ಬಿಜೆಪಿ ಹೀನಾಯವಾದ್ ಸೋತಿನ ಕಾರಣ ಮಾಜಿ ಸಿಎಂ ಸದಾನಂದ ಗೌಡ ಬೊಕ್ಕ ಪಕ್ಷದ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಮೆರೆನ ಜಿಲ್ಲೆಡೇ ಅವಮಾನ ಮಲ್ತಿನ ಘಟನೆ ದಕ್ಷಿಣ ಕನ್ನಡದ ಪುತ್ತೂರ್ ಡ್ ನಡತ್ ದ್ಂಡ್.
ಈ ರಡ್ಡ್ ನಾಯಕೆರೆನ ಭಾವಚಿತ್ರದ ಬ್ಯಾನರ್ ಪಾಡ್ದೆರ್. ಆಯಿಟ್ಟ್ ಬಿಜೆಪಿ ಸೋಪರೆ ಕಾರಣಕರ್ತೆರಾಯಿನ ನಿಕುಲೆಗ್ ಶದ್ಧಾಂಜಲಿ, ಬೇನೆ ಆಯಿನ ಹಿಂದೂ ಕಾರ್ಯಕರ್ತೆರ್ ಪಂದ್ ಬರೆದಿತ್ತೆರ್. ಅತ್ತೆ ಅತ್ತ್ ಬ್ಯಾನರ್ ಗ್ ಜೋಡುದ ಮಾಲೆ ಪಾಡ್ದೆರ್.
ವಿಧಾನ ಸಭೆ ವೋಟುಡು ಬಿಜೆಪಿ ಅಭ್ಯರ್ಥಿ ಡಾ.ಕೆ.ಸುಧಾಕರ್ ಮೆರೆನ ಸೋಲುರ್ದು ಬೇಜಾರ್ ಆಯಿನ ಅಭಿಮಾನಿಯೊರಿ ಕೆರೆಕ್ಕ್ ಲಾಗಿದ್ ತೀರ್ ಪೋಯಿನ ಘಟನೆ ಚಿಕ್ಕಬಳ್ಳಾಪುರ ತಾಲೂಕ್ ದ ವಡ್ರೆಪಾಳ್ಯಡ್ ನಡತ್ಂಡ್.
ತೀರ್ ಪೋಯಿನಾರ್ ಚಿತ್ತಾರ ವೆಂಕಟೇಶ ಪಂದ್ ತೆರಿದ್ ಬೈದ್ಂಡ್. ಮೇರ್ ಸುಧಾಕರ್ ಮೆರೆನ ಕಟ್ಟಾ ಅಭಿಮಾನಿಯಾದಿತ್ತೆರ್. ಸುಧಾಕರ್ ಸೋಲುರ್ದ್ ಬೇಜಾರಾದ್ ಆತ್ಯಹತ್ಯೆ ಮಲ್ತೊಂದೆರ್ ಪಂದ್ ತೆರಿದ್ ಬೈದ್ಂಡ್. ಚಿಕ್ಕಬಳ್ಳಾಪುರ ಕ್ಷೇತ್ರಡ್ ಈ ಸರ್ತಿ ಕಾಂಗ್ರೆಸ್ ದ ಪ್ರದೀಪ್ ಈಶ್ವರ್ 10,642 ವೋಟುದ ಅಂತರಡ್ ಗೆಂದ್ ದೆರ್.
ಸಿಬಿಐ ನಿರ್ದೇಶಕೆರಾದ್ ನೇಮಕ ಆಯಿನ ಪ್ರವೀಣ್ ಸೂದ್, ಕೇಂದ್ರ ಸರ್ಕಾರ ಬೊಕ್ಕ ಕರ್ನಾಟಕಗ್ ಗೌರವ ಕನಪೆ ಪಂದ್ ಪಂಡೆರ್.
