ಕಿರುತೆರೆಡ್ ಬೇಲೆ ಮಲ್ತಿನ ಕಲಾವಿದೆ, ಕರಿನ ಪತ್ತ್ ವರ್ಷರ್ದ್ ಸುಮಾರ್ ಧಾರವಾಹಿಲೆನ್ ನಿರ್ದೇಶನ ಮಲ್ತಿನ ಅನುಭವ ಇಪ್ಪುನ ರಂಜಿತ್ ರಾವ್ ಉಂದುವೇ ಸುರುತ ಬಾರಿ ನಿರ್ದೇಶನ ಮಲ್ತಿನ “ಪ್ರಾಯಶಃ” ಪಿಕ್ಚರ್ ದ ಟ್ರೈಲರ್ ಬುಡುಗಡೆ ಲೇಸ್ ಇಂಚಿಪ್ಪ ನಡತ್ಂಡ್.
ಮೇರೇ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದ್, ಆಕ್ಷನ್ ಕಟ್ ಪಂತೆರ್. ಅರ್ಹ ಕ್ರಿಯೇಶನ್ಸ್ ಬ್ಯಾನರ್ ದ ಅಡಿಟ್ ದೋಸ್ತಿಲು ಮಾತ ಸೇರ್ದ್ ಪಿಕ್ಚರ್ ನ್ ನಿರ್ಮಾಣ ಮಲ್ದೆರ್. ಉಂದು ಒಂಜಿ ಕ್ರೈಮ್ ಥ್ರಿಲ್ಲರ್ ಜಾನರ್ ಡ್ ನಡಪುನ ಕಥೆ ಆತ್ಂಡ್. ನೆತ್ತೊಟ್ಟಿಗೆ ಮೋಕೆದ ಸೀನ್ ಲ ಉಂಡು. ಕೇರ್ನ ಕೇಸ್ ಒಂಜೇತ ಸುತ್ತಲ ನಡಪುನ ಕಥೆ ಉಂದು ಆತ್ಂಡ್. ತನಿಖೆ ಮುಂದುವರಿವೊಂದು ಇಪ್ಪುನಗ ಸುತ್ತ ಮುತ್ತ ಇಪ್ಪುನಕ್ಲೆ ಕೇರ್ತೆರ ಪನ್ಪುನ ಭಾವನೆ ತೂಪುನಕ್ಲೆಗ್ ಬರ್ಪುಂಡು. ಆಂಡ ಅಕ್ಲೆನ ಊಹೆಗ್ ಮೀರ್ ನೆನ್ ಈ ಪಿಕ್ಚರ್ ಪನ್ಪುಂಡು ಪಂದ್ ನಿರ್ದೇಶಕೆರ್ ರಂಜಿತ್ ಪಂಡೆರ್. ಅಂಚನೆ ಈ ಪಿಕ್ಚರ್ ಎಕ್ಲೆನ ಎಲ್ಯ ಕನ, ಎಂಕುಲು ಸುರುಕು ಎನ್ನಿನನೇ ಬೇತೆ, ಇತ್ತೆ ಆಯಿನವೇ ಮಲ್ಲ. ಕುಡ್ಲ, ಬೆಂಗ್ಲೂರ್ ಸುತ್ತ ಮುತ್ತಲ ಸುಂದರ ತಾಣಲೆಡ್ ಪಿಕ್ಚರ್ ದ ಶೂಟಿಂಗ್ ಮಲ್ತೊಂದು ಉಲ್ಲ. ತೂಪುನಕ್ಲೆಗ್ ಒಂಜಿ ನಿಮಿಷಲ ಬೋರು ಅವಂದಿಲೆಕ್ಕ ಸುಮಾರ್ ಲೇಯರ್ ಇಪ್ಪುನ ಪಿಕ್ಚರ್ ಉಂದು. ಕೃರ್ತ ಕರ್ಮ ಬೊಕ್ಕ ಕ್ರಿಯೆದ ಮಿತ್ತ್ ನಡಪುನ ಕಥೆ ಈ ಪಿಕ್ಚರ್ ಡ್ ಉಂಡು. ಪ್ರತಿ ಸೀನ್ ಮಲ್ಪುನಗ ಎಂಕುಲು ಮಾಸ್ತ್ ಅಟ್ಟಣೆ ಮಲ್ತ್ ದ್, ಶೂಟ್ ಮಲ್ತ್ ದ ಪಂದ್ ಪಂಡೆರ್. ತುಳು ಪಿಕ್ಚರ್ ಡ್ ಆಕ್ಟಿಂಗ್ ಮಲ್ತಿನ ರಾಹುಲ್ ಅಮೀನ್ ಈ ಪಿಕ್ಚರ್ ಡ್ ಹೀರೋ ಆದ್ ಉಲ್ಲೆರ್. ವಿನಯ್ ಪ್ರಸಾದ್ ಮೆರೆನ ಅಣ್ಣನ ಮಗಲ್ ಕೃಷ್ಣಾ ಭಟ್ ಹೀರೋಯಿನ್ ಆದ್ ಆಕ್ಟ್ ಮಲ್ದೆರ್. ಬೊಕ್ಕ ಮಧು ಹೆಗಡೆ, ವಿನಯ್ ಶೋಭರಾಜ್ ಪಾವೂರ್ ಪಿಕ್ಚರ್ ಡ್ ತನ್ನ ಪಾತ್ರದ ಬಗೆಟ್ ಪಾತೆರಿಯೆರ್. ನೆಟ್ 3 ಪದ್ಯ ಉಂಡು. ವಿಜಯ ಕೃಷ್ಣ ಸಂಗೀತ ಸಂಯೋಜನೆ ಮಲ್ದೆರ್. ಪ್ರಶಾಂತ್ ಪಾಟೀಲ್ ಛಾಯಾಗ್ರಹಣ, ಅಶೋಕ್ ಸಂಕಲನ ಬೊಕ್ಕ ವಿನಾಯಕ್ ಮೆರೆನ ನೃತ್ಯ ನಿರ್ದೇಶನ ಈ ಪಿಕ್ಚರ್ ಡ್ ಉಂಡು. ಕುಡ್ಲ ಭಾಗದ ಕೊರ್ಪುನ ಹಕ್ಕ್ ಪಡೆದಿಪ್ಪುನ ವಿತರಕ ನಿಶಾಂತ್ ಪಾಲ್ ಪಡೆದ್ ಪಾತೆರ್ದ್, ದಕ್ಷಿಣ ಕನ್ನಡ, ಕಾಸ್ರೋಡು ಬೊಕ್ಕ ಒಡಿಪು ಏರಿಯಾದ ಸುಮಾರ್ ಸೆಂಟರ್ ಡ್ ಪಿಕ್ಚರ್ ನ್ ಎಂಕುಲೆ ರಿಲೀಸ್ ಮಲ್ಪುವ ಪಂದ್ ಪಂಡೆರ್. ಬೊಕ್ಕ ಸಹ ನಿರ್ಮಾಪಕೆರಾಯಿನ ಕೃಷ್ಣ ಕುಮಾರಿ, ಸುನಿಲ್ ಬೊಕ್ಕ ಸಂಕಲನಕಾರೆ ಅಶೋಕ್ ಪಿಕ್ಚರ್ ದ ಬಗೆಟ್ ಪಾತೆರಿಯೆರ್.
pallavi shetty