October 2022

ನ.1 ಕ್ ಕಾಸ್ರೋಡುಡ್ ಮಲಯಾಳಿ ದಿನಾಚರಣೆ: ರಾಜಶ್ರೀ ರೈ ಪೆರ್ಲ, ರಾಧಾಕೃಷ್ಣೆರೆಗ್ ತಮ್ಮನ

ಕಾಸ್ರೋಡು : ಜಿಲ್ಲೆಡ್ ನವೆಂಬರ್ 1 ಕ್ಕ್ ಮಲಯಾಳಿ ದಿನಾಚರಣೆದ ಅಂಗವಾದ್ ಕನ್ನಡ ಬೊಕ್ಕ ಮಲಿಯಾಳಿ ಸೇರ್ದ್ ರಡ್ಡ್ ಬರವುಗಾರೆರೆಗ್ ಜಿಲ್ಲಾಡಳಿತ ಗೌರವಿಸಾರೆ ಉಂಡು.

ಆಯಿನಂಚನೆ ಕಾಸ್ರೋಡುಡ್ ಆಯೆರೆ ಇಪ್ಪುನ ಆಡಳಿತ ಭಾಷಾ ಸಪ್ತಾಹದ ಜಿಲ್ಲಾ ಮಟ್ಟದ ಉದಿಪನ ಲೇಸ್ ಡ್ ಕವಿ, ಲೇಖಕೆರ್ ರಾಧಾಕೃಷ್ಣನ್ ಪೆರುಂಬಳ ಬೊಕ್ಕ ತುಳು ಬೊಕ್ಕ ಕನ್ನಡ ಲೇಖಕಿ ರಾಜಶ್ರೀ ಟಿ.ರೈ ಪೆರ್ಲ ಮೇರೆಗ್ ತಮ್ಮನ ಮಲ್ಪೆರೆ ಉಂಡು. ಮಲಿಯಾಳ ಕಾವ್ಯ, ಸಾಮಾಜಿಕ ಬೊಕ್ಕ ಸಾಂಸ್ಕೃತಿಕ ಕ್ಷೇತ್ರಗ್ ಕೊರ್ನ ಕೊಡುಗೆಗ್ ರಾಧಾಕೃಷ್ಣನ್ ಪೆರುಂಬಳ ಮೇರೆನ್ ಗೌರವಿಸಾರೆ ಉಂಡು. ತುಳು ಕಾದಂಬರಿ, ಎಲ್ಯ ಕಥೆ ಬೊಕ್ಕ ತುಳು ಸಂಸ್ಕೃತಿದ ಸಂಶೋಧನೆ ಕಾರ್ಯಲು ರಾಜಶ್ರೀ ಟಿ.ರೈ ಪೆರ್ಲ ಮೇರೆನ ಮುಖ್ಯ ಅಧ್ಯಯನ ಕ್ಷೇತ್ರಲು ಆತ್ಂಡ್. ನಾಲ್ ತುಳು ಕಾದಂಬರಿಲೆನ್ ಬರೆತೆರ್. ಕುಡ್ಲ ವಿಶ್ವವಿದ್ಯಾನಿಲಯದ ಸಂಶೋಧನೆ ಕೃತಿಲೆನ್ ಪ್ರಕಟಿಣೆ ಮಲ್ದ್ಂಡ್. ಮೇರೆನ ಕಥೆಲು ಕುಡ್ಲ ವಿಶ್ವವಿದ್ಯಾನಿಲಯಡ್ ರಡ್ಡ್ ನೇ ವರ್ಷದ ಎಂ ಎ ಪಾಠ ಬೂಕುದ ಭಾಗ ಆತ್ಂಡ್. ಮಾತ ಜನಪ್ರಿಯ ನಿಯತಕಾಲಿಕೆಲೆಡ್ ಕಥೆ ಬೊಕ್ಕ ಲೇಖನ ಪ್ರಕಟವಾತ್ಂಡ್. ಬರವುಲು ಕನ್ನಡ ಇಂಗ್ಲೀಷ್ ಬೊಕ್ಕ ಮಲಿಯಾಳ ಭಾಷೆಲೆಡ್ ಅನುವಾದ ಮಲ್ತ್ ದ್ ಪ್ರಕಟಣೆ ಮಲ್ದೆರ್. ಮೇರ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, ಪಣಿಯಾಡಿ, ಕಾದಂಬರಿ ಪ್ರಶಸ್ತಿ, ರತ್ನವರ್ಮ ಹೆಗ್ಗಡೆ ನಾಟಕ ಪ್ರಶಸ್ತಿ ಬೊಕ್ಕ ನಿಯತಕಾಲಿಕದ ವಾರ್ಷಿಕ ಕಥಾ ಸ್ಪರ್ಧೆಲೆಡ್ ಸುಮಾರ್ ಪ್ರಶಸ್ತಿ ತಿಕ್ಕ್ ದ್ಂಡ್.

