ಹಳೆಯಂಗಡಿ: ಮೂಜಿ ಸರ್ತಿ ಕರ್ನಾಟಕ ರಾಜ್ಯ ಪ್ರಶಸ್ತಿ ಪಡೆತಿನ ಹಳೆಯಂಗಡಿ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ ದ ಬಂಗಾರ್ ಪರ್ಬ ಅಂಚೆನೆ ಶ್ರೀ ವಿದ್ಯಾ ವಿನಾಯಕ ರಜತ ಸೇವಾಟ್ರಸ್ಟ್ ದ ಬೊಳ್ಳಿ ಪರ್ಬದ ಉಚ್ಚಯ ನ.4-11 ಮುಟ್ಟ ನಡಪರೆ ಉಂಡು ಪಂದ್ ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುಧಾಕರ ಅಮೀನ್ ತೆರಿಪಾಯೆರ್.
ಉತ್ಸವದ ಅಂಗವಾದ್ ಯುವಕ ಮಂಡಲದ ಬೊಳ್ಳೂರು ವಾರಿಜ ವಾಸುದೇವ ಕಲಾ ವೇದಿಕೆಡ್ ತುಳು ನಾಟಕ ಸ್ಪರ್ಧೆ, ವೈವಿಧ್ಯಮಯ ಪ್ರತಿಭಾ ಸ್ಪರ್ಧೆ, ಎಚ್.ನಾರಾಯಣ ಸನಿಲ್ ದತ್ತಿ ಇನಾಮು ಬೊಕ್ಕ ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್, ಮುಕ್ತ ಭಜನಾ ಸ್ಪರ್ಧೆ,ಯುವಕ ಮಂಡಲ ಅಂಚೆನೆ ಯುವತಿ ಬೊಕ್ಕ ಮಹಿಳಾ ಮಂಡಲದ ವಾರ್ಷಿಕೋತ್ಸವ ಇಂಚಿನ ಮಾತಾ ಲೇಸ್ ನಡಪರೆ ಉಂಡು ಪಂದ್ ಆರ್ ಪಂಡೆರ್.
ಸಾಂಸ್ಕೃತಿಕ ಕಾರ್ಯಕ್ರಮದ ನಿಲೆಟ್ಟ್ ಕಲ್ಲಡ್ಕ ವಿಠಲ ನಾಯಕ್ ಕೂಟದಕ್ಲೆರ್ದ್ ಗೀತಾ ಸಾಹಿತ್ಯ ಸಂಭ್ರಮ, ಜೋಕ್ಲೆನ ನೃತ್ಯ, ಯುವತಿ ಬೊಕ್ಕ ಮಹಿಳಾ ಮಂಡಳಿ ಸದಸ್ಯೆರೆರ್ದ್ ನೃತ್ಯ ವೈವಿಧ್ಯ, ಯುವಕ ಮಂಡಲದ ಸದಸ್ಯೆರೆರ್ದ್ “ನಮ ನಮ್ಮಾತಿಗೆ’ ತುಳು ನಾಟಕ ನಡಪರೆ ಉಂಡು ಪಂದ್ ಸುಧಾಕರ ಅಮೀನ್ ಪಂಡೆರ್.
ಗೌರವ ಪ್ರಧಾನ ಕಾರ್ಯದರ್ಶಿ ರಾಮದಾಸ್ ಪಾವಂಜೆ ಪಾತೆರ್ದ್, ನ.4 ಶನಿಯಾರ ಬಯ್ಯ 5 ಗಂಟೆಗ್ ತುಳುನಾಟಕ ಪಂತೊನು ಶಾಸಕೆರ್, ಸುವರ್ಣ ಮಹೋತ್ಸವ ಸಮಿತಿದ ಗೌರವಾಧ್ಯಕ್ಷೆರ್ ಉಮಾನಾಥ್ ಕೋಟ್ಯಾನ್ ಉದಿಪನ ಮಲ್ಪುವೆರ್. ಒಡಿಪು ತುಳುಕೂಟದ ಪ್ರಭಾಕರ ಭಂಡಾರಿ, ಪಟೇಲ್ ವಾಸುದೇವ ರಾವ್ ಪುನರೂರು, ಎಸ್.ಎಸ್. ಸತೀಶ್ ಭಟ್ ಕೊರುವೇಲ್ ಬಿನ್ನೆರಾದ್ ಬರ್ಪೆರ್. 6 ದಿನೊಟ್ಟು ರಾತ್ರೆ 7.30ರ್ದು ಕ್ರಮವಾದ್ ಎರುಮೈಂದೆ, ನಿರೆಲ್, ಪನರೆ ಪೋವೊಡ್ಚಿ, ಈ ದಾಯೆ ಪಾತೆರುಜ? ನಾಲಾಯಿ ಮಗುರುಜಿ, ಪನೊಡಿತ್ತಿಂಡ್ ಸ್ಸಾರಿ ಪನ್ಪಿನ ನಾಟಕಲೆನ ಪ್ರದರ್ಶನ ಉಂಡು. ಗೆಂದಿನ ಸುರೂತ್ತ ಮೂಜಿ ಕೂಟದಕ್ಲೆಗ್ 25,000 ರೂ., 15,000 ರೂ. ಬೊಕ್ಕ 10,000 ರೂ. ಇನಾಮು ಬೊಕ್ಕ ಟ್ರೋಫಿ ಪಟ್ಟರೆ ಉಂಡು ಪಂಡೆರ್.
