December 2023

ಮುಲ್ಕಿ ಸೀಮೆದ ಅರಸು ಕಂಬುಲ ವೈಭವ 2023: ಛಾಯಾಚಿತ್ರ ಪಂತೊದ ಪೋಸ್ಟರ್ ಬುಡುಗಡೆ

ಮುಲ್ಕಿ: ಮುಲ್ಕಿಡ್ ಡಿ.24 ಕ್ಕ್ ನಡಪರೆ ಇಪ್ಪುನ ಮುಲ್ಕಿ ಸೀಮೆದ ಅರಸು ಕಂಬುಲ ವೈಭವ 2023 ತ್ತ ಸೌತ್ ಕೆನರಾ ಫೋಟೋಗ್ರಾಫರ್ ಎಸೋಸಿಯೇಷನ್ ಮುಲ್ಕಿ ವಲಯದ ಸದಸ್ಯೆರೆನ ಛಾಯಾಚಿತ್ರ ಪಂತೊದ ಪೋಸ್ಟರ್ ಬುಡುಗಡೆ ಲೇಸ್ ಪಡುಪಣಂಬೂರು ಮುಲ್ಕಿ ಸೀಮೆದ ಅರಮನೆಟ್ಟ್ ನಡತ್ಂಡ್.

ಪೋಸ್ಟರ್ ಬಿಡುಗಡೆ ಮಲ್ತಿನ ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್ ಪಾತೆರ್ದ್, ಪಿರಕ್ ದ ವೈಭವನ್ ನೆಂಪು ಮಲ್ಪುನ ಅರಸು ಕಂಬುಲ ಸಾಂಪ್ರದಾಯಿಕವಾದ್ ನಡತೊಂದು ಉಂಡು. ಬೇತೆ ಬೇತೆ ಪಂತೊಲೆನ ಮುಖೇನ ಕಂಬುಲಗ್ ಪ್ರೋತ್ಸಾಹ ಕೊರ್ಪುನ ಸಂಸ್ಥೆಲೆನ ಸಹಕಾರನ್ ಮೆಚ್ಚೊಡಾಯಿನವು ಪಂದ್ ಪಂಡೆರ್.

ಎಸ್ ಕೆ ಪಿ ಎ ಮುಲ್ಕಿ ವಲಯದ ಗುರ್ಕಾರೆ ಪ್ರಕಾಶ್ ಸುವರ್ಣ ಪಾತೆರ್ದ್, ಕಂಬುಲದ ಛಾಯಾಚಿತ್ರ ಪಂತೊಡು ಸಂಸ್ಥೆದ ಸದಸ್ಯೆರ್ ಮಾತ್ರ ಪಾಲ್ ಪಡೆಯೆರೆ ಅವಕಾಶ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ಗೌತಮ್ ಜೈನ್ ಮುಲ್ಕಿ ಅರಮನೆ, ಎಸ್ ಕೆಪಿಎ ಮುಲ್ಕಿ ವಲಯದ ಮಾಜಿ ಗುರ್ಕಾರೆ ನವೀನ್ ಚಂದ್ರ ಬೊಕ್ಕ ಸಂಸ್ಥೆದ ಪದುಕೆರ್ ಪಾಲ್ ಪಡೆದಿತ್ತೆರ್.

ನಂದಳಿಕೆ ಇಂಚರ ಸೇವಾ ಬಳಗರ್ದ್ ಬಾಲೆದ ಚಿಕಿತ್ಸೆಗ್ ಪನವುದ ಸಕಾಯ

ಕಾರ್ಲ: ನಂದಳಿಕೆ ಇಂಚರ ಸೇವಾ ಬಳಗ (ರಿ.) ಒಂಜಿ ಬಡಪತ್ತ್ ಕುಟುಂಬಗ್ ಪನವುದ ಸಕಾಯನ್ ಮಲ್ದ್ಂಡ್.

