ಬ್ಯಾಂಕ್ ಆಫ್ ಬರೋಡಾ ಸುಬ್ರಹ್ಮಣ್ಯ ಶಾಖೆ ಪೊಸ ಕಟ್ವಾನಗ್ ಸ್ಥಳಾಂತರ

ಸುಬ್ರಹ್ಮಣ್ಯ: ಬ್ಯಾಂಕ್ ಆಫ್ ಬರೋಡಾ ಸುಬ್ರಹ್ಮಣ್ಯ ಶಾಖೆ ಸ್ಥಳಾಂತರ ಆದ್ ಪೊಸ ಕಟ್ವಾನ ಅಕ್ಷರ ವಸತಿ ಗ್ರಹದ ತೀರ್ತ್ ದ ಮಾಳಿಗೆಡ್ ಸೋಮಾರ ಸುರು ಆತ್ಂಡ್.

ಈ ಶಾಖೆನ್ ಬ್ಯಾಂಕ್ ಆಫ್ ಬರೋಡಾ ಮಂಗಳೂರು ವಲಯದ ಜನರಲ್ ಮ್ಯಾನೇಜರ್ ಗಾಯತ್ರಿ ಆರ್ ಮೇರ್ ಟೇಪ್ ಕಟ್ಟ್ ಮಲ್ತ್ ದ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಬೊಕ್ಕ ಮೇರ್ ಪಾತೆರ್ದ್, ಸುಬ್ರಹ್ಮಣ್ಯದಂಚಿನ ಗ್ರಾಮೀಣ ಪ್ರದೇಶಡ್ ನಮ್ಮ ಶಾಖೆಗ್ ಎಡ್ಡೆ ಸ್ಪಂದನೆ ತಿಕ್ ದ್ಂಡ್. ಮುಲ್ಪದ ಗ್ರಾಹಕೆರೆನ ಬೇಡಿಕೆಗನುಗುಣವಾದ್ ಬೊಕ್ಕ ಅಕ್ಲೆನ ಅನುಕೂಲಗಾದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದಕುಲು ನಮಕ್ ಎಡ್ಡೆ ಜಾಗೆನ್ ಕೊರ್ತೆರ್. ಮುಲ್ಪದ ಶಾಖೆಗ್ ಮಾತ ಗ್ರಾಹಕೆರ್ ಬೊಕ್ಕ ದೇವಸ್ಥಾನದ ನೌಕರೆರ್ ಬೊಕ್ಕ ಇಸೇಸವಾದ್ ಅಂಚಿ ಇಂಚಿ ಊರುದ ಕೃಷಿಕೆರ್ ಮಸ್ತ್ ಸ್ಪಂದನೆ ಕೊರ್ತೆರ್. ಮಾತೆರೆನ ಸಹಕಾರದೊಟ್ಟಿಗೆ ಈ ಶಾಖೆ ನನಾತ್ ಅಭಿವೃದ್ಧಿ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಡಾ. ನಿಂಗಯ್ಯ, ಕುಡ್ಲ ಸಿರಿ ಗ್ರಾಮೋದ್ಯೋಗ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಜನಾರ್ದನ, ಪುತ್ತೂರು ಪ್ರಾದೇಶಿಕ ಕಚೇರಿದ ಪ್ರಾದೇಶಿಕ ವ್ಯವಸ್ಥಾಪಕೆರ್ ದೇವಿ ಪ್ರಸಾದ ಶೆಟ್ಟಿ, ಉಪ ಪ್ರಾದೇಶಿಕ ವ್ಯವಸ್ಥಾಪಕೆರ್ ಶ್ರೀ ಮೂರ್ತಿ, ಕೈತಲ್ದ ಬ್ಯಾಂಕ್ ಆಫ್ ಬರೋಡ ಶಾಖೆದ ವ್ಯವಸ್ಥಾಪಕೆರ್ ಬೊಕ್ಕ ಗ್ರಾಹಕೆರ್ ಪಾಲ್ ಪಡೆದಿತ್ತೆರ್.

ಸುಬ್ರಹ್ಮಣ್ಯ ಶಾಖೆದ ವ್ಯವಸ್ಥಾಪಕೆರ್ ಕೃಷ್ಣಪ್ರಸಾದ್ ಮೇರ್ ಎದ್ಕೊನಿಯೆರ್. ನೂಜಿ ಬಾಳ್ತಿಲ ಶಾಖೆದ ವ್ಯವಸ್ಥಾಪಕೆರ್ ಶಿವಪ್ರಸಾದ್ ಲೇಸ್ ಸುಧಾರಿಕೆ ಮಲ್ತೆರ್. ಪ್ರಾದೇಶಿಕ ವ್ಯವಸ್ಥಾಪಕೆರ್ ದೇವಿ ಪ್ರಸಾದ್ ಶೆಟ್ಟಿ ಸೊಲ್ಮೆ ಸಂದಾಯೆರ್.