ಮಕ್ಕಾ ಯಾತ್ರೆ ಮಲ್ಪರೆ ಅಂಚನೆ ಈಜಿಪ್ಟ್ ಡ್ ಕಲ್ಪರೆ ಸೈಕಲ್‌ಡ್ ಪಿದಡ್ದಿನ ವಿಟ್ಲದ ಸಾಬಿತ್

ವಿಟ್ಲ ಕೈತಲ್‌ದ ಬೈರಿಕಟ್ಟೆದ ಜವನೆ ಸಾಬಿತ್ ಪನ್ಪಿನಾರ್ ಮಕ್ಕಾ ಯಾತ್ರೆ ಅಂಚನೆ ಈಜಿಪ್ಟ್ ಡ್ ಎಡ್ಡೆ ರೀತಿದ ಧಾರ್ಮಿಕ ವಿದ್ಯಾಭ್ಯಾಸ ಪಡೆಯೊನರೆ 10 ದೇಶಲೆಗ್ 15,000 ಕಿ.ಮೀ. ಸೈಕಲ್ ಯಾತ್ರೆಡ್ ಪೋಯರೆ ಉಲ್ಲೆರ್. ಅಕ್ಟೋಬರ್ 20 ಗ್ ಕೇರಳದ ತಿರುವನಂತಪುರರ್ದ್ ಯಾತ್ರೆ ಪಿದಡ್ಯರೆ ಉಂಡು.

ಈ ಬಗೆಟ್ ಕುಡ್ಲದ ಜನತಾ ಡಿಲಕ್ಸ್ ಹೋಟೆಲ್‌ಡ್ ನಡತಿನ ಪತ್ರಿಕಾಗೋಷ್ಠಿಡ್ ಸಾಬಿತ್ ಪಾತೆರ್ದ್, ಅಕ್ಟೋಬರ್ 19ಕ್ಕ್ ಕನ್ಯಾಕುಮಾರಿ ತಿರುವನಂತಪುರರ್ದ್ ಪಿದಾಡ್ದ್ ಕರ್ನಾಟಕ, ಗೋವಾ, ಮಹಾರಾಷ್ಟ್ರ, ರಾಜಸ್ಥಾನ, ಹರಿಯಾಣ, ಪಂಜಾಬ್, ಜಮ್ಮು ಕಾಶ್ಮೀರ, ಲಡಾಖ್‌ಗ್ ಪೋದು ಪಾಕಿಸ್ತಾನ, ಅಫ್ಘಾನಿಸ್ತಾನ, ಇರಾನ್, ಯುಎಇ, ಸೌದಿ ಮದೀನಾಗ್ ಪೋಪಿನ ಉದ್ದೇಶ ಉಂಡು. ಅಲ್ಪರ್ದ್ ಆಫ್ರಿಕಾ ಖಂಡದ ಈಜಿಪ್ಟ್ ದ ಕೈರಾಗ್ ಪೋಪೆ. ಅಲ್ಪ ರಡ್ಡ್ ವರ್ಷ ಕಲ್ಪುನ ಉದ್ದೇಶ ಉಂಡು ಪಂದ್ ಪಂಡೆರ್.
ಹಾಫಿಲ್ ಅಹ್ಮದ್ ಸಾಬಿತ್ ಮೇರ್ ಇತ್ತೆ ಕೇರಳನ್ ಸೈಕಲ್‌ಡ್ ಸುತ್ತ್ ದು ಅಭ್ಯಾಸ ಇತ್ತಿನಾರ್. ಮದೀನಾ ಬೊಕ್ಕ ಈಜಿಪ್ಟ್ ದ ವಿಶ್ವವಿದ್ಯಾನಿಲಯಗ್ ಸೈಕಲ್‌ದ ಮುಖೇನ 15,000 ಕಿಲೋಮೀಟರ್ ಸವಾರಿ ಮಲ್ತ್ ದ್ ಭೇಟಿ ಮಲ್ಪರೆ ಉಲ್ಲೆರ್. ವಿಟ್ಲ ಬೈರಕಟ್ಟೆದ ಅಬ್ದುಲ್ ರಹಮಾನ್ ಮಸ್ಲಿಯಾರ್ ಬೊಕ್ಕ ಹವ್ವಾರ ಮಗೆ ಸಾಬಿತ್ ಮೇರ್ ಕುರ್ ಆನ್ ಕಂಠಪಾಠ ಬೊಕ್ಕ ಉಪನ್ಯಾಸ ಕೊರ‍್ಪುನೆಟ್ಟ್ ಇತ್ತೆ ಸಾಧನೆ ಮಲ್ತಿನಾರ್. ಮೇರೆಗ್ ಇನ್‌ಸ್ಟಾಗ್ರಾಮ್‌ಡ್ 70,000ರ್ದ್ ಎಚ್ಚ ಫಾಲೋವರ‍್ಸ್ ಉಲ್ಲೆರ್. ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಮಲ್ತ್ ದೆರ್. ಪತ್ರಿಕಾಗೋಷ್ಠಿಡ್ ರಶೀದ್ ವಿಟ್ಲ, ಅಬೂಬಕರ್, ಮುಹಮ್ಮದ್ ಸಾದಿಕ್ ಇತ್ತೆರ್.