಒಟ್ಟುಗು ಅರಮನೆತ್ತ ಎರ್ಲೆನ್ ಕೊಂಬು, ಡೋಲು, ವಾದ್ಯ ಬ್ಯಾಂಡ್ ದೊಟ್ಟುಗು ಅರಮನೆರ್ದ್ ಮೆರವಣಿಗೆಡ್ ಕಂಬುಲದ ಕಂಡೊಗು ಲೆತೊಂದು ಪೋದು ಜೋಡುಕರೆಟ್ಟ್ ತಾರಾಯಿ ದರ್ತ್ ದ್, ಪೇರ್ ಅಭಿಷೇಕ ಮಲ್ತ್ ದ್, ಪಿಂಗಾರದ ಅರ್ಪಣೆ ಮಲ್ತ್ ದ್ ಕಂಬುಲೊಗು ಚಾಲನೆ ಕೊರಿಯೆರ್.

ಅರಮನೆತ್ತ ಗೌರವದ ಸಂಕೇತವಾದ್ ಅಲ್ತ ಜೋಡಿ ಎರ್ಲು ಕಂಬುಲದ ಕರೆಟ್ಟ್ ಗಿಡತಿ ಬೊಕ್ಕ ಮಾತಾ ಎರ್ಲೆನ ಯಜಮಾನೆರೆಗ್ ಗೌರವ ಸಂದಾಯೆರ್. ಬಪ್ಪನಾಡು ದೇವಸ್ಥಾನದ ಮನೋಹರ ಶೆಟ್ಟಿ ಅಧ್ಯಕ್ಷತೆ ಒಯಿಸ್ ದಿತ್ತೆರ್. ಮೈಸೂರುದ ಶ್ರೀಸ್ವರೂಪ್ ಆನಂದ್, ಅರಮನೆತ್ತ ಆಶಾಲತಾ, ಗೌತಮ್ ಜೈನ್, ಪವಿತ್ರೇಶ್ ಜೈನ್, ರಕ್ಷಾ, ಮಾಜಿ ಸಚಿವೆರ್ ಕೆ.ಅಭಯಚಂದ್ರ ಜೈನ್, ಹರಿಕೃಷ್ಣ ಪುನರೂರು, ಕೆ.ಭುವನಾಭಿರಾಮ ಉಡುಪ, ಎಚ್.ವಸಂತ ಬೆರ್ನಾಡ್, ಅಪ್ಪು ಯಾನೆ ಶ್ರೀನಿವಾಸ ಪೂಜಾರಿ, ವಾಮನ ಇಡ್ಯಾ, ಸೂರ್ಯಕಾಂತ್ ಮುಂಬೈ, ಬಿ.ಸೂರ್ಯಕುಮಾರ್, ಚಂದ್ರಶೇಖರ್ ಜಿ., ಬಿಜೆಪಿದ ಸುದರ್ಶನ್, ಶಶೀಂದ್ರ ಎಂ. ಸಾಲ್ಯಾನ್, ಸುಚೀಂದ್ರ ಅಮೀನ್ ಬರ್ಕೆ, ಯುವರಾಜ್ ಜೈನ್, ದಿವ್ಯಾ ಆಲೂರು, ಸಂತೋಷ್ ಶೆಟ್ಟಿ, ರೆ.ಅಮೃತ್ರಾಜ್ ಖೋಡೆ, ರಾಮಚಂದ್ರ ನಾಯ್ಕ್ ಕೊಲ್ನಾಡುಗುತ್ತು, ಮುಸ್ಲಿಂ ಧರ್ಮಗುರು ಅಬ್ದುಲ್ ಖೈನಿ, ಆಸ್ಟಿನ್ ಸಂತೋಷ್ ಬಹರೈನ್, ಕೂಳೂರು ಬೂಡು ಧನರಾಜ್ ಶೆಟ್ಟಿ, ಹರಿಶ್ಚಂದ್ರ, ಮೋಹನ್ ದಾಸ್ ಸುರತ್ಕಲ್, ವಿನೋದ್ ಎಸ್. ಸಾಲ್ಯಾನ್ ಬೆಳ್ಳಾಯರು, ಉಮೇಶ್ ಪೂಜಾರಿ, ವಿಜಯ ಶೆಟ್ಟಿ ಕೊಲ್ನಾಡು, ಶ್ಯಾಂಪ್ರಸಾದ್ ಪಡುಪಣಂಬೂರು, ಚಂದ್ರಹಾಸ್ ಕೋಟ್ಯಾನ್ ಪಡುತೋಟ, ನವೀನ್ ಕುಮಾರ್ ಬಾಂದಕೆರೆ ಮೊಕುಲು ಮಾತ ಇತ್ತೆರ್.

