ಬೆದ್ರಡ್ ಎಲ್ಲೆ ಕೋಟಿ ಚೆನ್ನಯ ಜೋಡು ಕರೆ ಕಂಬುಲ

ಬೆದ್ರ: ಕಡಲಕೆರೆ ನಿಸರ್ಗಧಾಮಡ್ ಕೋಟಿ ಚೆನ್ನಯ ಜೋಡು ಕರೆ ಕಂಬುಲ ಸಮಿತಿದ ಮುತಾಲಿಕೆಡ್ ನಡಪುನ 20ನೇ ವರ್ಷದ ಕಂಬುಲ ಎಲ್ಲೆ (ಡಿ.24) ನಡಪರೆ ಉಂಡು.

ಈ ಕಂಬುಲಡ್ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಯಿ, ಪ್ರವಾಸೋದ್ಯಮ ಸಚಿವೆರ್ ಆನಂದ್ ಸಿಂಗ್ ಬೊಕ್ಕ ಸಚಿವೆರ್, ಶಾಸಕೆರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕಂಬುಲ ಸಮಿತಿದ ಅಧ್ಯಕ್ಷೆರ್, ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಪಂಡೆರ್. ಗುರುವಾರ ಪತ್ರಿಕಾಗೋಷ್ಠಿಡ್ ಈ ಬಗೆಟ್ ಮಾಹಿತಿ ಕೊರ್ನ ಆರ್, “ಡಿ.24ಕ್ ಬೊಲ್ಪುಗು 7 ಗಂಟೆಗ್ ಚೌಟರ ಅರಮನೆತ ಕುಲದೀಪ್ ಎಂ. ಅಧ್ಯಕ್ಷತೆಡ್ ನಡಪುನ ಉದಿಪನ ಲೇಸ್ ಡ್ ಜಿಲ್ಲಾಧಿಕಾರಿ ಎಂ. ಆರ್. ರವಿಕುಮಾರ್ ರಾಣಿ ಅಬ್ಬಕ್ಕ ಪ್ರತಿಮೆಗ್ ಮಾಲೆ ಪಾಡಿಯೆರ್ ಉಲ್ಲೆರ್. ವೇದ ಮೂರ್ತಿ ಈಶ್ವರ್ ಭಟ್, ಧರ್ಮ ಗುರುಕುಲಾಯಿನ ರೆ. ಫಾ ವಾಲ್ಟರ್ ಡಿಸೋಜ, ಮೌಲಾನ ಝಿಯಾವುಲ್ ಹಕ್ ಬೊಕ್ಕ ಉದ್ಯಮಿ ಸುಧೀರ್ ಹೆಗ್ಡೆ ಉದಿಪನ ಮಲ್ಪೆರೆ ಉಲ್ಲೆರ್. ಬಯ್ಯಗ್ 5 ಗಂಟೆಗ್ ನಡಪುನ ಸಭಾ ಲೇಸ್ ಡ್ ಬೊಂಬೈದ ಉದ್ಯಮಿ, ಸಮಾಜ ಸೇವಕೆರ್ ಕನ್ಯಾನ ಸದಾಶಿವ ಶೆಟ್ಟಿ ಮೆರೆಗ್ ಕಂಬುಲದ ಗೌರವ ತಮ್ಮನ ನಡಪುಂಡು. ಬೊಕ್ಕ ಎರ್ಲೆನ ಯಜಮಾನೆರ್, ಪ್ರಗತಿಪರ ಕೃಷಿಕೆರ್ ಬಾಡ ಪೂಜಾರಿ ಇರುವೈಲ್ ಪಾಣಿಲ ಮೆರೆಗ್ ಮರಣೋತ್ತರ ಗೌರವ ಪ್ರಶಸ್ತಿ ಕೊರಿಯೆರೆ ಉಂಡು. ಹಿರಿಯ ದೈವ ಪಾತ್ರಿ ಅಣ್ಣು ಶೆಟ್ಟಿ ಲಾಡಿ, ಎರು ಗಿಡಪುನಾರ್ ಸಂಜೀವ ಪೂಜಾರಿ ರೆಂಜಾಳ, ಲೂಯಿಸ್ ಸಾಲ್ದಾನ ವಾಲ್ಪಾಡಿ, ಹಿರಿಯ ದೈವ ನರ್ತಕೆರ್ ಕಾಳು ಪಾಣಾರ ಕಡಂದಲೆ, ಕ್ರೀಡಾ ರತ್ನ ಮರೋಡಿ ಶ್ರೀಧರ್ ಮೊಕ್ಲೆಗ್ ತಮ್ಮನ, ಬೊಕ್ಕ ಯುವ ಪ್ರತಿಭೆ ಅರುಣ್ ಭಟ್ ಮೆರೆಗ್ ಗೌರವ ಪುರಸ್ಕಾರ ನಡಪರೆ ಉಂಡು ಪಂದ್ ಪಂಡೆರ್.