ಕಾರ್ಲ ತಾಲೂಕ್ ದ ಪಡ್ಡೆದ್ರ ಸುರೇಖಾ ಬೊಕ್ಕ ಪ್ರಶಾಂತ್ ಮೊಕ್ಲೆನ 8 ತಿಂಗೊಲ್ದ ಧ್ರುವಿ ಪೂಜಾರಿ ಪನ್ಪುನ ಬಾಲೆ ಲಿವರ್ ಸಮಸ್ಯೆರ್ದ್ ನರಲೊಂದು ಉಂಡು. ಈ ಬಾಲೆದ ಚಿಕಿತ್ಸೆಗ್ 30 ಲಕ್ಷದ ಅವಶ್ಯಕತೆ ಉಂಡು ಪಂದ್ ಬೆಂಗ್ಲೂರು ಕೆ.ಎಂ.ಸಿ ಆಸ್ಪತ್ರೆದ ವೈದ್ಯೆರ್ ತೆರಿಪಾದೆರ್.

ಅಂಚಾದ್ ಬಾಲೆದ ಚಿಕಿತ್ಸೆದ ಆಸ್ಪತ್ರೆ ಕರ್ಚಿಗ್ ಡಿ.17 ಬೊಕ್ಕ 18 ಕ್ಕ್ ತಿಬಾರ್ ಶ್ರೀ ಕೊಡಮಂದಾಯ ದೈವೊಲ್ಯಡ್ ಬೊಕ್ಕ ಡಿ.18 ಕ್ಕ್ ಸೂಡ ಶ್ರೀ ಸುಬ್ರಮಣ್ಯ ದೇವಲ್ಯಡ್ ನಿಧಿ ಸಂಗ್ರಹ ಮಲ್ತೆರ್. ನೆಟ್ಟ್ ಮೊಕ್ಲೆಗ್ 1,18,075/-ರೂ. ಸಂಗ್ರಹ ಆತ್ಂಡ್.

ಸಮ್ಮೇಳನದ ಮುಕೇನ ವಿಶ್ವದ ಬಂಟೆರೆನ್ ಮಾತ ಒಂಜೇ ಕಡೆಕ್ಕ್ ಸೇರ್ಸಾಯಿನ ತೃಪ್ತಿ ಉಂಡು: ಐಕಳ ಹರೀಶ್ ಶೆಟ್ಟಿ

ಮುಲ್ಕಿ: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮುತಾಲಿಕೆಡ್ ಒಡಿಪುಡ್ ನಡತಿನ ವಿಶ್ವ ಬಂಟರ ಸಮ್ಮೇಳನ 2023 ತ್ತ ಕರ್ಚಿ ವೆಚ್ಚದ ಸಭೆ ಮುಲ್ಕಿ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣದ ಪ್ರವೀಣ್ ಭೋಜ ಶೆಟ್ಟಿ ಆಡಳಿತ ಕಚೇರಿಡ್ ಇಂಚೊಗು ನಡತ್ಂಡ್.

ಸಭೆತ್ತ ಗುರ್ಕಾರ್ಮೆನ್ ಒಯಿಸೊನ್ನ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ ಪಾತೆರ್ದ್,ವಿಶ್ವ ಬಂಟೆರೆನ ಸಮ್ಮೇಳನದ ಮುಖೇನ ಮಾತಾ ಬಂಟ ಬಂಧುಲೆನ್ ಒಂಜೇ ಚಾವಡಿಡ್ ಒಟ್ಟು ಸೇರ್ಸಾಯಿನ ತೃಪ್ತಿ ಜಾಗತಿಕ ಬಂಟೆರೆನ ಸಂಘದ ಒಕ್ಕೂಟಗ್ ಉಂಡು. ಒಡಿಪುಡ್ ರಡ್ಡ್ ದಿನತ್ತ ಕ್ರೀಡೋತ್ಸವ ಬೊಕ್ಕ ಸಾಂಸ್ಕೃತಿಕ ಕಲೋತ್ಸವದ ಮುಖೇನ ಕ್ರೀಡಾಪಟುಕ್ಲೆನ್ ಬೊಕ್ಕ ಕಲಾವಿದೆರೆನ್ ಒಟ್ಟು ಸೇರ್ಸಾದ್ ಕೊರ್ನ ಲೇಸ್ ಪೊರ್ಲುಡು ನಡಪರೆ ಸಮಾಜದ ಮಾತೆರ್ಲಾ ಸಹಕಾರ ಕೊರ್ತೆರ್. ದುಂಬುದ ದಿನಟ್ಟ್ ಒಕ್ಕೂಟ ಬೇತೆ ಬೇತೆ ಯೋಜನೆಲೆಡ್ ಸಮಾಜದ ಪರ ಬೇಲೆ ಮಲ್ಪುಂಡು ಪಂದ್ ಪಂಡೆರ್.

