ಬಂಟರ ಸಂಘ ಬೊಂಬೈ ಡೊಂಬಿವಿಲಿ ಪ್ರಾದೇಶಿಕ ಸಮಿತಿ ಬೊಕ್ಕ ಭಿವಂಡಿ-ಬದ್ಲಾಪುರ ಪ್ರಾದೇಶಿಕ ಸಮಿತಿ ಪ್ರಾಯೋಜಕತ್ವಡ್ ಬೊಕ್ಕ ತ್ರಿರಂಗ ಸಂಗಮದ ಸಂಚಾಲಕತ್ವಡ್ ಅ.16 ಐತಾರದಾನಿ ಬೊಲ್ಪುಗ್ 9 ಗಂಟೆಗ್ ಸಾವಿತ್ರಿ ಬಾಯಿ ಪುಲೆ ಸಭಾಗ್ರಹ ಡೊಂಬಿವಿಲಿ-ಪೂರ್ವಡ್, ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.
ಈ ಆಟ ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ರ್ ನ ಸಾರಥ್ಯದ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಕೃಪಾಪೋಷಿತ ಯಕ್ಷಗಾನ ಮಂಡಳಿ ನಾಗವೃಜ ಕ್ಷೇತ್ರ, ಪಾವಂಜೆ ಮುಲ್ತ ಕಲಾವಿದೆರ್ ಗೊಬ್ಬುದು ತೋಜಾಯರೆ ಉಲ್ಲೆರ್.
ಪುತ್ತೂರ್: ಪುತ್ತೂರ್ ಸರಕಾರಿ ಬಸ್ ನಿಲ್ದಾಣಗ್ ತುಳುನಾಡ್ ದ ವೀರ ಪುರುಷೆರಾಯಿನ ಕೋಟಿ-ಚೆನ್ನಯೆರೆನ ಪುದರ್ ದೀಯೆರೆ ಸರಕಾರ ಅನುಮೋದನೆ ಮಲ್ತ್ಂಡ್.
ಪಡುಮಲೆ ಕೋಟಿ-ಚೆನ್ನಯ ಸಂಚಲನ ಟ್ರಸ್ಟ್ ಬಸ್ ನಿಲ್ದಾಣಗ್ ತುಳುನಾಡ್ ದ ಆರಾಧ್ಯ ಪುರುಷೆರೆನ ಪುದರ್ ದೀಯೆರೆ ಶಾಸಕೆರ್ ಸಂಜೀವ ಮಠಂದೂರ್ ಗ್ ಬಿನ್ನಾಪು ಸಂದಾದ್ ಇತ್ತೆರ್.
ಈ ಬಗೆಟ್ ನಾಮಕರಣಗ್ ಬೋಡಾಯಿನ ಮತ ದಾಖಲೆನ್, ಸರಕಾರಗ್ ಸಂಬಂಧಪಟ್ಟಿನ ಇಲಾಖೆಗ್ ಕೊರ್ತೆರ್. ಇತ್ತೆ ಸರಕಾರ ಈ ಬಿನ್ನಾಪುಗ್ ಗ್ರೀನ್ ಸಿಗ್ನಲ್ ಕೊರ್ತುಂಡು.
ಚಿತ್ರದುರ್ಗದ ಮುರುಘಾ ಮಠತ್ತ ಮುರುಘ ರಾಜೇಂದ್ರಸ್ವಾಮಿನ ಕೇಸ್ಗ್ ನನೊಂಜಿ ಟ್ವಿಸ್ಟ್ ತಿಕ್ ದ್ಂಡ್. ಮಠತ್ತ ವಸತಿ ಶಾಲೆದ ಜಾಗೆಡ್ ನಾಲರೆ ವರ್ಸದ ಪೊಣ್ಣು ಬಾಲೆ ಪತ್ತೆಯಾತ್ಂಡ್.
