ಕುಡ್ಲ: “ಬಿರ್ದ್‌ದ ಕಂಬುಲ” ತುಳು ಪಿಚ್ಚರ್‌ದ ಕಡೆತ್ತ ಶೂಟಿಂಗ್ ನಡತೊಂದು ಉಂಡು. ತುಳುನಾಡ್‌ದ ಪುಗರ್ತೆದ ಕಲಾವಿದೆರ್ ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್. ಈ ಪಿಚ್ಚರ್ ತುಳುನಾಡ್‌ದ ಸಂಸ್ಕೃತಿಗ್ ಮಾಮಲ್ಲ ಕೊಡುಗೆ ಕೊರಿಯರೆ ಉಂಡು ಪಂದ್ ಪಿಚ್ಚರ್‌ದ ನಿರ್ದೇಶಕೆರ್ ಎಸ್.ವಿ. ರಾಜೇಂದ್ರ ಸಿಂಗ್ ಬಾಬು ಪಂಡೆರ್.
ಕುಡ್ಲದ ಉರ್ವ ಮಾರ್ಕೆಟ್ ಮೈದಾನಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ಆರ್, ಈ ಪಿಚ್ಚರ್ ಒಂಜಿ ಕಂಬುಲದ ಕಥೆ ಆತಿನೆಡ್ದಾವರ ಪ್ರಾಣಿಲೆನ ಒಟ್ಟುಗು ಶೂಟಿಂಗ್ ಮಲ್ತ್‌ದ. ಉಂದು ಸುಲಭದ ಪಾತೆರ ಅತ್ತ್. ಉಂದೆಟ್ಟ್ ಬರ್ಪಿನ ಮಾತ ದೃಶ್ಯಲ ನೈಜವಾದ್ ಇತ್ತ್‌ದ್ ಸಹಜವಾದ್ ಚಿತ್ರನ್ ನಿರ್ಮಾಣ ಮಲ್ತ್‌ದ್. ತುಳುನಾಡ್‌ದ ಪುಗರ್ತೆದ ರಂಗಭೂಮಿ ಕಲಾವಿದೆರ್ ಪ್ರಕಾಶ್ ರಾಜ್, ರವಿಶಂಕರ್ ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್ ಪಂಡೆರ್. ನಿರ್ಮಾಪಕೆರ್ ಅರುಣ್ ರೈ ತೋಡಾರ್, ರಾಜೇಶ್ ಕುಡ್ಲ, ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ಇತ್ತಿನೆಡ್ದಾವರ ತುಳು ಭಾಷೆ ಯಂಕ್ ಗೊತ್ತಿಜಿಂಡಲ ಸುಲಭವಾದ್ ಶೂಟಿಂಗ್ ಮಲ್ಪರೆ ಆಂಡ್. “ಬಿರ್ದ್‌ದ ಕಂಬುಲ” ತುಳು ಪಿಚ್ಚರ್‌ನ್ ಕನ್ನಡ, ಹಿಂದಿ, ತಮಿಳ್, ಮಲಯಾಲಂ ಭಾಷೆಡ್‌ಲ ಡಬ್ ಮಲ್ತ್‌ದ್ ಬುಡುಗಡೆ ಮಲ್ಪರೆ ಉಂಡು ಪಂದ್ ಪಂಡೆರ್.
ಪಿಚ್ಚರ್‌ದ ಸಂಭಾಷಣೆಗಾರೆರ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ಪಾತೆರ್ದ್, “ಈ ಪಿಚ್ಚರ್‌ದ ಮುಕೇನ ರಾಜೇಂದ್ರ ಸಿಂಗ್ ಬಾಬು ಮೇರ್ ತುಳು ಭಾಷೆಗ್ ಪೊಸ ಆಯಾಮ ಕೊರಿಯರೆ ಉಲ್ಲೆರ್. ಉಂದೊಂಜಿ ವಿಭಿನ್ನವಾಯಿನ ಪಿಚ್ಚರ್. ಮಾತೆರ್‍ನಲಾ ಸಕಾರ ಈ ಪಿಚ್ಚರ್‌ಗ್ ಬೋಡು ಪಂದ್ ಪಂಡೆರ್.
ಕುಸಲ್ದರಸೆ ನವೀನ್ ಡಿ. ಪಡೀಲ್ ಪಾತೆರ್ದ್, “ಚಿತ್ರದ ಮಿತ್ತ್ ನಿರೀಕ್ಷೆ ಎಚ್ಚ ಆತ್ಂಡ್. ಯನ್ನ ಪಾತ್ರ ಡಿಫರೆಂಟ್ ಆದ್ ಉಂಡು. ಕಂಬುಲ ಬರೀ ನಮ್ಮ ಸಂಸ್ಕೃತಿ ಮಾತ್ರ ಅತ್ತ್ ಅವ್ ನಮ್ಮ ಬದ್‌ಕ್ ಪಂದ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಕಂಬುಲ ಓಟಗಾರೆ ಶ್ರೀನಿವಾಸ ಗೌಡ, ನಟೆ ಸ್ವರಾಜ್ ಶೆಟ್ಟಿ, ಕಲಾ ನಿರ್ದೇಶಕೆರ್ ಚಂದ್ರಶೇಖರ್ ಸುವರ್ಣ ಇತ್ತೆರ್.
Editorial