ಹಳೆಯಂಗಡಿ : ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್(ರಿ)ತೋಕೂರು ಬೊಕ್ಕ ಲಯನ್ಸ್ & ಲಿಯೋ ಕ್ಲಬ್ ಕದ್ರಿ ಹಿಲ್ಸ್ ಕುಡ್ಲ ನೆತ್ತ ಒಟ್ಟು ಸೇರಿಗೆಡ್ ತುಳುನಾಡ ತುಡರ ಪರ್ಬ -2022 ಲೇಸ್ ಅ.26 ಬುಧಾರ ಬಯ್ಯಗ್ ಸಂಸ್ಥೆದ ಚಾವಡಿಡ್ ನಡತ್ಂಡ್.
ದ.ಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ಕೃಷ್ಣ ಪೂಜಾರಿ ಹಳೆಯಂಗಡಿ ಮೇರ್ ದೀಪ ಪೊತ್ತಾದ್ ಲೇಸ್ ದ ಉದಿಪನ ಮಲ್ತೆರ್.ಆರ್ ತುಳುನಾಡ ಸಂಸ್ಕೃತಿ ಪರಂಪರೆತ ಪ್ರತೀಕ ಆಯಿನ ತುಳುನಾಡ ತುಡರ್ ಪರ್ಬ ಬೊಕ್ಕ ಬಲಿಂದ್ರ ಪೂಜೆದ ಮಹತ್ವದ ಬಗೆಟ್ ಪಾತೆರಿಯೆರ್. ಉಡುಪಿ ಸಮೂಹ ಶಿಕ್ಷಣ ಸಂಸ್ಥೆಲು ಮಣಿಪಾಲ ಮುಲ್ಪದ ಉಪನ್ಯಾಸಕೆರ್ ಅರ್ಪಿತಾ ಪ್ರಶಾಂತ್ ಶೆಟ್ಟಿ ಕಟಪಾಡಿ ಮೇರ್ ಲೇಸ್ ದ ಅಧ್ಯಕ್ಷೆರ್ ಆದಿತ್ತೆರ್. ಸಂಸ್ಥೆದ ಜನ ಸೇವೆಗ್ ದಕ್ಷಿಣ ಕನ್ನಡ ಜಿಲ್ಲಾ ಪ್ರಶಸ್ತಿ ತಿಕ್ಕಿನೆನ್ ನೆಂಪು ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ತುಳುನಾಡ ತುಡರ್ ಪರ್ಬನ್ ಎಂಚ ಆಚರಣೆ ಮಲ್ಪೊಡು ಬೊಕ್ಕ ನನದ ಜನಾಂಗಗ್ ಎಂಚ ಅರ್ಥ ಮಲ್ಪೊಡು ಪಂದ್ ನೆತ್ತ ಬಗೆಟ್ ಪಾತೆರಿಯೆರ್. ಲೇಸ್ ಗ್ ಬಿನ್ನೆರಾದ್ ನಟೆ ದೀಪಕ್ ಶೆಟ್ಟಿ, ಲಯನ್ಸ್ ಕ್ಲಬ್, ಕದ್ರಿಹಿಲ್ಸ್ ಕುಡ್ಲದ ಮಾಜಿ ಅಧ್ಯಕ್ಷೆರ್ ವಿಜಯಕುಮಾರ್ ಶೆಟ್ಟಿ, ಸಂಸ್ಥೆದ ಗೌರವ ಅಧ್ಯಕ್ಷೆರ್ ಮೋಹನ್ ದಾಸ್, ಅಧ್ಯಕ್ಷೆರ್ ಸಂತೋಷ್ ದೇವಾಡಿಗ, ಮಹಿಳಾ ಕಾರ್ಯಾಧ್ಯಕ್ಷೆರ್ ಶೋಭಾ.ವಿ.ಅಂಚನ್ ಮತ್ತರ್ಮೆಡ್ ಇತ್ತೆರ್. ಈ ಪೊರ್ತುಡು ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ನರೇಂದ್ರ ಕೆರೆಕಾಡು, ಲಯನ್ಸ್ ಕ್ಲಬ್ ಕದ್ರಿಹಿಲ್ಸ್ ಮಾಜಿ ಅಧ್ಯಕ್ಷೆರ್ ಸಂಜೀವ ಶೆಟ್ಟಿ, ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ವ್ಯವಸ್ಥಾಪನ ಸಮಿತಿದ ಸದಸ್ಯೆರ್ ಯೋಗೀಶ್ ಕೋಟ್ಯಾನ್, ಬಿಲ್ಲವ ಸಮಾಜ ಸೇವಾ ಸಂಘ ಹಳೆಯಂಗಡಿದ ಗೌರವಾಧ್ಯಕ್ಷೆರ್ ಗಣೇಶ್ ಬಂಗೇರ ತೋಕೂರು, ವಿಶ್ವ ಬ್ಯಾಂಕ್ ನೀರು ಸರಬರಾಜು, ಕ್ಲಸ್ಟರ್-2 ಮಾಜಿ ಅಧ್ಯಕ್ಷೆರ್ ದಿನಕರ್ ಸಾಲ್ಯಾನ್, ಜಂಟಿ ಸಂಸ್ಥೆದ ಪದಾಧಿಕಾರಿಲು, ಸದಸ್ಯೆರ್, ಜೋಕುಲು, ಗ್ರಾಮಸ್ಥೆರ್ ಇತ್ತೆರ್. ಮಹಿಳಾ ಸಮಿತಿದ ಸದಸ್ಯೆರ್ ವಾಣಿ ಮಹೇಶ್, ಪ್ರಮೀಳಾ. ಕೆ .ದೇವಾಡಿಗ ಪ್ರಾರ್ಥನೆ ಮಲ್ತೆರ್. ಅಧ್ಯಕ್ಷೆರ್ ಸಂತೋಷ್ ದೇವಾಡಿಗ ಎದ್ಕೊನಿಯೆರ್. ಪ್ರಧಾನ ಕಾರ್ಯದರ್ಶಿ ಜಗದೀಶ್ ಕುಲಾಲ್ ಸೊಲ್ಮೆ ಸಂದಾಯೆರ್. ಕಾರ್ಯಾಧ್ಯೆಕ್ಷೆರ್ ಸುರೇಶ್ ಶೆಟ್ಟಿ ಲೇಸ್ ದ ನಿರೂಪಣೆ ಮಲ್ತೆರ್. ಸದಸ್ಯೆರ್ ಹಿಮಕರ್ ಕೋಟ್ಯಾನ್ ಉಪಹಾರ ಬೊಕ್ಕ ಸಂತೋಷ್ ಎಸ್. ದೇವಾಡಿಗ ಚೀಪೆತಿಂಡಿ ಕೊರ್ದು ಸಹಕಾರ ಮಲ್ತೆರ್.
Editorial