ದುಬೈ ತುಳು ಪಾತೆರ್ಗ ತುಳು ಒರಿಪಾಗ ನೆತ್ತ 11ನೇ ವರ್ಷದ ಗೌಜಿ ಗಮ್ಮತ್ತ್ ತುಳುನಾಡ ಗೊಬ್ಬುದ ಲೇಸ್

ದುಬೈ ತುಳು ಪಾತೆರ್ಗ ತುಳು ಒರಿಪಾಗ ನೆತ್ತ 11ನೇ ವರ್ಷದ ಗೌಜಿ ಗಮ್ಮತ್ತ್ ತುಳುನಾಡ ಗೊಬ್ಬುದ ಲೇಸ್ ಮಾ.3 ಐತಾರ ದುಬೈದ ಝಬೀಲ್ ಪಾರ್ಕ್ ಡ್ ಗೌಜಿಡ್ ನಡತ್ಂಡ್.

ತುಳುನಾಡ್ ದ ಸಂಪ್ರದಾಯದಂಚೆನೆ ಪಾಲ್ ಪಡೆಯೆರೆ ಬತ್ತಿನ ಮಾತ ತುಳುವೆರೆಗ್ ಬೆಲ್ಲ ನೀರ್ ಬೊಕ್ಕ ಬಚ್ಚಿರೆ ಪೂಲು ಕೊರ್ಪುನ ಮುಕೇನ ಎದ್ಕೊನಿಯೆರ್.

ಕುಮಾರಿ ಪ್ರಿಶಾ, ಕುಮಾರಿ ಶಾರ್ವಿ, ಮಾಸ್ಟರ್ ಸುಹನ್ ಮೊಕುಲು ದೇವೆರೆನ ಪ್ರಾರ್ತನೆದೊಟ್ಟಿಗೆ ದುಬೈದ ತುಳು ಕನ್ನಡ ಸಂಘಟನೆದ ಹಿರಿಯೆರ್ ಸರ್ವೋತ್ತಮ ಶೆಟ್ಟಿ, ಸಂಸ್ಥೆದ ಹಿರಿಯ ಸದಸ್ಯೆರ್ ಅಜ್ಮಲ್ ದುಬೈ, ನೊವೆಲ್ ಅಲ್ಮೆಡ ಮೊಕುಲು ತುಳುವಪ್ಪೆನ ಭಾವಚಿತ್ರಗ್ ಪುಷ್ಪಾರ್ಚನೆ ಮಲ್ಪುನ ಮುಕೇನ ಲೇಸ್ ದ ಉದಿಪನ ಮಲ್ತ್ ದ್ ಕೂಟಗ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ತುಳುನಾಡ ಸುಗಿಪುನ್ ಪಂಡೆರ್.

ಊರುರ್ದ್ ಬತ್ತಿನ ಹಿರಿಯೆರ್ ಸುಶೀಲ ಸಂಜೀವ ಪೂಜಾರಿ ಬೊಕ್ಕ ಸುಲೋಚನಾ ಜಯ ಅಮಿನ್ ಮೊಕುಲು ಭೂಲೋಕದ ಕಲ್ಪವೃಕ್ಷ ತಾರೆದ ದೈ ನಡ್ಪುನ ಮುಕೇನ ತುಳುನಾಡ್ ದ ಗೊಬ್ಬುಗು ಚಾಲನೆ ಕೊರಿಯೆರ್.

