ಪುತ್ತಿಲ ಪರಿವಾರ ವಿಟ್ಲ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜಾ ಸಮಿತಿದ ಮುತಾಲಿಕೆಡ್ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ ಬೊಕ್ಕ ಹಿಂದೂ ಚೈತನ್ಯ ಸಮಾವೇಶ ಡಿ.9 ಸನಿಯಾರ ವಿಟ್ಲ ಶ್ರೀ ಪಂಚಲಿಂಗೇಶ್ವರ ದೇವಲ್ಯದ ಚಾವಡಿಡ್ ನಡಪರೆ ಉಂಡು.
ಅಂಚೆನೆ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಲ್ಯರ್ದ್ ವಿಟ್ಲ ಶ್ರೀ ಪಂಚಲಿಂಗೇಶ್ವರ ದೇವಲ್ಯಗ್ ಬೃಹತ್ ಪಾದಯಾತ್ರೆ ನಡಪರೆ ಉಂಡು.
ಡಾ. ಆರ್ ಕೆ ನಾಯರ್ ಮೆರೆನ ಸಂಪೂರ್ಣ ಸಹಕಾರಡ್, ಬೊಂಬೈ ಕಮಲ ಕಲಾ ವೇದಿಕೆದ ಮುತಾಲಿಕೆಡ್, ಅಮ್ಮ ಕಲಾವಿದೆರ್ ಕುಡ್ಲ ಮೊಕ್ಲೆನ ಅಭಿನಯಡ್ ಡಿ.9 ಸನಿಯಾರ ಬಯ್ಯಗ್ ಸಾಂತಕ್ರೂಸ್ ಬಿಲ್ಲವ ಭವನಡ್ ಅಮ್ಮೆರ್ ತುಳು ನಾಟಕ ನಡಪರೆ ಉಂಡು.
ಈ ನಾಟಕ ಶಿವಾನಂದ ಶೆಟ್ಟಿ ಮಂಗಲ್ಪಾಡಿ ಸಾರಥ್ಯಡ್, ತುಳುನಾಡ ಕಲಾಬಿರ್ಸೆ ದೀಪಕ್ ರೈ ಪಾಣಾಜೆ ಮೆರೆನ ಅಭಿನಯಡ್, ಸೋಮನಾಥ ಶೆಟ್ಟಿ ಮಂಗಲ್ಪಾಡಿ ಮೆರೆನ ರಚನೆಡ್, ರಂಗ್ ದ ರಾಜೆ ಸುಂದರ್ ರೈ ಮಂದಾರ ಮೆರೆನ ನಿರ್ದೇಶನ ಬೊಕ್ಕ ಅಭಿನಯಡ್ ನಡಪರೆ ಉಂಡು ಪಂದ್ ಲೇಸ್ ದ ವ್ಯವಸ್ಥಾಪಕೆರ್, ಕಮಲ ಕಲಾ ವೇದಿಕೆ ಸಂಚಾಲಕೆರ್ ನವೀನ್ ಪಡು ಇನ್ನಾ ಲೆಪ್ಪೋಲೆಡ್ ತೆರಿಪಾದೆರ್.
ಕಾಂತಾವರ ಬಾರಾಡಿಬೂಡು ಡಾ/ ಜೀವಂಧರ್ ಬಲ್ಲಾಳ್ ಮೆರೆನ ಮುತಾಲಿಕೆಡ್ ಡಿ.9 ಕ್ಕ್ ದಿ. ಪಾಂಡ್ಯರಾಜ್ ಬಲ್ಲಾಳ್ ಸ್ಮಾರಕ ಕಂಬುಲ ಕ್ರೀಡಾಂಗಣಡ್ 37ನೇ ವರ್ಷದ ಸೂರ್ಯ ಚಂದ್ರ ಜೋಡುಕರೆ ಕಂಬುಲ ನಡಪರೆ ಉಂಡು.
