ಮೈಸೂರ್: ಎಐಸಿಸಿ ಅಧ್ಯಕ್ಷೆರಾಯಿನ ಸೋನಿಯಾ ಗಾಂಧಿನ ಮಗೆ, ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ,ಭಾರತ್ ಜೋಡೋ ಯಾತ್ರೆದ ಬೊಕ್ಕ ನಾಗರಹೊಳೆ ತಿರ್ಗರೆ ಪೋಯಿನ ಪೊರ್ತುಡು ಪೆಟ್ಟಾತ್ತಿನ ಆನೆದ ಕಿನ್ನಿನ್ ತೂದು ಬೇಜಾರ್ ಡ್, ಅವೆನ್ ರಕ್ಷಣೆ ಮಲ್ಪರೆ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಯಿಯೆರೆಗ್ ಪತ್ರ ಬರೆತೆರ್.
ಆನೆದ ಕಿನ್ನಿದ ಸೊಂಡಿಲ್ ಬೊಕ್ಕ ಬೀಲಗ್ ಪೆಟ್ಟಾತ್ಂಡ್. ನೆತ್ತ ಜೀವ ಒರಿಪೊಡಾಂಡ, ನೆಕ್ ವೈದ್ಯಕೀಯ ಚಿಕಿತ್ಸೆ ಬೋಡು, ಅಂಚಾದ್ ಆಯಿನಾತ್ ಬೇಗ ನೆಕ್ ಚಿಕಿತ್ಸೆ ಕೊರ್ಪಾಲೆ ಪಂದ್ ಮುಖ್ಯಮಂತ್ರಿಲೆಡ ಬಿನ್ನಾಪು ಮಲ್ದೆರ್.
ಲಾಸ್ ಏಂಜಲೀಸ್: ಅಮೆರಿಕದ ಕ್ಯಾಲಿಪೋರ್ನಿಯಾಡ್ ಅ.3 ತಾರೀಕ್ ಗ್ ಕಿಡ್ನ್ಯಾಪ್ ಆಯಿನ 8 ತಿಂಗೊಲ್ದ ಪೊಣ್ಣು ಬಾಲೆ ಸಮೇತ ಸಿಖ್ ಕುಟುಂಬದ ಮಾತ 4 ಜನ ಪುನ ಆದ್ ಪತ್ತೆಯಾತೆರ್ ಪಂದ್ ಅಧಿಕಾರಿಲು ತೆರಿಪಾದೆರ್.
ಪಂಜಾಬ್ದ ಹೋಶಿಯಾರ್ಪುರದ ಹರ್ಸಿ ಪಿಂಡ್ದ ಕುಟುಂಬನ್ ಕ್ಯಾಲಿಪೋರ್ನಿಯಾದ ಮರ್ಸಿಡ್ ಕೌಂಟಿಡ್ ದುಷ್ಕರ್ಮಿಲು ಹತ್ಯೆ ಮಲ್ತ್ದಿತ್ತೆರ್.
36 ವರ್ಷದ ಜಸ್ದೀಪ್ ಸಿಂಗ್, ಅರೆನ ಬೊಡೆದಿ 27 ವರ್ಷದ ಜಸ್ಲೀನ್ ಕೌರ್ ಮೊಕ್ಲೆನ 8 ತಿಂಗೊಲ್ದ ಬಾಲೆ ಆರೋಹಿ ಧೇರಿ ಬೊಕ್ಕ ಬಾಲೆದ ದೊಡ್ಡಪ್ಪ 39 ವರ್ಷದ ಅಮನ್ದೀಪ್ ಸಿಂಗ್ ಮೊಕುಲೆನ ಪುನ ಬುಧಾರದಾನಿ ಪತ್ತೆಯಾತ್ಂಡ್ ಪಂದ್ ಮರ್ಸಿಡ್ ಕೌಂಟಿ ಶೆರಿಫ್ ವೆರ್ನ್ ವಾನ್ಕೇ ತೆರಿಪಾದೆರ್.
ಇಂಡಿಯಾನ ಮಾರ್ಗ ಬೊಕ್ಕ ಹಚಿನ್ಸನ್ ಮಾರ್ಗದ ಕೈತಲ್ ದ ತೋಟಡ್ ಮೊಕ್ಲೆನ ಪುನಕ್ಕುಲು ಪತ್ತೆ ಆತ್ಂಡ್.
