ಮುನಿಯಾಲ್ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಲ್ಯಡ್ ಕಾರ್ತಿಕ ತಿಂಗೊಲ್ದ ಪಕ್ಷಿ ಜಾಗರಣ ಪೂಜೆ ಮುಗಿತಲ ಆಂಡ್.
ಸಾರ ದೀಪದ ಅಲಂಕಾರಡ್ ದೇವೆರೆನ ಗರ್ಭಗುಡಿ ಮೆನ್ಕೊಂದು ಇತ್ತ್ಂಡ್. ಬೊಲ್ಪುಗು 5 ಗಂಟೆಗ್ ಸಾಮೂಹಿಕ ಸುಪ್ರಭಾತ ಪಠಣರ್ದ್ ಸುರು ಆದ್ ಊರುದ ಪ್ರತೀ ಇಲ್ಲಲ್ ರ್ದ್ ಸುಮಾರ್ 60 ನೀಲಾಂಜನ ಆರತಿರ್ದ್ ಪೂಜೆದ ವಿಧಿ ವಿಧಾನ ನಡತ್ಂಡ್. ಅತ್ತಂದೆ ಊರುದ ಸಮಸ್ತ ಭಕ್ತೆರೆರ್ದ್ ಭಜನೆ ನಡತ್ಂಡ್.
ಕುಡ್ಲ ತುಳು ಕೂಟ (ರಿ.) ದ ಮುತಾಲಿಕೆಡ್ ನ.18 ಸನಿಯಾರ ಮಧ್ಯಾಹ್ನ ಸುರತ್ಕಲ್ ವಿದ್ಯಾದಾಯಿನಿ ಪ್ರೌಢಶಾಲೆಡ್ ತುಳುವೆರೆ ತುಡರ ಪರ್ಬೊ ದೀಪೊಲಿ-ಬಲ್ಯೇಂದ್ರೆ ನಡತ್ಂಡ್.
ಈ ಲೇಸ್ ನ್ ಅಗರಿ ಎಂಟರ್ ಪ್ರೈಸಸ್ ರಾಘವೇಂದ್ರ ರಾವ್ ಅಗರಿ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಕುಡ್ಲ ತುಳುಕೂಟ (ರಿ.) ದ ಗುರ್ಕಾರೆ ಮರೋಳಿ ಬಿ. ದಾಮೋದರ ನಿಸರ್ಗ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಸುರತ್ಕಲ್ ಪ.ಪೂ ಕಾಲೇಜ್ ಗೋವಿಂದದಾಸ ಕಾಲೇಜ್ ದ ಉಪನ್ಯಾಸಕೆರ್ ವೆಂಕಟರಮಣ ಭಟ್ ಪೊಲಬು ಕೊರಿಯೆರ್.
ಮಲ್ಲ ಬಿನ್ನೆರಾದ್ ಎಂಜೆಎಫ್ ಜನರಲ್ ಮ್ಯಾನೇಜರ್, ಸನ್ನಿಧೀಸ್ ಹೋಟೆಲ್ಸ್ ದ ಭಾಸ್ಕರ್ ಸಾಲ್ಯಾನ್, ಸುರತ್ಕಲ್ ವಿದ್ಯಾದಾಯಿನಿ ಪ್ರೌಢಶಾಲೆದ ಸಂಚಾಲಕೆರ್ ಸುಧಾಕರ ರಾವ್ ಪೇಜಾವರ, ಮುಖ್ಯ ಶಿಕ್ಷಕೆರ್ ಬಾಲಚಂದ್ರ ಕೆ, ಪಾಲ್ ಪಡೆದಿತ್ತೆರ್. ಅಂಚೆನೆ ಸಾಂಸ್ಕೃತಿಕ ಲೇಸ್, ಹರಿದಾಸೆರ್ ತೋನ್ಸೆ ಪುಷ್ಪಳ ಕುಮಾರ್ ಮೆರೆನ ತುಳು ಭಾವಗೀತೆ ಪದರಂಗಿತೊ ನಡತ್ಂಡ್.