ನ.5 ಐತಾರ ಬೊಲ್ಪುಗು 9.30ಗು “ವೈವಿಧ್ಯಮಯ ಪ್ರತಿಭಾ ಪಂತೊ”ನು ಬಪ್ಪನಾಡ್ ದೇವಲ್ಯದ ಅನುವಂಶಿಕ ಮೊಕ್ತೇಸರೆರ್ ಮನೋಹರ ಶೆಟ್ಟಿ ಉದಿಪನ ಮಲ್ಪುವೆರ್. ಬಿನ್ನೆರಾದ್ ಆನೆಗುಂದಿ ಪೀಠದ ಪ್ರ.ಕಾರ್ಯದರ್ಶಿ ಲೋಕೇಶ್ ಎಂ.ಬಿ. ಆಚಾರ್ ಕಂಬಾರು ಬೊಕ್ಕ ಗೋವಿಂದ ದಾಸ ಕಾಲೇಜಿದ ಪ್ರಿನ್ಸಿಪಾಲ್ ಪ್ರೊ.ಕೃಷ್ಣಮೂರ್ತಿ ಪಾಲ್ ಪಡೆವೆರ್. ಅವೇ ದಿನ ಬಯ್ಯಗ್ ಟ್ರಸ್ಟ್ ದ ಬೊಳ್ಳಿ ಪರ್ಬ ಮುಗಿತಲದ ಲೇಸ್ ಡ್ ದತ್ತಿ ಇನಾಮು, ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್ ನಡಪರೆ ಉಂಡು. ಬಿನ್ನೆರಾದ್ ದ.ಕ ಜಿಲ್ಲಾ ಹಾಲು ಉತ್ಪಾದಕರ ಸಂಘದ ಅಧ್ಯಕ್ಷೆರ್ ಸುಚರಿತ್ ಶೆಟ್ಟಿ, ಡಾ|ಶ್ರೀಕಾಂತ್ ರಾವ್, ಎನ್ ಐಟಿಕೆ, ಜಿ.ಆರ್.ಪ್ರಸಾದ್, ಪ್ರಣವ ಸೌಹಾರ್ದ ಸಂಘ, ವಾಲ್ಟರ್ ನಂದಳಿಕೆ ದೈಜಿವರ್ಲ್ಡ್, ರೋಶನ್ ಬೆಳ್ಮಣ್ ಹ್ಯುಮ್ಯಾನಿಟಿ ಪಾಲ್ ಪಡೆವೆರ್.
ನ.10 ಸುಕ್ರವಾರ ಕಾಂಡೆ 9.30 ಗು ಮುಕ್ತ ಭಜನಾ ಪಂತೊನು ಧರ್ಮದರ್ಶಿ ಯಾಜಿ ನಿರಂಜನ ಭಟ್ ಉದಿಪನ ಮಲ್ಪುವೆರ್. ಯಾದವ ದೇವಾಡಿಗ, ಉದ್ಯಮಿ ಅಗರಿ ರಾಘವೇಂದ್ರ ರಾವ್ ಬಿನ್ನೆರಾದ್ ಬರ್ಪೆರ್. ಅವೇ ದಿನ ಬಯ್ಯ 5 ಗಂಟೆಗ್ ಬಂಗಾರ್ ಪರ್ಬ ಮುಗಿತಲದ ಲೇಸ್ ನಡಪರೆ ಉಂಡು. ಸುಬ್ರಹ್ಮಣ್ಯ ಮಠತ್ತ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮೀಜಿ ಆಶೀರ್ವಚನ ಮಲ್ಪುವೆರ್. ಸ್ಪೀಕರ್ ಯು.ಟಿ.ಖಾದರ್, ಸಂಸದೆರ್ ನಳಿನ್ ಕುಮಾರ್ ಕಟೀಲ್, ನಾಡೋಜ ಡಾ|ಜಿ.ಶಂಕರ್, ಶಾಸಕೆರ್ ಉಮಾನಾಥ ಕೋಟ್ಯಾನ್, ಮುಲ್ಕಿ ಸೀಮೆ ಅರಸೆರ್ ದುಗ್ಗಣ್ಣ ಸಾವಂತೆರ್, ಉದ್ಯಮಿಲಾಯಿನ ಎ.ಬಿ.ಶೆಟ್ಟಿ, ಮಿಥುನ್ ರೈ ಪಾಲ್ ಪಡೆವೆರ್. 7.30 ರ್ದು ಗೀತಾ ಸಾಹಿತ್ಯ ಸಂಭ್ರಮ ನಡಪರೆ ಉಂಡು.