ಕುಡ್ಲ: ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ನೆತ್ತ ಮುತಾಲಿಕೆಡ್ ಅಕಾಡೆಮಿದ ಮಾಜಿ ಪದುಕೆರ್, ನಾಟಕಕಾರೆ, ಸಾಹಿತಿ ಬೊಕ್ಕ ಸಮಾಜ ಸೇವಕೆ ದಿವಂಗತ ಎ.ಶಿವಾನಂದ ಕರ್ಕೇರ ಮೆರೆನ ಸಬಿ ನೆಂಪು ಲೇಸ್ ಅ.7 ಸುಕ್ರವಾರ ಬೊಲ್ಪುಗು 10 ಗಂಟೆಗ್ ಸಿರಿ ಚಾವಡಿ ತುಳು ಭವನದ ಸಿರಿ ಚಾವಡಿಡ್ ನಡಪರೆ ಉಂಡು.
ಈ ಲೇಸ್ ನ್ ಪ್ರಪುಲ್ಲ ಶಿವಾನಂದ ಕರ್ಕೇರ ಉದಿಪನ ಮಲ್ಪರೆ ಉಲ್ಲೆರ್.
ಅಂಚನೆ ಅಕಾಡೆಮಿದ ಮಾಜಿ ಪದುಕೆರ್ ವಿ.ಜಿ .ಪಾಲ್ ಸಬಿನೆಂಪುದ ಪಾತೆರ ಪಾತೆರಿಯೆರೆ ಉಲ್ಲೆರ್. ಬೊಕ್ಕ ಕುಡ್ಲ ಮಹಾನಗರ ಪಾಲಿಕೆದ ಮೇಯರ್ ಜಯಾನಂದ ಅಂಚನ್ ಸಾಧಕೆರೆಗ್ ಮಾನಾದಿಗೆ ಮಲ್ಪುವೆರ್. ಜನಪದ ಸಿರಿ ಸಿಂಗಾರ ಅಲಂಕಾರ ಕಲಾವಿದೆ ಆನಂದ ಬಂಗೇರ ಅರ್ಕುಳ ಮೇರೆಗ್ ಸಬಿನೆಂಪು ಮಾನಾದಿಗೆ ನಡಪರೆ ಉಂಡು. ಮಲ್ಲ ಬಿನ್ನೆರಾದ್ ಮುಜರಾಯಿ ಇಲಾಖೆದ ಗುರುಪ್ರಸಾದ್ ಬರ್ಪೆರ್. ಅಕಾಡೆಮಿದ ಗುರ್ಕಾರ್ರ್ ದಯಾನಂದ ಜಿ.ಕತ್ತಲ್ ಸಾರ್ ನ ಗುರ್ಕಾರ್ಮೆಡ್ ಈ ಲೇಸ್ ನಡಪುಂಡು.
ಅಂಚನೆ ರಿಜಿಸ್ಟ್ರಾರ್ ಕವಿತ, ಸದಸ್ಯ ಸಂಚಾಲಕೆರ್ ನರೇಂದ್ರ ಕೆರೆಕಾಡು,ದಿ. ಶಿವಾನಂದ ಕರ್ಕೇರೆರೆನ ಕುಟುಂಬದಕುಲು ಅಭಿಮಾನಿಲು ಲೇಸ್ ಡ್ ಪಾಲ್ ಪಡೆವೆರ್.
ಕುಡ್ಲ: ಪೇಂಟೆದ ಕರಾವಳಿ ಉತ್ಸವ ಮೈದಾನಡ್ ಅಂಗಾರೆ ಕಾಂಡೆ ರ್ದ್ ನಡುರಾತ್ರೆ ಮುಟ್ಟಲ ನಡತಿನ “ಪಿಲಿ ನಲಿಕೆ 2022” ಪಂತೊಡು ಜಪ್ಪು ಗೋರಕ್ಷನಾಥ ಕೂಟದಕುಲು ಸುರೂತ್ತ ಇನಾಮು ಪಡೆದೆರ್. ಪಿಲಿನಲಿಕೆ ಪ್ರತಿಷ್ಠಾನದ ಅಧ್ಯಕ್ಷೆರ್ ಮಿಥುನ್ ರೈ ಮುತಾಲಿಕೆಡ್ ಈ ಪಂತೊ ಭಾರೀ ಗೌಜಿಡ್ ನಡತ್ಂಡ್.