ಮಧ್ಯಾಹ್ನ ನಡತಿನ ಸಭಾ ಲೇಸ್ ಡ್ ಮಲ್ಲ ಬಿನ್ನೆರಾಯಿನ ಹರೀಶ್ ಬಂಗೇರ, ಡೋನಿ ಕೊರೆಯ, ಜಯಂತ್ ಶೆಟ್ಟಿ, ಮನೋಹರ್ ಹೆಗಡೆ, ಶೋಧನ್ ಪ್ರಸಾದ್, ಸುದರ್ಶನ್ ಹೆಗಡೆ, ಸತೀಶ್ ಪೂಜಾರಿ, ಜೋಸೆಫ್ ಮಥಾಯಿಸ್ ಬೊಕ್ಕ ಸಂಸ್ಥೆದ ಹಿರಿಯ ಸದಸ್ಯೆರ್ ಸತೀಶ್ ಉಳ್ಳಾಲ್, ಸಂದೀಪ್ ಕೊಟ್ಯಾನ್, ಗುರ್ಕಾರೆ ಪ್ರೇಮ್ ಜೀತ್ ಮೇರ್ ಪಾಲ್ ಪಡೆದಿತ್ತೆರ್.

ದುಬೈದ ಹಿರಿಯೆರ್, ಸಮಾಜ ಸೇವಕೆರ್ ಮಾಧವ ಪೆಜಮಾಡಿ ಕೋಡಿ ಮೆರೆಗ್ ಸನ್ಮಾನ ಮಲ್ತ್ ದ್ “ಅಪ್ಪೆ ಭಾಷೆ ತುಳುವ ತುಡರ್” ಪನ್ಪುನ ಬಿರ್ದ್ ನ್ ಕೊರ್ದು ಮಾನಾದಿಗೆ ಮಲ್ತೆರ್. ದುಬೈದ ತುಳು ಕನ್ನಡ ಸಂಘಟನೆಡ್ ಉತ್ತಮ ಕಾರ್ಯಕರ್ತೆರಾದ್ ಸೇವೆ ಸಂದಾಯಿನ ಶಮೀರ್ ಬೋಳಾರ, ತುಳು ಯೂಟ್ಯೂಬ್ ಚಾನಲ್ ಮುಕೇನ ತುಳುನಾಡ ಸಂಸ್ಕೃತಿನ್ ಪಸೆರುನ ಸವಿತಾ ಸಂದೀಪ್ ದೇವಾಡಿಗ ಬೊಕ್ಕ ಬಾಕ್ಸಿಂಗ್ ಕ್ರೀಡಾಪಟು ಸಚಿನ್ ಪೂಜಾರಿ, ಸಮಾಜ ಸೇವಕೆರ್ ಮಾಧವ ಪೂಜಾರಿ ಮೊಕ್ಲೆಗ್ ಶಾಲ್ ಪೊದೆಪಾದ್ ನೆಂಪುದ ಕಾಣಿಕೆ ಕೊರ್ದು ಸನ್ಮಾನ ಮಲ್ತೆರ್.

ಲೇಸ್ ಡ್ ಊರುದ ಅಶಕ್ತ ಎಲ್ಯ ಬಾಲೆದ ವೈದ್ಯಕೀಯ ಕರ್ಚ್ ಗಾದ್ ಸಹಾಯ ನಿಧಿನ್ ಸಮರ್ಪಣೆ ಮಲ್ತೆರ್. ದುಬೈದ ತುಳುವೆರೆನ್ ಬೆದ್ರ, ಕಾರ್ಲ, ಕಾಸ್ರೋಡು, ಬಾರಕೂರ್ ಪನ್ಪುನ ಪುದರ್ ದ ನಾಲ್ ಕೂಟ ರಚನೆ ಮಲ್ತ್ ದ್ ತುಳುನಾಡ್ ದ ಗೊಬ್ಬುಲಾಯಿನ ಕಬಡ್ಡಿ, ಲಗೋರಿ, ಬಲ್ಲ್ ಒಯಿಪುನ, ಕಾಕಜಿದ ಗೊಬ್ಬು, ಸೈಕಲ್ ಚಕ್ರ ಗಿಡಪುನೇ, ತುಳು ಸಂಸ್ಕೃತಿದ ರಸಪ್ರೆಶ್ನೆ, ಕಂಗ್ ದ ಪಾಲೆಡ್ ಒಯಿಪುನ ಗೊಬ್ಬು, ಮಡಲ್ ಮುಡೆಪುನ ಪಂತೊ ಇಸೇಸವಾದ್ ಪೊಂಜೋವುಲೆಗ್ ಬೊಕ್ಕ ಜೋಕ್ಲೆಗ್ ಬೇತೆ ಬೇತೆ ತರಹದ ಗೊಬ್ಬುಲೆನ್ ಆಯೋಜನೆ ಮಲ್ದೆರ್.

