November 2023

ನ.19: ಬೊಂಬೈಡ್ ಕಾಂತಾಬಾರೆ-ಬೂದಬಾರೆ ಗೊಬ್ಬುದ ಕೂಟ

ಬೊಂಬೈ ಬಿಲ್ಲವರ ಸಂಘದ ಮುತಾಲಿಕೆಡ್ ಯುವ ಕಲ್ಯಾಣ ಉಪ ಸಮಿತಿ ಆಯೋಜನೆ ಮಲ್ತಿನ ಕಾಂತಾಬಾರೆ-ಬೂದಬಾರೆ ಒಳಾಂಗಣ ಗೊಬ್ಬುದ ಕೂಟ ನ.19 ಕ್ಕ್ ಸಾಂತಾಕ್ರೂಜ್ ಬಿಲ್ಲವ ಭವನಡ್ ನಡಪರೆ ಉಂಡು.

ಈ ಕೂಟೊಡು ಕೇರಂ, ಚೆಸ್, ಡ್ರಾಯಿಂಗ್, ರಂಗೋಲಿ ಪಂತೊ ನಡಪರೆ ಉಂಡು.

ರೇಡಿಯೊ ಮಣಿಪಾಲಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್ ನ.2 ಗುರುವಾರ ಬಯ್ಯಗ್ 5‌ ಗಂಟೆಗ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆಯೆರೆ ಉಲ್ಲೆರ್. ನ.3 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ತುಳು ರಾಜ್ಯದ ಜನ ಜಾಗೃತಿಗಾದ್ ಟ್ವಿಟರ್ (X) ಅಭಿಯಾನ

ಕುಡ್ಲ: ತುಳು ರಾಜ್ಯದ ವಿಚಾರಡ್ ಜನಜಾಗೃತಿಗಾದ್ ನವೆಂಬರ್ 1 ಕ್ಕ್ ಟ್ವಿಟರ್ (X) ಡ್ ದಿನ ಇಡೀ #TulunadState ಅಭಿಯಾನ ನಡತ್ಂಡ್.

ತುಳು ಭಾಷೆಗ್ ಅಧಿಕೃತ ಸ್ಥಾನಮಾನ ಕೊರ್ಪುನ ವಿಚಾರಡ್ ಸರ್ಕಾರೊರ್ದು ನಂಬಿಕೆದ್ರೋಹ ಆವೊಂದುಂಡು. ದಾಯೆ ಪಂಡ ಕರ್ನಾಟಕ ಬೊಕ್ಕ ಕೇರಳ ರಾಜ್ಯರ್ದ್ ಲ ಎಲ್ಯ ರಾಜ್ಯಲೆಡ್ 2-19 ಭಾಷೆನ್ ಅಧಿಕೃತ ಮಲ್ದೆರ್.

ಸಂವಿಧಾನದ ವಿಧಿ 347ತ್ತ ಪ್ರಕಾರ ರಾಜ್ಯ ಸರಕಾರಗ್ ಅಧಿಕೃತ ಮಲ್ಪುನ ಮಾತ ಅವಕಾಶನ್ ನಮ್ಮ ಸಂವಿಧಾನನೇ ಕೊರ್ತುಂಡು. ಆಂಡಲ ಪದೇ ಪದೇ ಇಂಚ ಅಧಿಕೃತ ಮಲ್ಪುವೆ ಪಂದ್ ತಡ ಮಲ್ಪುನೆನ್ ತೂಂಡ ಮೊಕ್ಲೆಗ್ ತುಳುನು ಅಧಿಕೃತ ಮಲ್ಪುನ ಮನಸ್ಸಿಜ್ಜಿ ಪನ್ಪುನವು ಗೊತ್ತಾಪುಂಡು.

ಅಂಚಾದ್ ಅಧಿಕೃತ ತಾನಮಾನದ ಬೇಡಿಕೆರ್ದ್ ತುಳುರಾಜ್ಯದ ಬೇಡಿಕೆನೇ ಎಚ್ಚ ಪರಿಣಾಮಕಾರಿ ಆತ್ಂಡ್.ಒಂಜಾತ್ ಒಂಜಿ ದಿನ ನಮ ನಟ್ಟುನೆರ್ದ್, ನಮಕ್ ದಕ್ಕೊಡಾಯಿನೆನ್ ಪಡೆಯೆರೆ ನಮ ಸ್ವತಂತ್ರರಾವೊಡು.ಸಂವಿಧಾನಿಕವಾದ್ ರಾಜ್ಯದ ಬೇಡಿಕೆ ದೀವೊಡು. ಉಂದು ಸಂವಿಧಾನಬದ್ಧವಾಯಿನ ಹಕ್ಕು ಆತ್ಂಡ್. ಅಂಚಾದ್ ತುಳುರಾಜ್ಯನ್ ಅವ್ವೆ ಸಂವಿಧಾನ ಕೊರ್ನ ಅವಕಾಶದ ಮುಕೇನ ಪಡೆಕ ಪಂದ್ ಭಾರತದ ಸಂವಿಧಾನನ್ ಗೌರವಿಸಾವೊಂದು ಸುರುಕು ತುಳುರಾಜ್ಯದ ವಿಚಾರಡ್ ಜನಜಾಗೃತಿಗಾದ್ X ಅಭಿಯಾನ ಮಲ್ತ್ ದ ಪಂದ್ ತುಳು ಸಂಘಟನೆದಕುಲು ತೆರಿಪಾದೆರ್.

