ತುಮಕೂರ್ : ಕಾಂಗ್ರೆಸ್ ಅಧ್ಯಕ್ಷೆ ಚುನಾವಣೆಡ್ ಭಾಗವಹಿಸುನ ಮಲ್ಲಿಕಾರ್ಜುನ ಖರ್ಗೆ ಬೊಕ್ಕ ಶಶಿ ತರೂರ್ ನೆಟ್ಟ್ ಏರ್ ಗೆಂದ್ಂಡಲ ಅಕುಲ್ ಪಕ್ಷಡ್ ಸ್ವತಂತ್ರವಾದ್ ಇಪ್ಪುವೆರೆ ಹೊರತು ರಿಮೋಟ್ ಕಂಟ್ರೋಲರ್ ಆಪುಜೆರ್ ಪಂದ್ ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಭಾರತ ಜೋಡೋ ಯಾತ್ರೆ ತುಮಕೂರ್ ಎತ್ತಿನ ಪೊರ್ತುಡು ಸುದ್ದಿಗೋಷ್ಠಿಡ್ ಪಂಡೆರ್.
ಖರ್ಗೆ ಎಐಸಿಸಿ ಅಧ್ಯಕ್ಷೆರಾಂಡ ಅರ್ ಸೋನಿಯಾ ಗಾಂಧಿನ ರಿಮೋಟ್ ಕಂಟ್ರೋಲರ್ ಆಪೆರ್ ಪನ್ಪುನ ಬಿಜೆಪಿದ ಟೀಕೆಗ್ ರಾಹುಲ್ ಗಾಂಧಿ ಈ ಪಾತೆರ ಪಂಡೆರ್ .
ಪುತ್ತೂರ್: ನೆಹರುನಗರಡ್ ಇಪ್ಪುನ ಜಾಕಿ ಫರ್ನಿಚರ್ಸ್ ದ ದಣಿ, ಬನ್ನೂರ್ ಗುರುಂಪುನಾರ್ ದ ಇಬ್ರಾಹಿಂ ಮೆರೆನ ಮಗೆ ಆಫಾಕ್(38ವ) ದಾರ್ ಸಂಸ್ಥೆದ ಮಾಲಿಗೆಡ್ ಬಲ್ಲ್ ದೆತೊಂದು ತೀರ್ ಪೋತೆರ್.
ಈ ಘಟನೆದ ಜಾಗೆಗ್ ಪುತ್ತೂರ್ ಪೊಲೀಸೆರ್ ಬೈದೆರ್. ತೀರ್ ಪೋಯಿನರೆಗ್ ಬೊಡೆದಿ, ಮೂಜಿ ಜೋಕುಲು, ಪೊಪ್ಪ ಬೊಕ್ಕ ಸಹೋದರೆ ಉಲ್ಲೆರ್.
ಕುಡ್ಲ: ತುಳು ಪರಿಷತ್, ಕುಡ್ಲ, ಮಯೂರಿ ಫೌಂಡೇಶನ್ ಮುಲ್ಕಿ, ಕರ್ನಾಟಕ ಥಿಯಾಲಾಜಿಕಲ್ ಕಾಲೇಜ್, ಕರಾವಳಿದ ಲೇಖಕಿಯೆರೆನ- ವಾಚಕಿಯೆರೆನ ಸಂಘ, ಬೊಕ್ಕ ಸಾಮರಸ್ಯ ಕುಡ್ಲದ ಮುತಾಲಿಕೆಡ್ ದಸರಾ ಅಂಗವಾದ್ ಬಲ್ಮಠದ ಸಹೋದಯ ಹಾಲ್ ಡ್ ನಡತಿನ ಕಬಿ ಕೂಟೊಡು ಬೇತೆ ಬೇತೆ ಬಾಸೆದ ಕಬಿತೆಲು ಸಹೃದಯೆರೆನ ಮನಸ್ ಗೆಂದ್ಂಡ್.
ಕಮಲಶಿಲೆತ್ತ ಕವಯಿತ್ರಿನ ಕುಂದಾಪ್ರ ಕನ್ನಡ ಕಬಿತೆನ್ ಮೆಚ್ಚಿನ ಕಾವ್ಯಪ್ರಿಯೆರ್, ಗಡಿನಾಡ್ ಕಾಸ್ರೋಡ್ ದ ಕಬಿ ಪಂಡಿನ ಮಲಯಾಳಂ ಕಬಿತೆದ ಭಾವನೆಗ್ ಖುಷಿ ಆಯೆರ್.