ಮಠಟ್ಟ್ ಇತ್ತಿನ ಮಾತ ಜೋಕುಲೆನ್ ಬಾಲ ಮಂದಿರಗ್ ಶಿಫ್ಟ್ ಮಲ್ಪುನಗ ಬಾಲೆ ಪತ್ತೆಯಾತ್ಂಡ್. ಬಾಲೆದ ಪೋಷಕೆರ್ ಏರ್ ಪಂದ್ ತೆರಿದ್ ಬೈದಿಜಿ. ಉಂದುವೇ ಪೊರ್ತುಡು ಮಠಟ್ಟ್ ಬೇಲೆ ಮಲ್ತೊಂದು ಇತ್ತಿನ ಬೇಲೆದಕ್ಲೆನ ಮಿತ್ತ್ ಸ್ವಾಮಿಲು ಲೈಂಗಿಕ ದೌರ್ಜನ್ಯ ಮಲ್ತ್ದೆರ್ ಪನ್ಪಿನ ಆರೋಪ ಕೇಂದ್ ಬೈದ್ಂಡ್.
ದಿಲ್ಲಿ: ಹಿಮಾಚಲ ಪ್ರದೇಶದ ವಿಧಾನಸಭಾ ವೋಟುಗು ತಾರೀಕ್ನ್ ಕೇಂದ್ರ ಚುನಾವಣಾ ಆಯೋಗ ಘೋಷಿಸಾದ್ಂಡ್.
ನವೆಂಬರ್ 12 ಕ್ಕ್ ಹಿಮಾಚಲ ಪ್ರದೇಶಡ್ ವಿಧಾನಸಭೆಕ್ಕ್ ಒಂಜೇ ಹಂತೊಡು ವೋಟು ನಡಪರೆ ಉಂಡು ಪಂದ್ ಕೇಂದ್ರ ಚುನಾವಣಾ ಮುಖ್ಯ ಆಯುಕ್ತೆರ್ ತೆರಿಪಾಯೆರ್. ಡಿಸೆಂಬರ್ 8ಗ್ ಹಿಮಾಚಲ ಪ್ರದೇಶದ ವೋಟುದ ರಿಸಲ್ಟ್ ಬರಿಯರೆ ಉಂಡು.
ಕುಡ್ಲ: ಮಹಾನಗರ ಪಾಲಿಕೆ ವ್ಯಾಪ್ತಿದ ಉರ್ವ ಸ್ಟೋರ್ಡ್ ಇಪ್ಪುನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಜಾಗೆಡ್ ಕರಾವಳಿ ಅಭಿವೃದ್ದಿ ಪ್ರಾಧಿಕಾರದ ಮುತಾಲಿಕೆಡ್ ನಿರ್ಮಾಣ ಮಲ್ತಿನ ಬಯಲು ರಂಗ ಮಂದಿರದ ಉದಿಪನದ ಲೇಸ್ ಅ. 14 ತಾರೀಕ್ ಸುಕ್ರಾರ ನಡತ್ಂಡ್.
ಶಾಸಕೆರ್ ವೇದವ್ಯಾಸ್ ಕಾಮತ್, ಕರಾವಳಿ ಅಭಿವೃದ್ದಿ ಪ್ರಾಧಿಕಾರದ ಅಧ್ಯಕ್ಷೆರ್ ಮಟ್ಟಾರು ರತ್ನಾಕರ ಹೆಗ್ಡೆ ಮೊಕುಲು ನೆಲಕ್ಕ್ ತಾರಾಯಿ ಹಾಕ್ ದ್ ರಂಗ ಮಂದಿರ ಉದಿಪನ ಮಲ್ತೆರ್.
ಕುಡ್ಲ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ವೇದವ್ಯಾಸ್ ಕಾಮತ್ ಪಾತೆರ್ದ್, ತುಳುನಾಡ್ದಾರೇ ಆಯಿನ ಮಟ್ಟಾರು ರತ್ನಾಕರ ಹೆಗ್ಡೆ ಮೇರ್ ಕರಾವಳಿ ಅಭಿವೃದ್ದಿ ಪ್ರಾಧಿಕಾರದ ಅಧ್ಯಕ್ಷೆರ್ ಆಯಿನ ಕಾರಣ ಈ ಬಯಲು ರಂಗಮಂದಿರ ನಿರ್ಮಾಣ ಆಯರೆ ಪ್ರಮುಖ ಕಾರಣ ಆತ್ಂಡ್ ಪಂದ್ ಪಂಡೆರ್.
ಉಂದುವೇ ಪೊರ್ತುಡು ಕುಡ್ಲ ಮಹಾನಗರ ಪಾಲಿಕೆದ ಮೇಯರ್ “ಮದೆಪರಾವಂದಿನ ತುಳುವೆರ್” ಪನ್ಪಿನ ಅಕಾಡೆಮಿದ ಕೃತಿ ಅಂಚನೆ ಕೆಲ ಬೂಕುನ್ ಬುಡುಗಡೆ ಮಲ್ತೆರ್.
ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲಾದ್ ಬೇಲೆ ಮಲ್ತಿನ ದಯಾನಂದ ಕತ್ತಲ್ಸಾರ್, ಸಾಹಿತಿ ಸದಾನಂದ ಪೆರ್ಲ, ಸುಮಾರ್ 31 ಲಕ್ಷ ರೂಪಾಯಿ ಅನುದಾನನ್ ಬಯಲು ರಂಗ ಮಂದಿರಗ್ ಕೊರ್ದು ಸಾಕಾಯ ಮಲ್ತಿನ ಮಟ್ಟಾರು ರತ್ನಾಕರ ಹೆಗ್ಡೆ ಅಂಚನೆ ತುಳುನಾಡ್ದ ಸಂಸ್ಕೃತಿ-ಸಂಸ್ಕಾರದ ದಾಖಲೀಕರಣ ಮಲ್ತಿನ ಚಾನೆಲ್ದಕ್ಲೆಗ್ ಮಾನಾದಿಗೆದ ಲೇಸ್ ನಡತ್ಂಡ್.
ಈ ಪೊರ್ತುಡು ಉಪಮೇಯರ್ ಪೂರ್ಣಿಮಾ, ಮಾಜಿ ಮೇಯರ್ ಪ್ರೇಮಾನಂದ ಶೆಟ್ಟಿ, ಕಾರ್ಪೋರೇಟರ್ಲು ಆಯಿನ ಮನೋಹರ್ ಕದ್ರಿ, ಶಕಿಲಾ ಕಾವ, ಬಾಸ್ಕರ್ ರೈ ಕುಕ್ಕುವಳ್ಳಿ, ಪ್ರದೀಪ್ ಡಿಸೋಜ, ರಿಜಿಸ್ಟ್ರಾರ್ ಕವಿತಾ,ತುಳು ಅಕಾಡೆಮಿ ಪದುಕೆರ್ ಆಕಾಶ್ ರಾಜ್ ಜೈನ್, ಲೀಲಾಕ್ಷ ಕರ್ಕೇರ, ಸಂತೋಷ್ ಪೂಜಾರಿ, ನರೇಂದ್ರ ಕೆರೆಕಾಡು ಪಾಲ್ ಪಡೆದಿತ್ತೆರ್. ಮಲ್ಲಿಕಾ ಶೆಟ್ಟಿ ಲೇಸ್ ಸುದಾರಿಕೆ ಮಲ್ತೆರ್. ಅಕಾಡೆಮಿದ ಗುರ್ಕಾರ್ಲು ದಯಾನಂದ ಕತ್ತಲ್ಸ್ಸಾರ್ ಬಿನ್ನೆರೆನ್ ಎದ್ಕೊನಿಯೆರ್. ಕಲಾವತಿ ದಯಾನಂದ್ ದೇವೆರೆನ್ ಸುಗಿತೆರ್.
ಕುಡ್ಲ: ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜಾ ಮೆರೆನ ಮಿತ್ತ್ ಪುಂಡೆರ್ ದಾಳಿ ಮಲ್ತಿನ ಘಟನೆ ಕೋಡೆ ನಡುರಾತ್ರೆ ಫರಂಗಿಪೇಟೆದ ಕೈತಲ್ ನಡತ್ದಿತ್ತ್ದ್, ಈ ಘಟನೆಗ್ ಸಂಬಂಧಿಸಾದ್ ಪ್ರತಿಕ್ರಿಯೆ ಕೊರ್ತೆರ್.
