ಬೆಂಗ್ಲೂರ್ : ಕಾಂತಾರ ಪಿಕ್ಚರ್ ಇತ್ತೆ ಪ್ಯಾನ್ ಇಂಡಿಯಾ ಮಟ್ಟಡ್ ಯಶಸ್ವಿ ಆತ್ಂಡ್. ರಿಷಭ್ ಶೆಟ್ರ್ ನಟನೆ ಮಲ್ತ್ ದ್ ನಿರ್ದೇಶನ ಮಲ್ತಿನ ಕಾಂತಾರ ಪಿಕ್ಚರ್ ಇಡೀ ದೇಶಡ್ ಮಮಸ್ತ್ ಜನತ ಮೆಚ್ಚುಗೆಗ್ ಪಾತ್ರ ಆತ್ಂಡ್.
ನ.11ಕ್ ಬೆಂಗ್ಲೂರ್ ಗ್ ಬರ್ಪುನ ಪ್ರಧಾನಿ ನರೇಂದ್ರ ಮೋದಿ, ನಟೆ ರಿಷಭ್ ಶೆಟ್ರೆನ ಒಟ್ಟಿಗೆ ಕಾಂತಾರ ಪಿಕ್ಚರ್ ತೂಯರೆ ಉಲ್ಲೆರ್ ಪಂದ್ ಸಾಮಾಜಿಕ ಮಾಧ್ಯಮಡ್ ಸುದ್ದಿ ಒಂಜಿ ಆವೊಂದು ಉಂಡು.
ತುಳುನಾಡ್ ದ ದೈವಾರಾಧನೆನ್ ಜಗತ್ತ್ ಗ್ ತೆರಿಪಾಯಿನ, ನಟೆ ನಿರ್ದೇಶಕೆರ್ ರಿಷಬ್ ಶೆಟ್ರ್ ನ ಕಾಂತಾರ ಪಿಕ್ಚರ್ ರಾಜ್ಯ, ದೇಶ ಮಾತ್ರ ಅತ್ತಂದೆ ವಿದೇಶಡ್ಲಾ ಇಪ್ಪುನವು ಕನ್ನಡಿಗೆರೆಗ್ ಪೆರ್ಮೆದ ವಿಚಾರ. ಈ ನಡುಟ್ಟು ನಟೆ ಚೇತನ್ ತುಳುನಾಡ್ ದ ದೈವಾರಾಧನೆ ಹಿಂದೂ ಸಂಸ್ಕೃತಿದ ಮೂಲನೇ ಅತ್ತ್. ಹಿಂದೂ ಧರ್ಮಗ್ಲಾ ತುಳುನಾಡ್ ದ ದೈವಾರಾಧನೆಗ್ಲಾ ಒವ್ವೇ ಸಂಬಂಧ ಇಜ್ಜಿ ಪನ್ಪುನ ಹೇಳಿಕೆನ್ ಕೊರ್ತೆರ್.
ಈ ಹೇಳಿಕೆಗ್ ಪ್ರತಿಕ್ರಿಯೆ ಕೊರ್ನ ಮುಲ್ಕಿ-ಬೆದ್ರದ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಉಮಾನಾಥ್ ಕೋಟ್ಯಾನ್, ನಟೆ ಚೇತನ್ ಹಿಂದೂ ಪನ್ಪುನವೇ ಎಂಕ್ ಸಂಶಯ, ಅರೆನ್ ಒರ ಆಸ್ಪತ್ರೆಗ್ ಲೆತೊಂದು ಪೋದು ಚಿಕಿತ್ಸೆ ಕೊರೊಡು. ಮಾನಸಿಕ ಅಸ್ವಸ್ಥೆರ್ ಲೆಕ ಪಾತೆರೊಂದು ಉಲ್ಲೆರ್. ಇಂಚಿನ ನಟೆರೆನ್ ಸಮಾಜ ಬಹಿಷ್ಕಾರ ಮಲ್ಪೊಡು ಪಂದ್ ಪಂಡೆರ್.