ಸಭೆಟ್ಟ್ ಒತ್ತು ಗುರ್ಕಾರೆ ಕರ್ನಿರೆ ವಿಶ್ವನಾಥ್ ಶೆಟ್ಟಿ, ಗೌರವ ಕಾರ್ಯದರ್ಶಿ ಜಯಕರ್ ಶೆಟ್ಟಿ ಇಂದ್ರಾಳಿ, ಕೋಶಾಧಿಕಾರಿ ಉಳ್ತೂರು ಮೋಹನದಾಸ್ ಶೆಟ್ಟಿ, ಜತೆ ಕಾರ್ಯದರ್ಶಿ ಚಂದ್ರಹಾಸ ಡಿ.ಶೆಟ್ಟಿ ರಂಗೋಲಿ, ಬೇತೆ ಬೇತೆ ಸಮಿತಿಲೆನ ಸಂಚಾಲಕೆರ್, ಸಹ ಸಂಚಾಲಕೆರ್, ಕಾರ್ಯಕಾರಿ ಸಮಿತಿ ಸರ್ವಸದಸ್ಯೆರ್, ಒಕ್ಕೂಟದ ಮಾಜಿ ಕೋಶಾಧಿಕಾರಿ ಕೊಲ್ಲಾಡಿ ಬಾಲಕೃಷ್ಣ ರೈ, ಆಡಳಿತಾಧಿಕಾರಿ ಸಚ್ಚಿದಾನಂದ ಹೆಗ್ಡೆ ಕೊಳ್ಕೆಬೈಲ್, ಸಿಬ್ಬಂದಿಲು ಇತ್ತೆರ್.

ಬಂಜಿ ಬೇನೆಗ್ ಇಲ್ಲದ ಮರ್ದ್

ಲವಂಗ ತಿನ್ಪುನೆರ್ದ್ ಬಂಜಿ ಬೇನೆ, ಅಜೀರ್ಣ ನಿವಾರಣೆ ಮಲ್ಪುಂಡು. ಕಕ್ಕುನೇ ಗ್ಯಾಸ್ಟ್ರಿಕ್‌ ಸಮಸ್ಯೆಗ್ ಉಂದು ಸಹಕಾರಿ ಆತ್ಂಡ್.

ಪುದೀನಾ ತಿಂದ್ಂಡಲ ಬಂಜಿಬೇನೆ ಬೊಕ್ಕ ಕಕ್ಕುನ ಕಮ್ಮಿ ಆಪುಂಡು. ಅತ್ತಂದೆ ಶುಂಠಿ ತಿಂದ್ಂಡಲ ಆಪುಂಡು.

ಬೆಚ್ಚ ನೀರ್ ಗ್ ನಿಂಬೆ ರಸ ಬೆರೆಸಾದ್ ಪರ್ಂಡ, ಪರ್ಂದ್ ತಿಂಡ, ಒಮ ಅತ್ತಂಡ ಅವೆತ್ತ ನೀರ್ ನ್ ಪರ್ಂಡ ಬಂಜಿ ಬೇನೆ ಕಮ್ಮಿ ಆಪುಂಡು.

UPSC ಸಂದರ್ಶನ ವೇಳಾಪಟ್ಟಿ ಬುಡುಗಡೆ!

UPSC ಮುಖ್ಯ ಪರೀಕ್ಷೆಡ್ ಅರ್ಹತೆ ಪಡೆಯಿನ ಅಭ್ಯರ್ಥಿಲೆಗ್ ಸಂದರ್ಶನದ ವೇಳಾಪಟ್ಟಿನ್ ಬುಡುಗಡೆ ಮಲ್ದ್ಂಡ್.