ಕರಾವಳಿ ಉತ್ಸವ ಮೈದಾನೊಡು ಮೆರವಣಿಗೆದ ಜಂಡೆದ ನಲಿಕೆದ ಒರುಟ್ಟು ಬರ್ಪಿನ ಪಿಲಿ ಏಸ ಪಾಡ್ದಿನಕ್ಲೆನ್ ವರ್ಣನೆ ಮಲ್ಪರೆ ಸಾಧ್ಯ ಇಜ್ಜಿ. ಪಾಲ್ ಪಡೆಯಿನ 12 ಕೂಟಲ ಒಂಜೊಂಜಿ ರೀತಿಡ್ ಎಂಟ್ರಿ ಕೊರಿಯೆರ್.ಮೈಸೂರು ದಸರಾದ ಅಂಬಾರಿ, ರಥಬೀದಿ ಶ್ರೀ ವೆಂಕಟರಮಣ ದೇವಲ್ಯ ಅಂಚನೆ ಶತಮಾನೋಚ್ಚಯದ ಶಾರದೆ ಸೇರಿನಂಚನೆ ಬೇತೆ ಬೇತೆ ರೀತಿದ ವೈವಿಧ್ಯಲು ಪಿಲಿ ನಲಿಕೆಡ್ ತೋಜಿದ್ ಬತ್ತ್ಂಡ್.
ವೇದಿಕೆದ ಮಿತ್ತ್ ಭಾರೀ ಪೊರ್ಲುಡು ಪಜ್ಜೆ ಪಾಡೊಂದು ಇತ್ತಿನ ಪಿಲಿಕುಲು ತೂಪಿನ ಜನಕ್ಲೆನ್ ಕುಷಿ ಕೊರೊಂದು ಇತ್ತ್ಂಡ್. ಪಿಲಿಏಸ ನಲಿಕೆದ ಮೂಲ ರೂಪಗ್ ದಕ್ಕೆ ಆವಂದಿಲೆಕ್ಕ ಮಾತ ಕೂಟದಕುಲು ಪ್ರದರ್ಶನ ಕೊರಿಯೆರ್.ಪಿಲಿನಲಿಕೆ ಪಂತೊಡ್ 12 ಕೂಟಲು ಪಾಲ್ ಪಡೆದಿತ್ತ್ಂಡ್. ಪಂತೊದ ಅವಧಿ 20 ನಿಮಿಷ ಆದಿತ್ತ್ದ್ ಪೆರಿಯ ಪಿಲಿಕುಲು, ಕಿನ್ನಿ ಪಿಲಿಕುಲು ವೇದಿಕೆಡ್ ಚಳಿ ಬುಡ್ದು ನಲಿತ್ತ್ಂಡ್. ಪೌಲ ನಲಿಕೆ, ಮುಡಿ ದಕ್ಕ್ನವ್ ಜನಕುಲೆಗ್ ಕುಷಿ ಕೊತ್ಂಡ್. ಮಂಜಲ್ ಬೈಲ್ ಕೂಟಡ್ ಪೊಣ್ಣು ಪಿಲಿ ಏಸದಾರ್ ಮರಕಾರ್ ನಲಿಕೆಡ್ ಮಲ್ತಿನವ್ ವಿಶೇಷ ಆದಿತ್ತ್ಂಡ್.