ಸಿಬಿಐ ನಿರ್ದೇಶಕೆ ಆಪಿನ ನಿರೀಕ್ಷೆ ಇತ್ತಿಜಿ. ಎನ್ನ ಆಯ್ಕೆ ಎಂಕ್ ಅಚ್ಚರಿ ಆತ್ಂಡ್. ಮೇ25 ಕ್ಕ್ ಡೆಲ್ಲಿಗ್ ಪೋದು ಸಿಬಿಐ ನಿರ್ದೇಶಕೆರಾದ್ ಅಧಿಕಾರಿ ಸ್ವೀಕಾರ ಮಲ್ಪೆರೆ ಉಲ್ಲೆ. ಎನ್ನ ಸೇವೆ ಗುರುತಿಸಾದ್ ಕೇಂದ್ರ ಸರ್ಕಾರದ ಮಹತ್ವದ ಹೊಣೆಗಾರಿಕೆ ಕೊರ್ತುಂಡು. ಆ ನಂಬಿಕೆ ಚ್ಯುತಿ ಬಾರದಿಲೆಕ್ಕ ಕಾನೂನುದ ಚೌಕಟ್ಟುರ್ದ್ ಬೇಲೆ ಮಲ್ಪುವೆ ಪಂದ್ ಪಂಡೆರ್.
ಬಿರುವ ಜವನೆರ್ ಮಸ್ಕತ್ ಮೊಕುಲು ಮೇ19 ಸುಕ್ರಾರ ಮಸ್ಕತ್ ಒಮಾನ್ ಡ್ “ಸ್ವಾಮಿ ಕೊರಗಜ್ಜ ” ಬೊಕ್ಕ ” ಶ್ರೀ ಶನೀಶ್ವರ ಮಹಾತ್ಮೆ ” ತುಳು ಯಕ್ಷಗಾನ ತಾಳ ಮದ್ದಳೆನ್ ಆಯೋಜನೆ ಮಲ್ದೆರ್.
ದಾರ್ ಸೈಟ್ ಶ್ರೀ ಕೃಷ್ಣ ದೇವಲ್ಯಡ್ ಶ್ರೀ ಶನೀಶ್ವರ ಭಕ್ತ ವೃಂದ ಪಕ್ಷಿಕೆರೆ ಕುಡ್ಲ ಮೊಕ್ಲೆರ್ದ್ ನವರಸ ಇಪ್ಪುನ ರಡ್ಡ್ ತುಳು ಯಕ್ಷಗಾನ ಪ್ರಸಂಗಲು ಒಂಜೇ ದಿನ ಪ್ರದರ್ಶನ ಅವೆರೆ ಉಂಡು ಪಂದ್ ಬಿರುವ ಜವನೆರ್ ಸಂಘಟನೆದ ಮಾಧುರಿ ಸುವರ್ಣ ಸುದ್ದಿಗೋಷ್ಠಿಡ್ ತೆರಿಪಾದೆರ್.
ಮಸ್ಕತ್ ದ ಬಿರುವ ಜವನೆರ್ ಸಂಘಟನೆ ಕರಿನ ಒಂಜಿ ದಶಕರ್ದ್ ಮಸ್ಕತ್ ಡ್ ಸಾಮಾಜಿಕ, ಧಾರ್ಮಿಕ, ಸೇವಾ ಚಟುವಟಿಕೆನ್ ನಡಪಾವೊಂದು ಬೈದೆರ್. ನೇರ್ದ್ ದುಂಬು ಉಂದುವೇ ಕೂಟನ್ ಲೆತ್ತ್ ದ್, ಒಮಾನ್ ರಾಷ್ಟ್ರಡ್ ಸುರುತ್ತ ಪೂಜೆದೊಟ್ಟಿಗೆ “ಶನೀಶ್ವರ ಮಹಾತ್ಮೆ ” ಯಕ್ಷಗಾನ ತಾಳಮದ್ದಳೆನ್ ಆಯೋಜನೆ ಮಲ್ತಿನ ಕೀರ್ತಿಗ್ ಪಾತ್ರರಾತೆರ್.
ಒಮಾನ್ ಬಿಲ್ಲವಾಸ್, ಬಂಟ್ಸ್ ಓಮನ್, ವಿಶ್ವಕರ್ಮ, ಗೌಡ ಸಾರಸ್ವತ ಬ್ರಾಹ್ಮಣ, ಮೊಗವೀರ ಒಮಾನ್ ಬೊಕ್ಕ ತುಳು ಭಾಷಾ ಸಂಘಟನೆದ ಸಹಕಾರ, ಸಹಭಾಗಿತ್ವಡ್ ಈ ಲೇಸ್ ನ್ ಸಂಯೋಜನೆ ಮಲ್ಪೆರೆ ಆತ್ಂಡ್.