ಈ ಕಂಬುಲ ಕೂಟಡ್ ಕಂಬುಲಾಭಿಮಾನಿಲು ಎಚ್ಚದ ಸಂಖ್ಯೆಡ್ ಸೇರ್ದ್ ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬಂಟ್ವಾಳ: ಹನುಮಾನ್ ನಗರ ಶ್ರೀ ರಾಮ ವಿದ್ಯಾಕೇಂದ್ರಡ್ ಡಿ.9 ಸನಿಯಾರ ಬಯ್ಯಗ್ ಕಲ್ಲಡ್ಕ ಕ್ರೀಡೋತ್ಸವ-2023 ನಡಪರೆ ಉಂಡು.
ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಮಾಜಿ ಮುಖ್ಯಮಂತ್ರಿ ಎಚ್ ಡಿ. ಕುಮಾರಸ್ವಾಮಿ ಬೊಕ್ಕ ಮಾಜಿ ಕೇಂದ್ರ ಸಚಿವೆರ್ ಬಸವನಗೌಡ ಆರ್ ಪಾಟೀಲ್ (ಯತ್ನಾಳ್) ಪಾಲ್ ಪಡೆಯೆರೆ ಉಲ್ಲೆರ್.
ಬೊಲ್ತೇರ್: ಚಾರ್ಮಾಡಿ ಮತ್ತೂರು ಪಂಚಲಿಂಗೇಶ್ವರ ದೇವಲ್ಯಡ್ ಶತಚಂಡಿಕಾ ಯಾಗ, ಸಹಸ್ರನಾರಿಕೇಳ ಅಭಿಷೇಕ ಬೊಕ್ಕ ಶತರುದ್ರಾಭಿಷೇಕ ಡಿ.12 ಅಂಗಾರೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದೇವೆರೆನ ಪ್ರಸಾದ ದೆತೊನೊಡು ಪಂದ್ ಚಾರ್ಮಾಡಿದ ಮತ್ತೂರು ಪಂಚಲಿಂಗೇಶ್ವರ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಪ್ರಕಾಶ್ ಹೊಸಮಠ, ಆಡಳಿತ ಮಂಡಳಿ, ಅರ್ಚಕ ವೃಂದ ಬೊಕ್ಕ ಊರುದ, ಪರವೂರುದ ಭಕ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ ಕುಲಾಲ ಪ್ರತಿಷ್ಠಾನ (ರಿ.) ದ ಮುತಾಲಿಕೆಡ್ ಡಿ.10 ಐತಾರ ಬೊಲ್ಪುಗು ಸಾಂತಕ್ರೂಸ್ ಪೂರ್ವದ ಬಿಲ್ಲವ ಭವನಡ್ ಪಿರಾವುಡು ಒರಿ ಉಲ್ಲೆ…! ತುಳು ನಾಟಕ ನಡಪರೆ ಉಂಡು.
ಈ ನಾಟಕ ವಿಜಯ ಕಲಾವಿದೆರ್ ಕಿನ್ನಿಗೋಳಿ ಮೊಕ್ಲೆರ್ದ್ ನಡಪರೆ ಉಂಡು. ಅಂಚೆನೆ ಈ ನಾಟಕ ಧರ್ಮೊಗು ಪ್ರದರ್ಶನ ಆಪುಂಡು.
ಮಹಾನಗರ: ಅಖಿಲ ಭಾರತ ತುಳು ಒಕ್ಕೂಟದ ಮಹಾಸಭೆ ಡಿ.10 ಕ್ಕ್ ಕಾವೂರುದ ಮುಗ್ರೋಡಿ ಎನ್ ಕ್ಲೇವ್ ಡ್ ಇಪ್ಪುನ ಅಖಿಲ ಭಾರತ ತುಳು ಒಕ್ಕೂಟದ ಸಭಾಂಗಣಡ್ ನಡಪರೆ ಉಂಡು.