ದೈವಾರಾಧನೆಗ್ ಸೋಶಿಯಲ್ ಮೀಡಿಯಾಡ್ ನಿಂದೆ ಮಲ್ದಿನಾಯನ ಮಿತ್ತ್ ಕ್ರಮ ದೆತೊನರೆ ಪೊಲೀಸ್ ಕಮಿಷ್ನರ್ ಗ್ ದೂರು

ಸೋಶಿಯಲ್ ಮೀಡಿಯಾಡ್ ತುಳುನಾಡ್ ದ ದೈವಾರಾಧನೆಗ್ ನಿಂದನೆ ಮಲ್ದಿನ ಕನ್ನಡಿಗ ಶಿವರಾಜ್ ಪನ್ಪಿನಾಯನ ವಿರುದ್ಧ ದೈವಾರಾಧನೆ ಸಂರಕ್ಷಣಾ ಯುವ ವೇದಿಕೆದಕುಲು ಕಾನೂನು ಲಡಾಯಿಗ್ ದುಂಬಾತೆರ್.

ಸಾಮಾಜಿಕ ಜಾಲತಾಣಡ್ ತುಳು ಭಾಷೆದಕಲೆನ್, ಅಂಚನೆ ತುಳುನಾಡ್ ದ ನಂಬೊಲಿಗೆದ ದೈವಾರಾಧನೆ ಬೊಕ್ಕ ತುಳು ಕಲಾವಿದೆರೆನ ಬಗೆಟ್ ಪೆದಂಬು ಪಾತೆರ್ದ್, ತುಳುವೆರೆನ್ ನಿಂದನೆ ಮಲ್ದಿನ ಕನ್ನಡಿಗ ಶಿವರಾಜ್ ಪನ್ಪುನಾಯನ ಮಿತ್ತ್ ಕಾನೂನು ಕ್ರಮ ದೆತೊನೊಂದು ಪಂದ್ ಶಾಸಕ ವೇದವ್ಯಾಸ ಕಾಮತ್ ಮೇರೆಗ್ ದೈವಾರಾಧನೆ ಸಂರಕ್ಷಣೆ ಯುವ ವೇದಿಕೆದಕುಲು ಮನವಿನ್ ಸಂದಾಯೆರ್. ಆ ಪೊರ್ತುಡು ಶಾಸಕೆರ್ ಕೂಡ್ಲೆ ಕನ್ನಡಿಗ ಶಿವರಾಜ್ ನ ಮಿತ್ತ್ ಈ ಪ್ರಕರಣನ್ ದಾಖಲ್ ಮಲ್ಪೊಡು ಪಂದ್ ಪೊಲೀಸ್ ಆಯುಕ್ತೆರ್ ಆಯಿನ ಶಶಿಕುಮಾರ್ ಗ್ ತೆರಿಪಾದೆರ್.

ಈ ಬಗೆಟ್ ಪಾತೆರಿಮ ವೇದವ್ಯಾಸ ಕಾಮತೆರ್ ತುಳುನಾಡ್ ದ ಮೂಲ ನಂಬಿಕೆನ್ ಅಪಹಾಸ್ಯ ಮಲ್ತ್ ದ್, ದೈವಾರಾಧನೆದ ಬಗೆಟ್ ಬಪ್ಪರ್ ಬರೆತಿನ ಇಚಾರ ಗಮನಗ್ ಬೈದ್ಂಡ್. ಇತ್ತೆನೇ ಈ ಬಗೆಟ್ ಪೊಲೀಸ್ ಆಯುಕ್ತೆರೆಡ ಚರ್ಚೆ ಮಲ್ತ್ ದೆ, ಆಯಿನಾತ್ ಬೇಗ ಅಪರಾಧಿಲೆನ್ ಪತ್ ದ್ ಅಕಲೆನ ಮಿತ್ತ್ ಕಾನೂನು ಕ್ರಮ ದೆತೊನರೆ ತೆರಿಪಾದೆ ಪಂದ್ ಪಂಡೆರ್.

