Fri. Nov 20th, 2026

ಕಾರ್ಲ : ಸಾರ ಸಾರ ಆಣಿ ಬೊಕ್ಕ ನೂಲು ಗಲಸ್‌ದ್ ಭಾರತದ ನಕ್ಷೆ ರಚನೆ ಮಲ್ತ್‌ದ್ ಅಂತಾರಾಷ್ಟ್ರೀಯ ಬುಕ್ ಆಫ್ ರೆಕಾರ್ಡ್ಸ್ ‌ಡ್ ಪುದರ್ ಪಡೆತಿನ ಯುವ ಕಲಾವಿದೆ, ಕಾರ್ಲ ತಾಲೂಕುದ ಬೋಳ ಕೀರ್ತನ್ ಪೂಜಾರಿ ಮೆರೆಗ್ 2026ನೇ ಸಾಲ್‌ದ ಕಲಾಭೂಮಿ ರಾಜ್ಯೋತ್ಸವ ಪ್ರಶಸ್ತಿ ತಿಕ್‌ದ್ಂಡ್.

ಕನ್ನಡ ರಾಜ್ಯೋತ್ಸವದ ಅಂಗವಾದ್ ಬೆಂಗಳೂರುಡು ನಡತಿನ ಲೇಸ್‌ಡ್ ಕೀರ್ತನ್ ಮೆರೆಗ್ ಶಾಲ್, ಪೇಟ, ನೆಂಪು ಕಾಣಿಕೆ, ನೆಂಪು ಕಾಣಿಕೆ, ಪ್ರಶಸ್ತಿ ಪತ್ರ ಕೊರ್ದು ಗೌರವ ಮಲ್ತೆರ್.

ಕಲೆಗ್ ತನನ್ ಮುಡಿಪು ದೀದ್ ರಾಷ್ಟ್ರಮಟ್ಟಡ್ ಕರ್ನಾಟಕದ ಕೀರ್ತಿನ್ ಎಚ್ಚ ಮಲ್ದಿನ ಕೀರ್ತನ್, ಪಿರಾಕ್‌ದ ಕಾಲದ ವಸ್ತುಲೆನ್ ಸಂಗ್ರಹ ಮಲ್ತ್‌ದ್ ಇತಿಹಾಸ, ಸಂಸ್ಕೃತಿ ಒರಿಪಾವುನ ಬೇಲೆಲ ಮಲ್ಪುವೆರ್. ಎಲ್ಯ ಪ್ರಾಯೊಡ್ದೇ ಪೇಪರ್ ಕ್ರಾಫ್ಟ್, ಡ್ರಾಯಿಂಗ್ ಕಲೆನ್ ಕಲ್ತ್‌ದ್ ಮಸ್ತ್ ಶಿಬಿರಾರ್ಥಿಲೆಗ್ ಕಲ್ಪಾದ್ ಕೊರ್ತೆರ್. ಗೂಡು ದೀಪ ಪಂತೊಡುಲ ಕೆಲವು ಕಡೆಟ್ಟ್ ಪ್ರಶಸ್ತಿ ಪಡೆತೆರ್ .ಕುಣಿತ ಭಜನೆ ಬೊಕ್ಕ ತರಬೇತಿ, ಸಮಾಜ ಸೇವೆ, ಕಲೆ, ಕೃಷಿ ನೆಟ್ಟ್ ಆಸಕ್ತೆರಾದುಲ್ಲೆರ್.
2022ನೇ ಇಸ್ವಿಡ್ ನಮ್ಮ ದೇಶದ 75ನೇ ಸ್ವಾತಂತ್ರೋತ್ಸವದ ಅಮೃತ ಮಹೋತ್ಸವದಾನಿ ಆಣಿ ಬೊಕ್ಕ ನೂಲುದ ಸಹಾಯೊಡು ಭಾರತೀಯ ನಕ್ಷೆ ತಯಾರ್ ಮಲ್ತ್‌ದ್ ಅಂತರಾಷ್ಟ್ರೀಯ ಬುಕ್ ಆಫ್ ರೆಕಾರ್ಡ್ಸ್ ‌ಡ್ ದಾಖಲೆ ಮಲ್ದೆರ್. ಅಂಚೆನೆ ಸಾರ್ವಜನಿಕ ಜಾಗೆಡ್ ಬೇತೆ ಬೇತೆ ವೇಷ ಪಾಡ್ದ್ “ಭವತಿ ಭಿಕ್ಷಾಂ ದೇಹಿ” ಅಭಿಯಾನಡ್ ದೇಣಿಗೆ ಸಂಗ್ರಹ ಮಲ್ತ್‌ದ್ ಬಡವೆರೆಗ್ ಪಟ್‌ದೆರ್. ಇದಮುಟ್ಟ ಮೇರ್ 22 ಸರ್ತಿ ರಕ್ತದಾನ ಮಲ್ತ್‌ದ್ ಮಾನವೀಯತೆ ಮೆರೆತೆರ್.
ಬೆಂಗಳೂರುದ ಕಲಾಭೂಮಿ ಪ್ರತಿಷ್ಠಾನ (ರಿ) ಬೊಕ್ಕ ಕರ್ನಾಟಕ ರಾಜ್ಯ ಡಿಜಿಟಲ್ ಮೀಡಿಯಾ ಅಸೋಸಿಯೇಷನ್ ನಾಡು ನುಡಿ ಕಲೆ, ಸಂಸ್ಕೃತಿ ಬೊಕ್ಕ ಸಮಾಜ ಸೇವೆನ್ ಗುರ್ತಿಸಾದ್ ಈ ಪ್ರಶಸ್ತಿನ್ ಕೊರ್ತುಂಡು.ಕೀರ್ತನ್ ಪೂಜಾರಿ ಮೆರೆನ ಸಾಧನೆಗ್ ಮಸ್ತ್ ಜನ ಗಣ್ಯೆರ್ ಅಭಿನಂದನೆ ಸಂದಾದೆರ್.

Related Post

Leave a Reply

Your email address will not be published. Required fields are marked *

You Missed