ಒಡಿಪು ಜಿಲ್ಲೆ ಪೆಜಮಾಡಿ ಗ್ರಾಮದ ಫಾತಿಮಾ ರಲಿಯಾ ಮೆರೆನ ‘ಕಡಲು ನೋಡಲು ಹೋದವಳು’ ಬೂಕು ಶಿವಮೊಗ್ಗದ ಕರ್ನಾಟಕ ಸಂಘ ಪ್ರತಿ ವರ್ಷ ಕೊರ್ಪುನ ಪಿ.ಲಂಕೇಶ್ ಪ್ರಶಸ್ತಿಗ್ ಆಯ್ಕೆ ಆತ್ಂಡ್.
ನ. 26 ಕ್ಕ್ ಶಿವಮೊಗ್ಗದ ಹಸೂಡಿ ವೆಂಕಟ ಶಾಸ್ತ್ರಿ ಸಾಹಿತ್ಯ ಭವನಡ್ ಪ್ರಶಸ್ತಿ ಪ್ರದಾನ ಸಮಾರಂಭ ನಡಪರೆ ಉಂಡು. 10 ಸಾರ ರೂ. ಪನವುದ ಇನಾಮು ಬೊಕ್ಕ ನೆಂಪು ಕಾಣಿಕೆ ಈ ಪ್ರಶಸ್ತಿಡ್ ಉಂಡು. ಫಾತಿಮಾ ರಲಿಯಾ ಮೆರೆನ ಸುರುತ್ತ ಬೂಕು ಉಂದಾತ್ಂಡ್. ಅಹರ್ನಿಶಿ ಪ್ರಕಾಶನ ಪ್ರಕಟ ಮಲ್ದ್ಂಡ್.
ಇತ್ತೆ ಶಬರಿಮಲೆತ್ತ ಬೆಟ್ಟಲೆಡ್ ಅಯ್ಯಪ್ಪನ ನಾಮಸ್ಮರಣೆನೆ ಕೇನೊಂದು ಉಂಡು. ಆಂಡ ಅಲ್ಪದ ಅಯ್ಯಪ್ಪ ದೇವಲ್ಯಗ್ ಪೋಯೆರೆ 18 ಬೆಟ್ಟನ್ ದಾಟೊಡು. ಅವೆರ್ದ್ ಬೊಕ್ಕನೇ ಅಯ್ಯಪ್ಪನ ದರ್ಶನ ಆಪುಂಡು.
ಆ 18 ಬೆಟ್ಟದ ಪುದರ್ ಇಂಚ ಉಂಡು:
ಪೊನ್ನಂಬಲಮೇಡ್, ಗೌಡವಾಮಲ, ನಾಗಮಲ, ಸುಂದರಮಲ, ಚಿತ್ತಂಬಲಮಲ, ದೈಲದುಮಲ, ಶ್ರೀಪಾದಮಲ, ಖಾಲಿಗಿಮಲ, ಮಾತಂಗಮಲ, ದೇವರಮಲ, ನೀಲಕಲ್ ಮಾಳ, ದಳಪರ ಮಾಳ, ನೀಲಿಮಲ, ಕರಿಮಲ, ಪುಟ್ಟುಶೇರಿಮಲ, ಕಲೈಕಟ್ಟಿ ಮಾಳ, ಇಂಜಪ್ಪರ ಮಾಳ ಬೊಕ್ಕ ಶಬರಿಮಲೆ.
