ಕೊರೊನಾ ಸುರು ಆಯಿರ್ನೆದಾವೆರ ರಾಜ್ಯದ ಬಸ್ ಲೆಡ್ ಮಾಸ್ಕ್ ಕಡ್ಡಾಯವಾದ್ ಪಾಡೊಡು ಪಂದ್ ಸಾರಿಗೆ ಸಚಿವೆರ್ ರಾಮಲಿಂಗ ರೆಡ್ಡಿ ತೆರಿಪಾದೆರ್.
ಸರ್ಕಾರದ ಆದೇಶದಂಚೆನೆ ಕೆಎಸ್ ಆರ್ ಟಿಸಿ ಬೊಕ್ಕ ಬಿಎಂಟಿಸಿಡ್ ಪ್ರಯಾಣ ಮಲ್ಪುನ ಪ್ರತಿಯೊರಿ ಪ್ರಯಾಣಿಕೆಲ ಮಾಸ್ಕ್ ಪಾಡ್ದ್ ಪ್ರಯಾಣ ಮಲ್ಪೊಡು ಪಂದ್ ಪಂಡೆರ್.
ಅಂಚೆನೆ ಕೇರಳಗ್ ಪೋದು ಬರ್ಪುನ ಕೆಎಸ್ ಆರ್ ಟಿಸಿ ಬಸ್ ಟ್ಟ್ ಮುನ್ನೆಚ್ಚರಿಕೆ ಕ್ರಮವಾದ್ ಸ್ಯಾನಿಟೈಸರ್ ನ್ ಪಾಡೊಡು ಪಂದ್ ಸಚಿವೆರ್ ಸೂಚನೆ ಕೊರ್ತೆರ್.
7ನೇ ಕ್ಲಾಸ್ ದ ಪೊಣ್ಣುಯೊರ್ತಿ ತಿಗಲೆ ಬೇನೆಡ್ ತೀರ್ ಪೋಯಿನ ಘಟನೆ ಚಿಕ್ಕಮಗಳೂರು ಜಿಲ್ಲೆದ ಮೂಡಿಗೆರೆ ತಾಲೂಕ್ ದ ಜೋಗಣ್ಣನಕೆರೆಟ್ಟ್ ನಡತ್ಂಡ್.
ಇನಿ ಬೊಲ್ಪುಗು ಶಾಲೆಗ್ ಪೋಯೆರೆ ಪಿದಾಡಿನಪಗ ಸೃಷ್ಟಿ (13) ತರೆ ತಿರ್ಗ್ ದ್ ಬೂರ್ದಲ್. ಕೂಡ್ಲೆ ಆಸ್ಪತ್ರೆಗ್ ಲೆತೊಂದು ಪೋನಗ ಪೊಣ್ಣು ತೀರ್ ಪೋತಲ್.
ಮೂಡಿಗೆರೆ ಎಂಜಿಎಂ ಸರ್ಕಾರಿ ಆಸ್ಪತ್ರೆದ ವೈದ್ಯೆರ್ ತಿಗಲೆ ಬೇನೆಡ್ ತೀರ್ ಪೋತಲ್ ಪಂದ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಚಾರಣಪ್ರಿಯೆರ್ ಪಂದ್ ಪುದರ್ ಪಡೆನ ಗಿರಿಗದ್ದೆ ಮಹಾಲಿಂಗ ಭಟ್ ಹುಷಾರ್ ದಾಂತೆ ಇನಿ ಕುಡ್ಲದ ಆಸ್ಪತ್ರೆಡ್ ತೀರ್ ಪೋಯೆರ್. ಕುಮಾರಪರ್ವತ ಚಾರಣಿಗೆರೆಗ್ ಗಿರಿಗದ್ದೆದ ಇಲ್ಲಲ್ ವಿಶ್ರಾಂತಿ, ಕಾಫಿ, ವನಸ್, ತಿಂಡಿ, ಚಹಾ ವ್ಯವಸ್ಥೆ ಮಲ್ತೊಂದು ಇತ್ತಿನ ಮಹಾಲಿಂಗ ಭಟ್ ವಾರದ ಪಿರ ಹಾರ್ಟ್ ಅಟ್ಯಾಕ್ ಆದ್ ಕುಡ್ಲದ ಅತ್ತಾವರ ಕೆಎಂಸಿ ಆಸ್ಪತ್ರೆಡ್ ಚಿಕಿತ್ಸೆ ಪಡೆದ್ ಹುಷಾರ್ ಆದಿತ್ತೆರ್.