ಅವೆರ್ದ್ ಬೊಕ್ಕ ಪೊಲೀಸ್ ಆಯುಕ್ತೆರ್ ಆಯಿನ ಶಶಿಕುಮಾರ್ ಅರೆನ್ ಯುವವೇದಿಕೆದ ಪ್ರಮುಖೆರ್ ಭೇಟಿ ಆದ್ ಸರಿ ಆಯಿನ ಕ್ರಮ ದೆತ್ತೊನೊಡು ಪಂದ್ ಬರವುದ ಮುಖೇನ ಅವ್ವೇ ಸಂಘಟನೆದಕುಲು ಮನವಿ ಮಲ್ತೆರ್. ಈ ಬಗೆಟ್ ಇತ್ತೆನೇ ಸೈಬರ್ ಕ್ರೈಮ್ ಡ್ ಪ್ರಕರಣ ದಾಖಲ್ ಆದಿತ್ತ್ ದ್, ಆರೋಪಿಲೆನ್ ಪತ್ತೆರೆ ಪೊಲೀಸ್ ನಕುಲು ಬಲೆ ಬೀಜಿದೆರ್.

ಈ ಪೊರ್ತುಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಗುರ್ಕಾರ್ಲು ದಯಾನಂದ ಜಿ ಕತ್ತಲ್ ಸಾರ್, ತುಳುನಾಡ ದೈವಾರಾದನೆ ಯುವ ವೇದಿಕೆ (ರಿ) ಸಂಚಾಲಕೆರ್ ಭರತ್ ಬಲ್ಲಾಲ್ ಬಾಗ್, ರೋಶನ್ ರೆನಾಲ್ಡ್ , ಸಂತೋಷ್ ಕುಮಾರ್, ಚರಿತ್ ಪೂಜಾರಿ, ಮುಂಡಾಲ ಯುವ ವೇದಿಕೆ ಅಧ್ಯಕ್ಷೆರ್ ಜಯಚಂದ್ರ‌ ಕೊಟ್ಟಾರ ಕ್ರಾಸ್, ಸಂಘಟನಾ ಕಾರ್ಯದರ್ಶಿ ರವಿ ಕುದ್ಮುಲ್ ಗಾರ್ಡನ್, ನಂದೀಶ್, ಪ್ರಖ್ಯಾತ್, ನಂದನ್ ಯುವರಾಜ್, ಅಭಿಷ್ ಪ್ರೀತೇಶ್, ಧನುಷ್, ಫ್ರಾನ್ಸಿಸ್ ಡಿಸೋಜಾ ಮೊಕುಲು ಮಾತ ಈ ಪೊರ್ತುಡು ಇತ್ತೆರ್.

ಯುವವಾಹಿನಿ ಸಂಸ್ಥೆ, ಪ್ರಭಾಕರ ಜೋಶಿ, ಸರಪಾಡಿ ಅಶೋಕ್ ಶೆಟ್ಟಿ, ಗುಡ್ಡ ಪಾಣಾರ ಸೇರ್ದ್ 67 ಸಾಧಕೆರೆಗ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ

ಬೆಂಗಳೂರು: ಸಮಾಜಸೇವೆಡ್ ಪುಗರ್ತೆ ಪಡೆದಿನ ದ.ಕ.ಜಿಲ್ಲೆದ ಸೇವಾ ಕೂಟ ಯುವವಾಹಿನಿ (ರಿ) ಅಂಚೆನೆ ಯಕ್ಷಗಾನ ಕ್ಷೇತ್ರದ ಪ್ರಭಾಕರ ಜೋಶಿ, ಸರಪಾಡಿ ಅಶೋಕ್ ಶೆಟ್ಟಿ ಸೇರ್ದ್ 67 ಜನ ಸಾಧಕೆರೆಗ್ 2022 ನೇ ವರ್ಷದ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಘೋಷಣೆ ಆತ್ಂಡ್. ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಅಧೀನ ಕಾರ್ಯದರ್ಶಿಲು ಈ ಪ್ರಶಸ್ತಿದ ಪಟ್ಟಿನ್ ಪ್ರಕಟಿಸಾದೆರ್.