ಲೇಸ್ಡ್ ಚಿತ್ರನಟೆರಾಯಿನ ಸುನೀಲ್ ಶೆಟ್ಟಿ, ರಿಷಬ್ ಶೆಟ್ಟಿ ಮೊಕುಲು ದುಂಬುಗ್ ಅಕ್ಲೆನ ಪಿಚ್ಚರ್ಡ್ ಪಿಲಿನಲಿಕೆಗ್ ಅವಕಾಶ ಕೊರ್ಪಿನ ಬಗೆಟ್ ಭರವಸೆ ಕೊರಿಯೆರ್. ಡಾ. ಮೋಹನ್ ಆಳ್ವ ಜಾಂಬೂರಿಡ್ ಅವಕಾಶ ಕೊರ್ಪಿನ ಬಗೆಟ್ ಅಂಚನೆ ಶಾಸಕೆರ್ ಯು.ಟಿ.ಖಾದರ್ ದುಬೈಡ್ ಪಿಲಿನಲಿಕೆಗ್ ಅವಕಾಶ ಕೊರ್ಪಿನ ಬಗೆಟ್ ಭರವಸೆ ಕೊರಿಯೆರ್.
ಪಿಲಿಏಸನ್ ತೂಯರೆ ವರ್ಷರ್ದ್ ವರ್ಷಗ್ ಬರ್ಪಿನ ಜನಕಲೆನ ಸಂಖ್ಯೆ ಎಚ್ಚ ಆವೊಂದು ಇತ್ತಿನೆಡ್ದಾವರ ಪಂತೊನು ಮಂಗಳಾ ಸ್ಟೇಡಿಯಂದ ವಾಲಿಬಾಲ್ ಗ್ರೌಂಡ್ರ್ದ್ ಕರಾವಳಿ ಉತ್ಸವ ಮೈದಾನಗ್ ಬದಲ್ ಮಲ್ಪೊಡಾಂಡ್. ಪಂತೊದ ತೀರ್ಪುಗಾರೆರಾದ್ ಕೆ.ಕೆ ಪೇಜಾವರ, ವೆಂಕಟೇಶ್ ಭಟ್, ಮಿಥುನ್ ರೈ ನಿರ್ವಹಣೆ ಮಲ್ತೆರ್. ಸಂಗೀತ ನಿರ್ದೇಶಕೆರ್ ಗುರುಕಿರಣ್ ಲೇಸ್ಡ್ ಪಾಲ್ ಪಡೆದಿತ್ತೆರ್. ನವೀನ್ ಶೆಟ್ಟಿ ಎಡ್ಮೆಮಾರ್ ಲೇಸ್ ಸುದಾರಿಕೆ ಮಲ್ತೆರ್.
ಪಿಲಿನಲಿಕೆದ ರಿಸಲ್ಟ್:
ಈ ಸರ್ತಿ ಎಡ್ಡೆ ರೀತಿಡ್ ಪ್ರದರ್ಶನ ಕೊರಿನ ಜಪ್ಪು ಗೋರಕ್ಷನಾಥ ಕೂಟ ವಿನ್ನರ್ ಆಯೆರ್. ಈ ಇನಾಮುಡ್ 3 ಲಕ್ಷ ಕಾಸ್ ಬೊಕ್ಕ ಪಿಲಿನಲಿಕೆ-2022 ಪ್ರಶಸ್ತಿನ್ ಕೊರ್ದು ಮಾನಾದಿಗೆ ಮಲ್ತೆರ್. ಸುರುತ್ತ ರನ್ನರ್ ಆಪ್ ಪ್ರಶಸ್ತಿ ಪುರಲ್ದಪ್ಪೆನ ಮೋಕೆದ ಬೊಳ್ಳಿಲು ಕೂಟಗ್ ತಿಕ್ಕ್ದಿತ್ತ್ದ್, 2 ಲಕ್ಷ ಕಾಸ್ ಬೊಕ್ಕ ರನ್ನರ್ ಅಪ್ ಪ್ರಶಸ್ತಿನ್ ಪಡೆಯೆರ್. ರಡ್ಡನೇ ರನ್ನರ್ ಆಪ್ ಪ್ರಶಸ್ತಿ ಮುಳಿಹಿತ್ಲು ಫ್ರೆಂಡ್ಸ್ ಸರ್ಕಲ್ ಕೂಟಗ್ ತಿಕ್ಕ್ದಿತ್ತ್ದ್, 1 ಲಕ್ಷ ಇನಾಮು