ಈ ಬಗೆಟ್ ಶಾಸಕೆರ್ ಕುಡ್ಲಡ್ ಪಾತೆರ್ದ್, ಯನ್ನ ಮಿತ್ತ್ ದಾಳಿ ಮಲ್ತಿನವ್ ಅಂದ್, ಗುರುವಾರದಾನಿ ಬೆಂಗ್ಲೂರ್ರ್ದ್ ರಾತ್ರೆ ಕುಡ್ಲಗ್ ಬರೊಂದಿಪ್ಪುನ ಪೊರ್ತುಡು ಸ್ಕಾರ್ಪಿಯೊ ಗಾಡಿ ಓವರ್ ಟೇಕ್ ಮಲ್ತ್ದ್ ಯಾನ್ ಇತ್ತಿನ ಕಾರ್ಗ್ ರಡ್ಡ್ ಸರ್ತಿ ತಲ್ವಾರ್ ದಾಳಿ ಮಲ್ತ್ದೆರ್. ಗೃಹ ಸಚಿವೆರ್ ಉಂದೆಕ್ಕ್ ಸರಿಯಾಯಿನ ತನಿಖೆ ಮಲ್ತ್ದ್ ಕ್ರಮ ದೆತೊನುನ ಭರವಸೆ ಕೊರ್ತೆರ್ ಪಂದ್ ಪಂಡೆರ್.
ಸುಬ್ರಹ್ಮಣ್ಯ: ಬಿರ್ಲಾ ಗ್ರೂಪ್ ಆಫ್ ಇಂಡಸ್ಟ್ರೀಸ್ದ ಛೇರ್ಮನ್ ಆದ್ ಇತ್ತಿನ ದಿ. ಜಿ.ಪಿ ಬಿರ್ಲಾ ಅರೆನ ಬೊಡೆದಿ ನಿರ್ಮಲಾ ಬಿರ್ಲಾ ಬೊಕ್ಕ ಇತ್ತೆದ ಬಿರ್ಲಾ ಗ್ರೂಪ್ ಆಫ್ ಇಂಡಸ್ಟ್ರೀಸ್ ದ ಛೇರ್ಮನ್ ಚಂದ್ರಕಾಂತ ಬಿರ್ಲಾ ಅರೆನ ಕುಟುಂಬ ಇನಿ ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯಡ್ ದೇವೆರೆನ ದರ್ಶನ ಮಲ್ತೆರ್.
ಅಂಚನೆ ದೇವಲ್ಯಡ್ ಆಶ್ಲೇಷ ಬಲಿ ಪೂಜೆ ಬೊಕ್ಕ ಮಹಾ ಪೂಜೆ ನ್ ಮಲ್ತ್ ದ್ ಪ್ರಾರ್ಥನೆ ಸಂದಾದೆರ್. ಈ ಪೊರ್ತುಡು ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಮೋಹನ್ ರಾಮ್ , ಸದಸ್ಯೆರ್ ಪ್ರಸನ್ನ ದರ್ಬೆ ಇತ್ತೆರ್.
ಮುಲ್ಕಿ : ಪುನರೂರು ಪ್ರತಿಷ್ಠಾನ (ರಿ.)ನೆತ್ತ ಮುತಾಲಿಕೆಡ್ ಜನವಿಕಾಸ ಸಮಿತಿ ಮುಲ್ಕಿದ ಸಹಕಾರೊಡ್ ವಿಶ್ವ ಆಹಾರ ದಿನಾಚರಣೆದ ಪ್ರಯುಕ್ತ ಆಹಾರ ಜಾಗೃತಿ ಅಭಿಯಾನ-2022 ಅ.16 ಐತಾರದಾನಿ ಬೊಲ್ಪುಗು 9 ಗಂಟೆಗ್ ಮುಲ್ಕಿ ಕೊಲ್ಲೂರುದ ನಡುಮನೆ ಇಲ್ಲಡ್ ನಡಪರೆ ಉಂಡು.