ಮೇ19 ಕ್ಕ್ ಬೊಲ್ಪುಗು 8.30 ರ್ದ್ 12.30 ಮುಟ್ಟ ಹರೀಶ್ ಶೆಟ್ಟಿ ಸೂಡ ರಚನೆದ “ಅಜ್ಜ ಕೊರಗಜ್ಜ” ತುಳು ತಾಳಮದ್ದಳೆ, ಬೊಕ್ಕ ಪ್ರಸಾದ ಭೋಜನ, ಅವೆರ್ದ್ ಬೊಕ್ಕ ಮಧ್ಯಾಹ್ನ 2.30 ರ್ದ್ ಬಯ್ಯ 7ಗಂಟೆ ಮುಟ್ಟ ಚಿನ್ಮಯ ದಾಸ ವಿರಚಿತ “ಶ್ರೀ ಶನೀಶ್ವರ ಮಹಾತ್ಮೆ” ವಿಕ್ರಮಾದಿತ್ಯ ಚರಿತ್ರೆ ಪನ್ಪುನ ಪುಣ್ಯ ಪ್ರಸಂಗ ಪೂಜೆದೊಟ್ಟಿಗೆ ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು.
ಕರಿನ ಮೂಜಿ ದಶಕರ್ದ್ ಶನಿ ಪೂಜೆದೊಟ್ಟಿಗೆ ತಾಳಮದ್ದಳೆನ್ ಮಸ್ಕತ್, ದುಬೈ, ಅಬುದಾಬಿ, ಬೊಂಬೈ, ಸಾಂಗ್ಲಿ ಸೇರಿನಂಚೆನೆ ದೇಶ ವಿದೇಶಡ್ ನೂದೆರ್ದ್ ಎಚ್ಚ ಲೇಸ್ ನ್ ಕೊರಿನ ಕರಾವಳಿದ ಪುಗರ್ತೆದ ಯಕ್ಷಗಾನ ಕೂಟ ಶ್ರೀ ಶನೀಶ್ವರ ಭಕ್ತ ವೃಂದ ಪಕ್ಷಿಕೆರೆ ಇತ್ತೆ ರಡ್ಡನೇ ಸರ್ತಿ ಮಸ್ಕತ್ ಡ್ ಖ್ಯಾತ ಅರ್ಥಧಾರಿಲೆನ ಸಮ್ಮಿಲನದೊಟ್ಟಿಗೆ ಲೇಸ್ ಕೊರಿಯೆರೆ ತಯಾರ್ ಆತ್ಂಡ್.
ತೆಂಕು ತಿಟ್ಟುದ ಪುಗರ್ತೆದ ಭಾಗವತೆರ್ ರವಿಚಂದ್ರ ಕನ್ನಡಿಕಟ್ಟೆ ಮೆರೆನ ಭಾಗವತಿಕೆಡ್ ರಡ್ಡ್ ಪ್ರಸಂಗಲು ಬರಿಯೆರೆ ಉಂಡು. ಹಿಮ್ಮೆಳಡ್ ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ, ಭಾಸ್ಕರ ಭಟ್ ಕಟೀಲ್ ಸಹಕಾರ ಮಲ್ಪೆರೆ ಉಲ್ಲೆರ್. ಪಕ್ಷಿಕೆರೆ ಪದ್ಮನಾಭ ಶೆಟ್ಟಿಗಾರ್ ಮೇರ್ ಕೂಟದ ಪ್ರಧಾನ ಸಂಚಾಲಕೆರಾತೆರ್.
ಅರ್ಥಧಾರಿಲಾದ್ ಕದ್ರಿ ನವನೀತ ಶೆಟ್ಟಿ, ಶ್ರೀಪತಿ ಭಟ್ ಸಸಿಹಿತ್ಲು, ವಿಜಯ ಕುಮಾರ್ ಶೆಟ್ಟಿ ಮೊಯಿಲೊಟ್ಟು, ಸೀತಾರಾಮ್ ಕುಮಾರ್ ಕಟೀಲ್, ಸದಾಶಿವ ಆಳ್ವ ತಲಪಾಡಿ, ಕಾವಳಕಟ್ಟೆ ದಿನೇಶ್ ಶೆಟ್ಟಿ, ದಯಾನಂದ ಜಿ ಕತ್ತಲ್ ಸಾರ್, ಪ್ರಸನ್ನ ಶೆಟ್ಟಿ ಅತ್ತೂರು, ಪುಷ್ಪರಾಜ ಕುಕ್ಕಾಜೆ, ರಾಮಚಂದ್ರ ಮುಕ್ಕ ಪಾಲ್ ಪಡೆಯೆರೆ ಉಲ್ಲೆರ್.