ಅರಸು ಪ್ರಶಸ್ತಿ ಪ್ರದಾನ:

ಪಡುಪಣಂಬೂರುದ ಮೂಲ್ಕಿ ಅರಮನೆ ವೆಲ್ಫೇರ್ ಬೊಕ್ಕ ಚಾರಿಟೇಬಲ್ ಟ್ರಸ್ಟ್ ಅಂಚಡನೆ ಹಳೆಯಂಗಡಿದ ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿ ಜಂಟಿಯಾದ್ ಮೂಲ್ಕಿ ಸೀಮೆ ಅರಸು ಕಂಬಳದ ಪ್ರಯುಕ್ತ ಸಂಯೋಜನೆ ಮಲ್ತಿನ ಅರಸು ಪ್ರಶಸ್ತಿನ್ ದಿ.ಪಯ್ಯೊಟ್ಟು ಸದಾಶಿವ ಸಾಲ್ಯಾನ್ (ಮರಣೋತ್ತರ), ಭುಜಂಗ ಎಂ. ಶೆಟ್ಟಿ ಉತೃಂಜೆ (ಸಾಮಾಜಿಕ), ನವೀನ್ ಶೆಟ್ಟಿ ಎಡ್ಮೆಮಾರ್ (ತುಳು ಸಂಸ್ಕೃತಿ), ಗಂಗಾಧರ್ ದೇವಾಡಿಗ (ಕೃಷಿ), ಸುಷ್ಮಾ ತಾರಾನಾಥ್ ಅಮೀನ್ (ಕ್ರೀಡೆ), ಡಾ. ಗುರುಪ್ರಸಾದ್ ನಾವಡ (ವೈದ್ಯಕೀಯ), ದಿ. ಪಂಜದಗುತ್ತು ಶಾಂತರಾಮ ಶೆಟ್ಟಿ (ಅರಸು ಸೀಮೆದ ಸಿರಿ) ಮೊಕ್ಲೆನ್ ಮೂಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್ ಮಾನಾದಿಗೆ ಮಲ್ತೆರ್.

ವಿವೇಕ್ ಆಳ್ವ ಬೆದ್ರ, ದಿವಾಕರ ಕದ್ರಿ, ವೀಣಾ ಸಾಮಾನಿ, ಎಂ. ಶಶೀಂದ್ರಕುಮಾರ್ ಪಾವಂಜೆ, ಸೊಸೈಟಿದ ಪ್ರತಿಭಾ ಕುಳಾಯಿ, ಉಮಾನಾಥ ಶೆಟ್ಟಿಗಾರ್, ತನುಜಾ ಶೆಟ್ಟಿ, ವಿಜಯಕುಮಾರ್ ಸನಿಲ್, ಗಣೇಶ್ ದೇವಾಡಿಗ, ಸಿಇಒ ಸುದರ್ಶನ್, ಅಧ್ಯಕ್ಷೆರ್ ಎಚ್.ವಸಂತ ಬೆರ್ನಾಡ್, ಟ್ರಸ್ಟ್‌ ದ ಗೌತಮ್ ಜೈನ್, ಡಾ.ಗಣೇಶ್ ಅಮೀನ್ ಸಂಕಮಾರ್ ಇತ್ತೆರ್.