ನ.19: ಕಲ್ಯಾಣ್ ಪಶ್ವಿಮದ ಮಾತೋಶ್ರೀ  ಸಭಾಗೃಹಡ್ ಕರ್ನಾಟಕ ರಾಜ್ಯೋತ್ಸವ, ಭಕ್ತಿಸುಗಿಪು ಪಂತೊ

ಕನ್ನಡ ಸಾಂಸ್ಕೃತಿಕ ಕೇಂದ್ರ ಕಲ್ಯಾಣ್ (ರಿ.) ದ 21 ನೇ ವರ್ಷದ ಉಚ್ಚಯ ಬೊಕ್ಕ ಕರ್ನಾಟಕ ರಾಜ್ಯೋತ್ಸವ ಲೇಸ್ ನ.19 ಐತಾರ ಮಧ್ಯಾಹ್ನ ಕಲ್ಯಾಣ್ ಪಶ್ವಿಮದ ಮಾತೋಶ್ರೀ  ಸಭಾಗೃಹಡ್ ನಡಪರೆ ಉಂಡು.

ಈ ಲೇಸ್ ಡ್ ಬೊಂಬೈ ಪರಿಸರದ ಸಮಸ್ತ ಕನ್ನಡ ಸಂಘ, ಸಂಸ್ಥೆಲು, ಬೇತೆ ಬೇತೆ ಜಾತಿ ಸಮುದಾಯ ಸಂಸ್ಥೆಲು, ಬೇತೆ ಬೇತೆ ಕಲಾಮಾಧ್ಯಮ ಕೂಟಲೆಗ್ ಸಮೂಹ ಭಕ್ತಿಸುಗಿಪು ಪಂತೊನ್ ಆಯೋಜನೆ ಮಲ್ದೆರ್.

ಈ ಪಂತೊಡು ಪಾಲ್ ಪಡೆಪುನ ಆಸಕ್ತೆರ್ ತನ್ನ ಪುದರ್ ನ್ ಸಂಸ್ಥೆದ ಗೌರವ ಪ್ರಧಾನ ಕಾರ್ಯದರ್ಶಿ ಪ್ರಕಾಶ್ ಕುಂಠಿನಿ 9322400251 ಅತ್ತಂಡ ಜತೆ ಕಾರ್ಯದರ್ಶಿ ಕುಮುದಾ ಡಿ. ಶೆಟ್ಟಿ 9619026965 ಮೆರೆನ್ ಸಂಪರ್ಕ ಮಲ್ತ್ ದ್ ನೊಂದಣಿ ಮಲ್ಪೊಲಿ.

ರಜನಿಕಾಂತ್ ಗ್ ದೇವಲ್ಯ ನಿರ್ಮಾಣ ಮಲ್ತಿನ ಅಭಿಮಾನಿ

ತಮಿಳುನಾಡು: ಭಾರತೀಯ ಚಿತ್ರರಂಗದ ಸೂಪರ್ ಸ್ಟಾರ್ ತಮಿಳು ನಟೆ ರಜನಿಕಾಂತ್ ಮೆರೆಗ್ ಅಭಿಮಾನಿಯೊರಿ ದೇವಲ್ಯನ್ ನಿರ್ಮಾಣ ಮಲ್ದೆರ್.

ತಮಿಳುನಾಡ್ ದ ಮಧುರೈನ ಕಾರ್ತಿಕ್ ತನ್ನ ಇಲ್ಲದ ಜಾಲ್ ಡೇ ತಲೈವಾಗ್ ದೇವಲ್ಯನ್ ಕಟ್ಟ್ ದೆರ್. ಈ ದೇವಲ್ಯದೊಲಯಿ 250 ಕೆ.ಜಿ ತೂಕದ ರಜನಿಕಾಂತ್ ಮೂರ್ತಿ ಪ್ರತಿಷ್ಠಾಪನೆ ಮಲ್ದೆರ್.

ಯಾನ್ ರಜನಿಕಾಂತ್ ಬುಡ್ದ್ ಬೇತೆ ಒವ್ವೇ ನಟೆರೆನ ಪಿಕ್ಚರ್ ತೂಪುಜಿ. ಎಂಕ್ ಆರ್ ದೇವೆರ್. ಯಾನ್ ದೇವಲ್ಯ ನಿರ್ಮಾಣ ಮಲ್ದೆ. ರಜಿನಿಕಾಂತ್ ಮೆರೆನ್ ಮಸ್ತ್ ಮೋಕೆ ಮಲ್ಪುವೆ. ಎನ್ನ ಕುಟುಂಬದ ಐನ್ ತರೆಮಾರ್ ರ್ದಿಂಚಲ ಎಕುಲು ರಜಿನಿಕಾಂತ್ ಮೆರೆನ ಅಭಿಮಾನಿಲು ಪಂದ್ ಅಭಿಮಾನಿ ಕಾರ್ತಿಕ್ ಪಂತೆರ್.