ನೆತ್ತ ಅಟ್ಟಣೆದ ಸಭೆ ಗುರ್ಕಾರೆ ಎ.ಸಿ ಭಂಡಾರಿ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್. ಈ ಸಭೆಟ್ಟ್ ದೇಶದ 44 ಒಕ್ಕೂಟದ ಸದಸ್ಯೆರ್, ತುಳು ಸಂಘಟನೆಲೆನ 3 ಪ್ರತಿನಿಧಿಲು ಪಾಲ್ ಪಡೆಯೆರೆ ಉಲ್ಲೆರ್. ಮುಖ್ಯವಾದ್ ತುಳುಭಾಷೆ ಮಾನ್ಯತೆದ ಪೊರ್ಂಬಾಟದ ರೂಪುರೇಖೆ, ಬೈಲಾ ತಿದ್ದುಪಡಿ, ಪರಿಷ್ಕರಣೆ ಬೊಕ್ಕ ಒಕ್ಕೂಟದ ಮುತಾಲಿಕೆಡ್ ದುಂಬಗ್ ನಡಪರೆ ಇಪ್ಪುನ ತುಳು ಭಾಷೆ ಸಂಸ್ಕೃತಿ, ಅಭಿವೃದ್ಧಿಗ್ ಸಂಬಂಧಪಟ್ಟಿನ ಲೇಸ್ ದ ಬಗೆಟ್ಟ್ ಅಂಚೆನೆ ಸದಸ್ಯೆರೆನ ಕೂಟಲೆನ ಲೇಸ್ ದ ಬಗೆಟ್ಟ್ ಸಭೆಟ್ಟ್ ನಿರ್ಧಾರ ದೆತೊಂಡೆರ್.
ಈ ಪೊರ್ತುಡು ಪದುಕೆರಾಯಿನ ಮುಲ್ಕಿ ಕರುಣಾಕರ ಶೆಟ್ಟಿ, ಮೋಹನ್ ದಾಸ್ ಹಿರಿಯಡ್ಕ, ಚಂದ್ರಶೇಖರ್ ಸುವರ್ಣ, ಪಿ.ಎ ಪೂಜಾರಿ, ತಾರಾನಾಥ ಶೆಟ್ಟಿ ಬೋಳಾರ್, ರಾಜೇಶ್ ಆಳ್ವ, ಮಹಿಳಾ ವಿಭಾಗದ ವಿಜಯಲಕ್ಷ್ಮೀ ಬಿ. ಶೆಟ್ಟಿ, ಸುಕಲಾಕ್ಷಿ ಸುವರ್ಣ ಇತ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ಕಾವ್ಯಗಾನ -ಸಂಗೀತ ಪಾಠ ಸರಣಿ ಲೇಸ್ ದ 37ನೇ ಸಂಚಿಕೆ ಡಿ.8 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಕಲ್ಪಾರ್ಥಿ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಡಿ.9 ಸನಿಯಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕುಡ್ಲ ವಿಶ್ವವಿದ್ಯಾನಿಲಯ, ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳುಪೀಠ, ಕಪ್ಪಂದಕರ್ಯ ಕುಪ್ಪಣ್ಣ-ತುಂಬೆಕ್ಕ ಪ್ರತಿಷ್ಠಾನ ಮೂಡುಬೆಳ್ಳೆ, ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ, ಕುಡ್ಲ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್ ದ ಒಟ್ಟುಸೇರಿಗೆಡ್ ಇನಿ (ಡಿ.8) ಬಯ್ಯಗ್ ಕುಡ್ಲ ಶಿವರಾಮ ಕಾರಂತ ಸಭಾಭವನಡ್ ಪೂ-ಪನ್ನೀರ್ ಸುರುತ್ತ ವರ್ಸದ ಜೋಕುಲೆನ್ ಎದ್ಕೊನುನ ಬೊಕ್ಕ ತುಳುಲಿಪಿ ತರಬೇತಿದ ಮುಗಿತಲದ ಲೇಸ್ ನಡಪರೆ ಉಂಡು.
