ಶ್ರೀ ಕಟೀಲ್ ಮೇಳದ ಆಟದ ಸೇವಾ ಸಮಿತಿಲು ಬೊಕ್ಕ ಸೇವಾದಾರೆರೆನ ಸಮಾಲೋಚನೆ ಸಭೆ ಅ.16 ಐತಾರದಾನಿ ಮಧಾಹ್ನ ಗಂಟೆ 3:30 ಗು ಕದ್ರಿ ಅಭಿಷೇಕ ಮಂದಿರಡ್ ನಡಪರೆ ಉಂಡು.
ಕಟೀಲ್ ಮೇಳದ ಆಟದ ಸೇವೆ ಪರಂಪರೆದಂಚನೆ ರಾತ್ರೆರ್ದ್ ಬೊಲ್ಪು ಮುಟ್ಟ ನಡಪೊಡು ಪನ್ಪಿನ ಉದ್ದೇಶೊಡು ಅಟ್ಟಣೆ ಮಲ್ದಿನ ಈ ಸಭೆಟ್ಟ್ ಮಾತೆರ್ಲಾ ಬತ್ತ್ ದ್ ಪಾಲ್ ಪಡೆದ್ ಕಟೀಲ್ ಮೇಳದ ಆಟದ ಪರಂಪರೆನ್ ಒರಿಪಾಗ ಪಂದ್ ಸಭೆತ್ತ ಆಯೋಜಕೆರ್ ಬಿನ್ನಯ ಮಲ್ದೆರ್.
ಕಾನೂನು ಪ್ರಕಾರ ಚಿತ್ರದುರ್ಗದ ಮುರುಘಾ ಮಠಕ್ ಪೊಸ ಪೀಠಾಧಿಪತಿ ನೇಮಕ ಮಲ್ಪುವ ಪಂದ್ ಸಿಎಂ ಬೊಮ್ಮಾಯಿ ಘೋಷಣೆ ಮಲ್ದೆರ್.
ಈ ಪೊರ್ತುಡು ಮುರುಘಾಶ್ರೀ ತನ್ನ ಪವರ್ ಆಫ್ ಅಟಾರ್ನಿನ್ ಮಠದ ಎಸ್ ಜೆಎಂ ವಿದ್ಯಾಪೀಠದ ಕಾರ್ಯದರ್ಶಿ, ನಿವೃತ್ತ ನ್ಯಾ.ಎಸ್.ಬಿ.ವಸ್ತ್ರದ ಮಠ ಅರೆಗ್ ಕೊರ್ತೆರ್. ಇಂಚಾದ್ ಎಸ್ ಜೆಎಂ ವಿದ್ಯಾಪೀಠದ ಆಡಳಿತ ಅಧಿಕಾರ ಕಾರ್ಯದರ್ಶಿಗ್ ತಿಕ್ಕಿಯೆರೆ ಉಂಡು. ಅಂಚೆನೆ ಸಂಸ್ಥೆದ ಸಿಬ್ಬಂದಿಲೆಗ್ ಸಂಬಳ ಕೊರ್ಪುನವು ತಡ ಆವೊಂದು ಇತ್ತಿರ್ನೆದಾವರ ಅಟಾರ್ನಿ ಕೊರಿಯರೆ ಹೈಕೋರ್ಟ್ ಆದೇಶ ಮಲ್ದ್ಂಡ್.
ಒಡಿಪು : ನ್ಯಾಷನಲ್ ಪರ್ಫಾಮಿಂಗ್ ಆರ್ಟ್ಸ್ ಚಾಂಪಿಯನ್ ಶಿಪ್ ಮಹಾರಾಷ್ಟ್ರ – 2022 ಸ್ಪರ್ಧೆಡ್ ಕರ್ನಾಟಕನ್ ಪ್ರತಿನಿಧಿಸಾದ್ ಪಿಲಿ ಏಸ ಪಾಡ್ದ್ ಮರಕಾರ್ ನಲಿಕೆಡ್ ರಾಷ್ಟ್ರೀಯ ಮಟ್ಟಡ್ ಬಂಗಾರ್ ದ ಪದಕ ಪಡೆದ್ ಅಂತಾರಾಷ್ಟ್ರೀಯ ಮಟ್ಟದ ಸ್ಪರ್ಧೆಗ್ ಅಂತ್ರಾ ಆನಂದ್ ಕೋಟ್ಯಾನ್ ಆಯ್ಕೆ ಅತೆರ್.
