October 10, 2022

ಸರ್ವ ತುಳು ಬಂದುಲೆನ ಒಟ್ಟು ಸೇರಿಗೆಡ್ ಮಲ್ಲ ಪೊರ್ಂಬಾಟ

ಕಂಬುಲ ಒರಿಪರೆ ಬೋಡಾದ್ ಮಲ್ದಿನ ಪೊರ್ಂಬಾಟದ ಮಾದರಿ ಪೊರ್ಂಬಾಟ ಆವೊಡು : ವಿಜಯಕುಮಾರ್ ಕೊಡಿಯಾಲ್ ಬೈಲ್

ಕುಡ್ಲ : ತುಳುನಾಡ್ ಡ್ ತುಳು ಬಾಸೆದ ಮಿತ್ತ್ ಕನ್ನಡ ಕಡ್ಡಾಯದ ತೊರ್ಪಾಟ ವಿರೋಧಿಸಾದ್ ಸರವ ತುಳು ಚಿತ್ರರಂಗ, ನಾಟಕ ರಂಗ ಸೇರ್ದ್ ಸರ್ವ ತುಳು ಸಂಘಟನೆಲೆನ ಒಟ್ಟುಸೇರಿಗೆಡ್ ತುಳು ಪೊರ್ಂಬಾಟ ಸಮಿತಿದ ಮುತಾಲಿಕೆಡ್
ಸೋಮಾರ ಮಿನಿ ವಿಧಾನಸೌಧದ ಎದುರು ಭಾರಿ ಮಲ್ಲ ಪ್ರತಿಭಟನೆ ನಡತ್ಂಡ್.

ಕಂಬುಲ ಒರಿಪರೆ ಬೋಡಾದ್ ಪೊರ್ಂಬಾಟದ ಮಾದರಿ ಪೊರ್ಂಬಾಟ ಆವೊಡು ಪಂದ್ ತುಳು ನಾಟಕ ನಿರ್ದೇಶಕೆರ್ ವಿಜಯಕುಮಾರ್ ಕೊಡಿಯಾಲ್ ಬೈಲ್ ಪಂಡೆರ್.

ತುಳುಕ್ಕಾದ್ ನಮ ಇನಿ ಮಾರ್ಗೊಗು ಜಪ್ಪೊಡಾದ್ ಬೈದ್ಂಡ್. ತುಳು ಅಕಾಡೆಮಿದ ಅಧ್ಯಕ್ಷೆರ್ ತುಳು ಚಿತ್ರರಂಗೊಗು ಬಿಲೆ ಕೊರ್ಪುಜೆರ್.ತುಳು ಬಾಸೆ ಒರಿಪರೆಗಾದ್ ರಾಜೀನಾಮೆ ದಕ್ ದ್ ಇಡೆ ಬತ್ತ್ ದ್ ಪೊರ್ಂಬಾಟೊಡು ಪಾಲ್ ಪಡೆವೊಡಿತ್ತ್ಂಡ್ ಪಂಡೆರ್.

ತೆಲಿಕೆದ ಬೊಳ್ಳಿ ಡಾ.ದೇವದಾಸ್ ಕಾಪಿಕಾಡ್ ಪಾತೆರ್ದ್, ನಮ್ಮಕುಲೇ ತುಳುತ್ತ ಪಿಚ್ಚರ್ ಗ್ ಥಿಯೇಟರ್ ಕೊರ್ರೆ ತಯಾರ್ ಇಜ್ಜೆರ್. ತೆಲುಗು, ತಮಿಳ್ ಗ್ ಕೊರ್ಪೆರ್. ಇತ್ತೆ ತುಳುವೆರ್ ಮಾರ್ಗೊಗು ಬರೆಡಾಂಡ್.