67 ಪ್ರಶಸ್ತಿದ ಪೈಕಿ ದಕ್ಷಿಣ ಕನ್ನಡ ಜಿಲ್ಲೆದ ರವಿ ಶೆಟ್ಟಿ (ಸಮಾಜಸೇವೆ) ನಾರಾಯಣ ಎಂ.(ಸಂಗೀತ), ಸರಪಾಡಿ ಅಶೋಕ್ ಶೆಟ್ಟಿ (ಯಕ್ಷಗಾನ) ಕಮಲಾಕ್ಷಾಚಾರ್ಯ (ನೃತ್ಯ) ಮೊಕಲೆಗ್ ಪ್ರಶಸ್ತಿ ತಿಕ್ ದ್ಂಡ್. ಒಡಿಪು ಜಿಲ್ಲೆದ ಜಯರಾಮ ಬನಾನ್ (ವಾಣಿಜ್ಯೋದ್ಯಮ), ಪ್ರಭಾಕರ ಜೋಶಿ (ತಾಳಮದ್ದಳೆ-ಯಕ್ಷಗಾನ), ಗುಡ್ಡ ಪಾಣಾರ (ದೈವನರ್ತಕೆರ್), ಎಂ.ಎ ನಾಯಕ್ (ಯಕ್ಷಗಾನ) ಮೊಕ್ಲೆಗ್ ಪ್ರಶಸ್ತಿ ಘೋಷಣೆ ಆತ್ಂಡ್.

ತುಳುನಾಡ್ ದ ರಾಜಬೂಡುಡು ತುಳು ಲಿಪಿ ಪಲವೆ ಉದಿಪನ ಮಲ್ತಿನ “ಬಾರ್ಕೂರ್ದ ಭೀಷ್ಮೆ” ಶಾಂತಾರಾಮ ಶೆಟ್ರ್

ಬಾರ್ಕೂರು : ಪಿರಾಕ್ ದ್ ತುಳುನಾಡ್ ದ ರಾಜಬೂಡು ಆಯಿನ ಬಾರ್ಕೂರುದ ಸೀಮೆ ದೇವೆರಾಯಿನ ಬಾರ್ಕೂರು ಮಹತೋಭಾರ ಶ್ರೀ ಪಂಚಲಿಂಗೇಶ್ವರ ದೇವೆರ್ನ ದೇವಲ್ಯಡ್ ತುಳು ಲಿಪಿತ್ತ ಪಲವೆದ ಉದಿಪನ ಮಲ್ಪುನ ಮುಕೇನ ತುಳು ಬಾಸೆ ಸಂಸ್ಕೃತಿ ಆಚಾರ ವಿಚಾರೊಲೆನ್ ಒರಿಪುನ ಕಜ್ಜೊಗು ಕಂಬುಲ ಕ್ಷೇತ್ರದ ಸಾಧಕೆರ್ ಬಾರ್ಕೂರು ಗ್ರಾಮ ಪಂಚಾಯಿತಿ ಅಧ್ಯಕ್ಷೆರ್ “ಬಾರ್ಕೂರ್ದ ಭೀಷ್ಮೆ” ಪುಗರ್ತೆದ ಶಾಂತಾರಾಮ್ ಶೆಟ್ರ್ ಚಾಲನೆ ಕೊರಿಯೆರ್.