ಕುಡ್ಲಡ್ ಇಪ್ಪುನ ಮಗಲ್ ನ ಇಲ್ಲಲ್ ವಿಶ್ರಾಂತಿಡ್ ಇತ್ತಿನ ಅರೆಗ್ ಪಿರ ತಿಗಲೆ ಬೇನೆ ಸುರು ಆದ್ ದೇವೆರೆ ಪಾದ ಸೆರಿಯೆರ್. ಮೇರೆಗ್ ಒರಿ ಮಗೆ, ಮೂಜಿ ಜನ ಪೊಂಜೊಕುಲು ಉಲ್ಲೆರ್. ಕುಮಾರಪರ್ವತ ಸಾದಿದ ಗಿರಿಗದ್ದೆಡ್ ಇಲ್ಲ್ ಇತ್ತಿನ ಮೇರ್ ಮಹಾಲಿಂಗ ಭಟ್ ಗಿರಿಗದ್ದೆ ಭಟ್ರ್ ಪಂದೆ ಪುದರ್ ಪಡೆದಿತ್ತೆರ್. ಕುಮಾರಪರ್ವತ ಚಾರಣಿಗೆರೆಗ್ ಉಪಚಾರ, ಮಾರ್ಗದರ್ಶನ, ಆಹಾರ ತಯಾರ್ ಮಲ್ತ್ ಕೊರ್ಪುನ, ಆಶ್ರಯ ಕೊರ್ಪುನ ಮುಖೆನ ಚಿರಪರಿಚಿತೆರಾದಿತ್ತೆರ್. ಕುಮಾರಪರ್ವತ ಚಾರಣಗ್ ಪೋಪಿನ ಎಚ್ಚಿನಕುಲು ಮೇರೆನ್ ಸಂಪರ್ಕ ಮಲ್ತ್ ದೆ ಬರೊಂದು ಇತ್ತೆರ್.
ಬೆಂಗ್ಲೂರುದ ಅಂತಾರಾಷ್ಟ್ರೀಯ ಇಮಾನ ನಿಲ್ದಾಣಗ್ ಪೋಪಿನ ದೊಡ್ಡಜಾಲದ ಕೈತಲ್ ಕೋಡೆ ಸರಣಿ ಆಕ್ಸಿಡೆಂಟ್ ಆದ್ 9 ಕಾರ್ ನಕ್ಕೆ ಆತ್ಂಡ್.
ಈ ಘಟನೆರ್ದ್ ಒವ್ವೇ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್. ಎದುರುಡು ಪೋವೊಂದು ಇತ್ತಿನ ಒಮ್ನಿ ಕಾರ್ ದ ಡ್ರೈವರ್ ಒರಾನೆ ಬ್ರೇಕ್ ಪಾಡಿರ್ನೆದಾವೆ ಪಿರವುಡು ಬರೊಂದು ಇತ್ತಿನ ಗಾಡಿಲು ಒಂಜೆಕ್ಕೊಂಜಿ ಗುದ್ದೊಂದುಂಡು. ರ್ನೆದಾವೆರ ಮಾತ ಕಾರ್ ದ ಎದುರುಡು ನಕ್ಕೆ ಆತ್ಂಡ್.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ಚಂಪಾಷಷ್ಠಿ ಜಾತ್ರಾ ಮಹೋತ್ಸವದ ಪ್ರಯುಕ್ತ ಮಾರ್ಗಶಿರ ಶುದ್ಧ ಸಪ್ತಮಿದ ದಿನವಾಯಿನ ಅಂಗಾರೆ ಕಾಂಡೆ ಕುಮಾರಾಧಾರಾತುದೆಟ್ಟ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ನೌಕಾವಿಹಾರ ಬೊಕ್ಕ ಅವಭೃತ ಉಚ್ಚಯ ಸಂಪನ್ನ ಆಂಡ್.