ಬೊಕ್ಕ ರಡ್ಡನೇ ರನ್ನರ್ ಅಪ್ ಪ್ರಶಸ್ತಿನ್ ಪೆಡೆಯೆರ್. ಗೋಲ್ಡನ್ ಲೀಫ್ ಕಾವೂರುಗ್ ಕಿನ್ನಿ ಪಿಲಿ ಪ್ರಶಸ್ತಿ ಬೊಕ್ಕ ಕರಿ ಪಿಲಿ ಪ್ರಶಸ್ತಿ ತಿಕ್ಕ್ಂಡ್. ಮುಡಿ ಪಾರಾವುನವ್ (ಸೋಮೇಶ್ವರ), ತಾಸೆ (ಅದ್ಯಪಾಡಿ ವೈದ್ಯನಾಥ ಕೂಟ), ಎಡ್ಡೆ ರಂಗ್ (ಮಂಜಲ್ಬೈಲ್), ಎಡ್ಡೆ ಪಿಲಿನಲಿಕೆ (ಗೋಲ್ಡನ್ ಲೀಫ್ ಕಾವೂರು) ಪ್ರಶಸ್ತಿ ಪಡೆಯೊನ್ಯೆರ್. ವೈಯಕ್ತಿಕ ವಿಭಾಗದ ಪ್ರಶಸ್ತಿಗ್ 50 ಸಾರ ರೂಪಾಯಿ ಕಾಸ್ ಬೊಕ್ಕ ಪ್ರಶಸ್ತಿ ಕೊರಿಯೆರ್. ಪಾಲ್ ಪಡೆಯಿನ 12 ಕೂಟದಕ್ಲೆಗ್ ಲ ತಲಾ 50 ಸಾರ ರೂ. ಉಮೇದ್ ದ ಪಣವು ಪಟ್ಟಿಯೆರ್.
ದಕ್ಷಿಣ ಆಫ್ರಿಕಾದ ವಿರುದ್ದ ಟಿ20 ಸರಣಿನ್ 2-1 ಅಂಕದ ಅಂತರರ್ದ್ ಗೆಂದಿನ ಭಾರತ , ಇತ್ತೆ ಏಕದಿನ ಸರಣಿಗ್ ತಯಾರ್ ಆತ್ಂಡ್. ಇನಿ ಲಕ್ನೋದ ಬಿಹಾರಿ ವಾಜಪೈ ಏಕಾನಾ ಕ್ರಿಕೆಟ್ ಸ್ಟೇಡಿಯಂಡ್ ಸುರುತ್ತ ಏಕದಿನ ಪಂತೊ ನಡಪರೆ ಉಂಡು.
ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಕೆಎಲ್ ರಾಹುಲ್ ನಂಚಿನ ಸ್ಟಾರ್ ಆಟಗಾರೆರ್ ಟಿ20 ವಿಶ್ವಕಪ್ಗಾದ್ ಆಸ್ಟ್ರೇಲಿಯಾಗ್ ಪೋಯಿನ ಕಾರಣ ತಂಡೊನು ಶಿಖರ್ ಧವನ್ ನಡಪಾಯರೆ ಉಲ್ಲೆರ್. ಭಾರತದ ಪರ ಓಪನರ್ ಆದ್ ಶಿಖರ್ ಧವನ್ ಅಂಚನೆ ಶುಭ್ಮನ್ ಗಿಲ್ ಗೊಬ್ಯರ ಉಲ್ಲೆರ್. ಉಪ ನಾಯಕೆರ್ನ ಜವಾಬ್ದಾರಿ ಇಪ್ಪುನ ಶ್ರೇಯಸ್ ಅಯ್ಯರ್ ಮೂರನೇ ತಾನೊಡು ಇತ್ತ್ಂಡ ಇಶಾನ್ ಕಿಶನ್ ಬೊಕ್ಕದ ತಾನೊಡ್ ಗೊಬ್ಬರ ಉಲ್ಲೆರ್. ಸಂಜು ಸ್ಯಾಮ್ಸನ್ ಮೆರೆಗ್ ವಿಕೆಟ್ ಕೀಪರ್ ಜವಾಬ್ದಾರಿ ಉಂಡು.