ಜೈ ತುಳುನಾಡ್ (ರಿ) ಕೂಟದ ಮುತಾಲಿಕೆಡ್ ದೇವಲ್ಯದ ಜಾಲ್ ಡ್ ಐತಾರ ತುಳು ಲಿಪಿ ಪಲವೆ ಪಾಡುನ ಲೇಸ್ ಅಂಚೆನೆ “ಅಲ್ಲಿಗೆ” ಪುದರ್ ದ ತುಳು ಲಿಪಿ ಫಾಂಟ್ ಬುಡುಗಡೆ ಲೇಸ್ ನಡತ್ಂಡ್. ಪಂಚಲಿಂಗೇಶ್ವರ ದೇವೆರ್ನ ಎದುರು ಪ್ರಾರ್ಥನೆ ಮಲ್ತಿ ಬೊಕ್ಕ ತುಳು ಲಿಪಿತ್ತ ಪಲವೆ ಉದಿಪನದ ಕಜ್ಜ ನಡತ್ಂಡ್. ಅಯಿರ್ದ್ ಬೊಕ್ಕ ನಡತಿನ ಸಭಾ ಕಾರ್ಯಕ್ರಮೊಡು ಪಾತೆರಿನ ಶಾಂತಾರಾಮ ಶೆಟ್ರ್, ಬಾರ್ಕೂರು ತುಳುನಾಡ್ ದ ರಾಜಧಾನಿ ಪಂದ್ ಒತ್ತೊನಿಯರೆ ಕುಸಿ ಆಪುಂಡು. ಈ ಮುಕೇನ “ತುಳುವ ಸೀಮೆದ ದೇವೆರ್” ಪನ್ಪಿನ ಪುಗರ್ತೆದ ಪಂಚಲಿಂಗೇಶ್ವರ ದೇವಸ್ಥಾನ ಅಂಚೆನೆ ಬಾರ್ಕೂರುದ ಸಮಗ್ರ ಅಭಿವೃದ್ಧಿ ಮಲ್ಪರೆ ಬೋಡಾದ್ ಸರ್ಕಾರದ ಗಮನೊಗು ಕನವರೆ ಇಂಚಿನ ಲೇಸ್ ರ್ದ್ ಮಸ್ತ್ ಅನುಕೂಲ ಆಪುಂಡು ಪಂಡೆರ್.

ಬಾರ್ಕೂರುದಕುಲು ಕುಂದ ಕನ್ನಡ ಪಾತೆರಿಯೆರ್ಡಲ ಎಚ್ಚಿನಕ್ಲೆಗ್ ತುಳು ಬರ್ಪುಂಡು. ಅಯಿಕ್ಕ್ ಮಲ್ಲ ಕಾರಣ ಪಂಡ ನಮ್ಮ ಕಂಬುಲ ಬೊಕ್ಕ ಕಂಬುಲದ ಎರ್ಲು ಪಂದ್ ಆರ್ ತೆರಿಪಾಯೆರ್. ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಸಂಪೊಲಿಗೆದಾರ್ ಶಶಿ ಬಂಡಿಮಾರ್ ಪಾತೆರ್ದ್, ಬಾರ್ಕೂರುಡು ತುಳುನಾಡ್ ದ ಐತಿಹಾಸಿಕ ಸೊತ್ತುಲು, ಮಾಮಲ್ಲ ಶಾಸನೊಲು ತೂವರೆ ತಿಕ್ಕುಂಡು. ಈ ಊರುದ ಮೂಲೆ ಮೂಲೆ ಒಕ್ಕೊಂದು ಪೋಂಡ ಪೊಸ ಪೊಸ ಇತಿಹಾಸ ತೋಜಿದ್ ಬರ್ಪುಂಡು. ಅವೆನ್ ರಕ್ಷಣೆ ಮಲ್ತ್ ದ್ ಅಭಿವೃದ್ಧಿ ಮಲ್ತ್ ದ್ ತುಳುನಾಡ್ ದ ಇತಿಹಾಸ ಒರಿಪುಗ ಪಂದ್ ಬಿನ್ನಾಪು ಮಲ್ತೆರ್.

ಬಾರ್ಕೂರು ಶ್ರೀ ಪಂಚಲಿಂಗೇಶ್ವರ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಮಂಜುನಾಥ ರಾವ್ ಪಾತೆರ್ದ್, ಕುಡ್ಲರ್ದ್ ಬತ್ತಿನ ತುಳುವೆರ್ ಮೂಲು ತುಳು ಸೇವೆದ ಬಿತ್ತ್ ಪಾಡ್ದೆರ್. ಅವೆನ್ ಬುಲೆಪಾವುನ ಜಬದಾರಿ ನಮ್ಮ ಬಾರ್ಕೂರುದ ಜನಕ್ಲೆಗ್ ಉಂಡು ಪಂಡೆರ್. ಈ ಪೊರ್ತುಡು ಸಾಫ್ಟ್ ವೇರ್ ತಂತ್ರಜ್ಞೆರ್ ಪ್ರಹ್ಲಾದ್ ಪ್ರಸಾದ್ ತಂತ್ರಿ ಮೇರ್ ತಯಾರ್ ಮಲ್ದಿನ ಅಲ್ಲಿಗೆ ಪನ್ಪಿನ ತುಳು ಲಿಪಿ ಫಾಂಟ್ ನ್ ಬಿನ್ನೆರ್ ಬುಡುಗಡೆ ಮಲ್ತೆರ್. ಈ ಪೊರ್ತುಡು ಪಾತೆರಿನ ಪ್ರಹ್ಲಾದ ತಂತ್ರಿಲು, ಇಲ್ಲದ ಪ್ರತಿ ಲೇಸ್ ಗ್ ಲ ತುಳು ಲಿಪಿಟ್ಟ್ ಪುದರ್ ಪಾಡ್ಲೆ. ಅಂಚೆನೆ ರಾಜಕೀಯ ನಾಯಕೆರ್ ತುಳು ರಾಜ್ಯ ಬಾಸೆ ಮಲ್ಪರೆ ಪ್ರಯತ್ನ ಮಲ್ಪುಲೆ ಪಂಡೆರ್.