ಅಂಚೆನೆ ಕನ್ನಡ, ಕೊಂಕಣಿ, ಕೊರಗ,ತುಳು, ಅರೆಭಾಷೆ, ಬ್ಯಾರಿ, ಹವ್ಯಕ ಸುಮಾರ್ ಬಾಸೆದ ಕಬಿತೆಲು ಇತ್ತ.
ಅಂಚನೆ ಬಾಬು ಕೊರಗ ಪಾಂಗಾಳ(ಕೊರಗ ಬಾಸೆ) ವಿಜಯ ಶೆಟ್ಟಿ ಸಾಲೆತ್ತೂರ್, ಶಾರದಾ ಶೆಟ್ಟಿ (ತುಳು) ರಾಧಾಕೃಷ್ಣ ಉಳಿಯತಡ್ಕ, ರಾಜವರ್ಮ ವಿಟ್ಲ (ಕನ್ನಡ) ತಾರಾ ಲವಿನಾ ಗಂಜಿಮಠ, ವಿನೋದ್ ಪಿಂಟೊ ತಾಕೋಡೆ, ವೆಂಕಟೇಶ್ ನಾಯಕ್ (ಕೊಂಕಣಿ) ಶಾಂತ ಕಂಠಿನಿ, ಗೋಪಾಲಕೃಷ್ಣ ಶಾಸ್ತ್ರಿ(ಹವ್ಯಕ), ಮಿಸ್ರಿಯಾ ಐ ಪಜೀರ್ (ಬ್ಯಾರಿ) ಪೂರ್ಣಿಮಾ ಕಮಲಶಿಲೆ (ಕುಂದಾಪ್ರ ಕನ್ನಡ) ಚಂದ್ರಹಾಸ್ ನಂಬಿಯಾರ್ (ಮಳಯಾಳಂ)ಸೌಮ್ಯ ಗೋಪಾಲ್(ಶಿವಳ್ಳಿ) ಬೊಕ್ಕ ಯೋಗೀಶ್ ಹೊಸೊಳಿಕೆ (ಅರೆಬಾಸೆ) ಕಬಿತೆಲೆನ್ ಓದಿಯೆರ್. ರತ್ನಾವತಿ ಬೈಕಾಡಿ ಬೊಕ್ಕ ಜಯಲಕ್ಷ್ಮಿ ಭಾವಗಾನ ಪದ ಪಂಡೆರ್ . ಅಂಚೆನೆ ಲೇಸ್ ನ್ ಉದಿಪನ ಮಲ್ತಿನ ಮಯೂರಿ ಫೌಂಡೇಶನ್ ದ ಅಧ್ಯಕ್ಷೆರ್ ಜಯ.ಟಿ ಶೆಟ್ಟಿ, ಮಾತ ಬಾಸೆದಕುಲುಲ ಒಂಜೇ ವೇದಿಕೆಡ್ ಬರ್ಪುನ ತುಳುನಾಡ್ ದ ಸೌಹಾರ್ದ ಪರಂಪರೆನ್ ಮಿತ್ತ್ ಕೊನೊವೊಡ್ ಪಂದ್ ಪಂಡೆರ್.
ಮುಲ್ಕಿ ಕಾರ್ನಾಡ್ ಸರ್ಕಾರಿ ಪದವಿಪೂರ್ವ ಕಾಲೇಜ್ ದ ಪ್ರಾಂಶುಪಾಲೆರಾಯಿನ ವಾಸುದೇವ ಬೆಳ್ಳೆ, ಬೇತೆ ಒಲ್ಪಲ ತೂವಂದಿನ ಬಾಸೆಲೆನ್ ತುಳುನಾಡ್ ತೂಪಿನವು ಇಸೇಸ ಪಂದ್ ಪಂಡೆರ್.