ಕಡಲಕೆರೆ ಅಭಿವೃದ್ದಿಗ್ 9.90 ಕೋಟಿ ಪ್ರಸ್ತಾವನೆ:
“ಕಡಲ ಕೆರೆನ್ ಸಮಗ್ರವಾದ್ ಅಭಿವೃದ್ದಿ ಮಲ್ತ್ ದ್, ಪ್ರವಾಸಿತಾಣ ಮಲ್ಪುನ ದಿಟ್ಟಿಡ್ 9.90 ಕೋಟಿ ರೂ. ಯೋಜನೆನ್ ಪಾಡ್ದ್ಂಡ್. ಸರಕಾರಗ್ ಈ ಪ್ರಸ್ತಾವನೆ ಸಂದಾದ್ಂಡ್. ಮಂಜೂರಾತಿ ಹಂತಡ್, ಸೈನಿಕೆರೆನ ನೆಂಪುಗಾದ್ ಪಾರ್ಕ್ ಒಂಜೆನ್ ಅಭಿವೃದ್ದಿ ಮಲ್ಪೆರೆ ಉಂಡು. ಆಯಿಕ್ 50 ಲಕ್ಷ ರೂ. ಅನುದಾನ ಮಂಜೂರಾತ್ಂಡ್ ಪಂದ್ ಪಂಡೆರ್. ಪತ್ರಿಕಾಗೋಷ್ಠಿಡ್ ಗೋಪಾಲ ಕಡಂಬ, ಜಿಲ್ಲಾ ಕಂಬುಲ ಸಮಿತಿದ ಅಧ್ಯಕ್ಷೆರ್ ಏರ್ಮಾಳ್ ರೋಹಿತ್ ಹೆಗ್ಡೆ, ಜಿಲ್ಲೆ ಸಂಚಾಲಕೆರ್ ಸುರೇಶ್ ಕೆ.ಪೂಜಾರಿ, ಕಂಬುಲ ಸಮಿತಿದ ಕಾರ್ಯದರ್ಶಿ ರಂಜಿತ್ ಪೂಜಾರಿ, ಮುಡಾ ಅಧ್ಯಕ್ಷೆರ್ ಮೇಘನಾಥ್ ಶೆಟ್ಟಿ, ಪುರಸಭೆ ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ನಾಗರಾಜ್ ಪೂಜಾರಿ ಇತ್ತೆರ್.

ಶೂನ್ಯ ತ್ಯಾಜ್ಯ ಕಂಬುಲ ಮಲ್ಪುನ ದಿಟ್ಟಿಡ್ ಸಮಿತಿ ಬೊಕ್ಕ ಪುರಸಭೆ ಯೋಜನೆ ಪಾಡ್ದ್ಂಡ್. ಬೇರದಕುಲು ತೆನಸ್ ದ ಸೊತ್ತುಲೆನ್ ಪಾಲೆ ಬೊಕ್ಕ ಇರೆಟ್ಟ್ ಕೊರಿಯರೆ ಸೂಚನೆ ಕೊರಿಯೆರ್. ಕಂಬುಲದ ಯಜಮಾನೆರ್ ಈ ದಿಟ್ಟಿಡ್ ಸಹಕಾರ ಮಲ್ಪೊಡು ಪಂದ್ ಪುರಸಭೆ ಅಧ್ಯಕ್ಷೆರ್ ಪ್ರಸಾದ್ ಕುಮಾರ್ ಬಿನ್ನಾಪು ಮಲ್ತೆರ್.

250 ಜೋಡಿ ಎರ್ಲು:
“ಈ ಸರ್ತಿದ ಕಂಬುಲಡ್ 250 ಜತೆ ಎರ್ಲುಲು ಪಾಲ್ ಪಡೆವುನ ನಿರೀಕ್ಷೆ ಉಂಡು. ಬೊಲ್ಪುಗು 8 ಗಂಟೆಗ್ ಸುರು ಆಪುಂಡು. ಯಜಮಾನೆರ್ ನಿಘಂಟ್ ಮಲ್ತಿನ ಪೊರ್ತುದುಲಯಿ ಎರ್ಲೆನ್ ಕಂಬುಲ ಕರೆಕ್ ಜಪ್ಡಾವೊಡು ಪಂದ್ ಸಮಿತಿದ ಕೋಶಾಧಿಕಾರಿ ಭಾಸ್ಕರ್ ಎಸ್. ಕೋಟ್ಯಾನ್ ತೆರಿಪಾದೆರ್.

✍️ಜಗದೀಶ್ ಪೂಜಾರಿ
ಬೆದ್ರ