ಖಾಸಗಿ ಸುದ್ದಿವಾಹಿನಿಡ್ ಪಾತೆರ್ದ್, ಶಾಸಕೆರ್ ದೈವಾರಾಧನೆಗ್ ಆಯಿನವೇ ಆಯಿನ ನಂಬಿಕೆ ಉಂಡು. ತುಳುನಾಡ್ ಡ್ ದೈವಾರಾಧನೆ ನಾಗಾರಾಧನೆ ಪವಿತ್ರ ಬೊಕ್ಕ ಶ್ರೇಷ್ಠ ಆಯಿನವ್. ಎಡಪಂಥೀಯೆರ್ಲಾ ಅಕುಲೆಗ್ ಕಷ್ಟ ಬನ್ನಗ ದೈವಲು ಬೊಕ್ಕ ನಾಗದೇವೆರೆಡ ನಟ್ಟೊನುವೆರ್. ಅಂಚ ಇಪ್ಪುನಗ ಈ ನಟೆ ಚೇತನ್ ವಾ ಲೆಕ್ಕಗ್ಲಾ ಅತ್ತ್. ಇಂಚಿನಕುಲೆನ್ ಬಹಿಷ್ಕಾರ ಮಲ್ಪೊಡು ಪಂದ್ ಪಂಡೆರ್.
ಒಡಿಪು: ವಿಶ್ವದ ಮಾಮಲ್ಲ ಇಮಾನ ಎ380 ನ್ ಯಶಸ್ವಿಯಾದ್ ಬೆಂಗ್ಲೂರ್ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಡ್ ಲ್ಯಾಂಡಿಂಗ್ ಮಲ್ತಿನ ಸಂದೀಪ್ ಪ್ರಭು ಒಡಿಪು ಜಿಲ್ಲೆದಾರ್. ಅಕ್ಟೋಬರ್ 14ಕ್ಕ್ ದುಬೈರ್ದ್ ಪಿದಾಡ್ದ್ ಬೆಂಗ್ಲೂರ್ ವಿಮಾನ ನಿಲ್ದಾಣಡ್ ಲ್ಯಾಂಡಿಂಗ್ ಮಲ್ತ್ದೆರ್. ಆತೆ ಅತ್ತಂದೆ ಪೈಲೆಟ್ ಅನೌನ್ಸ್ಮೆಂಟ್ಲ ಕನ್ನಡಡೇ ಮಲ್ತ್ದೆರ್.
ಅಲೆವೂರುದ ಆರತಿ ಪ್ರಭು ಬೊಕ್ಕ ಶಿವರಾಯ ಪ್ರಭು ದಂಪತಿಲೆನ 2ನೇ ಮಗೆ ಸಂದೀಪ್ ಕರಿನ 15 ವರ್ಷರ್ದ್ ಪೈಲೆಟ್ ಆದ್ ಬೇಲೆ ಮಲ್ತೊಂದಿತ್ತೆರ್. ಫಿಲಿಫೈನ್ಸ್ ದೇಶಡ್ ಪೈಲೆಟ್ ತರಬೇತಿನ್ ಪಡೆದ್, ಫ್ರಾನ್ಸ್ಡ್ ಎಡ್ಡೆ ರೀತಿದ ಕೋರ್ಸ್ನ್ ಮಲ್ತ್ದೆರ್. ಆಯಿಬೊಕ್ಕ ದುಬೈ ಎಮಿರೇಟ್ಸ್ ವಿಮಾನ ಸಂಸ್ಥೆಡ್ ಬೇಲೆಗ್ ಸೇರ್ದಿತ್ತೆರ್. ಈ ಪಿರವು ಬೊಂಬಾಯಿ ವಿಮಾನ ನಿಲ್ದಾಣಡ್ ಉಂದುವೇ ವಿಮಾನನ್ ಯಶಸ್ವಿಯಾದ್ ಲ್ಯಾಂಡಿಂಗ್ ಮಲ್ತ್ದಿತ್ತೆರ್.
ಬೆಂಗ್ಲೂರ್: ರಿಷಬ್ ಶೆಟ್ಟಿ ನಿರ್ದೇಶನದ ಕಾಂತಾರ ಪಿಕ್ಚರ್ ಮಾತ ತಿಕ್ಕ್ ಡ್ಲ ಎಡ್ಡೆ ಪ್ರದರ್ಶನ ಕೊರೊಂದು ಉಂಡು.