ಕೊರಂಗ್ರಪಾಡಿದ ಆನಂದ್ ಕೋಟ್ಯಾನ್ ಬೊಕ್ಕ ತನುಜಾ ಕೋಟ್ಯಾನ್ ದಂಪತಿಲೆನ ಮಗಲ್ ಆಯಿನ ಮೇರ್, ಒಡಿಪು ಸೈಂಟ್ ಸಿಸಿಲಿಯಾ ಶಾಲೆಡ್ 8ನೇ ಕ್ಲಾಸ್ ಡ್ ಕಲ್ತೊಂದು ಉಲ್ಲೆರ್.
ಕುಡ್ಲ: ಕುಂಟು ದೆಪ್ಪೆರೆ ಬತ್ತಿನ ಬುರ್ಖಾದ ಪೊಂಜೋವ್ ಅಂಗಡಿಡ್ ಇತ್ತಿನ ಕೆಲವು ಕುಂಟುಲೆನ್ ಕಂಡಿನ ಘಟನೆ ಕಾವೂರ್ ದ ದುರ್ಗಾ ಪ್ರಸಾದ್ ಕಟ್ಟಡಡ್ ಇಪ್ಪುನ ಸಂಧ್ಯಾ ಟೆಕ್ಸ್ ಟೈಲ್ ಡ್ ನಡತ್ಂಡ್.
ಕಂಡಿನ ಈ ದೃಶ್ಯ ಅಂಗಡಿದ ಸಿಸಿಟಿವಿ ಕ್ಯಾಮೆರಾಡ್ ಸೆರೆ ಆತ್ಂಡ್. ಈ ಬಗೆಟ್ ಅಂಗಡಿ ಮಾಲೀಕೆರ್ ಕಾವೂರು ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ದೆರ್. ಪೋಲಿಸೆರ್ ತನಿಖೆ ಸುರು ಮಲ್ದೆರ್.
ಸುಬ್ರಹ್ಮಣ್ಯ: ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯದ ಯಶಸ್ವಿನಿ ಆನೆಗ್ ಅರಣ್ಯ ಇಲಾಖೆರ್ದ್ ಮಾಲಿಕತ್ವ ಪ್ರಮಾಣ ಪತ್ರ ಕೊರ್ಯೆರ್.
ಕರಿನ 18 ವರ್ಷೋರ್ದಿಂಚಿ ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯಡ್, ಆನೆಗ್ ಇತ್ತಿನ ಮಾಲಿಕತ್ವ ಪ್ರಮಾಣ ಪತ್ರ ತಿಕ್ಕಂದೆ ಇಜ್ಜಾಂಡ್. ಆಂಡ ಈ ಸರ್ತಿ 5 ವರ್ಸ ಮುಟ್ಟದ ಮಾಲಿಕತ್ವ ಪತ್ರ ತಿಕ್ಕ್ಂಡ್.
ಬೆಂಗ್ಲೂರ್ : “ಕಾಂತಾರ” ಚಿತ್ರದ ಯಶಸ್ಸಿರ್ದ್ ಪುಗರ್ತೆ ಪಡೆಯಿನ ನಿರ್ದೇಶಕೆರ್ ಬೊಕ್ಕ ನಟೆ ರಿಷಭ್ ಶೆಟ್ಟಿ ಅರೆನ ಕುಡೊಂಜಿ ನಿರ್ಮಾಣದ ‘ಶಿವಮ್ಮ’ ಚಿತ್ರಗ್ 27ನೇ ಬೂಸಾನ್ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ ಪ್ರಶಸ್ತಿ ತಿಕ್ಕ್ ದ್ಂಡ್.
ಈ ಚಿತ್ರನ್ ಯುವ ನಿರ್ದೇಶಕೆರ್ ಜೈ ಶಂಕರ್ ನಿರ್ದೇಶನ ಮಲ್ದೆರ್. ಹಳ್ಳಿದ ಪೊಂಜೋವ್ ಒರ್ತಿ ಕಷ್ಟೊಡು ಸಂಪಾದನೆ ಮಲ್ತಿನ ಕಾಸ್ ನ್ ನೆಟ್ ವರ್ಕ್ ವೈವಾಟ್ ಡ್ ಹೂಡಿಕೆ ಮಲ್ತ್ ದ್ ಅಯಿರ್ದ್ ಅನುಭವಿಸುನ ಸಂಕಟೊನು “ಶಿವಮ್ಮ” ಚಿತ್ರಡ್ ತೋಜಾದೆರ್. ಅಂಚನೆ ಈ ಚಿತ್ರದ ನಿರೂಪಣೆದ ಬಗೆಟ್ ತೀರ್ಪುಗಾರೆರ್ ಮೆಚ್ಚಿಗೆ ತೊಜಪಾದೆರ್.