ಈ ಲೇಸ್ ಡ್ ಆಹಾರ ಪೂರೈಸುನ ರೈತೆರೆನ ಪ್ರಾಮುಖ್ಯತೆನ್ ತೆರಿಪಾವೊನೆತ ಒಟ್ಟಿಗೆ ಕೃಷಿಕ್ಷೇತ್ರಡ್ ಆಪಾರ ಸಾಧನೆ ಮಲ್ತೊಂದು ಇಪ್ಪುನ ದೊಂಬ ನಾಯ್ಕೆರೆಗ್ ಕೃಷಿ ರತ್ನ-2022 ಪನ್ಪುನ ಬಿರ್ದ್ ದೊಟ್ಟಿಗೆ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪುನ ಲೇಸ್ ಲ ನಡಪುಂಡು. ಈ ಲೇಸ್ ನ್ ಪುನರೂರು ಪ್ರತಿಷ್ಠಾನ (ರಿ.) ಗೌರವಾಧ್ಯಕ್ಷೆರಾಯಿನ ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರ್ ನ ಮುತಾಲಿಕೆಡ್ ನಡಪುಂಡು. ಕವತ್ತಾರ್ ಸಿರಿ ಅಬ್ಬಗದಾರಗ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಪ್ರಧಾನ ಅರ್ಚಕೆರ್ ಪಿ.ವಿಷ್ಣುರಾಜ್ ಭಟ್ರ್ ಶುಭಸಂಶನೆ ಕೊರ್ಯೆರೆ ಉಲ್ಲೆರ್. ಬೊಕ್ಕ ವಿಜಯ ರೈತೆರೆನ ಸೇವಾ ಸಹಕಾರಿ ಬ್ಯಾಂಕ್ ನಿ. ಮುಲ್ಕಿ ಅಧ್ಯಕ್ಷೆರ್ ರಂಗನಾಥ ಶೆಟ್ರ್ ಸನ್ಮಾನ ಮಲ್ಪೆರೆ ಉಲ್ಲೆರ್. ಅಂಚನೆ ಈ ಲೇಸ್ ಡ್ ಪುನರೂರು ಪ್ರತಿಷ್ಠಾನ (ರಿ.) ದ ಪ್ರಧಾನ ಕಾರ್ಯದರ್ಶಿ ಶ್ರೇಯಾ ಪುನರೂರು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪುನರೂರು ಪ್ರತಿಷ್ಠಾನ (ರಿ.) ಅಧ್ಯಕ್ಷೆರ್ ದೇವಪ್ರಸಾದ್ ಪುನರೂರು ಬೊಕ್ಕ ಸರ್ವಸದಸ್ಯೆರ್, ಬೊಕ್ಕ ಜ್ಞಾನವಿಕಾಸ ಸಮಿತಿ ಮುಲ್ಕಿದ ಅಧ್ಯಕ್ಷೆರ್ ದಾಮೋದರ ಶೆಟ್ಟಿ ಕೊಡೆತ್ತೂರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಾಸ್ಕೋರ್ದ್ ದಿಲ್ಲಿಗ್ ಬತ್ತಿನ ಇಮಾನಡ್ ಬಾಂಬ್ ದೀತೆರ್ ಪಂದ್ ಕರಿನ ರಾತ್ರೆ ದಿಲ್ಲಿ ವಿಮಾನ ನಿಲ್ದಾಣಗ್ ಬೆದರಿಕೆದ ಇಮೇಲ್ ಬೈದ್ಂಡ್.
ಈ ಬಗೆಟ್ ದೆಹಲಿ ವಿಮಾನ ನಿಲ್ದಾಣಡ್ ಪೊಲೀಸ್ ಬಿಗಿ ಭದ್ರತೆ ಮಲ್ದೆರ್.
ನೆತ್ತ ಬಗೆಟ್ ಭದ್ರತಾ ಸಿಬ್ಬಂದಿಲು ಪರಿಶೀಲನೆ ಮಲ್ದೆರ್.
ರಷ್ಯಾದ ಮಾಸ್ಕೋರ್ದ್ ವಿಮಾನ ಇನಿ ಬೊಲ್ಪುಗ್ 3:20ಕ್ ದಿಲ್ಲಿಗ್ ಬೈದ್ಂಡ್. ಇಮಾನ ಲ್ಯಾಂಡ್ ಆವೊಂದು ಇತ್ತಿಲೆಕ್ಕನೇ ಇಮಾನಡ್ ಇತ್ತಿನ 386 ಪ್ರಯಾಣಿಕೆರೆನ್ ಬೊಕ್ಕ 16 ಸಿಬ್ಬಂದಿಲೆನ್ ತಿರ್ತ್ ಜಪುಡಾಯೆರ್.
ಈ ಶರೀರ ನಶ್ವರ. ಜೀವ ಇಪ್ಪುನಾತ್ ದಿನ ಕಷ್ಟೊಡು ಇಪ್ಪುನಕ್ಲೆನ,ಅಸಹಾಯಕೆರೆನ ಸಂಕಷ್ಟಗ್ ಆಸರೆ ಆವೊಡು ಸೇವೆ ಮಲ್ಪೊಡು.