ಕರಾವಳಿ ಲೇಖಕಿಯೆರೆನ-ವಾಚಕಿಯೆರೆನ ಸಂಘದ ಅಧ್ಯಕ್ಷೆ ಜ್ಯೋತಿ ಚೇಳ್ಯಾರ್ ಲೇಸ್ ದ ಅಧ್ಯಕ್ಷೆರಾದ್ ಇತ್ತೆರ್. ಈ ಪೊರ್ತುಡು ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಕರ್ನಾಟಕ ಥಿಯೊಲಾಜಿಕಲ್ ಕಾಲೇಜ್ ದ ಪ್ರಾಂಶುಪಾಲೆ ಎಚ್.ಎಂ.ವಾಟ್ಸನ್, ಕರ್ನಾಟಕ ಬ್ಯಾರಿ ಸಾಹಿತ್ಯ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್ ಬಿ.ಎ. ಮಹಮ್ಮದ್ ಹನೀಫ್, ಕೊರಗರೆನ ಸಂಘದ ಅಧ್ಯಕ್ಷೆರ್ ಸುಂದರ ಕೊರಗ, ತುಳು ಪರಿಷತ್ ಗೌರವಾಧ್ಯಕ್ಷೆರ್ ಸ್ವರ್ಣ ಸುಂದರ್, ತುಳು ಪರಿಷತ್ ದ ಗೌರವ ಸಲಹೆಗಾರೆ ಪ್ರಭಾಕರ್ ನೀರ್ ಮಾರ್ಗ, ಸಾಮರಸ್ಯ ಕುಡ್ಲ ಅಧ್ಯಕ್ಷೆರ್ ಮಂಜುಳಾ ವೈ.ನಾಯಕ್ ಇತ್ತೆರ್.
ಶುಭೋದಯ ಆಳ್ವ ಬತ್ತಿನಕಲೆನ್ ಎದ್ಕೊನಿಯೆರ್. ತಾರನಾಥ್ ಗಟ್ಟಿ ಕಾಪಿಕಾಡ್ ಲೇಸ್ ದ ಸುಧಾರಿಕೆ ಮಲ್ತೆರ್.
ಆನ್ ಲೈನ್ ಜುಗಾರಿದ ಗೊಬ್ಬುಲೆನ್ ಬಂದ್ ಮಲ್ಪೊಡು ಪಂದ್ ತಮಿಳುನಾಡ್ ಸರ್ಕಾರ ಚಿಂತನೆ ಮಲ್ದ್ಂಡ್.
ರಾಜ್ಯಡ್ ಜುಗಾರಿದ ಆನ್ ಲೈನ್ ಗೊಬ್ಬುಲೆರ್ದ್ ಸುಮಾರ್ ಜನ ಸೈಪುನ ಕೇಸ್ ಹೆಚ್ಚಾವೊಂದು ಇಪ್ಪುನ ಬಗೆಟ್ ಸರ್ಕಾರ ಈ ಮಲ್ಲ ಚಿಂತನೆನ್ ಮಲ್ದ್ಂಡ್.
ತಮಿಳುನಾಡ್ ಡ್ ಈ ವರ್ಷ ಆನ್ ಲೈನ್ ಗೇಮ್ ಡ್ ಒಟ್ಟು ಆಜಿ ಜನ ಸೈತ್ ದೆರ್. ನೆತ್ತ ಬಗೆಟ್ ಆನ್ ಲೈನ್ ರಮ್ಮಿ ಬೊಕ್ಕ ಪೋಕರ್ ಗೊಬ್ಬುಲೆನ್ 2 ವಾರ ನಿಷೇಧ ಮಲ್ಪೊಡು ಪಂದ್ ಸರ್ಕಾರ ತೆರಿಪಾದ್ಂಡ್. ಸರ್ಕಾರದ ನಿರ್ಧಾರಗ್ ರಾಜ್ಯಪಾಲೆರ್ ಒಪ್ಪಿಗೆ ಕೊರ್ತೆರ್. ಬೊಕ್ಕ ಗೊಬ್ಬುಲೆನ್ ಶಾಶ್ವತವಾದ್ ನಿಷೇಧ ಮಲ್ಪೆರೆ ಎಂ.ಕೆ.ಸ್ಟಾಲಿನ್ ಮುತಾಲಿಕೆದ ಸರ್ಕಾರ ಅಲಚನೆ ಮಲ್ದ್ಂಡ್. ಅಂಚೆನೆ ನೆತ್ತ ಜಾಹಿರಾತುನ್ ಲ ಉಂತಾಯರೆ ಪೊಸ ಕಾನೂನು ಜಾರಿಗ್ ಕನದೆರ್.
ಹೊಸನಗರ: ಹೊಸನಗರ ತಾಲೂಕುದ ಕಿಳಮದೂರ್ ಗ್ರಾಮಡ್ ಬಜ್ಜಯಿ ಕೃಷಿಕ್ಕೆ ಕೃಷ್ಣಪ್ಪಗೌಡ (60) ಬಲ್ಲ್ ದೆತೊಂದು ತೀರ್ ಪೋತೆರ್.