ಇನಿ ಮಾಣಿಮಜಲು ಜೋಡುಸಾನ ಕೈತಲ್ದ ಭವ್ಯ ಮಂಟಪಡ್ ಸತ್ಯೊದ ಸ್ವಾಮಿ ಕೊರಗಜ್ಜ ಆಟ

ಕಳವಾರುದ ಬಾಳ ಶ್ರೀ ಬೆಂಕಿನಾಥೇಶ್ವರ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ (ಡಿ.25) ಇನಿ ರಾತ್ರೆ ಮಾಣಿಮಜಲು ಜೋಡುಸಾನ ಕೈತಲ್ದ ಭವ್ಯ ಮಂಟಪಡ್ ಸತ್ಯೊದ ಸ್ವಾಮಿ ಕೊರಗಜ್ಜ ಆಟ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಇನಿ ಇನ್ನಂಜೆ ಕಲ್ಯಾಲು ನಡಿಬೆಟ್ಟು ಜುಮಾದಿ ಬಂಟ ದೈವೊಲ್ಯಡ್ ನೇಮ

ಇನ್ನಂಜೆ ಕಲ್ಯಾಲು ನಡಿಬೆಟ್ಟು ಜುಮಾದಿ ಬಂಟ ದೈವೊಲ್ಯಡ್ ಇನಿ ನೇಮ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.26-28: ಹನ್ನೆರಡು ಕವಲು ದೇವಲ್ಯಡ್ ನೆತ್ತೋಡಿ ಹೊಸ ಕನಸು ಸೇವಾ ಟ್ರಸ್ಟ್ ದಕ್ಲೆರ್ದ್ ನಿಧಿ ಸಂಗ್ರಹಣೆ

ನೆತ್ತೋಡಿ ಹೊಸ ಕನಸು ಸೇವಾ ಟ್ರಸ್ಟ್ (ರಿ.) ದಕುಲು ಹನ್ನೆರಡು ಕವಲು ದೇವಲ್ಯಡ್ ಇಸೇಸ ಏಸಡ್ ಡಿ.26-28 ಮುಟ್ಟ ನಿಧಿ ಸಂಗ್ರಹಣೆ ಮಲ್ಪೆರೆ ಉಲ್ಲೆರ್.

ಕೋಟೆಬಾಗಿಲುದ ಬಾಡಿಗೆ ಇಲ್ಲಡುಪ್ಪುನ ಬಡಕುಟುಂಬದ ಅಮಿತಾ ಮೆರೆನ 8 ವರ್ಷದ ಮಗೆ ಸುಪ್ರೀತ್ ವಿಚಿತ್ರ ಚರ್ಮದ ಸೀಕ್ ರ್ದ್ ನರಲೊಂದು ಉಲ್ಲೆರ್. ಈ ಸೀಕ್ ರ್ದಾವೆರ ಬಾಲೆದ ಅಮ್ಮೆರ್ ಮೊಕ್ಲೆನ್ ಬುಡ್ತೆರ್. ಅಂಚಾದ್ ಬಾಲೆದ ಚಿಕಿತ್ಸೆಗ್ ಲಕ್ಷ ಗಟ್ಟಲೆ ಕರ್ಚಾಪುಂಡು ಪಂದ್ ವೈದ್ಯೆರ್ ತೆರಿಪಾದೆರ್. ಇತ್ತೆನೇ ಮೇರ್ ಇತ್ತಿನ ಬಂಗಾರ್ ಬೊಕ್ಕ ಕಾಸ್ ನ್ ಕರ್ಚಿ ಮಲ್ದೆರ್. ಮೆರೆಗ್ ನನ ಚಿಕಿತ್ಸೆ ಕೊರಿಯೆರೆ ಆವಂದಿನ ಕಾರಣ ನೆತ್ತೋಡಿ ಹೊಸ ಕನಸು ಸೇವಾ ಟ್ರಸ್ಟ್ ದಕುಲು ಇಸೇಸ ಏಸ ಪಾಡ್ದ್ ಡಿ.26-28 ಮುಟ್ಟ ಹನ್ನೆರಡು ಕವಲು ದೇವಲ್ಯಡ್ ನಡಪುನ ಬ್ರಹ್ಮಕಲಶ ಉಚ್ಚಯಡ್ ನಿಧಿ ಸಂಗ್ರಹಣೆ ಮಲ್ಪೆರೆ ಉಲ್ಲೆರ್. ನೆಕ್ಕ್ ದಾನಿಲು ಮಾತೆರ್ಲಾ ಸಹಕಾರ ಕೊರೊಡು ಪಂದ್ ಕೂಟದಕುಲು ಬಿನ್ನಾಪು ಮಲ್ತೊಂದೆರ್.