ದೇವಲ್ಯದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಸೀತಾರಾಮ ಎಡಪಡಿತ್ತಾಯ ಅವಭೃತ ಉಚ್ಚಯದ ಧಾರ್ಮಿಕ ವಿಧಿವಿಧಾನ ನಡಪಾದ್ ಕೊರಿಯೆರ್. ಅರ್ಚಕೆರ್ ವೇದಮೂರ್ತಿ ರಾಜೇಶ್ ನಡ್ಯಂತಿಲ್ಲಾಯೆರ್ ಬೊಕ್ಕ ವೇದಮೂರ್ತಿ ಸತ್ಯನಾರಾಯಣ ನೂರಿತ್ತಾಯೆರ್ ಉತ್ಸವದ ವೈದಿಕ ವಿಧಿ ವಿಧಾನಡ್ ಸಹಕರಿಸಾಯೆರ್. ಭಕ್ತೆರ್ ಶ್ರೀ ದೇವೆರ್ನ ಅವಭೃತ ಸ್ನಾನಡ್ ಪಾಲ್ ಪಡೆದ್ ಪುಣ್ಯ ಸ್ನಾನ ಮಲ್ತೆರ್. ಕಾಂಡೆ ದೇವಸ್ಥಾನದ ದ್ವಾದಶಿ ಮಂಟಪಡ್ ಓಕುಳಿ ಪೂಜೆ ಬೊಕ್ಕ ಓಕುಳಿ ಚೆಲ್ಲಾಟ ನೆರವೇರಿಸಾಯೆರ್. ಬೊಕ್ಕ ದೇವೆರೆಗ್ ಓಕುಳಿ ಸಮರ್ಪಣೆಯಾದ್ ಭಕ್ತಾದಿಲೆಗ್ ಓಕುಳಿ ಪ್ರೋಕ್ಷಣೆ ಬೊಕ್ಕ ಓಕುಳಿ ಚೆಲ್ಲಾಟ ನಡತ್ಂಡ್.
ಕುಮಾರಧಾರೆದ ಮತ್ಸ್ಯತೀರ್ಥದ ಶ್ರೀ ದೇವೆರ್ನ ಜಳಕದ ಗುಂಡಿರ್ದ್ ದೇವೆರ್ನ ಅವಭೃತೋತ್ಸವ ನಡತ್ಂಡ್. ಕ್ಷೇತ್ರ ಪುರೋಹಿತೆರ್ ಮದುಸೂಧನ ಕಲ್ಲೂರಾಯ ನೇತೃತ್ವಡ್ ಪುರೋಹಿತೆರ್ ಮಂತ್ರಘೋಷ ನಡಪಾದ್ ಕೊರಿಯೆರ್. ಈ ಪೊರ್ತುಡು ಶ್ರೀ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಮೋಹನರಾಂ ಸುಳ್ಳಿ, ಕಾರ್ಯ ನಿರ್ವಹಣಾಧಿಕಾರಿ ಡಾ|ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ವನಜಾ.ವಿ.ಭಟ್, ಪ್ರಸನ್ನ ದರ್ಬೆ, ಪಿಜಿಎಸ್ಎನ್ ಪ್ರಸಾದ್, ಶ್ರೀವತ್ಸ ಬೆಂಗಳೂರು, ಶೋಭಾ ಗಿರಿಧರ್, ಮನೋಹರ ರೈ, ಲೋಕೇಶ್ ಮುಂಡುಕಜೆ,ಬ್ರಹ್ಮರಥ ದಾನಿಲೆಡ್ ಒರಿ ಆಯಿನ ಉದ್ಯಮಿ ಅಜಿತ್ ಶೆಟ್ಟಿ, ಮಾಸ್ಟರ್ ಪ್ಲಾನ್ ಮೇಲುಸ್ತುವಾರಿ ಸಮಿತಿ ಸದಸ್ಯೆರ್ ಪವನ್ ಎಂ.ಡಿ ದೇವಲ್ಯದ ಸಿಬ್ಬಂದಿಲು, ಭಕ್ತೆರ್ ಇತ್ತೆರ್. ಶ್ರೀ ಕುಕ್ಕೆ ಸುಬ್ರಹ್ಮಣ್ಯ ದೇವೆರ್ನ ನೌಕಾವಿಹಾರ ಬೊಕ್ಕ ಅವಭೃತೋತ್ಸವದ ಪೊರ್ತುಡು ಕ್ಷೇತ್ರದ ಆನೆ ಯಶಸ್ವಿ ಮಾತೆರ್ನ ಒಟ್ಟಿಗೆ ನೀರಾಟ ಗೊಬ್ಬುದು ಕುಷಿ ಪಡೆಯೆರ್. ಡಿ.24 ತಾನಿ ಮಾರ್ಗಶಿರ ಶುದ್ಧ ದ್ವಾದಶಿದಾನಿ ಕೊಪ್ಪರಿಗೆ ಜಪ್ಪುನ ಒಟ್ಟಿಗೆ ವಾರ್ಷಿಕ ಚಂಪಾಷಷ್ಠಿ ಜಾತ್ರೆ ಮುಕ್ತಾಯ ಆವೆರೆ ಉಂಡು.
ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಾಲಯದ ಅನ್ನದಾನಗ್ ತೆಲಂಗಾಣದ ಸಚಿವೆರ್ ಶ್ರೀನಿವಾಸ ರೆಡ್ಡಿ ಪನ್ಪುನಾರ್ ಒಂಜಿ ಕೋಟಿ ರೂ. ಪನವುನು ಅನ್ನದಾನಗ್ ಕೊರ್ದು ಪರಕೆ ಸಂದಾಯೆರ್. ತನ್ನ ಮಗಲ್ ನ ಮದಿಮೆಗಾದ್ ಮಲ್ತಿನ ಪ್ರಾರ್ಥನೆ ಫಲಿಸಾಯಿನ ಕಾರಣ ಈ ಸೇವೆ ಸಂದೈತ ಮಲ್ದೆರ್.
ಸಚಿವೆರ್ ಶ್ರೀನಿವಾಸ ರೆಡ್ಡಿ ಕುಟುಂಬ ಸಮೇತ ಶ್ರೀ ಕ್ಷೇತ್ರಗ್ ಬತ್ತ್ ದ್ ಅಪಾರ ಭಕ್ತಿ ತೊಜಪಾದೆರ್. ಈ ಪೊರ್ತುಡು ಅರೆನ ಒಟ್ಟಿಗೆ ಮಗಲ್, ಮರ್ಮಯೆ, ಅಣ್ಣೆ, ಬೊಕ್ಕ ತಿರುಪತಿದ ಪ್ರೊಫೆಸರ್ ಗಣಪತಿ ಭಟ್ ಇತ್ತೆರ್.
ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲು ಮೋಹನ್ ರಾಂ ಸುಳ್ಳಿ, ಕಾರ್ಯನಿರ್ವಹಣಾಧಿಕಾರಿ ಡಾl ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಪಿ.ಜಿ.ಎಸ್.ಎನ್ ಪ್ರಸಾದ್, ಪ್ರಸನ್ನ ದರ್ಬೆ, ಶ್ರೀವತ್ಸ, ಲೋಕೇಶ್ ಮುಂಡಕಜೆ, ಶೋಭಾ ಗಿರಿಧರ್, ವನಜಾ ಭಟ್ ಮಾತ ಒಟ್ಟಿಗೆ ಇತ್ತ್ ದ್ ಚೆಕ್ ಹಸ್ತಾಂತರ ಮಲ್ತೆರ್.
ಎತ್ತಿನಹೊಳೆ ಯೋಜನೆ ಪರೀಕ್ಷೆ ಮಲ್ಪುನಗ ಸುಮಾರ್ ಕಡೆಟ್ಟ್ ಕುಡ ಜಲ ಸ್ಫೋಟ ಆತ್ಂಡ್ !
ಹೆಬ್ಬಸಾಲೆದ ದೇಖ್ಲಾ ಗ್ರಾಮಡ್ ಪೈಪ್ ಪುಡಾದ್ ಮಸ್ತ್ ಪ್ರಮಾಣದ ನೀರ್ ಜತ್ತ್ ಬೈದಿ ನೆರ್ದಾವರ ಕೈತಲ್ ದಕ್ಲೆನ ಇಲ್ಲಗ್ ನೀರ್ ಪೊಗ್ಗುದುಂಡು.
