ರಾಜ್ಯದ ಸುಮಾರ್ ಜಿಲ್ಲೆಡ್ ಇನಿರ್ದ್ 3 ದಿನ ಭಾರೀ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.
ಇನಿ ಕೊಡಗು, ಮೈಸೂರ್ ಜಿಲ್ಲೆಗ್, ಎಲ್ಲೆ ತುಳುನಾಡ್ ದ ಉತ್ತರ ಕನ್ನಡ, ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆಗ್, ಬೊಕ್ಕ ಎಲ್ಲಂಜಿ ಚಾಮರಾಜನಗರ, ಚಿಕ್ಕಮಗಳೂರು, ಕೊಡಗು, ಶಿವಮೊಗ್ಗ ಬೊಕ್ಕ ಹಾಸನ ಜಿಲ್ಲೆಡ್ ಯೆಲ್ಲೋ ಅಲರ್ಟ್ ಘೋಷಣೆ ಆತ್ಂಡ್. ಉತ್ತರ ಕರ್ನಾಟಕದ ಕೆಲವು ಭಾಗಲೆಡ್ ಎಡ್ಡೆ ಬರ್ಸ ಬರ್ಪುಂಡು. ಬೆಂಗ್ಲೂರ್ ಡ್ ಇನಿಲ ಬರ್ಸ ಬರ್ಪುಂಡು ಪಂದ್ IMD ಪಂತ್ಂಡ್.
ಬೆಸ್ಕಾಂ ಸೇರ್ದ್ ರಾಜ್ಯ ಇಡೀ ಮತ 5 ಕರೆಂಟ್ ಸರಬರಾಜು ಕಂಪನಿದ ವ್ಯಾಪ್ತಿಡ್ 3 ದಿನ ಆನ್ ಲೈನ್ ಸೇವೆ ಬಂದ್ ಆಪುಂಡು.
ನ.24-26 ಮುಟ್ಟ ಪೊಸ ಕರೆಂಟ್ ಸಂಪರ್ಕ, ಪುದರ್/ ಲೋಡ್ ಬದಲಾವಣೆ, ನಗದು ಪಾವತಿ, ಆನ್ ಲೈನ್ ಮುಖೇನ ಬಿಲ್ ಪಾವತಿ ಸೇರಿನಂಚೆನೆ ಬೇತೆ ಸೇವೆಗ್ ಇಪ್ಪುಜಿ ಪಂದ್ ಮೆಸ್ಕಾಂ ತೆರಿಪಾದ್ಂಡ್. IT ಸೇವೆಗ್ ಸಂಬಂಧಪಟ್ಟಿನಂಚೆನೆ ತಂತ್ರಾಂಶ ಬೊಕ್ಕ ಹಾರ್ಡ್ ವೇರ್ ಅಪ್ ಗ್ರೇಡ್ ಮಲ್ಪುನ ಬಗೆಟ್ಟ್ 3 ದಿನ ಆನ್ ಲೈನ್ ಸೇವೆ ಇಪ್ಪುಜಿ ಪಂದ್ ಪಂತ್ಂಡ್.
ಕೇರಳದ ಬೇತೆ ಬೇತೆ ಭಾಗಡ್ ಬರ್ಸ ಬರೊಂದು ಉಂಡು. ಅಂಚೆನೆ ಶಬರಿಮಲೆಟ್ಟ್ ಭಾರೀ ಬರ್ಸ ಬರೊಂದು ಇಪ್ಪುರ್ನೆದಾವೆರ ರೆಡ್ ಅಲರ್ಟ್ ಘೋಷಣೆ ಆತ್ಂಡ್.
ಅತ್ತಂದೆ ನೀಲಕಲ್ ರ್ದ್ ಪಂಪೈಗ್ ಪೋಪುನ ಮಾರ್ಗಡ್ ಗುಡ್ಡೆ ಜರಿದ್ ಆ ಮಾರ್ಗಡ್ ಸಂಚಾರ ಮಲ್ಪೆರೆ ಆವೊಂದು ಇಜ್ಜಿ. ಅಂಗಾರೆ ಬೊಕ್ಕ ಬುಧಾರ ಬತ್ತಿನ ಭಾರೀ ಬರ್ಸದಾವೆರ ಶಬರಿಮಲೆ ಯಾತ್ರಿಲು ಪರದಾಡುಲೆಕ್ಕ ಆತ್ಂಡ್.