ಬೆಂಗ್ಲೂರ್: ಕರ್ನಾಟಕ-ತಮಿಳುನಾಡ್ ಗಡಿಭಾಗದ ಹೊಸೂರುಡ್ ಕೆಮಿಕಲ್ ಬಾಯ್ಲರ್ ಪುಡಾದ್ ಗ್ಯಾಸ್ ಸೋರಿಕೆ ಆಯಿನ ಕಾರಣ 100ಕ್ ಜಾಸ್ತಿ ವಿದ್ಯಾರ್ಥಿಲು ಆಸ್ಪತ್ರೆಗ್ ದಾಖಲ್ ಆತೆರ್.
ಶಾಲೆದ ಪಿರವು ಇತ್ತಿನ ಖಾಸಗಿ ಕಟ್ಟಡಡ್ ಕೆಮಿಕಲ್ ಬಾಯ್ಲರ್ ಪುಡಾದ್, ಶಾಲೆದ ಜೋಕುಲೆಗ್ ಉಸುಲು ದಂಬು ಕಟ್ವದ್ 100ಕ್ ಲ ಜಾಸ್ತಿ ಜೋಕುಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್, ನೆಟ್ಟ್ ಸುಮಾರ್ ಜನತ ಆರೋಗ್ಯ ಸ್ಥಿತಿ ಗಂಭೀರ ಆತ್ಂಡ್ ಪಂದ್ ತೆರಿದ್ ಬೈದ್ಂಡ್.
ಬೆಂಗ್ಲೂರ್: ಬೆಂಗ್ಲೂರ್ ಡ್ ಅದಿತಿ ಅಹುಜಾ ಕಂಪೆನಿ ತಯಸರ್ ಮಲ್ದಿನ ಇಡ್ಲಿ ವೆಂಡಿಂಗ್ ಮೆಷಿನ್ ದ ವಿಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.
ಮೊಬೈಲ್ ಡ್ ಮೆನು ಸೆಲೆಕ್ಟ್ ಮಲ್ತ್ ದ್ ಮೆಷಿನ್ ಗ್ ಸ್ವೈಪ್ ಮಲ್ತ್ಂಡ ಕೆಲವೇ ನಿಮಿಷಡ್ ಈ ಮೆಷಿನ್ ರ್ದ್ ಬೆಚ್ಚ ಬೆಚ್ಚ ಇಡ್ಲಿ ಬೊಕ್ಕ ಚಟ್ನಿದ ಪ್ಲೇಟ್ ಕೈಕ್ ಬರ್ಪುಂಡು. ಈ ಸರ್ವೀಸ್ ದಿನದ 24 ಗಂಟೆ ಮುಟ್ಟ ಉಂಡು. ಅವ್ವತ್ತಂದೆ ನೆಟ್ಟ್ ವಡೆ, ಉಪ್ಪಿಟ್ಟು ಇಂಚನೆ ಬೇತೆ ಬೇತೆ ತೆನಸುಲುಲ ತಿಕ್ಕುಂಡು ಪಂದ್ ತೆರಿದ್ ಬೈದ್ಂಡ್.
ಬಲೂಚಿಸ್ತಾನ : ಬಲೂಚಿಸ್ತಾನ್ ಹೈಕೋರ್ಟ್ದ ಮಾಜಿ ಮುಖ್ಯ ನ್ಯಾಯಮೂರ್ತಿ ಮುಹಮ್ಮದ್ ನೂರ್ ಮಸ್ಕಂಜೈ ಅರೆನ್ ಗುಂಡು ಪಾರ್ದ್ ಕೇರ್ನ ಘಟನೆ ಪಾಕಿಸ್ತಾನದ ಬಲೂಚಿಸ್ತಾನ್ ಪ್ರಾಂತ್ಯದ ಖರಾನ್ ಪ್ರದೇಶಡ್ ನಡತ್ಂಡ್.
ಮೇರ್ ಪಲ್ಲಿಡ್ ಪ್ರಾರ್ಥನೆ ಸಂದಾದ್ ಪಿದಯಿ ಬನ್ನಗ ಗುಂಡು ಪಾಡ್ದೆರ್.