ಪೈಪ್ ರ್ದ್ ಮಸ್ತ್ ಪ್ರಮಾಣದ ನೀರ್ ಪಿದಯಿ ಬತ್ತಿರ್ನೆದಾವೆರ ಮಾರ್ಗದ ಬರಿತ್ತ ಇಲ್ಲ್ ಗ್ ತೊಂದರೆ ಆತ್ಂಡ್. ಅತ್ತಂದೆ ಮಾರ್ಗಗ್ ನೀರ್ ಪೊಗ್ಗುದು ಕೆಸರಾತ್ಂಡ್.
ರಡ್ಡ್ ವಾರದ ಪಿರವು ಹಾರ್ಲೆ ಕೂಡುದ ಕೈತಲ್ ಪೈಪ್ ಲೈನ್ ಪುಡಾದ್ ನೀರ್ ಪಿದಯಿ ಬತ್ತ್ ದ್ ಮಸ್ತ್ ತೊಂದರೆ ಆತ್ಂಡ್. ಇಂಚಾದ್ ಕೋಟಿ ಕೋಟಿ ಕರ್ಚಿ ಮಲ್ತಿನ ಎತ್ತಿನಹೊಳೆ ಯೋಜನೆ ಇಡೇಗ್ ಉಂತುನ ಲಕ್ಷಣ ತೋಜೊಂದು ಉಂಡು ಪಂದ್ ಜನಕುಲು ಪನೊಂದುಲ್ಲೆರ್.
ಕಳಿಯ: ಗೇರುಕಟ್ಟೆದ ಕಳಿಯ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದ ಆಡಳಿತ ಮಂಡಳಿ ನಿರ್ದೇಶಕೆರೆನ ವೋಟು ಡಿ.19 ಕ್ಕ್ ಸೊಸೈಟಿ ಸಭಾಂಗಣಡ್ ನಡತ್ಂಡ್.
ಈ ವೋಟುಡು ಬಿಜೆಪಿ ಬೆಂಬಲವಾದ್ ಉಂತಿನ ಸಹಕಾರಿ ಭಾರತಿ ಅಭ್ಯರ್ಥಿ 12 ಟ್ಟ್ 12 ಜನಲ ಗೆಂದ್ ದೆರ್.
ಮಾಜಿ ಗುರ್ಕಾರೆ ವಸಂತ ಮಜಲು, ಹರಿದಾಸ್ ಪಡಂತ್ತಾಯ, ಕುಶಾಲಪ್ಪ ಗೌಡ, ಗೋಪಾಲ ಬನ, ಬಾಲಕೃಷ್ಣ ಗೌಡ ಬಿರ್ಮೊಟ್ಟು, ಲೋಕೇಶ್ ನಾಳ, ಶೇಖರ್ ನಾಯ್ಕ, ಉದಿತ್ ಕುಮಾರ್, ರಾಜಪ್ರಕಾಶ್ ಶೆಟ್ಟಿ, ಮಮತಾ ಆಳ್ವಾ, ಚಂದ್ರಾವತಿ, ಕೇಶವ ಪೂಜಾರಿ ಗೆಂದಿನಕುಲು.
ಪ್ರಕಾಶ್, ರಮೇಶ ಗೌಡ, ನೀನಾ ಕುಮಾರ್, ನೇವಿಲ್ ಮೊರಸ್., ಲಕ್ಷ್ಮಣ್ ನಾಯ್ಕ, ಕೇಶವತಿ, ಕೇಶವ ಪೂಜಾರಿ ನಾಳ, ಮರಿಟಾ ಪಿಂಟೊ, ಪೌಲಿನ್ ರೆಗೋ, ರೀತಾ ಪಿ. ಬೊಕ್ಕ ಹರೀಶ್ ಕುಮಾರ್ ಕಾಂಗ್ರೆಸ್ ಬೆಂಬಲಡ್ ವೋಟು ಉಂತಿನಕುಲು.