ಅವ್ವತ್ತಂದೆ ಈ ಪಿಕ್ಚರ್ ಡ್ ಇಪ್ಪುನ ಭೂತ ಕೋಲ, ತುಳುನಾಡ ದೈವೊಲೆನ ಆರಾಧನೆ, ಪಿಚ್ಚರ್ ಗೆಂದಿಯೆರೆ ಕಾರಣ ಆತ್ಂಡ್. ಈ ಬಗೆಟ್ ಸುತ್ತಲ ಚರ್ಚೆ,ವಿಮರ್ಶೆಲು ನಡತೊಂದು ಉಂಡು. ಅಂಚನೆ ಭೂತಕೋಲ ಹಿಂದೂ ಸಂಸ್ಕೃತಿ ಪಂದ್ ನಿರ್ದೇಶಕೆರ್ ರಿಷಬ್ ಶೆಟ್ರ್ ನ ಪಾತೆರಗ್, ನಟೆ ಚೇತನ್ ಕುಮಾರ್ ಅರೆನ ಪಾತೆರ ಸುಳ್ಳು, ಭೂತಾರಾಧನೆ ನಮ್ಮ ಪಂಬದ, ನಲಿಕೆ, ಪರವರೆನ ಸಂಪ್ರದಾಯ ಅವು. ಮೂಲ ನಿವಾಸಿ ಸಂಸ್ಕೃತಿಲೆನ್ ಪರದೆ ಮಿತ್ತ್ ಬೊಕ್ಕ ಪಿದಯಿ ಸತ್ಯದೊಟ್ಟಿಗೆ ಪ್ರದರ್ಶನ ಮಲ್ಪೊಡು ಪಂದ್ ಟ್ವೀಟ್ ಡ್ ಪನ್ತೆರ್. ಈ ಪಾತೆರ ಇತ್ತೆ ಭಾರಿ ವಿವಾದೊಗು ಕಾರಣ ಆತ್ಂಡ್
ಬೊಲ್ತೇರ್ : ಅ.25ದಾನಿ ಸೂರ್ಯಗ್ರಾಣದ ಲೆಕ್ಕೊಡು ಶ್ರೀ ಕ್ಷೇತ್ರ ಧರ್ಮಸ್ಥಳ ಮಂಜುನಾಥ ಸ್ವಾಮಿ ದೇವಲ್ಯಡ್ ಭಕ್ತರೆಗ್ ದೇವೆರೆನ ದರ್ಶನಗ್ ಅವಕಾಶ ಇಜ್ಜಿ ಪಂದ್ ದೇವಲ್ಯದ ಆಡಳಿತ ಮಂಡಳಿ ಪ್ರಕಟನೆಡ್ ತೆರಿಪಾದ್ಂಡ್.
ಆನಿ ಮಧ್ಯಾಹ್ನ 2.30 ರ್ದ್ ರಾತ್ರೆ 7.30 ಮುಟ್ಟ ದೇವೆರೆನ ದರ್ಶನಗ್ ಅವಕಾಶ ಇಜ್ಜಿ. ಅಂಚನೆ ವನಸ್, ಪ್ರಸಾದ ಮಧ್ಯಾಹ್ನ 2.30 ಕ್ ಮುಗಿದ್ ರಾತ್ರೆ 7.30 ರ್ದು ಬೊಕ್ಕ ಉಪ್ಪುಂಡು.
ಅ.25 ದಾನಿ ಬಯ್ಯಗ್ 5.11ಕ್ ಗ್ರಾಣ ಸುರು ಆದ್, ಬಯ್ಯಗ್ 6.28ಕ್ ಮುಗಿಪುಂಡು. ಅ. 26ಕ್ ಏಪಲದಲೆಕ್ಕನೆ ದೇವೆರೆನ ದರ್ಶನಗ್ ಅವಕಾಶ ಉಂಡು.
ಹಾವೇರಿ: ಇಡೀ ದೇಶಡ್ ಇತ್ತೆ ಕಾಂತಾರ ಪಿಕ್ಚರ್ ತೂದು ತುಳುನಾಡ ದೈವೊಲೆನ ಶಕ್ತಿ ಬೊಕ್ಕ ಜನಕುಲೆನ ನಂಬಿಕೆದ ಬಗೆಟ್ ಚರ್ಚೆ ಆವೊಂದು ಉಂಡು. ಅವ್ವತ್ತಂದೆ ತುಳುನಾಡ್ ದ ಜನಕುಲೆಗ್ ದೈವದ ಮಿತ್ತ್ ಇಪ್ಪುನ ನಂಬಿಕೆ ಇತ್ತೆ ಉತ್ತರ ಕರ್ನಾಟಕ ಭಾಗಡ್ಲಾ ಉಂಡು. ಮೊಕುಲು ಇತ್ತೆ ದೈವೊಲೆನ್ ನಂಬೊಂದು ಇಪ್ಪುನ ಒಂಜಿ ಘಟನೆ ಹಾವೇರಿ ಜಿಲ್ಲೆದ ಕೇರಿಮತ್ತಿ ಹಳ್ಳಿದ ಫಕ್ಕಿರೇಶ ಮರಿಯಣ್ಣ ನಲ್ಪ ನಡತ್ಂಡ್ .
