ಕುಡ್ಲ: ಮೂಜಿ ದಿನತ ಉಲಯಿ ಪೊಯ್ಯೆ ದೆಪ್ಪರೆ ಪರ್ಮಿಶನ್!

ಕುಡ್ಲ: ಕರಾವಳಿ ನಿಯಂತ್ರಣ ವಲಯ (ಸಿಆರ್‌ಝಡ್) ವ್ಯಾಪ್ತಿಡ್ ಸಾಂಪ್ರದಾಯಿಕ ಪದ್ಧತಿಡ್ ಪೊಯ್ಯೆ ದೆಪ್ಪುನೆಕ್ಕ್ ರಡ್ಡ್ ಮೂಜಿ ದಿನಟ್ ಪರವಾನಿಗೆ ಕೊರ್ಪ ಪಂದ್ ದ.ಕ. ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್. ತೆರಿಪಾದೆರ್.

ಒಡಿಪು ಜಿಲ್ಲೆಗ್ ಸಂಬಂಧ ಪಟ್ಟಿನ ಕೇಸ್ ಡ್ ರಾಷ್ಟ್ರೀಯ ಹಸಿರು ನ್ಯಾಯಮಂಡಳಿ (ಎನ್‌ಜಿಟಿ) ಸರ್ಕಾರಗ್ ಕೊರ್ನ ನಿರ್ದೇಶನನ್ ದಕ್ಷಿಣ ಕನ್ನಡ (ದ.ಕ) ಜಿಲ್ಲೆಗ್ ಮೇ ತಿಂಗೊಲುಡು ಸಿಆರ್‌ಝಡ್ ವ್ಯಾಪ್ತಿಡ್ ಪೊಯ್ಯೆ ದೆಪ್ಪುನೆನ್ ಉಂತಾದಿತ್ತ್ಂಡ್. ನೆಕ್ ಸಂಬಂಧ ಪಟ್ಟಿನ ಅಧಿಕಾರಿಲೆನೊಟ್ಟಿಗೆ ಸಭೆ ನಡತ್ಂಡ್. 142 ಸಾಂಪ್ರದಾಯಿಕ ಪೊಯ್ಯೆ ದೆಪ್ಪುನಕ್ಲೆನ ಜಿಲ್ಲಾಡಳಿತ ಗುರ್ತ ಮಲ್ದ್ಂಡ್. ನನ 52 ಅರ್ಜಿಲು ಪರಿಶೀಲನೆಗ್ ಬಾಕಿ ಉಂಡು. ಅರ್ಜಿದಾರೆರ್ ಸಾಂಪ್ರದಾಯಿಕ ಪೊಯ್ಯೆ ದೆಪ್ಪುವೆರ ಇಜ್ಜ ಪಂದ್ ಪರಿಶೀಲನೆ ಮಲ್ಪೆರೆ ಸಹಾಯಕ ಆಯುಕ್ತೆರೆಗ್ ತೆರಿಪಾದ್ಂಡ್. ನಾನ್ ಸಿಆರ್‌ಝಡ್ ಪ್ರದೇಶಡ್ ಪೊಯ್ಯೆ ದೆಪ್ಪುನ 18 ಜಾಗೆನ್ ಗುರ್ತ ಮಲ್ತ್ ದ್, ಟೆಂಡರ್ ಲೈದೆರ್. ನನ 17ರ್ದ್ 18 ಕಡೆಟ್ ಪೊಯ್ಯೆದ ಗುಡ್ಡೆನ್ ಗುರ್ತ ಮಲ್ತ್ ದ್, ಜಿಲ್ಲಾಡಳಿತ ಪರಿಸರ ಅನುಮತಿಗಾದ್ ಕಾತೊಂದು ಉಂಡು. ಅನುಮತಿ ತಿಕ್ಕಿನ ಬೊಕ್ಕ ಪ್ರಕ್ರಿಯೆ ಸುರು ಆಪುಂಡು ಪಂದ್ ಪಂಡೆರ್. ನಾನ್ ಸಿಆರ್ ಝಡ್ ಪ್ರದೇಶಡ್ ಸುಮಾರ್ 10 ಲಕ್ಷ ಮೆಟ್ರಿಕ್ ಟನ್ ಲಭ್ಯ ಉಂಡು ಪಂದ್ ಡಿಸಿ ತೆರಿಪಾದೆರ್. ಕಲ್ವ ತಾದಿಡ್ ಪೊಯ್ಯೆ ಸಾಲಗ್ 18 ಸಾರ ರೂ. ಒರ ಪೊಯ್ಯೆ ದೆಪ್ಪುನೆನ್ ಸಕ್ರಮ ಮಲ್ತ್ಂಡ ಪ್ರತಿ ಲೋಡ್‌ಗ್ 7ರ್ದ್ 8 ಸಾರ ರೂ.ಗ್ ಜನಕ್ಲೆಗ್ ಪೊಯ್ಯೆ ತಿಕ್ಕಿಯೆರೆ ಉಂಡು ಪಂದ್ ಪಂಡೆರ್.