ಕುಡ್ಲ : ಶಾರದಾ ದೇವಿ, ನವದುರ್ಗೆಯೆರ್ನ ಮೂರ್ತಿ ವಿಸರ್ಜನೆದೊಟ್ಟುಗು ಕುಡ್ಲ ದಸರಾಗ್ ಮುಗಿತಲದ ಚುಕ್ಕೆ

ಕುಡ್ಲ: ಕುಡ್ಲ ದಸರಾ ಪಂದೇ ಪುಗರ್ತೆ ಪಡೆಯಿನ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಡ್ ಶ್ರೀ ಶಾರದಾ ದೇವಿ, ಗಣಪತಿ ಅಂಚೆನೆ ನವದುರ್ಗೆಯೆರ್‍ನ ಮೂರ್ತಿಲೆನ ಶೋಭಾಯಾತ್ರೆ ಭಾರೀ ಗೌಜಿಡ್ ಕುಡ್ಲದ ರಾಜಬೀದಿಡ್ ಬುಧಾರ ಬಯ್ಯರ್ದ್ ಸುರುವಾದ್ ಗುರುವಾರ ಕಾಂಡೆ ವಿಸರ್ಜನೆದ ಒಟ್ಟುಗು ಜಗತ್ತ್ ಡೇ ಪುಗರ್ತೆ ಪಡೆದಿನ ಮಲ್ಲ ಮಟ್ಟ್ ದ “ಕುಡ್ಲ ದಸರಾ 2022” ಉಚ್ಚಯೊಗು ಮುಗಿತಲದ ಚುಕ್ಕೆ ದೀಯೆರ್.

ಕುದ್ರೋಳಿ ಕ್ಷೇತ್ರದ ಅಭಿವೃದ್ದಿ ರೂವಾರಿ, ಕೇಂದ್ರ ಸರಕಾರದ ಮಾಜಿ ಮಂತ್ರಿಲು ಬಿ. ಜನಾರ್ದನ ಪೂಜಾರ್ಲೆನ ಮುತಾಲಿಕೆಡ್ ದಸರಾ ಉಚ್ಚಯ ಬೊಕ್ಕ ಮೆರವಣಿಗೆಗ್ ಚಾಲನೆ ಕೊರ್ದಿತ್ತೆರ್.

ಬುಧಾರ ರಾತ್ರೆ ಇಡೀ ನಡತಿನ ಮೆರವಣಿಗೆಡ್ ಇನಿ ಕಾಂಡೆ 9 ಗಂಟೆ 7 ನಿಮಿಷಗ್ ಸರಿಯಾದ್ ದೇವಲ್ಯದ ಕೆರೆಟ್ಟ್ ಮೂರ್ತಿಲೆನ ವಿಸರ್ಜನೆ ಭಾರಿ ಭಕ್ತಿ ಶ್ರದ್ಧೆಡ್ ನಡತ್ಂಡ್. ಚೆಂಡೆ, ಕೊಂಬು, ಭಜನಾ ಕೂಟಲು, ಬೇತೆ ಜಿಲ್ಲೆರ್ದ್ ಬತ್ತಿನ ಕಲಾ ಪ್ರಕಾರಲು, ಪಿಲಿ ಏಸದ ಕೂಟ, ಪುರಾಣ ಕಥೆನ್ ಪನ್ಪಿನ ಟ್ಯಾಬ್ಲೋ, ಡೊಳ್ಳು ಕುಣಿತದ ಮೆರವಣಿಗೆ ನನಾತ್ ಎಚ್ಚ ಮೆರುಗು ಕೊರ್ತ್ಂಡ್.

PC: Shetty Punik Photography