ಕಾರ್ಲದ ಜಯಂತಿನಗರ ಶ್ರೀ ರಾಮ ಮಂದಿರಡ್ ನ.24 ಕ್ಕ್ ತುಳಸಿ ಪೂಜೆ ನಡಪರೆ ಉಂಡು.
ಭಕ್ತಾದಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಶ್ರೀ ರಾಮ ಪರಿವಾರ ದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಕಾರ್ಲ ಶ್ರೀ ರಾಮ ಮಂದಿರದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಶ್ರೀ ಅಂಬಾಮಹೇಶ್ವರಿ ಭಜನಾ ಮಂಡಳಿ ಅಂಬಾನಗರ, ಅರೆಕೆರೆ ಬೈಲು ಜಪ್ಪು ಕುಡ್ಲ ಮೊಕ್ಲೆನ ಒತ್ತು ಸೇರಿಗೆಡ್ ಟೀಮ್ ಜೇನುಗೂಡು ಆಯೋಜನೆದ ಬಜನೆ ಮಲ್ಪುಗ ಜೋಕ್ಲೆಗಾದ್ ಭಕ್ತಿದ ಪಂತೋ ಕಾರ್ಯಕ್ರಮ ಇಚ್ಚಿಂಪಗ್ ನಡತ್ಂಡ್. ಈ ಲೇಸ್ ದ ಇನಾಮು ಪಟ್ಟುನ ಕಾರ್ಯಕ್ರಮ ಡಿ.3 ಐತಾರ ಮದ್ಯಾಹ್ನ 12.30 ಗಂಟೆಗ್ ಅಂಬಾಮಹೇಶ್ವರಿ ಭಜನಾ ಮಂಡಳಿಡ್ ನಡಪೆರೆ ಉಂಡು. ಮಾತೆರ್ಲ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆಯೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಆಸ್ಟ್ರೇಲಿಯಾ ಕ್ರಿಕೆಟ್ ತಂಡಡ್ ಕೋಚ್ ಆದ್ 34 ವರ್ಷದ ಕಿನ್ನಿಗೋಳಿ ಮೂಲದ ಊರ್ಮಿಳಾ ರೊಸಾರಿಯೋ ಕಾರ್ಯ ನಿರ್ವಹಣೆ ಮಲ್ತೊಂದು ಉಲ್ಲೆರ್. ಊರ್ಮಿಳಾ ರೊಸಾರಿಯೋ ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಮ್ಯಾನೇಜರ್ ಬೊಕ್ಕ ಆಟಗಾರೆರ್ನ ಕೇರ್ ಟೇಕರ್ ಆತೆರ್.
ಮೂಲತಃ ಕಿನ್ನಿಗೋಳಿದಾರ್ ಆಯಿನ ಊರ್ಮಿಳಾನ ಪೊಪ್ಪ ಅಮ್ಮ ಐವಿ ಬೊಕ್ಕ ವಾಲೆಂಟೈನ್ ಉದ್ಯೋಗದ ನಿಮಿತ್ತ ಕತಾರ್ ದೋಹಾಡ್ ಮಸ್ತ್ ವರ್ಷರ್ದ್ ಅವ್ಲು ಉಲ್ಲೆರ್. ಊರ್ಮಿಳಾ ಕತಾರ್ಡ್ ಪುಟ್ಟುದು ಬುಲೆತ್ತಿನಾರ್. ಎಲ್ಯೆರ್ದೆ ಕ್ರಿಕೆಟ್ಡ್ ಆಸಕ್ತಿ ಇತ್ತ್ದ್ ಕತಾರ್ ಟೆನ್ನಿಸ್ ಫೆಡೆರೇಶನ್ಡ್ ಬೇಲೆ ಮಲ್ತೊಂದು ಇತ್ತೆರ್. ಬೊಕ್ಕ ಆಸ್ಟ್ರೇಲಿಯಾಡ್ ಅಡಿಟೇಲ್ ಕ್ರಿಕೆಟ್ ಟೀಂಡ್ ಮೂಜಿ ವರ್ಷದ ಕಾಲ ಮ್ಯಾನೇಜರ್ ಆದ್ ಬೇಲೆ ಮಲ್ತ್ದೆರ್. ಊರ್ಮಿಳಾ ರೊಸಾರಿಯೋ ಮೇರ್ನ ಪೊಪ್ಪ ಅಮ್ಮ ಕರಿನ ಏಳ್ ವರ್ಷರ್ದ್ ಸಕಲೇಶಪುರಡ್ ಎಸ್ಟೇಟ್ ದೆತ್ತ್ದ್ ಅವ್ಲು ವಾಸ್ತವ್ಯ ಉಲ್ಲೆರ್.