ಕುಡೊರಿ ತಂತ್ರಜ್ಞೆ ರ್ ಸುಮಂತ್ ಪೂಜಾರಿ ಹೆಬ್ರಿ ಪಾತೆರ್ದ್ ಪ್ರಹ್ಲಾದ್ ತಂತ್ರಿಲು ಬರವು, ಮಂದಾರ, ಅಲ್ಲಿಗೆ, ಪಳಂತುಳು, ಬಾರಗ ಇಂಚಿನ ಕೆಲವು ಫಾಂಟ್ ಲೆನ್ ಅಭಿವೃದ್ಧಿ ಮಲ್ದೆರ್. ಅಲ್ಲಿಗೆ ಪಂಡ ಒಂಜಿ ಪೂ, ನೈದಿಲೆ ಪಂಡ್ ದ್ ಪನ್ಪೆರ್. ಆ ಪುದರ್ ತುಳು ಲಿಪಿ ತುಳುನಾಡ್ ಇಡೀಕ ಸಿಂಗಾರ ಆವಡ್ ಪಂದ್ ತೆರಿಪಾಯೆರ್. ಜೈ ತುಳುನಾಡ್ ದ ಒತ್ತು ಗುರ್ಕಾರ್ಲು ವಿಶುಶ್ರೀ ಕೇರ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಈ ಪೊರ್ತುಡು ತುಳು ಲಿಪಿ ಕಲ್ಪಾದಿನಕ್ಲೆಗ್ ಆಜೋಲೆ ಪಟ್ಟುನ ಲೇಸ್ ನಡತ್ಂಡ್. ರಾಜೇಶ್ ತುಳುವೆ ಉಂದೆನ್ ನಡಪಾದ್ ಕೊರಿಯೆರ್. ಅಂಜಲಿ ಬೆಳ್ಮಣ್ ಪ್ರಾರ್ಥನೆ ಮಲ್ತೆರ್. ರಕ್ಷಿತ್ ರಾಜ್ ಬಿನ್ನೆರೆನ್ ಎದ್ಕೊಂಡೆರ್. ಅವಿನಾಶ್ ಮುಕ್ಕ ಪ್ರಾಸ್ತಾವಿಕ ಮದಿಪು ಕೊರಿಯೆರ್. ಸುಷ್ಮಾ ದೇವಾಡಿಗ ಉದ್ಯಾರ ಲೇಸ್ ಸುಧಾರಿಕೆ ಮಲ್ತೆರ್. ಶರತ್ ಕೊಡವೂರು ಸೊಲ್ಮೆ ಸಂದೈತ ಮಲ್ತೆರ್.
(ಬಾಕ್ಸ್)
*ತುಳುಕ್ಕು ರಾಜ್ಯ ಬಾಸೆದ ಮಾನಾದಿಗೆ ಕೊರ್ಪಾವುನ ಬೇಲೆ ಸರ್ಕಾರ ಮಲ್ತೊಂದುಂಡು: ಡಾ. ಆಕಾಶ್ ರಾಜ್ ಜೈನ್*
###
ಬಾರ್ಕೂರು : ರಾಜ್ಯ ಸರಕಾರ ತುಳುನು ಬೇಗೊಡೆ ಅಧಿಕೃತ ಬಾಸೆ ಮಲ್ಪರೆ ಪ್ರಯತ್ನ ಬರೊಂದುಂಡು. ಉಂದು ತುಳುವೆರೆಗ್ ಭಾರಿ ಕುಸಿತ್ತ ವಿಚಾರ ಪಂದ್ ಅಳುಪ ವಂಶಸ್ಥೆರ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರಾಯಿನ ಡಾ.ಆಕಾಶ್ ರಾಜ್ ಜೈನ್ ಪಂಡೆರ್.
ತುಳು ಬೊಕ್ಕ ಕುಂದ ಕನ್ನಡದ ಒಡನಾಟ ಅನಾದಿಕಾಲೊಡ್ದಿಂಚಿಲ ಭಾರಿ ಸಾಮರಸ್ಯೊಡು ಇತ್ತಿನವು. ಕುಂದ ಕನ್ನಡೊಡ್ಲ ತುಳು ಸಂಸ್ಕೃತಿ ಸೇರ್ದುಂಡು.ದೈವಾರಾಧನೆ ಪದ್ಧತಿಡ್ ಲ ಸಾಮ್ಯತೆ ಉಂಡು ಪಂದ್ ಪಂಡೆರ್.
ನಮ್ಮ ರಾಜ್ಯೊಡು 143 ತಮಿಳು ಶಾಲೆಲು ಉಂಡು, 162 ತೆಲುಗು ಶಾಲೆಲು,4 ಸಾರ ಉರ್ದು ಶಾಲೆಲು, 2
ಮಲಯಾಳಂ ಶಾಲೆಲು ಉಂಡು. ಆಂಡ ಒಂಜೇ ಒಂಜಿ ತುಳು ಮಾಧ್ಯಮ ಶಾಲೆ ಇಜ್ಜಿ ಪಂದ್ ಆರ್ ತೆರಿಪಾಯೆರ್. ಕರ್ನಾಟಕದ ಪ್ರಥಮ ಶಾಸನ ಹಲ್ಮಿಡ್ ಡ್ ಇಪ್ಪುನೇ ತುಳುತ್ತ ಇಚಾರ. ಶಾಸನಡ್ 10 ಶತಮಾನ ಬಂಕಿ ಶಾಸನಡ್ ತುಳು ಪನ್ಪಿನ ಶಬ್ದ ಉಂಡು. ತುಳು ಲಿಪಿಟ್ಟ್ ಏತೋ ಮಹಾ ಕಾವ್ಯಲು ಉಂಡು. ದುರಂತ ಪಂಡ ಬ್ರಿಟಿಷೆರ್ನ ದಾಳಿ ಇಂಚಿನ ಮಾತಾ ಸಮಸ್ಯೆಡ್ ತುಳು ಲಿಪಿ, ಸಂಸ್ಕೃತಿ ಅಡಿಕ್ಕ್ ಬೂರ್ದು ನಾಶ ಆತ್ಂಡ್. ಅವೆನ್ ಮಿತ್ತ್ ಕನಪಿನ ಬೇಲೆ ಆವೊಡು ಪಂಡೆರ್. ರಾಜ್ಯೊಗು ರಾಜಸ್ವ ಕೊರ್ಪಿನೆಟ್ಟ್ ತುಳುನಾಡ್ ರಡ್ಡನೇ ತಾನೊಡು ಉಂಡು. ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನೊಡು ಅತಿ ಎಚ್ಚ ಆದಾಯ ಸರ್ಕಾರೊಗು ತಿಕ್ಕುಂಡು ಪಂಡೆರ್.