ಮೇರ್ ಕೃಷಿ ಅಭಿವೃದ್ಧಿಗಾದ್ ಬ್ಯಾಂಕ್ ಲೆಡ್ ಸಾಲ ಮಲ್ತ್ ದ್ ಇತ್ತೆರ್. ಆಂಡ ಕಂಗ್ ಗ್ ಎಲೆಚುಕ್ಕಿ ಸೀಕ್ ಬತ್ತ್ಂದ್ ಫಸಲ್ ಕಮ್ಮಿ ಆಂಡ್, ನನ ಈ ಸಾಲನ್ ಎಂಚ ತೀರಿಸವುನೆ ಪಂದ್ ಮಂಡೆ ಬೆಚ್ಚಡೇ ಬಲ್ಲ್ ಪಾಡೊಂದೆರ್ ಪಂದ್ ಅರೆನ ಮಗೆ ಸತೀಶ್ ಠಾಣೆಡ್ ದೂರು ದಾಖಲ್ ಮಲ್ದೆರ್. ನೆತ್ತ ಬಗೆಟ್ ಪೊಲೀಸೆರ್ ತನಿಖೆ ಸುರು ಮಲ್ದೆರ್.
ಮೈಸೂರ್ : ಕೇಂದ್ರ ರೈಲ್ವೆ ಸಚಿವಾಲಯ ರಾಜ್ಯದ ರಡ್ಡ್ ರೈಲ್ ಲೆನ ಪುದರ್ ಬದಲ್ ಮಲ್ತ್ಂಡ್.
ಮೈಸೂರ್-ಬೆಂಗ್ಲೂರ್ ಇತ್ತಿನ ‘ಟಿಪ್ಪು ಎಕ್ಸ್ಪ್ರೆಸ್’ ರೈಲ್ ಗ್ ‘ಒಡೆಯರ್ ಎಕ್ಸ್ಪ್ರೆಸ್’ ಪಂದ್ ಬೊಕ್ಕ ಮೈಸೂರ್-ತಾಳಗುಪ್ಪ ರೈಲ್ ಗ್ ‘ಕುವೆಂಪು ಎಕ್ಸ್ಪ್ರೆಸ್’ ಪಂದ್ ಪುದರ್ ದೀತ್ಂಡ್. ಈ ಬಗೆಟ್ ಸಂಸದೆ ಪ್ರತಾಪ್ ಸಿಂಹ ಶುಕ್ರಾರ ಉಂದು ಎಡ್ಡೆ ಸುದ್ದಿ, ಅಂಚನೆ ”ನನ ದುಂಬು ಪುದರ್ ಬದಲ್ ಆಯಿನ ರೈಲ್ ಲು ನಿಕುಲೆಗ್ ಸೇವೆ ಮಲ್ಪುವ, ಅಂಚನೆ ಈ ಪ್ರಯತ್ನಗ್ ಬೆರಿಬಲ ಆದ್ ಉಂತಿನ ಪ್ರಹ್ಲಾದ್ ಜೋಶಿ , ಕುವೆಂಪುನ ಪುದರ್ ಸೂಚಿಸಾಯಿನ ದೋಸ್ತಿ ಡಿಪಿ ಸತೀಶೆರೆಗ್ ಸೊಲ್ಮೆಲು ಪಂದ್ ಟ್ವೀಟ್ ಮಲ್ದೆರ್. ಅಂಚನೆ ಪ್ರತಾಪ್ ಸಿಂಹ ಪುದರ್ ನ್ ಬದಲ್ ಮಲ್ಪುನಂಚನೆ ಕೇಂದ್ರ ರೈಲ್ವೆ ಸಚಿವೆರಾಯಿನ ಅಶ್ವಿನಿ ವೈಷ್ಣವ್ ಅರೆಗ್ ಬಿನ್ನಾಪು ಸಂದಾದಿತ್ತೆರ್.
ಒಡಿಪು : ತುಳುನಾಡ್ ಬೊಕ್ಕ ಉತ್ತರ ಕನ್ನಡ ಜಿಲ್ಲೆಡ್ ಬೆನ್ನಿದಕುಲು ಬುಲೆಪುನ ಎಮ್04, ಕಜೆ, ಜಯ, ಜ್ಯೋತಿ, ಪಂಚಮುಖಿ, ಸಹ್ಯಾದ್ರಿ, ಉಮ ಬೊಕ್ಕ ಅಭಿಲಾಷ್ ಬಿದೆತ್ತ ಉರ್ಪೆಲ್ ಅರಿನ್ ಸರ್ಕಾರಿ ಬಿಲೆಟ್(ಎಮ್ ಎಸ್ ಪಿ) ದೆತೊಂದು ಅವೆನ್ ಆಯಾ ಜಿಲ್ಲೆದ ರೇಷನ್ ಕಾರ್ಡ್ ಮುಕೇನ ಪಟ್ಟರೆ ಕೇಂದ್ರ ಸರಕಾರ ಒಪ್ಪಿಗೆ ಕೊರ್ತುಂಡು.