ನ.11 ಸನಿಯಾರ ಬಯ್ಯಡ್ 4.30 ಗು ವಿದ್ಯಾವಿನಾಯಕಯುವಕ ಮಂಡಲದ 52 ನೇ ಅಂಚೆನೆ ಯುವತಿ ಬೊಕ್ಕ ಮಹಿಳಾ ಮಂಡಲದ 48 ನೇ ವಾರ್ಷಿಕೋತ್ಸವ ನಡಪರೆ ಉಂಡು. ವಿಶ್ವಕರ್ಮ ಸಹಕಾರಿ ಬ್ಯಾಂಕ್ ದ ಅಧ್ಯಕ್ಷೆರ್ ಡಾ|ಎಸ್.ಆರ್ ಹರೀಶ್ ಆಚಾರ್ಯ, ಮಡಿಕೇರಿ ಎಸಿಪಿ ಡಾ|ಯತೀಶ್ ಉಲ್ಲಾಳ್, ಡಾ. ಶಿವಶರಣ್ ಶೆಟ್ಟಿ, ಪಾರ್ಥಸಾರಥಿ ಪಂಜ, ಗ್ರಾಮ ಪಂಚಾಯತಿ ಅಧ್ಯಕ್ಷೆರ್ ಪೂರ್ಣಿಮಾ ಮಲ್ಲ ಬಿನ್ನೆರಾದ್ ಪಾಲ್ ಪಡೆವೆರ್.ಉಂದುವೇ ಪೊರ್ತುಡು ಅಂಗನವಾಡಿ, ಕಿಶೋರ ಕಿಶೋರಿ ಸಂಘದ ಜೋಕುಲೆರ್ದ್ ನೃತ್ಯ, ಯುವಕ ಬೊಕ್ಕ ಯುವತಿ, ಮಹಿಳಾ ಮಂಡಳಿ ಸದಸ್ಯೆರೆರ್ದ್ ನೃತ್ಯ ವೈವಿಧ್ಯ, ರಾತ್ರೆ 8 ಗಂಟೆರ್ದ್ ಯುವಕ ಮಂಡಲದ ಸದಸ್ಯೆರೆರ್ದ್ “ನಮ ನಮ್ಮಾತಿಗೆ” ತುಳು ಸಾಂಸಾರಿಕ ನಾಟಕ ನಡಪರೆ ಉಂಡು ಪಂದ್ ರಾಮದಾಸ್ ಪಾವಂಜೆ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ಸುವರ್ಣ ಮಹೋತ್ಸವ ಸಮಿತಿದ ಅಧ್ಯಕ್ಷೆರ್ ಬಿ.ಸೂರ್ಯ ಕುಮಾರ್, ಕಾರ್ಯಾಧ್ಯಕ್ಷೆರ್ ಸುಧಾಕರ ಅಮೀನ್, ಗೌ.ಪ್ರ.ಕಾರ್ಯದರ್ಶಿ ರಾಮದಾಸ್ ಪಾವಂಜೆ, ಕೋಶಾಧಿಕಾರಿ ಪರಮೇಶ್ವರ ಪಿ., ರಜತ ಸೇವಾ ಟ್ರಸ್ಟ್ ದ ಗೌ.ಪ್ರ. ಕಾರ್ಯದರ್ಶಿ ಸ್ಟ್ಯಾನಿ ಡಿ ಕೋಸ್ಟ,ಕೋಶಾಧಿಕಾರಿ, ಯುವಕ ಮಂಡಲದ ಅಧ್ಯಕ್ಷೆರ್ ನಾಗೇಶ್ ಟಿ.ಜಿ., ಸಲಹಾ ಸಮಿತಿದ ಮೋಹನ್ ಬಂಗೇರ, ಹಿಮಕರ ಕೋಟ್ಯಾನ್, ಹನುಮಂತ ಪೂಜಾರ್ ಇತ್ತೆರ್.