ಜ.2 ರ್ದ್ ಫೆ.16 ಮುಟ್ಟ ವೈಯಕ್ತಿಕ ಸಂದರ್ಶನ ನಡಪರೆ ಉಂಡು. 2844 ಜನ ಈ ಸಂದರ್ಶನಗ್ ಅರ್ಹತೆ ಪಡೆತೆರ್. ಸುರುತ್ತ 1026 ಅಭ್ಯರ್ಥಿಲೆಗ್ ಸಂದರ್ಶನದ ವೇಳಾಪಟ್ಟಿನ್ ಬುಡುಗಡೆ ಮಲ್ದ್ಂಡ್. ಈ ದಿಟ್ಟಿಡ್, ಇ-ಕಾಲ್ ಪತ್ರನ್ ಬೇಗಡೇ ವೆಬ್‌ಸೈಟ್‌ಡ್ ಪ್ರಕಟ ಮಲ್ಪುವ ಪಂದ್ ಪಂತ್ಂಡ್.

CSIR ಡ್ 444 ಬೇಲೆ

ಕೌನ್ಸಿಲ್ ಆಫ್ ಸೈಂಟಿಫಿಕ್ ಅಂಡ್ ಇಂಡಸ್ಟ್ರಿಯಲ್ ರಿಸರ್ಚ್ ಡ್ (CSIR) ಖಾಲಿ ಇಪ್ಪುನ 444 ಬೇಲೆಗ್ ಅರ್ಜಿ ಸಂದಾವೊಲಿ.

ಅಭ್ಯರ್ಥಿಲು ಜ.12 ತ್ತೊಲಯಿ ಆನ್ ಲೈನ್ ಡ್ ಒವ್ವೇ ಪದವಿ ಆಯಿನಕುಲು ಅರ್ಜಿ ಸಂದಾವೊಲಿ. ಸೆಕ್ಷನ್ ಆಫೀಸರ್ 75, ಸಹಾಯಕ ಸೆಕ್ಷನ್ ಆಫೀಸರ್ 368 ಬೇಲೆ ಉಂಡು.

ಅಭ್ಯರ್ಥಿಲೆನ್ ಲಿಖಿತ ಪರೀಕ್ಷೆದ ಆಧಾರದ ಮಿತ್ತ್ ಆಯ್ಕೆ ಮಲ್ಪರೆ ಆಪುಂಡು. ನೆಟ್ಟ್ 45 ಸಾರ ರೂ. ರ್ದ್ 1,40,000 ರೂ. ಸಂಬಳ ಉಂಡು.

ನಾಸಿಕ್ ನಾಕ ಶ್ರೀ ಅಯ್ಯಪ್ಪ ಭಕ್ತ ಸಮಿತಿದ ವರ್ಷದ ಉಚ್ಚಯ

ನಾಸಿಕ್ ನಾಕ ಶ್ರೀ ಅಯ್ಯಪ್ಪ ಭಕ್ತ ಸಮಿತಿದ ವರ್ಷದ ಉಚ್ಚಯ ಬೊಕ್ಕ ಮಹಾ ಅನ್ನಸಂತರ್ಪಣೆ ಡಿ.17 ಅಯಿತಾರದಾನಿ ಕಾಂಡೆ 10 ಗಂಟೆಡ್ದ್ ಬಯ್ಯ 4:30 ಗಂಟೆ ಮುಟ ಶರ್ಮ ಮಂಗಳ ಕಾರ್ಯಾಲಯಡ್ ಬಾರಿ ಗೌಜಿಡ್ ನಡತ್ಂಡ್.

ಶ್ರೀ ದುರ್ಗಾಪರಮೇಶ್ವರಿ ಭಜನಾಮಂಡಳಿ ಸಾತ್ಪುರ ಬೊಕ್ಕ ಶ್ರೀ ಭ್ರಾಮರಿ ಮಹಿಳಾ ಭಜನಾ ಮಂಡಳಿ ಮಹಾತ್ಮಾನಗರ ಮೊಕೆಲೆನ ಭಜನೆಡ್ದ್ ಶುರು ಆಯಿನ ಕಜ್ಜೊ ವಿವಿಧ ಸಮಾಜಪರ ಕಜ್ಜೊಲೆಡಪ್ಪ, ಧಾರ್ಮಿಕ ಕಾರ್ಯಕ್ರಮೊಲು ಕೆಲವು ಮುಖ್ಯ ಭಿನ್ನೆರೆನ ಉಪಸ್ಥಿತಿಡ್, ಗುರುಸ್ವಾಮಿಲಾಯಿನ ಬಿ.ರಾಜ ಗುರುಸ್ವಾಮಿಲೆನ ಮುತಾಲಿಕೆಡ್,ಸುರೇಶ್ ಶೆಟ್ರೆನ ಬೊಕ್ಕ ಪ್ರದೀಪ್ ಶೆಟ್ರೆನ ಜಬದಾರಿಕೆಡ್ ಶ್ರೀ ಸ್ವಾಮಿನ ವರ್ಸೊಚ್ಚಯ ಬಾರಿ ಯಶಸ್ವಿಯಾದ್ ನೆರವೇರ್ಂಡ್.