ತುಳುನಾಡ್ ಡ್ ರೇಷನ್ ಗ್ ಉರ್ಪೆಲ್ ಅರಿ ಕೊರೊಡು ಪಂದ್ ಜನಪ್ರತಿನಿಧಿನಕುಲು ಸರ್ಕಾರೊಗು ಬಿನ್ನಾಪು ಮಲ್ದಿತ್ತೆರ್.
ಈ ನಿಟ್ಟ್ ಡ್ ರಾಜ್ಯ ಸಮಾಜ ಕಲ್ಯಾಣ ಇಲಾಖೆದ ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರಿ ಬೊಕ್ಕ ಒಡಿಪು- ಚಿಕ್ಕಮಗಳೂರ್ ಸಂಸದೆ, ಕೇಂದ್ರ ಸಚಿವರಾಯಿನ ಶೋಭಾ ಕರಂದ್ಲಾಜೆ ಮೊಕುಲು ಕೇಂದ್ರದ ಆಹಾರ ಇಲಾಖೆ ಸಚಿವೆರಾಯಿನ ಪಿಯೂಷ್ ಗೋಯಲ್ ಗ್ ಪತ್ರ ಬರೆದ್ ಸದರಿ ಬೇಡಿಕೆನ್ ಅನುಮೋದನೆ ಮಲ್ಪುನಂಚ ಬಿನ್ನಾಪು ಮಲ್ದಿತ್ತೆರ್.
ಈ ಬಿನ್ನಾಪುನು ಪರಿಗಣಿಸಯಿನ ಪಿಯೂಷ್ ಗೋಯಲ್ ಉರ್ಪೆಲ್ ಅರಿನ್ ಬುಲೆಪುನ ಜಿಲ್ಲೆಡ್ ಎಮ್ಎಸ್ ಪಿಡ್ ಖರೀದಿ ಮಲ್ತ್ ದ್ ರೇಷನ್ ಕಾರ್ಡ್ ಡ್ ಪಟ್ಟೊಲಿ ಪಂದ್ ರಾಜ್ಯ ಸರಕಾರಗ್ ಅನುಮತಿ ಕೊರ್ತೆರ್.
ವಿಶ್ವ ಕುಸ್ತಿ ಪಟು ಸಾರಾ ಲೀ 30ನೇ ವರ್ಷೊದ ಎಲ್ಯ ಪ್ರಾಯೊಡು ತೀರ್ ಪೋಯೆರ್ ಪಂದ್ ಸಾರಾ ಲೀ ಮೆರೆನ ಅಮ್ಮ ಬೊಕ್ಕ ರೆಸ್ಲಿಂಗ್ ಸಂಸ್ಥೆದಕುಲು ತೆರಿಪಾದೆರ್.
ಸಾರಾ ಲೀ ಮೆರೆನ ಸಾವುದ ಸುದ್ದಿ ಕೇನ್ದ್ ಇಡೀ ಕುಸ್ತಿ ಜಗತ್ತ್ ಗ್ ಬೇಜಾರಾತ್ತ್ಂಡ್. ಸಾರಾ ಲೀ 2015ತ ವರ್ಲ್ಡ್ ರೆಸ್ಲಿಂಗ್ ಎಂಟರ್ಟೈನ್ ಮೆಂಟ್ (ಡಬ್ಲ್ಯೂ ಡಬ್ಲ್ಯೂಇ)ಸೂಪರ್ ಸ್ಟಾರ್ ಆದ್ ಇತ್ತೆರ್. ಬೊಕ್ಕ 2017 ಟ್ ಡಬ್ಲ್ಯೂ ಡಬ್ಲ್ಯೂಇ ರ್ದ್ ಪಿದಯಿ ಬತ್ತೆರ್. ಮೇರ್, 2015ರ್ದ್ 2017 ಮುಟ್ಟ ಡಬ್ಲ್ಯೂ ಡಬ್ಲ್ಯೂಇ ವ್ರೆಸ್ಲಿಂಗ್ ಡ್ ಮಿಂಚೊಂದು ಇತ್ತೆರ್. ಅಂಚನೆ ಸಾರಾ ಲೀನ ಸಾವುದ ಬಗೆಟ್ ಸುಮಾರ್ ಚರ್ಚೆ ನಡತ್ತೊಂದು ಉಂಡು. ಡಬ್ಲ್ಯೂ ಡಬ್ಲ್ಯೂಇ ರ್ದ್ ಪಿದಯಿ ಬತ್ತಿ ಬೊಕ್ಕ ಮೇರೆಗ್ ಮೂಂಕುಗು ಸಂಬಂಧಪಟ್ಟಿನ ಸೀಕ್ ಇತ್ತ್ಂಡ್ ಪಂದ್ ಕೆಲವು ಮಾಧ್ಯಮೊಲು ತೆರಿಪಾದ. ಮೇರೆಗ್ ಮದಿಮೆ ಆದಿತ್ತ್ ದ್ ಮೂಜಿ ಜೋಕುಲು ಉಲ್ಲೆರ್.