ಸುಬ್ರಹ್ಮಣ್ಯದ ಎಸ್ ಎಸ್ ಪಿಯು ಕಾಲೇಜ್ ದ ಬೊಳ್ಳಿ ಪರ್ಬ ಜಾವಡಿಡ್ ” ಚಿದಗ್ನಿ” ಕಾದಂಬರಿ ಬುಡುಗಡೆ

ಸುಬ್ರಹ್ಮಣ್ಯ: ಪುಸ್ತಕೊಲೆನ್ ಓದುನೆರ್ದ್ ಜ್ಞಾನ ಬೊಕ್ಕ ಮಾನಸಿಕ ಸಂತೋಷ ತಿಕ್ಕುಂಡು. ವಿದ್ಯಾರ್ಥಿಲು ಸಾಹಿತ್ಯಾಸಕ್ತಿ ಬುಲೆಪುಲೆಕ್ಕ ಮಲ್ಪೊಡು. ನೇರ್ದ್ ಓದುನ ಬೊಕ್ಕ ಜ್ಞಾನಾರ್ಜನೆದ ಹವ್ಯಾಸ ಆಪುಂಡು ಪಂದ್ ಕನ್ನಡದ ಹಿರಿಯ ವಿದ್ವಾಂಸೆರ್ ಲಕ್ಷ್ಮೀಶ ತೋಳ್ಳಾಡಿ ಪಂಡೆರ್.