ದಿನೇಶ್ ಆರ್.ಶೆಟ್ಟಿ, ರವೀಂದ್ರ ಕೆ.ಶೆಟ್ಟಿ, ಹರೀಶ್ ಆಳ್ವ,ಜಯಪ್ರಕಾಶ್ ಶೆಟ್ಟಿ, ಪ್ರಮೋದ್ ಶೆಟ್ಟಿ, ಸತೀಶ್ ಶೆಟ್ಟಿ ಕುಂಟಿಬೈಲ್, ಸುರೇಶ್ ಪೂಜಾರಿ, ವಿಶ್ವನಾಥ ದೇವಾಡಿಗ ಅಂಚೆನೆ ಕಾರ್ಯಕಾರಿ ಸಮಿತಿದ ಮಾತ ಸದಸ್ಯರೆನ ಒಗ್ಗಟ್ಟ್ ದ ಶ್ರಮೊಡ್ದಾವರ ಈ ದೇವತಾ ಕಜ್ಜೊ ಯಶಸ್ವಿಯಾದ್ ನೆರವೇರ್ಂಡ್.

ಡಿ.25: ಶಾಂತಿನಗರ ಶ್ರೀ ಮಹಾವಿಷ್ಣು ದೇವಲ್ಯಡ್ ರಂಗಪೂಜೆ

ಪುತ್ತೂರು: ಶ್ರೀ ಮಹಾವಿಷ್ಣು ದೇವಲ್ಯದ ಪುನರ್ ಪ್ರತಿಷ್ಠಾಬಂಧ ಬ್ರಹ್ಮಕಲಶಾಭಿಷೇಕ ಉಚ್ಚಯದ ವರ್ಷದ ದಿನತ್ತ ಲೆಕ್ಕೊಡು ಶ್ರೀ ದೇವೆರೆಗ್ ಕ್ಷೇತ್ರದ ತಂತ್ರಿಲಾಯಿನ ಬ್ರಹ್ಮಶ್ರೀ ಕೆಮ್ಮಿಂಜೆ ನಾಗೇಶ ತಂತ್ರಿಲೆನ ಮುತಾಲಿಕೆಡ್ ಡಿ.25 ಕ್ಕ್ ರಾತ್ರೆ ರಂಗಪೂಜೆ ನಡಪರೆ ಉಂಡು.

ಬೊಲ್ಪುಗು ನಿತ್ಯ ಪೂಜೆ, ಗಣಪತಿ ಹವನ, ಶ್ರೀ ನಾಗದೇವೆರೆಗ್ ತಂಬಿಲ, ರಕ್ತೇಶ್ವರೀ ಬೊಕ್ಕ ಪರಿವಾರ ದೈವೊಲೆಗ್ ತಂಬಿಲ ಅಶ್ವಥ ಪೂಜೆ, ರಾತ್ರೆ ರಂಗಪೂಜೆ, ಪ್ರಸಾದ ಪಟ್ಟುನ ಲೇಸ್, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಶಾಂತಿನಗರ ಶ್ರೀ ಮಹಾವಿಷ್ಣು ದೇವಲ್ಯದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಡಿ.23: ಮಾಟುಂಗದ ಮೈಸೂರ್ ಅಸೋಸಿಯೇಶನ್ ಚಾವಡಿಡ್ ದತ್ತಿ ಉಪನ್ಯಾಸ ಲೇಸ್