ತುಳು ಬಾಸೆನ್ ನಾಲಿಡ್ ಪತ್ತುನ ಪರಿಸ್ಥಿತಿ ಬೈದಂಡ್. ಅಂಚಾದ್ ನಮ ಮಾರ್ಗೊಗು ಜಪ್ಪೊಡಾದ್ ಬೈದ್ಂಡ್. ತುಳು ಸಾಹಿತ್ಯ ಅಕಾಡೆಮಿರ್ದ್ ಒಂಜೇ ಒಂಜಿ ಲೆಪ್ಪೋಲೆ‌ ಕೊರ್ಪುಜೆರ್ ಭಾರಿ ಬೇಜಾರಡ್ಡ್ ಪಂಡೆರ್.

ಪೊರ್ಂಬಾಟಗಾರೆ ದಿಲ್ ರಾಜ್ ಆಳ್ವ ಪಾತೆರ್ದ್, ತುಳು ಚಿತ್ರರಂಗೊಗು ಒಂಜಿ ಲೆಪ್ಪೋಲೆ ಕೊರಂದಿನ ತುಳು ಸಾಹಿತ್ಯ ಅಕಾಡೆಮಿಗ್ ಬೀಗ ಪಾಡೊಡು ಪಂದ್ ಪಂಡೆರ್.

ಪ್ರಾಣಿಪ್ರಿಯೆ ರಜನಿ ಶೆಟ್ಟಿ ಪಾತೆರ್ದ್, ನಮಕ್ಕ್ ತುಳು ಬೋಡೇ ಬೋಡು.ಮಾತೆರ್ಲ ಒಟ್ಟಾದ್ ತುಳು ಬಾಸೆನ್ ಒರಿಪಾಲೆ ಪಂಡೆರ್.

“ಮೋಸ ಮೋಸತಾಂತ್ರಿಕ ದೋಷ, ರಾಜ್ಯ ಬಾಸೆ ಏಪಣ್ಣ ಬೇಗ ಪನ್ಲೆ ಸುನಿಲಣ್ಣ, ಬೇಗ ಪನ್ಲೆ ನಳಿನಣ್ಣ, ಮಂಗೆ ಮಲ್ತಿನ ಯಾವಣ್ಣ,ಪಾತೆರ್ಲೆ ಪಾತೆರ್ಲೆ ವಿಧಾನಸೌಧಡ್ ಪಾತೆರ್ಲೆ, ಕೆಬಿ ಕೇನುಜ ತುಳುವ ಶಾಸಕರೇ, ಒರಿಪಾಲೆ ಒರಿಪಾಲೆ ತುಳು ಅಪ್ಪೆನ್ ಒರಿಪಾಲೆ” ಇಂಚಿನ ಘೋಷಣೆ ಪಾಡ್ದ್ ಪ್ರತಿಭಟನೆ ಮಲ್ತೆರ್.

ತುಳು ಪೊರ್ಂಬಾಟಗಾರೆದಿಲ್ ಐಕಳಬಾವ ಚಿತ್ರರಂಜನ್ ಶೆಟ್ಟಿ ಪಾತೆರಿಯೆರ್. ಅರ್ಜುನ್ ಕಾಪಿಕಾಡ್, ರಾಜ್ ಸೌಂಡ್ಸ್ ನಿರ್ಮಾಪಕೆರ್,
ಆನಂದ್ ಕುಂಪಲ, ನಟೆ ವಿನೀತ್ ಕುಮಾರ್,
ರೋಶನ್, ತುಳುವೆರೆ ಪಕ್ಷದ ಸ್ಥಾಪಕೆರ್ ಆರ್. ಜೆ.ಶೈಲೇಶ್, ಜೈ ತುಳುನಾಡ್ ದ ಕಿರಣ್ ತುಳುವೆ, ಮಾಜಿ ಅಧ್ಯಕ್ಷೆರ್ ಸುದರ್ಶನ್ ಸುರತ್ಕಲ್ ಮೊಕುಲು ಮಾತ ಪೊರ್ಂಬಾಟೊಡು ಪಾಲ್ ಪಡೆದಿತ್ತೆರ್.