ಮೇರ್ನ ಕಂಡೊಡು ಕೊರಗಜ್ಜನ ಎಲ್ಯ ದೇವಲ್ಯ ನಿರ್ಮಾಣ ಆತ್ಂಡ್. ಇಡೆಗ್ ಬೆಳಗಾವಿ, ದಾವಣಗೆರೆ, ಬಳ್ಳಾರಿ, ಹುಬ್ಬಳ್ಳಿ, ಧಾರವಾಡ ಜಿಲ್ಲೆಲೆರ್ದ್ ಭಕ್ತೆರ್ ಬತ್ತ್ ದ್ ಕೊರಗಜ್ಜನ ಸೇವೆ ಮಲ್ತೊಂದು ಉಲ್ಲೆರ್. ಕುಡ್ಲದ ಕುತ್ತಾರ್ ಡ್ ಇಪ್ಪುನ ಕೊರಗಜ್ಜಗ್ಲಾ ಕೇರಿಮತ್ತಿಹಳ್ಳಿ ಗ್ರಾಮಗ್ಲಾ ಸುಮಾರ್ 40 ವರ್ಷದ ಪಿರವುದ ನಂಟ್ ಉಂಡು. ಕೇರಿಮತ್ತಿಹಳ್ಳಿ ಗ್ರಾಮದ ಬಾಲಮ್ಮ ಪನ್ಪುನ ಅಜ್ಜಿ ಕುತ್ತಾರ್ ಗ್ ಬತ್ತ್ ದ್ ಕೊರಗಜ್ಜನ ಸೇವೆ ಮಲ್ತೊಂದು ಇತ್ತಿನ ಮೇರ್ ಇತ್ತೆ ದೇವೆರೆಪಾದ ಸೇರ್ದೆರ್. ಇತ್ತೆ ಮೇರೆನ ಪುಲ್ಲಿ ಫಕ್ಕಿರೇಶ ಮರಿಯಣ್ಣನ ಕನಟ್ ಕೊರಗಜ್ಜ ತೋಜಿದ್ ಆರ್ ಪಂಡಿಲೆಕ್ಕನೇ ಪ್ರತಿಷ್ಠಾಪನೆ ಮಲ್ತ್ ದ್ ನಂಬೊಂದು ಉಲ್ಲೆರ್. ಈ ದೇವಲ್ಯದ ಜೀರ್ಣೋದ್ದಾರದ ಪೊರ್ತುಡು ತುಳುನಾಡ್ ದ ರಘು ಅಜ್ಜೆರ್ ಬತ್ ದ್ ಕೋಲ ಸೇವೆ ಮಲ್ತ್ ದೆರ್ ಪಂದ್ ಮಾಹಿತಿ ಉಂಡು.
ಇಂಚೊಗು ಮೈಸೂರುದ ಭಕ್ತೆರ್ ಲ ಕೊರಗಜ್ಜನ್ ನಂಬುದೆರ್ ಪಂದ್ ತೆರಿದ್ ಬೈದ್ಂಡ್.
ಬೊಲ್ತೇರ್: ಗಿರಿಜಾ ಮೆರೆನ ಇಲ್ಲ್ ದ ಮಿತ್ತ್ ಮರ ಬೂರ್ದು ಇಲ್ಲ್ ಪುರಾ ಲಗಾಡಿ ಪೋಯಿನ ಘಟನೆ ಕೋಡೆ ಬಯ್ಯಗ್ ಲಾಯಿಲ ಗ್ರಾಮದ ಜೋಗಿ ಕಾಲನಿಡ್ ನಡದ್ಂಡ್.
ಇಲ್ಲ್ ಲ್ ಜೋಕುಲು ಸೇರ್ದ್ ಮೂಜಿ ಜನ ಇತ್ತೆರ್. ಪುಣ್ಯಡ್ ನೆರ್ದ್ ಯೆರೆಗ್ಲಾ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್.