ಈ ಲೇಸ್ ಡ್ ಕಾರ್ಲ ಶ್ರೀ ಭುವನೇಂದ್ರ ಕಾಲೇಜ್ ಕನ್ನಡ ವಿಭಾಗೊದ ಸಹಪ್ರಾಧ್ಯಾಪಕೆರ್ ಡಾ.ಅರುಣಕುಮಾರ ಎಸ್ ಆರ್ ಮೇರ್ ತುಳು ಸಂಸ್ಕೃತಿಡ್ ಸಿರಿ ಆರಾಧನೆತ್ತ ಪೊಲಬುನ್ ಕೊರಿಯೆರೆ ಉಲ್ಲೆರ್. ಬೊಕ್ಕ ತುಳು ಸ್ನಾತಕೋತ್ತರ ಪದವಿಡ್ ರ್ಯಾಂಕ್ ಪಡೆತಿನ ಜೋಕುಲೆಗ್ ಸನ್ಮಾನ ನಡಪರೆ ಉಂಡು.
ಈ ಲೇಸ್ ನ್ ಕುಡ್ಲ ಮಹಾನಗರ ಪಾಲಿಕೆದ ಮಹಾಪೌರೆರ್ ಸುಧೀರ್ ಶೆಟ್ಟಿ ಕಣ್ಣೂರು ಉದಿಪನ ಮಲ್ಪುವೆರ್. ಕುಡ್ಲ ವಿ.ವಿ ಕುಲಪತಿ ಪ್ರೊ.ಜಯರಾಜ್ ಅಮೀನ್ ಗುರ್ಕಾರ್ಮೆನ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಸಾಹಿತಿಲು ಮುದ್ದು ಮೂಡುಬೆಳ್ಳೆ ಬರಿಯೆರೆ ಉಲ್ಲೆರ್. ಮಾನಾದಿಗೆದ ಬಿನ್ನೆರಾದ್ ಕುಡ್ಲ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ಲಕ್ಷ್ಮೀದೇವಿ ಎಲ್, ಸಂಯೋಜಕೆರ್ ಡಾ. ಯತೀಶ್ ಕುಮಾರ್, ತುಳು ಲಿಪಿ ಶಿಕ್ಷಕೆರ್ ಗೀತಾ ಲಕ್ಷ್ಮೀಶ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬಂಟ್ವಾಳ: ಪೆರಾಜೆ ಗ್ರಾಮದ ಶ್ರೀ ವಿಷ್ಣುಮೂರ್ತಿ ಭಜನಾ ಮಂಡಳಿ (ರಿ.) ದ 47ನೇ ವರ್ಷದ ಭಜನೆ ಬೊಕ್ಕ ಸಾರ್ವಜನಿಕ ಸತ್ಯನಾರಾಯಣ ಪೂಜೆ ಜ.21 ಐತಾರ ನಡಪರೆ ಉಂಡು.
ಈ ಲೇಸ್ ಡ್ ಊರುದ ಪರವೂರುದ ಭಕ್ತೆರ್ ಪಾಲ್ ಪಡೆದ್, ಪ್ರಸಾದ ದೆತೊಂದು, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಮಾನಾದಿಗೆದ ಗುರ್ಕಾರೆ ಕೆ. ಶ್ರೀಕಾಂತ ಆಳ್ವ ಪೆರಾಜೆಗುತ್ತು, ಗುರ್ಕಾರೆ ಬಿ. ಚಂದ್ರಹಾಸ ಶೆಟ್ಟಿ ಬುಡೋಳಿಗುತ್ತು, ಒತ್ತು ಗುರ್ಕಾರೆ ಪಿ. ವಿಶ್ವನಾಥ ನಾಯ್ಕ ಸಾದಿಕುಕ್ಕು, ಖಜಾಂಚಿ ಶಾಂತಿಲ ದಿವಾಕರ ಗೌಡ, ಕಾರ್ಯದರ್ಶಿ ಲಕ್ಷ್ಮೀಶ ಪಿ., ಭಜನಾ ಮಂಡಳಿದ ಕಾರ್ಯಕಾರಿ ಮಂಡಳಿ ಸದಸ್ಯೆರ್ ಬೊಕ್ಕ ಸರ್ವಸದಸ್ಯೆರ್ ಪ್ರಕಟಣೆಡ್ ತೆರಿಪಾದೆರ್.