ಸುಬ್ರಹ್ಮಣ್ಯದ ಶ್ರೀ ಸುಬ್ರಹ್ಮಣೇಶ್ವರ ಪದವಿಪೂರ್ವ ಕಾಲೇಜ್, ಜೇಸಿಐ ಸುಬ್ರಹ್ಮಣ್ಯ ಕುಕ್ಕೆ ಪ್ರೀವರೋಟರಿ ಕ್ಲಬ್ ಸುಬ್ರಹ್ಮಣ್ಯ ನೆತ್ತ ಆಶ್ರಯಡ್ ಸುಬ್ರಹ್ಮಣ್ಯದ ಎಸ್ ಎಸ್ ಪಿಯು ಕಾಲೇಜ್ ಡ್ ಬೊಳ್ಳಿಪರ್ಬದ ಜಾವಡಿಡ್ ಶನಿವಾರ ನಡತಿನ ಲೇಸ್ ಡ್ ಡಾ.ಪ್ರಭಾಕರ ಶಿಶಿಲ ಮೆರೆನ ಕಾದಂಬರಿ “ಚಿದಗ್ನಿ” ಉದಿಪನ ಮಲ್ತ್ ದ್ ಪಾತೆರಿಯೆರ್. ಸಾಹಿತ್ಯ ಜೀವನದ ಆದ್ ಪೋಪುನೆನ್ ಬೊಕ್ಕ ಅನುಭವವನ್ ತೂಪಾವುನ ಮಾದ್ಯಮ. ಅನುಭವರ್ದ್ ಬೇತೆಕಲೆಗ್ ಪ್ರಯೋಜನ ಆಪುಂಡು. ಸಾಹಿತ್ಯ ಕ್ಷೇತ್ರ ಬೊಕ್ಕ ಬೂಕುಲು ನಮ್ಮ ಬದ್ ಕ್ ದ ತಾದಿಗ್ ಬೊಲ್ಪಾಪುಂಡು. ಆಯಿರ್ದಾವೆರ ಬೂಕುಲೆನ್ ಹೆಚ್ಚ ಹೆಚ್ಚ ಓದುನ ಎಡ್ಡೆ. ಬೂಕುಲು ಏಪಲ ಸಂಪತ್ತ್ ಲು. ಆಯಿನ್ ಶೇಖರಣೆ ಮಲ್ಪುನವು ನಮ್ಮ ದಿನಚರಿ ಆವೊಡು ಪಂದ್ ಪಂಡೆರ್. ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ ಈ ಲೇಸ್ ದ ಅಧ್ಯಕ್ಷೆರಾದ್ ಇತ್ತೆರ್. ಸಾಹಿತಿ ಡಾ.ಪ್ರಭಾಕರ ಶಿಶಿಲ, ಕಾಲೇಜ್ ದ ಪ್ರಾಚಾರ್ಯ ಸೋಮಶೇಖರ ನಾಯಕ್, ಜೇಸಿಐ ಸುಬ್ರಹ್ಮಣ್ಯ ಕುಕ್ಕೆಶ್ರೀದ ಅಧ್ಯಕ್ಷೆರ್ ದೀಪಕ್ ನಂಬಿಯಾರ್, ರೋಟರಿ ಕ್ಲಬ್‌ ಅಧ್ಯಕ್ಷೆರ್ ಗೋಪಾಲ್ ಎಣ್ಣೆಮಜಲು, ಕಾರ್ಯದರ್ಶಿ ರವಿ ಕಕ್ಕೆಪದವು, ಉಪನ್ಯಾಸಕಿ ಆಯಿನ ಜಯಶ್ರೀ ವಿ.ದಂಬೆಕೋಡಿ, ರೇಖಾರಾಣಿ ಸೋಮಶೇಖರ್ ಇತ್ತೆರ್. ಈ ಪೊರ್ತುಡು ಸಾಹಿತಿ ಡಾ.ಪ್ರಭಾಕರ ಶಿಶಿಲ ಮೇರೆಗ್ ತಮ್ಮನ ಮಲ್ತೆರ್.
ವರದಿ:ಗೋಪಿಚಂದನ್ ಕೆ.ಎಸ್