ಉಂದು ತುಳು ಭಾಷೆದ ಸೊಗಡು, ಅಜ್ಜ ಕೊರಗಜ್ಜನ ಸಂದಿ ಪಾರ್ದನದ ತಿರ್ಲ್, ಪುರಾಣ ಪುಣ್ಯ ಕತೆಕ್ಕ್ ಪೊಸ ದೇಖಿ ಕೊರ್ಪಿನ ಲೇಸ್ ಉಂದಾತ್ಂಡ್. ಮಸ್ಕತ್ ಡ್ ವಾಸ ಇಪ್ಪುನ ಮಾತ ಸಮುದಾಯದ ಕಲಾಸಕ್ತೆರ್ ಪಾಲ್ ಪಡೆದ್ ಸಹಕಾರ ಮಲ್ಪೊಡು ಪಂದ್ ಬಿರುವ ಜವನೆರ್ ಮಸ್ಕತ್ ಬಿನ್ನಾಪು ಮಲ್ದೆರ್.
ದಾಮೋದರ್ ಕುಂದರ್ ಮಸ್ಕತ್, ಸುಹಾನ್ ಸುವರ್ಣ ಮಸ್ಕತ್, ಕದ್ರಿ ನವನೀತ ಶೆಟ್ಟಿ, ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ ಸುದ್ದಿಗೋಷ್ಠಿಡ್ ಇತ್ತೆರ್.
ದಾಮೋದರ್ ಕುಂದರ್ 9353141939
ಕದ್ರಿ ನವನೀತ ಶೆಟ್ಟಿ
944813061
ವರದಿ: ಮುಲ್ಕಿ ಕರುಣಾಕರ ಶೆಟ್ಟಿ
ಆಂಧ್ರಪ್ರದೇಶದ ವೈಎಸ್ ಆರ್ ಜಿಲ್ಲೆದ ಕೊಂಡಾಪುರಂ ಮಂಡಲದ ಚಿತ್ರಾವತಿ ಸಂಕದ ಕೈತಲ್ ತಿರುಪತಿ ದರ್ಶನ ಮಲ್ತ್ ದ್ ಪಿರ ಬನ್ನಗ ಅಕಲ್ನ ಗಾಡಿ ಆಕ್ಸಿಡೆಂಟ್ ಆದ್ ಏಳ್ ಜನ ಜಾಗೆಡೇ ತೀರ್ ಪೋಯೆರ್.
ಈ ಘಟನೆ ಪ್ರಯಾಣಿಕೆರೆನ್ ಗಾಡಿಡ್ ಲೆತೊಂದು ಪೋನಗ ಲಾರಿ ಗುದ್ದುದುಂಡ್. ತೀರ್ ಪೋಯಿನಕುಲು ತಾಡಿಪತ್ರಿಗ್ ಸೇರಿನಕುಲು. ತಿರುಮಲರ್ದ್ ದರ್ಶನ ಮುಗಿತ್ ದ್ ಬರೊಂದು ಇತ್ತೆರ್.
ತೋಕೂರು : ಹಳೆಯಂಗಡಿ ಕೈತಲ್ದ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನಡ್ ನಡತೊಂದುಪ್ಪುನ ಪುನಃಪ್ರತಿಷ್ಠೆ ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ಉಚ್ಚಯದ ನಿಲೆಟ್ಟ್ ಮೇ 14 ಐತಾರ ಬೊಲ್ಪುಗು ಶ್ರೀ ಮಹಾಗಣಪತಿ ಅಂಚೆನೆ ಶ್ರೀ ದುರ್ಗಾದೇವಿನ ಬಿಂಬ ಪ್ರತಿಷ್ಠೆ ಬೊಕ್ಕ ಅಷ್ಟಬಂಧ ಪ್ರತಿಷ್ಠೆ ನಡತ್ಂಡ್.