ಗಾಝಿಯಾಬಾದ್ : ಉತ್ತರ ಪ್ರದೇಶದ ಗಾಝಿಯಾಬಾದ್ ದ ಒಂಜಿ ಇಲ್ಲಲ್ ಎಲ್ಇಡಿ ಟಿವಿ ಪುಡಾದ್ 16 ವರ್ಷದ ಓಮೇಂದ್ರ ತೀರ್ ಪೋತೆರ್.
ಈ ಘಟನೆಡ್ ಅರೆನ ಅಮ್ಮ, ಅತ್ತಿಗೆ ಬೊಕ್ಕ ದೋಸ್ತಿ ಕರಣ್ ಗ್ ಪೆಟ್ಟಾತ್ಂಡ್. ಮೊಕಲೆಗ್ ಆಸ್ಪತ್ರೆಡ್ ಚಿಕಿತ್ಸೆ ನಡತೊಂದು ಉಂಡು. ಅಂಚನೆ ನೆತ್ತ ಬಗೆಟ್ ತನಿಖೆ ನಡತೊಂದು ಉಂಡು ಪಂದ್ ಪೊಲೀಸೆರ್ ಪಂಡೆರ್.
ದಿಲ್ಲಿ: ಭಾರತಡ್ ತಯಾರ್ ಮಲ್ದಿನ ತೆಮ್ಮ, ಸೀತದ ಮರ್ದ್ ಪರ್ನ ಆಫ್ರಿಕಾದ ಗ್ಯಾಂಬಿಯಾದ 66ಕ್ ಲ ಎಚ್ಚ ಜೋಕುಲು ತೀರ್ ಪೋತೆರ್.ನೆತ್ತ ಬಗೆಟ್ ಕೂಡ್ಲೆ ತನಿಖೆ ಮಲ್ಪೊಡು ಪಂದ್ ಕೇಂದ್ರ ಔಷಧ ನಿಯಂತ್ರಕ ಮಂಡಳಿ(ಸಿಡಿಎಸ್ಸಿಒ)ಗ್ ಪಂತ್ಂಡ್.
ತೆಮ್ಮ ಬೊಕ್ಕ ಸೀತಗ್ ಕೊರ್ಪುನ ನಾಲ್ ಸಿರಪ್ ಹರಿಯಾಣದ ಮೇಡನ್ ಫಾರ್ಮಾಸ್ಯುಟಿಕಲ್ಸ್ ಕಂಪನಿಡ್ ತಯಾರಾತಿನವು ಪಂದ್ ಡಬ್ಲ್ಯುಎಚ್ಒ ಮಹಾನಿರ್ದೇಶಕೆರ್, ಟೆಡ್ರೊಸ್ ಅಧಾನೊಮ್ ಗೆಬ್ರೆಯೆಸಸ್ ಜಿನೀವಾಡ್ ಪತ್ರಿಕಾಗೋಷ್ಠಿಡ್ ತೆರಿಪಾದೆರ್.
ತೆಮ್ಮದ ಮರ್ದ್ ಗ್ಯಾಂಬಿಯಾಡ್ ಮಾತ್ರ ಪತ್ತೆ ಆತ್ಂಡ್.ಆಂಡ, ಬೇತೆ ದೇಶಲೆಗ್ ಲ ಉಂದುವೇ ಕಂಪನಿದ ಮರ್ದುಲು ಕೊರ್ತುನೆರ್ದಾವೆರ ಎಚ್ಚರಿಕೆಡ್ ಉಪ್ಪೊಡು ಪಂದ್ ವಿಶ್ವ ಆರೋಗ್ಯ ಸಂಸ್ಥೆ ಪಂಡ್.
ಬ್ಯಾಂಕಾಕ್: ಥಾಯ್ಲೆಂಡ್ದ ಈಶಾನ್ಯ ಪ್ರಾಂತ್ಯಡ್ ಜೋಕ್ಲೆನ ಡೇ ಕೇರ್ ಸೆಂಟರ್ಡ್ ಗುರುವಾರದಾನಿ ಸಾಮೂಹಿಕ ಗುಂಡುದ ದಾಳಿಗ್ 31 ಜನ ತೀರ್ ಪೋತೆರ್.