ಬೊಂಬೈ ಕನ್ನಡ ಸಂಘ (ರಿ.) ದ ಮುತಾಲಿಕೆಡ್ ದತ್ತಿ ಉಪನ್ಯಾಸ ಲೇಸ್ ಡಿ.23 ಸನಿಯಾರ ಬಯ್ಯಗ್ ಮಾಟುಂಗದ ಮೈಸೂರ್ ಅಸೋಸಿಯೇಶನ್ ದ ಸಭಾಂಗಣಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಬೊಂಬೈ ಕನ್ನಡ ಸಂಘದ ಗುರ್ಕಾರೆ ಗುರುರಾಜ ಎಸ್ ನಾಯಕ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಬೊಂಬೈ ವಿದ್ಯಾದಾಯಿನಿ ಸಭಾ (ರಿ.) ದ ಮಾನಾದಿಗೆದ ಕಾರ್ಯದರ್ಶಿ, ಸಮಾಜ ಸೇವಕೆರ್ ಚಿತ್ರಾಪು ಕೆ.ಎಂ ಕೋಟ್ಯಾನ್ ಪಾಲ್ ಪಡೆಯೆರೆ ಉಲ್ಲೆರ್.

ಬೊಂಬೈದ ಕವಯತ್ರಿ, ಲೇಖಕಿ ಲಕ್ಷ್ಮೀ ರಾಜೀವ ಹೇರೂರು ಪುರಣ ಕಾಲದ ಪೊಣ್ಣು ನಡತ್ ಬತ್ತಿನ ಪರಂಪರೆದ ಬಗೆಟ್ಟ್, ಬೊಕ್ಕ ಬೊಂಬೈ ಸೃಜನಾ ಬಳಗದ ಸಂಚಾಲಕಿ, ಲೇಖಕಿ ಪದ್ಮಜಾ ಮಣ್ಣೂರು ಮಾತೃಭಾಷೆದ ಪರಿಕಲ್ಪನೆದ ಬಗೆಟ್ಟ್ ಉಪನ್ಯಾಸ ಕೊರಿಯೆರೆ ಉಲ್ಲೆರ್. ಈ ಲೇಸ್ ನ್ ಸೋಮನಾಥ ಎಸ್ ಕರ್ಕೇರ ಸುಧಾರಿಕೆ ಮಲ್ಪುವೆರ್ ಪಂದ್ ಬೊಂಬೈ ಕನ್ನಡ ಸಂಘದ ಕಾರ್ಯಕಾರಿ ಸಮಿತಿದ ಗುರ್ಕಾರೆ ಜಿ.ಎಸ್ ನಾಯಕ್, ಒತ್ತು ಗುರ್ಕಾರ್ದಿ ಡಾ.ಎಸ್ ಕೆ ಭವಾನಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

11 ವರ್ಷದ ಬಾಲೆಗ್ 50 ವರ್ಷದ ಜನತ್ತ ಹಾರ್ಟ್‌!

11 ವರ್ಷದ ಬಾಲೆಗ್ 50 ವರ್ಷದ ಜನತ್ತ ಹಾರ್ಟ್‌ನ್ ಕಸಿ ಮಲ್ತಿನ ಘಟನೆ ತಿರುಪತಿದ ಶ್ರೀಪದ್ಮಾವತಿ ಹೃದಯ ಮಂದಿರಡ್ ನಡತ್ಂಡ್.

ವನಸ್ಥಲಿಪುರಂ (ತೆಲಂಗಾಣ) ದ ಬಾಲೆಗ್ ಹೃದಯ ಕಸಿ ಮಲ್ದೆರ್. ಅಂಚಾದ್, ಇತ್ತೆನೇ ಬ್ರೈನ್ ಡೆಡ್ ಆಯಿನ 50 ವರ್ಷದ ಜನತ್ತ (ಶ್ರೀಕಾಕುಳಂ) ಕುಟುಂಬಸ್ಥೆರ್ ಅಂಗಾಂಗ ದಾನಗ್ ದುಂಬಾತೆರ್. ಇಂಚಾದ್ ಹೆಲಿಕಾಪ್ಟರ್ ಮುಖೇನ ಮೆರೆನ್ ಲೆತೊಂದು ಬತ್ತ್ ದ್ ಬೊಕ್ಕ ಇಸೇಸ ಇಮಾನದ ಮುಖೇನ ತಿರುಪತಿಗ್ ಲೆತೊಂದು ಬತ್ತ್ ದ್ ಹಾರ್ಟ್ ಕಸಿ ಮಲ್ದೆರ್.