ತಿಬಾರ್ ಗೋಪಾಲಕೃಷ್ಣ ತಂತ್ರಿಲೆನ ಮುತಾಲಿಕೆಡ್ ನಡಪುನ ಧಾರ್ಮಿಕ ವಿಧಿ ವಿಧಾನಡ್ ಕಲಶಾಭಿಷೇಕ, ಮಹಾಪೂಜೆ, ಪ್ರಸಾದ ವಿತರಣೆ, ದಿಶಾ ಹೋಮ, ಬಲಿ ಶಿಲಾ ಪ್ರತಿಷ್ಠೆ, ಮಹಾಬಲಿ ಪೀಠ ಪ್ರತಿಷ್ಠೆ ನಡತ್ಂಡ್.
ದಾನಿಲಾಯಿನತೋಕೂರು ಪುರುಷೋತ್ತಮ ರಾವ್ ಬೊಕ್ಕ ಯಶೋಧ ದಂಪತಿಲು ಶ್ರೀ ದುರ್ಗಾದೇವಿಗೆ ಬಂಗಾರ್ದ ಕಾಸಿನ ಹಾರ ಅರ್ಪಣೆ ಮಲ್ತೆರ್. ತೋಕೂರು ಮಜಿಗುತ್ತು ವ್ಯಾಸರಾವ್ ಅಂಚೆನೆ ಮೆಗ್ಯೆ ಪಲಿಯಲ್ಲು ಶ್ರೀ ದುರ್ಗಾದೇವಿಗ್ ಬೊಳ್ಳಿದ ಕವಚ ಸಂದಾಯೆರ್.
ಮೂಲ್ಕಿ ಸೀಮೆದ ಅರಸೆರಾಯಿನ ಎಂ. ದುಗ್ಗಣ್ಣ ಸಾವಂತೆರ್ ಭೇಟಿ ಕೊರ್ದು ದೇವಲ್ಯದ ಬೇಲೆದ ಬಗೆಟ್ಟ್ ಪರಿಶೀಲನೆ ಮಲ್ತೆರ್.
ಅಂಚೆನೆ ಬಪ್ಪನಾಡ್, ಕಲ್ಲಾಪು, ಇಂದಿರಾನಗರ, ಕೆರೆಕಾಡು, ಪಕ್ಷಿಕೆರೆ, ಪಡುಪಣಂಬೂರು ಅರಮನೆ, ಪಂಜ ಕೊಯಿಕುಡೆ ಇಂಚಿನ ಮಾತಾ ಕಡೆರ್ದ್ ಗ್ರಾಮಸ್ಥೆರ್ ಪುದೆ ಕಾಣಿಕೆ ಸಮರ್ಪಣೆ ಮಲ್ತೆರ್.
ಮೂಲ್ಕಿ ಅರಮನೆತ್ತ ಗೌತಮ್ ಜೈನ್, ಚಂದ್ರಶೇಖರ್, ಉಮೇಶ್ ಪೂಜಾರಿ, ಕ್ಷೇತ್ರದ ಅರ್ಚಕೆರ್ ಮಧುಸೂಧನ ಆಚಾರ್ಯ, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಉಪಾಧ್ಯಕ್ಷೆರ್ ಮೋಹನ್ದಾಸ್, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಸದಸ್ಯೆರಾಯಿನ ವಿಜಯಕುಮಾರ್ ರೈ, ಟಿ.ಪುರುಷೋತ್ತಮ ರಾವ್, ಲೋಕಯ್ಯ ಕೆ. ಸಾಲ್ಯಾನ್, ವಿಪುಲ ಡಿ. ಶೆಟ್ಟಿಗಾರ್, ಶಾರದಾ ಜಿ. ಬಂಗೇರ, ವಿಶ್ವನಾಥ್, ಯೋಗೀಶ್ ಆರ್. ಕೋಟ್ಯಾನ್, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್ಕುಮಾರ್ ಹೆಗ್ಡೆ, ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ, ಸಂಚಾಲಕೆರ್ ಸೋಂದಾ ಭಾಸ್ಕರ ಭಟ್, ಅನಂತರಾಮ ಶಿಮಂತ್ರಾಯ, ಪಿ.ಸಿ.ಕೋಟ್ಯಾನ್, ಆರ್.ಎನ್.ಶೆಟ್ಟಿಗಾರ್, ಗಂಗಾಧರ ಶೆಟ್ಟಿ, ಗುರುರಾಜ್ ಎಸ್. ಪೂಜಾರಿ, ದೇವಿದಾಸ ಶೆಟ್ಟಿ ಕಿನ್ನಿಗೋಳಿ, ರತ್ನಾಕರ ಶೆಟ್ಟಿಗಾರ್, ಸಂಪತ್ ದೇವಾಡಿಗ, ದೀಪಕ್ ಸುವರ್ಣ, ಧನಂಜಯ ಶೆಟ್ಟಿಗಾರ್, ವಿಜಯ ಶೆಟ್ಟಿ ಕೊಲ್ನಾಡು ಮೊಕುಲು ಮಾತ ಇತ್ತೆರ್.