ಮಸ್ತ್ ಪೆಟ್ಟಾಯಿನ ಮೇರೆನ್ ಖರಾನ್ ಪೇಂಟೆರ್ದ್ ಸುಮಾರ್ 280 ಕಿ.ಮೀ ದೂರಡ್ ಇಪ್ಪುನ ಕ್ವೆಟ್ಟಾದ ಆಸ್ಪತ್ರೆಗ್ ಲೆತೊಂದು ಪೋನಗ ಮಾರ್ಗಸ ನಡುಟ್ಟೇ ತೀರ್ ಪೋಯೆರ್.
ಈ ಗುಂಡುದ ದಾಳಿರ್ದ್ ನನ ರಡ್ಡ್ ಜನಕ್ಕ್ ಪೆಟ್ಟಾತ್ಂಡ್. ಅಕಲೆನ ಸ್ಥಿತಿ ಚಿಂತಾಜನಕ ಆತ್ಂಡ್ ಪಂದ್ ಪೊಲೀಸ್ ಉಪ ಮಹಾನಿರೀಕ್ಷಕೆರ್ ನಜೀರ್ ಅಹ್ಮದ್ ಕುರ್ದ್ ತೆರಿಪಾದೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ , ಕರಾವಳಿ ಕೇಸರಿ ನ್ಯೂಸ್ ಬೊಕ್ಕ ಶ್ರೀ ಶಾರದಾ ಸೇವಾ ಸಮಿತಿ ಒಟ್ಟುಸೇರಿಗೆಡ್ ಅ.15 ಮದ್ಯಾಹ್ನ 3 ಗಂಟೆಗ್ ಅಗರಿ ರಘುರಾಮ ಭಾಗವತ ವೇದಿಕೆಡ್ ಯಕ್ಷಕೇಸರಿ 2022 ಪ್ರಶಸ್ತಿ ಪಟ್ಟುನ ಲೇಸ್ ಬೊಕ್ಕ ಸುಂಕದಕಟ್ಟೆ ಮೇಳದ ಬೊಕ್ಕ ಅತಿಥಿ ಕಲಾವಿದೆರೆರ್ದ್ ಕಾರ್ನಿಕದ ಕೊರಗಜ್ಜೆ ತುಳು ಆಟ ನಡಪರೆ ಉಂಡು.
ಅಂಚನೆ ಯಕ್ಷಕೇಸರಿ-2022, ಕಲಾಕೇಸರಿ 2022 ದ ಪ್ರಶಸ್ತಿ ಪ್ರದಾನ ಬೊಕ್ಕ ಪತ್ರಿಕೆದ ಇಸೇಸ ಸಂಚಿಕೆ ಬುಡುಗಡೆ, ಬೊಕ್ಕ ಪ್ರಸಿದ್ಧ ಕಲಾವಿದೆರೆರ್ದ್ ಸಂಗೀತ ಬೊಕ್ಕ ನೃತ್ಯ ಲೇಸ್, ಬೊಕ್ಕ ಪ್ರಸಾದ್ ನೇತ್ರಾಲಯದ ಸಹಕಾರರ್ದ್ ಕಣ್ಣ್ ತಪಾಸಣೆ ಬೊಕ್ಕ ಚಿಕಿತ್ಸೆ ಶಿಬಿರ, ಬೊಕ್ಕ ಕನ್ನಡಕ ಕೊರ್ಯೆರೆ ಉಂಡು. ಶ್ರೀ ಕ್ಷೇತ್ರ ಕಟೀಲ್ ದ ವೇದಮೂರ್ತಿ ಹರಿನಾರಾಯಣ ಆಸ್ರಣ್ಣ ಮೇರ್ ಆರ್ಶೀವಚನ ಕೊರ್ಯೆರೆ ಉಲ್ಲೆರ್. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲು ದಯಾನಂದ ಕತ್ತಲ್ ಸಾರ್ ಅರೆನ ಶುಭಾಶಂಸನೆ ಉಂಡು. ಬೊಕ್ಕ ಸುರತ್ಕಲ್ ಗೋವಿಂದದಾಸ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ.ಕೃಷ್ಣಮೂರ್ತಿ ಅಧ್ಯಕ್ಷತೆಡ್ ಒಯಿಸೊನ್ವೆರ್. ಅಂಚನೆ ಅಗರಿ ಗ್ರೂಪ್ ಎಂಟರ್ ಪ್ರೈಸಸ್ ದ ಮಾಲಕೆರ್ ಅಗರಿ ರಾಘವೇಂದ್ರ ರಾವ್ ಲೇಸ್ ನ್ ಉದಿಪನ ಮಲ್ಪೆರೆ ಉಲ್ಲೆರ್. ಬೊಕ್ಕ ಕುಡ್ಲ ಉತ್ತರ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಡಾ.ಭರತ್ ಶೆಟ್ಟಿ ವೈ ಪ್ರಶಸ್ತಿ ಪ್ರದಾನ ಮಲ್ಪುವೆರ್. ಪುನರೂರು ಪ್ರತಿಷ್ಠಾನ (ರಿ.) ಅಧ್ಯಕ್ಷೆರ್ ದೇವಪ್ರಸಾದ್ ಪುನರೂರು ಇಸೇಸ ಸಂಚಿಕೆ ಬುಡುಗಡೆ ಮಲ್ಪೆರೆ ಉಲ್ಲೆರ್. ಶ್ರೀ ಶಾರದಾ ಸೇವಾ ಸಮಿತಿ ಪ್ರಧಾನ ಸಂಘಟಕೆರ್, ತುಳುಕೂಟ ಮಸ್ಕತ್ ದ ಮಾಜಿ ಅಧ್ಯಕ್ಷೆರ್ ದಯಾನಂದ ರಾವ್ ಕಾವೂರ್ ಧನಸಕಾಯ ಕೊರ್ಯೆರೆ ಉಲ್ಲೆರ್. ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕೆರ್ ರಾಜೇಶ್ ಜಿ, ಕುಡ್ಲ ಉರ್ವ ಪೊಲೀಸ್ ಠಾಣೆದ ಪೊಲೀಸ್ ನಿರೀಕ್ಷಕೆರ್ ಭಾರತಿ.ಜಿ, ಡಿಜಿಎಂ ಸೇಲ್ಸ್ ಬೊಕ್ಕ ಮಾರ್ಕೆಟಿಂಗ್ ಮಾಂಡೋವಿ ಮೋಟಾರ್ಸ್ ಪ್ರೈಲಿ. ಶಶಿಧರ ಟಿ.ಕಾರಂತ್, ಪ್ರಸಂಗಕರ್ತೆರ್ ಜಿ.ಕೆ ಶ್ರೀನಿವಾಸ್ ಸಾಲ್ಯಾನ್ ಬೋಂದೆಲ್ ಮಲ್ಲ ಬಿನ್ನೆರಾದ್ ಬರ್ಯೆರೆ ಉಲ್ಲೆರ್. ಅಂಚನೆ ತೆಂಕುತಿಟ್ಟು ಖ್ಯಾತ ಭಾಗವತೆರ್ ರಸರಾಗ ಚಕ್ರವರ್ತಿ ದಿನೇಶ್ ಅಮ್ಮಣ್ಣಾಯ ಅರೆಗ್ ಯಕ್ಷಕೇಸರಿ- 2022 ಪ್ರಶಸ್ತಿ ಬೊಕ್ಕ ಖ್ಯಾತ ಚಲನಚಿತ್ರ ನಟೆ ಕುಸಾಲ್ದರಸೆ ನವೀನ್ ಡಿ.ಪಡೀಲ್ ಗ್ ಕಲಾಕೇಸರಿ-2022 ಪ್ರಶಸ್ತಿ ಪ್ರದಾನ ಮಲ್ಪೆರೆ ಉಂಡು. ಈ ಲೇಸ್ ನ್ ತುಳು ಸಾಹಿತ್ಯ ಅಕಾಡೆಮಿ ಸದಸ್ಯೆರ್ ಪತ್ರಕರ್ತೆರ್ ನರೇಂದ್ರ ಕೆರೆಕಾಡು ಬೊಕ್ಕ ಪೂರ್ಣಿಮಾ ಶಾಸ್ತ್ರಿ ಸುಧಾರಿಕೆ ಮಲ್ಪುವೆರ್ ಪಂದ್ ರಿಜಿಸ್ಟ್ರಾರ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಅಕಾಡೆಮಿದ ಸರ್ವಸದಸ್ಯೆರ್ ಕವಿತಾ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾಲು ದಯಾನಂದ ಜಿ ಕತ್ತಲ್ ಸಾರ್,ಕರಾವಳಿ ಕೇಸರಿ ಸಂಪಾದಕೆರ್ ರಜನ್ ಕುಮಾರ್ ಕೆ. ಲೆಪ್ಪೋಲೆಡ್ ತೆರಿಪಾದೆರ್.