ಮೂಲ್ಕಿ: ಅಸೋಸಿಯೇಶನ್ ಆಫ್ ಸಿವಿಲ್ ಇಂಜಿನಿಯರ್ಸ್ ಮೂಲ್ಕಿ ನೆತ್ತ ಪದಾಧಿಕಾರಿಲು ನ.21ಕ್ಕ್ ಮೂಲ್ಕಿ ನಗರ ಪಂಚಾಯತ್ ಮುಖ್ಯಾಧಿಕಾರಿ ಇಂಧೂ ಎಮ್. ಮೇರೆನ್ ಭೇಟಿಯಾದ್ ಮೂಲ್ಕಿ ನಗರ ಪಂಚಾಯತ್ ವ್ಯಾಪ್ತಿಡ್ ಬರ್ಸದ ನೀರ್ ಸಂಗ್ರಹ ಮಲ್ಪುನ ಚರಂಡಿದ ಭದ್ರತೆದ ಬಗೆಟ್ಟ್ ಬಿನ್ನಾಪು ಮಲ್ತೆರ್.
ಅಂಚನೆ ಬರ್ಸದ ನೀರ್ ಡ್ ಚರಂಡಿ ಅಲ್ಪ ಅಲ್ಪ ಮುಚ್ಚಂದಿನಂಚ ತೂವೊನೊಡು, ಬರ್ಸದ ನೀರ್ ಎಡ್ಡೆ ರೀತಿಡ್ ಪೋಪುನ ವ್ಯವಸ್ಥೆ ಮಲ್ಪೊಡು. ಕಟ್ವಾಣ ಪರವಾನಿಗೆ ಬೊಕ್ಕ ಅಕ್ಯೂಪೆನ್ಸಿ ಪ್ರಮಾಣ ಪತ್ರ ಕೊರ್ಪುನ ಪೊರ್ತುಡು ಬರ್ಸದ ನೀರ್ ಕೊಯ್ಲು ಕಡ್ಡಾಯ ಮಲ್ಪೊಡು. ಮೂಲ್ಕಿ ನಗರ ಪಂಚಾಯತ್ ವ್ಯಾಪ್ತಿದ ಅಭಿವೃದ್ಧಿ ಕೆಲಸಡ್ ನಮ್ಮ ಸಹಕಾರ ಇಪ್ಪುಂಡು ಪಂದ್ ಪಂಡೆರ್. ಅಸೋಸಿಯೇಶನ್ ಆಫ್ ಸಿವಿಲ್ ಇಂಜಿನಿಯರ್ಸ್ ಮೂಲ್ಕಿದ ಸ್ಥಾಪಕಾಧ್ಯಕ್ಷೆರ್ ಜೀವನ್ ಕೆ. ಶೆಟ್ಟಿ, ಕಾರ್ಯದರ್ಶಿ ಸುಜಿತ್ ಸಾಲ್ಯಾನ್, ಖಜಾಂಚಿ ವರುಣ್, ನಗರ ಪಂಚಾಯತ್ ಅಭಿಯಂತರೆರ್ ಅಶ್ವಿನಿ ಈ ಪೊರ್ತುಡು ಇತ್ತೆರ್.
ದುಬೈ :1985ಟ್ ಸ್ಥಾಪನೆ ಆಯಿನ ಕರ್ನಾಟಕ ಸಂಘ ದುಬೈ, ಅನಿವಾಸಿ ಕನ್ನಡಿಗರ ಕ್ಷೇಮಾಭಿವೃದ್ಧಿಗಾದ್ ಸೇವೆ ಮಲ್ತೊಂದು ಬರೊಂದು ಇತ್ತ್ ದ್, ಕಲೆ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮಲೆನ್ ದುಬೈದ ಕನ್ನಡಿಗೆರೆನ್ ಒಟ್ಟುಗೂಡಿಸಾದ್ ಪ್ರತಿ ವರ್ಷಲ ವಿಜೃಂಭಣೆಡ್ ಆಚರಣೆ ಮಲ್ಪುನ ” ಕರ್ನಾಟಕ ರಾಜ್ಯೋತ್ಸವ” ದ ಅಂಗವಾದ್ ಕೊರ್ಪುನ “ದುಬೈ ಕರ್ನಾಟಕ ರಾಜ್ಯೊತ್ಸವ -2023 ಪ್ರಶಸ್ತಿ” ಗ್ ಈ ಸರ್ತಿ ಬಾಲಕೃಷ್ಣ ಸಾಲಿಯಾನ್ ಆಯ್ಕೆಯಾತೆರ್.