ದಕ್ಷಿಣ ಕನ್ನಡ ಕ್ಷೇತ್ರಡ್ ಗೆಂದಿನಕುಲು
ಸುಳ್ಯ: ಭಾಗೀರಥಿ ಮುರುಳ್ಯ (ಬಿಜೆಪಿ)
ಪುತ್ತೂರ್: ಅಶೋಕ್ ಕುಮಾರ್ ರೈ (ಕಾಂಗ್ರೆಸ್)
ಬಂಟ್ವಾಳ: ರಾಜೇಶ್ ನಾಯ್ಕ್ (ಬಿಜೆಪಿ)
ಬೊಲ್ತೇರ್: ಹರೀಶ್ ಪೂಂಜ (ಬಿಜೆಪಿ)
ಕುಡ್ಲ: ಯು ಟಿ ಖಾದರ್ (ಕಾಂಗ್ರೆಸ್)
ಕುಡ್ಲ ಉತ್ತರ: ಭರತ್ ಶೆಟ್ಟಿ (ಬಿಜೆಪಿ)
ಕುಡ್ಲ ದಕ್ಷಿಣ: ವೇದವ್ಯಾಸ ಕಾಮತ್ (ಬಿಜೆಪಿ)
ಬೆದ್ರ: ಉಮಾನಾಥ ಕೋಟ್ಯಾನ್ (ಬಿಜೆಪಿ)
ಒಡಿಪು ಜಿಲ್ಲೆಡ್ ಫುಲ್ ಬಿಜೆಪಿ
ಬೈಂದೂರು : ಗುರುರಾಜ್ ಗಂಟಿಹೊಳಿ
ಕುಂದಾಪುರ : ಕಿರಣ್ ಕೊಡ್ಗಿ
ಒಡಿಪು : ಯಶ್ ಪಾಲ್ ಸುವರ್ಣ
ಕಾರ್ಲ : ಸುನಿಲ್ ಕುಮಾರ್
ಕಾಪು : ಸುರೇಶ್ ಶೆಟ್ಟಿ ಗುರ್ಮೆ
ರಾಜ್ಯ ರಾಜಕೀಯದ ಹಾಸನ ಕ್ಷೇತ್ರಡ್ ಜೆಡಿಎಸ್ ಅಭ್ಯರ್ಥಿ ಸ್ವರೂಪ್ ಗೆಂದ್ ದೆರ್.
ಬಿಜೆಪಿದ ಪ್ರೀತಂಗೌಡ ಮೆರೆನ ಎದುರು 10 ಸಾರ ವೋಟುದ ಅಂತರಡ್ ಗೆಂದ್ ದೆರ್.
ರಾಜ್ಯಡ್ ಕಾಂಗ್ರೆಸ್ ಗೆಂದಿನ ಬೊಕ್ಕ ಗೆಲ್ಮೆ ದಾಖಲ್ ಆತ್ಂಡ್.
ಕನಕಪುರಟ್ ಡಿಕೆ ಶಿವಕುಮಾರ್ ಸಚಿವೆರ್ ಆರ್. ಅಶೋಕ್ ನ ಎದುರು ಗೆಂದ್ ದೆರ್. ಉಂಡು ಮೆರೆನ 8 ನೇ ಗೆಲ್ಮೆ ಆತ್ಂಡ್. ಡಿಕೆಶಿ ಸುಮಾರ್ 42 ಸಾರರ್ದ್ ಎಚ್ಚ ವೋಟುರ್ದ್ ಗೆಂದ್ ದೆರ್.