ಕೇರಳದ ತ್ರಿಶೂರ್ ಡ್ ಜ.5-9 ಮುಟ್ಟ ನಡಪುನ 7ನೇ ಅಂತರಾಷ್ಟ್ರೀಯ ಚಲನ ಚಿತ್ರೋತ್ಸವಗ್ ಇಂಚಿಪ್ಪ ಬುಡುಗಡೆ ಆಯಿನ ತುಳುತ್ತ ಸುರುತ್ತ ಸಂಶೋಧನಾತ್ಮಕ ಸಾಕ್ಷ್ಯಚಿತ್ರ “ಪುರ್ಸ ಕಟ್ಟುನೆ: ಇನಿ-ಕೋಡೆ- ಎಲ್ಲೆ” ಆಯ್ಕೆ ಆತ್ಂಡ್.
ವಿಕಿಪೀಡಿಯ ಫೌಂಡೇಶನ್ ತಯಾರ್ ಮಲ್ತಿನ ಈ ಸಾಕ್ಷ್ಯಚಿತ್ರದ ನಿರ್ಮಾಣನ್ ಭರತೇಶ ಅಲಸಂಡೆಮಜಲು ಬೊಕ್ಕ ಡಾ.ವಿಶ್ವನಾಥ ಬದಿಕಾನ ಮಲ್ದೆರ್. ಡಾ.ಸುಂದರ ಕೇನಾಜೆ ಚಿತ್ರಕತೆ ಬರೆದ್ ನಿರ್ದೇಶನ ಮಲ್ದೆರ್.
ಭಾರತದ ಬೇತೆ ಬೇತೆ ಭಾಷೆಲೆಡ್ ಆಯ್ಕೆ ಆಯಿನ 70 ಸಾಕ್ಷ್ಯಚಿತ್ರ ಬೊಕ್ಕ ಜಗತ್ತ್ ದ ಬೇತೆ ಬೇತೆ ದೇಶಲೆರ್ದ್ ಆಯ್ಕೆ ಆಯಿನ 310 ಚಲನ ಚಿತ್ರಲು ಈ ಚಿತ್ರೋತ್ಸವಡ್ ಪ್ರದರ್ಶನ ಆವೆರೆ ಉಂಡು. ಅವೆಟ್ಟ್ ತುಳು ಭಾಷೆದ ಜಾನಪದ ವಿಭಾಗಡ್ ಈ ಸಾಕ್ಷ್ಯಚಿತ್ರನ್ ಆಯ್ಕೆ ಮಲ್ದೆರ್. ನೆತ್ತ ವಿಶೇಷ ದಾದ ಪಂಡ ತುಳು ಭಾಷೆದ ಸುರುತ್ತ ಸಾಕ್ಷ್ಯಚಿತ್ರವಾದ್ ಆಯ್ಕೆ ಆತ್ಂಡ್.
ಮಧ್ಯಕಾಲೀನ ಕರ್ನಾಟಕದ ರಹಸ್ಯ ತಾಂತ್ರಿಕ ಪಂಥಲೆನ ಪ್ರಭಾವರ್ದ್ ಇತ್ತೆಲ ದಕ್ಷಿಣ ಕನ್ನಡ ಜಿಲ್ಲೆದ ಕೆಲವೊಂಜಿ ಭಾಗಡ್ ಇಪ್ಪುನ ಒಂಜಿ ಮಹತ್ವದ ನಲಿಕೆನೇ “ಪುರ್ಸ ಕಟ್ಟುನ”. ಬೊಲ್ತೇರ್ ತಾಲೂಕ್ ದ ಕುದುರೆಮುಖ ಘಟ್ಟದ ತಿರ್ತ ಭಾಗಡ್ ಇತ್ತೆಲ ಇಪ್ಪುನ ಈ ನಲಿಕೆ ಸುಗ್ಗಿ ತಿಂಗೊಲ್ದ ಪುಣ್ಣಮೆದ ದಿನಟ್ಟ್ ನಡಪುಂಡು.