ನ.26 ದಾನಿ ನಡಪುನ 68ನೇ ಕರ್ನಾಟಕ ರಾಜ್ಯೊತ್ಸವ ಕಾರ್ಯಕ್ರಮಡ್ ಬಾಲಕೃಷ್ಣ ಸಾಲಿಯಾನ್ ಮೇರೆಗ್ ಮಾನಾದಿಗೆ ಮಲ್ಪೆರೆ ಉಲ್ಲೆರ್ ಪಂದ್ ದುಬೈ ಕರ್ನಾಟಕ ಸಂಘದ ಗುರ್ಕಾರ್ಲು ಶಶಿಧರ್ ನಾಗರಾಜಪ್ಪ ಬೊಕ್ಕ ಕಾರ್ಯಕಾರಿ ಸಮಿತಿ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.
ಬೋಲ್ತೆರ್: ನನದ ಫೆಬ್ರವರಿ ತಿಂಗೊಲುಡು ವೇಣೂರುಡ್ ನಡಪೆರೆ ಇಪ್ಪುನ ಭಗವಾನ್ ಬಾಹುಬಲಿ ಸ್ವಾಮಿನ ಮಹಾಮಸ್ತಕಾಭೀಷೇಕ ಮಹೋತ್ಸವಗ್ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರೆಗೆ ಅರ್ವ ಅರಮನೆತ ತಿಮ್ಮಣ್ಣರಸೆರ್ ಡಾ| ಪದ್ಮಪ್ರಸಾದ್ ಅಜಿಲೆರ್ ಲೆಪ್ಪೋಲೆನ್ ಕೊರಿಯೆರ್.
ಈ ಪೊರ್ತುಡು ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ವೇಣೂರು ತೀರ್ಥ ಕ್ಷೇತ್ರ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪ್ರವೀಣ್ ಕುಮಾರ್ ಇಂದ್ರ ಇತ್ತೆರ್.
ವಿಶ್ವಕಪ್ಡ್ ಭಾರತ ಸೋತಿನೆಕ್ಕ್ ಬೇಜಾರ್ ಆದ್ ಅಭಿಮಾನಿ ಒರಿ ಆತ್ಮಹತ್ಯೆ ಮಲ್ತೊನ್ನ ಘಟನೆ ವರದಿ ಆತ್ಂಡ್. ಪಶ್ಚಿಮ ಬಂಗಾಳದ ಬಂಕುರಾ ಜಿಲ್ಲೆದ ರಾಹುಲ್ ಲೋಹರ್ 23 ವರ್ಷದ ಜವನೆ ತೀರ್ಪೋಯಿನಾಯೆ.
ಫೈನಲ್ ಪಂದ್ಯದ ಬೊಕ್ಕ ಐತಾರ ರಾತ್ರೆ ಬಂಕುರಾದ ಬೆಲಿಯತೋರ್ ಥಿಯೇಟರ್ದ ಕೈತಲ್ ಈ ಘಟನೆ ನಡತ್ಂಡ್. ಕಟ್ಟಾ ಕ್ರಿಕೆಟ್ ಅಭಿಮಾನಿಯಾಯಿನ ರಾಹುಲ್ ಫೈನಲ್ ಪಂದ್ಯ ತೂವೆರೆ ಬೇಲೆಗ್ ರಜೆ ಪಾರ್ದ್ ಇತ್ತೆ. ಫೈನಲ್ಡ್ ಸೋತಿನ ಬೊಕ್ಕ ರಾಹುಲ್ ತನ್ನ ಕೋಣೆಗ್ ಪೋದು ಬಲ್ಲ ಪಾಡೊಂನ ಸ್ಥಿತಿಟ್ ಇತ್ತೆ. ಪೊಲೀಸೆರ್ ಕೇಸ್ ದಾಖಲ್ ಮಲ್ತೊಂದು ತನಿಖೆ ಮಲ್ತೊಂದು ಉಲ್ಲೆರ್.