ತೀರ್ ಪೋತಿನಕ್ಲೆಡ್ ಜೋಕುಲು ಬೊಕ್ಕ ಪ್ರಾಯದಕುಲು ಸೇರ್ದೆರ್. ಉಂದೆತ್ತ ಬಗೆಟ್ ಕ್ರಮ ದೆತೊನರೆ ಬೊಕ್ಕ ತಪ್ಪು ಮಲ್ತಿನಕ್ಲೆನ್ ಅರೆಸ್ಟ್ ಮಲ್ಪರೆ ಪ್ರಧಾನಿ ಮಾತ ಏಜೆನ್ಸಿನಕ್ಲೆಗ್ ಎಚ್ಚೆರ್ಗೆ ಕೊರ್ತೆರ್ ಪಂದ್ ಸರ್ಕಾರದ ವಕ್ತಾರೆರ್ ತೆರಿಪಾದೆರ್.
ಕೊಲ್ಕತ್ತಾ: ಪಶ್ಚಿಮ ಬಂಗಾಳಡ್ ದುರ್ಗೆನ್ ಸುದೆಕ್ಕ್ ಬುಡ್ಪಿನ ಪೊರ್ತುಡು ಬೊಲ್ಲ ಬತ್ತಿನ ಪರಿಣಾಮ ಬೊಲ್ಲಗ್ ತಿಕ್ಕ್ದ್ ಬೂರ್ದ್ 8 ಜನ ತೀರ್ ಪೋತಿನ ಘಟನೆ ಜಲ್ಪೈಗುರಿತ್ತ ಮಾಲ್ ಸುದೆಟ್ ನಡತ್ಂಡ್.
ಸುದೆಟ್ ಬೊಲ್ಲಡ್ ಪೋಯಿನ 70 ಜನನ್ ರಕ್ಷಣೆ ಮಲ್ತ್ದೆರ್. ಈ ಘಟನೆಡ್ 13 ಜನಕ್ಕ್ ಪೆಟ್ಟಾತ್ಂಡ್. ಮಾಲ್ ಸುದೆಟ್ 20-30 ಜನ ಬೊಲ್ಲಡ್ ತಿಕ್ಕ್ದ್ ಬೂರ್ದ್ ನಾಪತ್ತೆಯಾತೆರ್. ನೀರ್ಡ್ ಬುಡ್ಪಿನ ಪೊರ್ತುಡು ಒರನೇ ಬೊಲ್ಲ ಬತ್ತಿನೆಡ್ದಾವರ ಈ ಘಟನೆ ನಡತ್ಂಡ್. ಪ್ರಧಾನಿ ಮೋದಿಜಿ ಈ ಬಗೆಟ್ ಅರೆನ ಬೇಜಾರ್ನ್ ತೆರಿಪಾದೆರ್.
36ನೇ ರಾಷ್ಟ್ರೀಯ ಕ್ರೀಡಾಕೂಟಡ್ ರೇಸ್ವಾಕ್ ಪಂತೊಡ್ ಪೊಸ ದಾಖಲೆ ಮಲ್ಪಿನ ಮುಕೇನ ಸಾಮಾನ್ಯ ಜನ ಒರಿ ಪೊಸ ದಾಖಲೆ ಮಲ್ತ್ದೆರ್. ಉತ್ತರಪ್ರದೇಶದ ರಾಮ್ ಬಾಬು ಈ ಸಾಧನೆ ಮಲ್ತಿನ ಜನ.
ಸಾಮಾನ್ಯವಾದ್ ರೇಸ್ವಾಕ್ ಪಂತೊಡ್ ನಿಧಾನವಾದ್ ನಡೆಪುಲೆಕ್ಕ ಇಜ್ಜಿ. ಇಂಚಿರ್ದ್ ಬಲಿಪುಲೆಕ್ಕಲ ಇಜ್ಜಿ. ಉಂದೆತ್ತ ನಡುಟ್ ಬ್ಯಾಲೆನ್ಸ್ ಮಲ್ತ್ದ್ ಬರೋಬ್ಬರಿ 35 ಕಿ.ಮೀ ದೂರ ಪೋದು ರಾಮ್ ಬಾಬು ಪೊಸ ಪರಪೋಕುನ್ ಮಲ್ತ್ದೆರ್.