ಮಧ್ಯಾಹ್ನ ಕಜೆ ಅರಿತ್ತ ಗಂಜಿ, ಕುಡುತ್ತ ಚಟ್ನಿ, ಕಡ್ಲೆ ಬಲ್ಲ್ಯಾರ್, ನುಂಗೆಲ್ ನಂಗ್ ಫ್ರೈ, ಕಾಯಿ ಕುಕ್ಕುದ ತಲ್ಲಿ ಬೊಕ್ಕ ಕಡ್ಲೆ ಸಲಾಯಿದ ಪಾಯಸನ್ ಊರುರ್ದ್ ಕನಪಾಯಿನ ಪಾಲೆದ ಬಟ್ಟಲ್ ಡ್ ವನಸ್ ದ ವ್ಯವಸ್ಥೆ ಮಲ್ತ್ ದಿತ್ತೆರ್.

ಬೊಕ್ಕ ಗೆಂದಿನ ಕೂಟಲೆಗ್ ಪ್ರಶಸ್ತಿ ಪತ್ರ, ಪದಕ ಕೊರ್ದು ಮಾನಾದಿಗೆ ಮಲ್ತೆರ್. ಲೇಸ್ ಗ್ ಸಹಕಾರ ಕೊರ್ನ ದಾನಿಲೆಗ್ ನೆಂಪುದ ಕಾಣಿಕೆ ಕೊರ್ದು ಅಭಿನಂದನೆ ಸಂದಾಯೆರ್. ನೊವೆಲ್ ಅಲ್ಮೇಡಾ ಬೊಕ್ಕ ಅಮರ್ ನಂತೂರ್, ಶೋಭಿತ ಪ್ರೇಮ್ ಜೀತ್, ಜಯ ಪ್ರೇಮಾನಂದ್, ಲಕ್ಷ್ಮೀ ಪೂಜಾರಿ, ಅಶ್ವಿನಿ ಸತೀಶ್, ಲಿಖಿತ ದೀಪಕ್, ಶ್ವೇತಾ
ಸಂದೀಪ್ ಗೊಬ್ಬುದ ನಿರ್ವಹಣೆ ಮಲ್ತೆರ್.

500 ರ್ದ್ ಎಚ್ಚ ದುಬೈದ ಬಂಧು ಬಾಂಧವೆರ್ ಈ ಲೇಸ್ ಡ್ ಪಾಲ್ ಪಡೆದ್ ಕುಸಿ ಪಡೆಯೆರ್. ಸಂಸ್ಥೆದ ಕಾರ್ಯದರ್ಶಿ ರೀತು ಅಂಚನ್ ಕುಲಶೇಖರ ಎದ್ಕೊಂದು ಸಂಸ್ಥೆದ ಸಾಧನೆನ್ ತೆರಿಪಾದ್, ಲೇಸ್ ನ್ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್. ತುಳು ಪಾತೆರ್ ಗ ತುಳು ಒರಿಪಾಗದ ಗುರ್ಕಾರೆ, ಸರ್ವಸದಸ್ಯೆರೆನ ಪಾಲ್ವಿಕೆ ಬೊಕ್ಕ ಸಂಪೂರ್ಣ ಸಹಕಾರಡ್ ಲೇಸ್ ಯಶಸ್ವಿಯಾದ್ ಮುಗಿತಲ ಆಂಡ್.