ಎಐಸಿಸಿ ಪೊಸ ಅಧ್ಯಕ್ಷೆರಾದ್ ಆಯ್ಕೆಯಾಯಿನ ಮಲ್ಲಿಕಾರ್ಜುನ್ ಖರ್ಗೆ ಇನಿ ಬಯ್ಯ 4 ಗಂಟೆಗ್ ದೆಲ್ಲಿದ ಪಕ್ಷದ ಕೇಂದ್ರ ಕಚೇರಿಡ್ ಸುದ್ದಿಗೋಷ್ಠಿ ಮಲ್ತ್ದ್ ಪಾತೆರಿಯರೆ ಉಲ್ಲೆರ್.
ಈ ನಡುಟ್ಟ್ ಮಾಜಿ ಪ್ರಧಾನಿ ಹೆಚ್ ಡಿ ದೇವೇಗೌಡ, ಸಿಎಂ ಹೆಚ್. ಡಿ ಕುಮಾರಸ್ವಾಮಿ, ಸಿದ್ಧರಾಯಯ್ಯ ಸೇರಿನಂಚನೆ ಮಸ್ತ್ ಬಿನ್ನೆರ್ ಎಡ್ಡೆಪ್ಪುದ ಮಾನಾದಿಗೆ ಮಲ್ಪರೆ ಉಲ್ಲೆರ್.
ಬೆಂಗ್ಲೂರ್: ದೀಪಾವಳಿಗ್ ಕೆಲವು ದಿನ ಬಾಕಿ ಇಪ್ಪುನಗನೇ ಬಂಗಾರ್ ಬೊಕ್ಕ ಬೊಲ್ಲಿದ ಬಿಲೆ ಕಮ್ಮಿ ಆತ್ಂಡ್.
ಒಂಜಿ ಕೆಜಿ ಬೊಲ್ಲಿದ ಬಿಲೆಟ್ಟ್ 3,900 ರೂ. ಅಂಚೆನೆ 22 ಕ್ಯಾರೆಟ್ದ 10 ಗ್ರಾಂ ಬಂಗಾರ್ ದ ಬಿಲೆ 400 ರೂ. ಕಮ್ಮಿ ಆತ್ಂಡ್
22 ಕ್ಯಾರೆಟ್ 10 ಗ್ರಾಂ ಬಂಗಾರ್ ದ ಬಿಲೆ 46,420 ರೂ. ಅಂಚೆನೆ 24 ಕ್ಯಾರೆಟ್ ಬಂಗಾರ್ ದ ಬಿಲೆ 50,640 ರೂ. ಗ್
ಜೈದ್ಂಡ್.
ಒಂಜಿ ಕೆಜಿ ಬೊಲ್ಲಿದ ಬಿಲೆ ಬಿಲೆ 56,600 ರೂ.ಗ್ ಕಮ್ಮಿ ಆತ್ಂಡ್.
ಉಂದುವೇ ಸುರುತ್ತ ಸರ್ತಿ ಬೆಂಗ್ಲೂರ್ಗ್ “ಏರಿಯಲ್ ಲ್ಯಾಡರ್ ಬೈದ್ಂಡ್. ಉಂದು ಮಸ್ತ್ ಎತ್ತರ ಇಪ್ಪುನ ಕಟ್ವಾನೊಡ್ ತೂ ಪೊತ್ತ್ಂಡ ಅವೆನ್ ತೆಕ್ಕಾವುನ ಬೇಲೆನ್ ಈ ಗಾಡಿ ಮಲ್ಪುಂಡು. ಉಂದು 90 ಮೀಟರ್ ಎತ್ತರಗ್ ಪೋದ್ ತೂ ತೆಕ್ಕಾವುಂಡು.
ಎಲ್ಲೆ ಸಿಎಂ ಬೊಮ್ಮಾಯಿ ಬೊಕ್ಕ ಅರಗ ಜ್ಞಾನೇಂದ್ರ, ಅಗ್ನಿಶಾಮಕ ಬೊಕ್ಕ ತುರ್ತ್ ಸೇವೆದ ಇಲಾಖೆಗ್ ಒಪ್ಪಿಸಾಯರೆ ಉಲ್ಲೆರ್. 30 ಕೋಟಿ ಬಿಲೆತ್ತ ಈ ಲ್ಯಾಡರ್ನ್ ಸರ್ಕಾರ ಫಿನ್ಲೆಂಡ್ ದೇಶರ್ದ್ ಕನಪಾದೆರ್.