ತುಳುಭಾಷೆನ್ ಪಾತೆರುನ ಸುಮಾರ್ ಜನಾಂಗಲು ಒಟ್ಟು ಸೇರ್ದ್ ನಡಪಾವುನ ಈ ನಲಿಕೆನ್ ಮೂಲತಃ ಗೌಡ ಸಮುದಾಯದಕುಲು ನಡಪಾವೊಂದು ಬೈದೆರ್. ಆಚರಣೆ, ಮನರಂಜನೆ, ನಂಬಿಕೆ, ವಿಡಂಬನೆ ಬೊಕ್ಕ ಸಮನ್ವಯದ ಭಾಗವಾದ್ ನಡಪುನ ಈ ನಲಿಕೆದ ಒಳತಿರ್ಲ್ ನೆಟ್ಟ್ ಉಂಡು. ಒಟ್ಟು 40 ನಿಮಿಷದ ಈ ಸಾಕ್ಷ್ಯಚಿತ್ರ ತುಳುನಾಡ್ ಡ್ ಇಪ್ಪುನ ತಾಂತ್ರಿಕ ಪಂಥ ಬೊಕ್ಕ ಜನಪದ ನಲಿಕೆಗ್ ಸಂಬಂಧಪಟ್ಟಿನವು ಆತ್ಂಡ್. ತುಳುನಾಡ್ ಘಟನಾವಳಿ ಬೊಕ್ಕ ವಿದ್ವಾಂಸೆರೆನ ವಿಶ್ಲೇಷಣೆದೊಟ್ಟಿಗೆ ಮೈಸೂರ್ ದ ಕನ್ನಡಿ ಕ್ರಿಯೇಷನ್ ತಯಾರ್ ಮಲ್ತಿನ ಈ ಸಾಕ್ಷ್ಯಚಿತ್ರ ಯೂಟ್ಯೂಬ್ ಬೊಕ್ಕ ವಿಕಿಮೀಡಿಯ ಕಾಮನ್ಸ್ ಮುಖೇನ ತೂಪುನಕ್ಲೆನ ಮೆಚ್ಚುಗೆಗ್ ಪಾತ್ರ ಆತ್ಂಡ್.
ಆಸ್ಟ್ರೇಲಿಯಾ ಸ್ಟಾರ್ ಕ್ರಿಕೆಟರ್ ಪ್ಯಾಟ್ ಕಮಿನ್ಸ್ ನ್ ಸನ್ ರೈಸರ್ಸ್ ಹೈದರಾಬಾದ್ ಟೀಮ್ ದಕುಲು ಬಿಡ್ ಡ್ 20.50 ಕೋಟಿ ರೂ.ಗ್ ದೆತೊಂದೆರ್.
ಕಮಿನ್ಸ್ ನ್ ಎಚ್ಚ ಬಿಲೆಕ್ಕ್ ದೆತೊನಿಯೆರೆ ಚೆನ್ನೈ ಸೂಪರ್ ಕಿಂಗ್ಸ್, ರಾಯಲ್ ಚಾಲೆಂಜರ್ಸ್ ಬೆಂಗ್ಲೂರು, ಸನ್ ರೈಸರ್ಸ್ ಹೈದರಾಬಾದ್ ಬೊಕ್ಕ ಬೊಂಬೈ ಇಂಡಿಯನ್ಸ್ ದುಂಬು ಬತ್ತ್ ದ್ ಇತ್ತ್ಂಡ್.
ಉಂದು ಐಪಿಎಲ್ ಇತಿಹಾಸಡೇ ಕ್ರಿಕೆಟರ್ ಒರಿಯಗ್ ತಿಕಿನ ಮಲ್ಲ ಸಂಭಾವನೆ. ನೆರ್ದ್ ದುಂಬು ಮಲ್ಲ ಬಿಲೆಕ್ಕ್ ಏಲಂ ಆಯಿನ ದಾಖಲೆ ಸ್ಯಾಮ್ ಕರನ್ ನ ಪುದರ್ ಡ್ ಇತ್ತ್ಂಡ್. ಇತ್ತೆ ಕಮಿನ್ಸ್ ಗ್ 20.50 ಕೋಟಿ ರೂ. ಕೊರ್ಪುನ ಮುಖೇನ ಸನ್ ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿ ಪೊಸ ಇತಿಹಾಸ ನಿರ್ಮಾಣ ಮಲ್ದ್ಂಡ್.
