ಉಳ್ಳಾಲ ನಗರಸಭೆ ಸ್ಥಾಯಿ ಸಮಿತಿದ ಅಧ್ಯಕ್ಷೆರಾದ್ ವೀಣಾ ಡಿಸೋಜ ಆಯ್ಕೆ

ಪುಗರ್ತೆದ ಉಳ್ಳಾಲ ನಗರ ಸಭಾ ಸ್ಥಾಯಿ ಸಮಿತಿದ ಅಧ್ಯಕ್ಷೆರಾದ್ ಉಳಿಯ ಹೊಯ್ಗೆ 5 ನೇ ವಾರ್ಡ್ ದ ಪ್ರತಿನಿಧಿ ಆದಿತ್ತಿನ ಕಾಂಗ್ರೆಸ್ ಪಕ್ಷದ ಮಹಿಳಾ ಕೌನ್ಸಿಲರ್ ವೀಣಾ ಶಾಂತಿ ಡಿಸೋಜ ಮೇರ್ ಆಯ್ಕೆ ಆತೆರ್.

ಬಿಜೆಪಿದ 6 ಸದಸ್ಯೆರೆನ ತಟಸ್ಥ ನಿಲುವು, ಬೊಕ್ಕ SDPI 6 ಬೊಕ್ಕ ಜೆಡಿಎಸ್ 4 ಒಂಜಿ ಪಕ್ಷೇತರ ಸದಸ್ಯೆ, ಇಂಚ ಒಟ್ಟು 11 ಸದಸ್ಯೆರೆನ ವಿರೋಧದ ನಡುಟ್ ಆಡಳಿತ ಕಾಂಗ್ರೆಸ್ ಪಕ್ಷ ತನ್ನ ಒಂಜಿ ಸದಸ್ಯೆರ್ ರವಿಚಂದ್ರ ಮೇರೆನ ಗೈರುದೊಟ್ಟಿಗೆ ಪಕ್ಷದ 12 ಬೊಕ್ಕ ಒಂಜಿ ಪಕ್ಷೇತರ ಸದಸ್ಯೆರ್ ಅಬ್ದುಲ್ ಆಝೀಝ್ ಮೆರೆನ ಬೆಂಬಲ ಇಂಚ ಒಟ್ಟು 13 ಸದಸ್ಯೆರೆನ ಬಲದೊಟ್ಟಿಗೆ ತನ್ನಡನೇ 9 ಸ್ಥಾಯಿ ಸಮಿತಿದ ಸದಸ್ಯೆರೆನ್ ಆಯ್ಕೆ ಮಲ್ಪುನ ಮುಖೇನ ವೀಣಾ ಡಿಸೋಜ ಮೆರೆನ್ ಸ್ಥಾಯಿ ಸಮಿತಿದ ಅಧ್ಯಕ್ಷೆರಾದ್ ಆಯ್ಕೆ ಮಲ್ದೆರ್. ವೀಣಾ ಮೆರೆನ ಆಯ್ಕೆದೊಟ್ಟಿಗೆ ಉಳ್ಳಾಲ ನಗರ ಸಭೆಟ್ ಅಧ್ಯಕ್ಷೆರಾದ್ ಚಿತ್ರಕಲಾ ( ಹಿಂದೂ) ಉಪಾಧ್ಯಕ್ಷೆರಾದ್ ಆಯ್ಯೂಬ್ (ಮುಸ್ಲಿಂ) ಸ್ಥಾಯಿ ಸಮಿತಿದ ಅಧ್ಯಕ್ಷೆರಾದ್ ವೀಣಾ ಶಾಂತಿ ಡಿಸೋಜ (ಕ್ರಿಶ್ಚಿಯನ್) ಇಂಚ ಮೂಜಿ ಸಮುದಾಯಗ್ ಪ್ರಾಶಸ್ತ್ಯ ತಿಕ್ಕುಲೆಕ್ಕ ಕಾಂಗ್ರೆಸ್ ತೂವೊಂದುಂಡು.
ನಗರ ಸಭೆಟ್ ಪಕ್ಷಲೆನ ಬಲ:
ಕಾಂಗ್ರೆಸ್ 13, ಬಿಜೆಪಿ 6, SDPI 6, ಜೆಡಿಎಸ್ 4, ಪಕ್ಷೇತರ 2 ಒಟ್ಟು 31 .