ಸೇವೆದ ಮುಖೇನ ಬದ್ ಕ್ ಡ್ ತೃಪ್ತಿ ಪಡೆಯೊನೊಡು ಪನ್ಪುನಂಚಿನ ಸೇವಾ ಮನೋಭಾವ ಮಾತೆರೆಗ್ಲ ಇಪ್ಪುಜಿ.
ಆಂಡ ತುಳುನಾಡ್ಡ್ “ಯುವಶಕ್ತಿ ಸೇವಾಪಥ” ಪನ್ಪುನ ಜವನೆರೆನ ಕೂಟ ಒಂಜಿ ಜನಸೇವೆಗಾದ್ ಅಕ್ಲೆನ್ ಅಕುಲು ಸಮರ್ಪಿಸಾದೆರ್.
ಕರಿನ ಕೆಲವು ವರ್ಷೊಲೆರ್ದ್ ಇಂಚ ಅವೇತೊ ಬಡ ಕುಟುಂಬೊಲೆದ ಕಣ್ಣನೀರ್ ಒರೆಸುನಂಚಿನ ಎಡ್ಡೆ ಬೇಲೆ ಮಲ್ತೊಂದು ಉಲ್ಲೆರ್.
ದಾನಿಲೆನ ಸಕಾಯ ಪಡೆಯೊಂದು “ಯುವಶಕ್ತಿ ಸೇವಾಪಥ” ಕೂಟದ ಮುಖೇನ ಮಸ್ತ್ ಜನಕ್ಲೆಗ್ ಪಣವುದ ಸಕಾಯ ಕೊರ್ದು ಅಕ್ಲೆನ ಮನಸ್ ಗ್ ನೆಮ್ಮದಿ ಕೊರ್ತೆರ್.
ಇಂಚೊಗು ಅಪಘಾತ ಆದ್ ಚಿಕಿತ್ಸೆ ಪಡೆಯೊಂದು ಇತ್ತಿನ ಕಡಬ ತಾಲೂಕುದ ವಾಸುದೇವ ಗೌಡ, ಕೈಕಾರ್ ಬೂರ್ದು ಬೆನಿಯೆರೆ ಆವಂದೆ ಜೀವನ ನಡಪಾಯೆರೆ ಪೊನೆಯೊಂದು ಇಪ್ಪುನ ಬಂಟ್ವಾಳ ತಾಲೂಕುದ ಗಣೇಶ್ ಮಧ್ವ ,
ಶ್ವಾಸಕೋಶದ ಕ್ಯಾನ್ಸರ್ ಗ್ ಚಿಕಿತ್ಸೆ ಪಡೆಯೊಂದು ಇಪ್ಪುನ ಕುಡ್ಲ ತಾಲೂಕುದ ಕಸ್ತೂರಿ ಕಿನ್ನಿಮಜಲು,
ಕ್ಯಾನ್ಸರ್ ರೋಗರ್ದ್ ಪಂಡ್ದ್ ತೊಂದರೆ ಅನುಭವಿಸೊಂದು ಇಪ್ಪುನ ಕುಡ್ಲ ತಾಲೂಕು ಕಿನ್ಯ ಮುಲ್ಪದ ಹೇಮಚಂದ್ರ, ಬುಕ್ಕ ಅಲ್ಸರ್ ಗ್ ಚಿಕಿತ್ಸೆ ಪಡೆಯೊಂದು ಇಪ್ಪುನ ಪುತ್ತೂರು ತಾಲೂಕುದ ಕೆದಿಲ ಕಸ್ತೂರಿ ಆನಂದ ಮುಕ್ಲೆಗ್ ತಲಾ 54000 ರೂಪಾಯಿದ ಲೆಕ ಒಟ್ಟು 270000 ರೂ. ಪಣವುದ ಸಕಾಯ ಮಲ್ದೆರ್.
ಒವ್ವೆ ಪ್ರತಿಫಲಾಪೇಕ್ಷೆ ಬಯಕಂದೆ “ಯುವಶಕ್ತಿ ಸೇವಾಪಥ” ಈ ಕೂಟದ ಸದಸ್ಯೆರ್ ಮಲ್ಪುನ ಈ ಸೇವರ್ದ್ ಅವೇತೊ ಕುಟುಂಬೊಲು ನೆಮ್ಮದಿದ ಜೀವನ ನಡಪಾವುಲೆಕ ಆತ್ಂಡ್.