ಓಸ್ಲೋ: ರಷ್ಯಾದ ಮಾನವ ಹಕ್ಕು ಸಂಸ್ಥೆ ಬೊಕ್ಕ ಉಕ್ರೇನಿಯನ್ ದ ಮಾನವ ಹಕ್ಕು ಸಂಸ್ಥೆ ಸೆಂಟರ್ ಫಾರ್ ಸಿವಿಲ್ ಲಿಬರ್ಟೀಸ್ ಸಂಸ್ಥೆಲು, ಮಾನವ ಹಕ್ಕು ಪೊರ್ಂಬಾಬಟಗಾರೆ, ಇತ್ತೆ ಜೈಲ್ ಡ್ ಇಪ್ಪುನ ಅಲೆಸ್ ಬೈಲ್ಯಾಟ್ಸ್ಕಿಗ್ ನೊಬೆಲ್ ಶಾಂತಿ ಪ್ರಶಸ್ತಿ ಕೊರ್ತುಂಡು.
ನೊಬೆಲ್ ಶಾಂತಿ ಪ್ರಶಸ್ತಿದ ಗೌರವ ಬೆಲರೂಸಿಯನ್ ಜೈಲ್ ಡ್ ಇಪ್ಪುನ ಮಾತ ರಾಜಕೀಯ ಕೈದಿಲೆಗ್ ಸೇರ್ದ್ಂಡ್ ಪಂದ್ ಪ್ರತಿ ಪಕ್ಷದ ನಾಯಕೆ ಪಾವೆಲ್ ಲತುಷ್ಕೊ ಪಂತೆರ್.
ಬೆಂಗ್ಲೂರ್: ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮೆರೆನ ಮಗೆ ಭರತ್ ಬಿ.ಬೊಮ್ಮಾಯಿ ಅರೆಗ್ ಪ್ರತಿಷ್ಠಿತ ಅಂತಾರಾಷ್ಟ್ರೀಯ ಟೈಟಾನ್ ಬಿಸಿನೆಸ್ ಅವಾರ್ಡ್-2022 ತಿಕ್ ದ್ಂಡ್.
ಅಶ್ವ ಎನರ್ಜಿ ಬೊಕ್ಕ ವಾಲ್ಟೆಕ್ ಪನ್ಪುನ ಸಂಸ್ಥೆಲೆನ್ ನಡಪಾವೊಂದು ಇಪ್ಪುನ ಭರತ್, ಉತ್ಪಾದನೆ ವಿಭಾಗಡ್ ವರ್ಷದ ಜಾಗತಿಕ ವಾಣಿಜ್ಯೋದ್ಯಮಿಯಾದ್ ಉಲ್ಲೆರ್. ಅಂಚನೆ 2022ತ ಟೈಟಾನ್ ಬಿಸಿನೆಸ್ ಅವಾರ್ಡ್ ಸೀಸನ್ 2ಟ್ಟ್ ಪ್ರಶಸ್ತಿ ಗೆಂದ್ ದೆರ್. ಈ ಬಗೆಟ್ ಟೈಟಾನ್ ಬಿಸಿನೆಸ್ ಅವಾರ್ಡ್ ಆಯೋಜಕೆರಾಯಿನ ಇಂಟರ್ನ್ಯಾಷನಲ್ ಅವಾರ್ಡ್ಸ್ ಅಸೋಸಿಯೇಟ್ ಪ್ರಕಟಣೆ ಮಲ್ದ್ಂಡ್.
