ಹಳೆಯಂಗಡಿಡ್ ಸಿಎಸ್ ಐ ಚರ್ಚ್ ಮಹಿಳಾ ಕೂಟದಕ್ಲೆರ್ದ್ ಆತ್ಮೀಕ ಕೂಟ

ಹಳೆಯಂಗಡಿ : ಕುಡ್ಲ ಬೊಕ್ಕ ಒಡಿಪು ಜಿಲ್ಲೆಗ್ ಸೇರ್ನ ಸಿ.ಎಸ್.ಐ ಚರ್ಚ್ ಲೆನ ಮಹಿಳಾ ಕೂಟದಕಲೆರ್ದ್ ಒಂಜಿ ದಿನತ ಆತ್ಮೀಕ ಕೂಟ ಹಳೆಯಂಗಡಿ ಸಿಎಸ್.ಐ ಅಮ್ಮನ ಚರ್ಚ್ ಡ್ ನಡತ್ಂಡ್.
ಪೊಂಜೋವುಲೆನ ಜೀವನಡ್ ಕ್ರಿಸ್ತೀಯ ಬಿಲೆ ಬೊಕ್ಕ ಜವಾಬ್ದಾರಿ ಪನ್ಪುನ ಶೀರ್ಷಿಕೆದ ಬಗೆಟ್ ಈ ಕೂಟನ್ ಸ್ಥಳೀಯ ಸಭಾ ಪಾಲಕೆರಾಯಿನ ರೆ. ವಿನಯಲಾಲ್ ಬಂಗೇರ ಪ್ರಾರ್ಥನೆದೊಟ್ಟಿಗೆ ಸುರು ಮಲ್ತೆರ್. ಅಂಚನೆ ಸಂಪನ್ಮೂಲ ವ್ಯಕ್ತಿಯಾದ್ ಬತ್ತಿನ ರೆ. ಸಿಸ್ಟರ್ ಸುಕುಮಾರಿ ಜತನ್ನ, ರೆ. ಡಾ. ಎವ್ಲಿನ್ ಅಮ್ಮಣ್ಣ, ರೆ. ಶಶಿಕಲ ಅಂಚನ್, ರೆ. ರೇಶ್ಮಾ ರವಿಕಲಾ, ರೆ. ರೆಚಲ್ ಆರ್ ಈ ಲೇಸ್ ಡ್ ಪಾಲ್ ಪಂಡೆದ್ ಬಿಲೆತ ವಿಷಯಲೆನ್ ಪತೆರ್ಯೆರ್. ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಡಯಾಸಿಸ್ ನ ಮಹಿಳಾ ಪದಾಧಿಕಾರಿ ಕಾರ್ಯದರ್ಶಿ ಶೋಭಾ ಅಬ್ರಾಹಂ, ಕೋಶಾಧಿಕಾರಿ ಲಿಲ್ಲಿ ಜೋಯ್ಸ್ ಇತ್ತೆರ್. ಅಂಚನೆ ಅಧ್ಯಕ್ಷೆರಾದ್ ಹರಿಣಿ ಎಸ್. ಬಂಗೇರ ಇತ್ತೆರ್. ಈ ಲೇಸ್ ಗ್ ಬತ್ತಿನಕುಲೆನ್ ಕೋಶಾಧಿಕಾರಿ ಅಯಿನ ಸಾರ ಕರ್ಕಡ ಎದ್ಕೊನಿಯೆರ್.

ರೆನಿಟ ಕರ್ಕಡ ಮಾತೆರೆಗ್ಲ ಸೊಲ್ಮೆ ಸಂದೈತ ಮಲ್ತೆರ್. ಅಂಚನೆ ಸುಷ್ಮಾ ಕರ್ಕಡ ಈ ಲೇಸ್ ದ ಸುಧಾರಿಕೆ ಮಲ್ತೆರ್.
ಈ ಪೊರ್ತುಡು ಸಭಾ ಪರಿಪಾಲನ ಸಮಿತಿದ ಸದಸ್ಯೆರಾಯಿನ ಆಸ್ಟಿನ್ ಕರ್ಕಡ, ವಸಂತ್ ಬೆರ್ನಾಡ್, ಜೇಮ್ಸ್ ಕರ್ಕಡ, ಸಿಡ್ನಿ ಕರ್ಕಡ, ಶರ್ಲಿ ಬಂಗೇರ, ಲಾವಣ್ಯ ಕೋಟ್ಯಾನ್ ಇತ್ತೆರ್.