ಸುಬ್ರಹ್ಮಣ್ಯ : ಪುತ್ತೂರುದ ನೃತ್ಯೋಪಾಸನಾ ಕಲಾ ಕೇಂದ್ರ ವತಿರ್ದ್ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಸಹಕಾರಡ್ ಸುಬ್ರಹ್ಮಣ್ಯ ಶಾಖೆದ ಕಲಾತಂಡರ್ದ್ ‘ನೃತ್ಯೋಹಂ’ ಭರತನಾಟ್ಯ ಕಾರ್ಯಕ್ರಮ ಇಂಚಿಪ್ಪಗ್ ಕುಕ್ಕೆ ಸುಬ್ರಮಣ್ಯ ವನದುರ್ಗಾದೇವಿ ಸಭಾಂಗಣಡ್ ನಡತ್ಂಡ್.
ಶ್ರೀ ಸುಬ್ರಹ್ಮಣ್ಯ ಮಠದ ಸುದರ್ಶನ ಜೋಯಿಷ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ಪಾತೆರ್ದ್, ಸನಾತನ ಸಾಂಸ್ಕೃತಿಕ ಕಲೆನ್ ಒರಿಪಾವುನ ನಿಟ್ಟ್ ಡ್ ಶಾಸ್ತ್ರೀಯ ಕಾರ್ಯಕ್ರಮಲು ಅನಿವಾರ್ಯ. ಪ್ರಸ್ತುತ ಪಾಶ್ಚಾತ್ಯ ನೃತ್ಯ ಬೊಕ್ಕ ಸೀರಿಯಲ್ ದ ಭರಾಟೆದ ನಡುವೆ ಇಂಚಿನ ಕಾರ್ಯಕ್ರಮಲು ನನಲ ಎಚ್ಚ ಆವೊಡು ಪಂದ್ ಪಂಡೆರ್ ಈ ಪೊರ್ತುಡು ಕಲಾ ಕೇಂದ್ರದ ವತಿರ್ದ್ ಚೈತನ್ಯ ಬೊಕ್ಕ ಮೇಘನಾ ಪನ್ಪುನ ವಿದ್ಯಾರ್ಥಿಲೆನ ನೃತ್ಯ ಪೋಷಣ ಕಾರ್ಯಕ್ರಮಡ್ ಉಚಿತ ಶಿಕ್ಷಣಗ್ ದತ್ತು ಪಡೆಯೆರ್.
ಭರತನಾಟ್ಯ ಜೂನಿಯರ್, ಸೀನಿಯರ್ ಪರೀಕ್ಷೆಡ್ ತೇರ್ಗಡೆ ಅಯಿನ ವಿದ್ಯಾರ್ಥಿಲೆಗ್ ಈ ಪೊರ್ತುಡು ಮಾನಾದಿಗೆ ನಡತ್ಂಡ್. ನೃತ್ಯೋಹಂ ಅಂಗವಾದ್ ಸುಬ್ರಹ್ಮಣ್ಯ ಕಲಾತಂಡದ ವಿದ್ಯಾರ್ಥಿಲು ನೃತ್ಯ ಕೇಂದ್ರದ ಗುರು ವಿದುಷಿ ಶಾಲಿನಿ ಆತ್ಮಭೂಷಣ್ ನಿರ್ದೇಶನಡ್ ಭರತನಾಟ್ಯ ಸಮೂಹ ನೃತ್ಯ ಪ್ರದರ್ಶನ ಮಲ್ತೆರ್. ನಟವಾಂಗಡ್ ವಿದುಷಿ ಶಾಲಿನಿ ಆತ್ಮಭೂಷಣ್, ಹಾಡುಗಾರಿಕೆ ವಿದ್ವಾನ್ ಕೃಷ್ಣಾಚಾರ್ ಪಾಣೇರ್, ಮೃದಂಗಡ್ ವಿದ್ವಾನ್ ಗೀತೇಶ್ ನೀಲೇಶ್ವರ ಬೊಕ್ನ ವಯಲಿನ್ ಡ್ ವಿದ್ವಾನ್ ಬಾಲರಾಜ್ ಕಾಸ್ರೋಡು ಸಹಕಾರ ಮಲ್ತೆರ್. ಕಲಾ ಕೇಂದ್ರದ ಟ್ರಸ್ಟಿ ಆತ್ಮಭೂಷಣ್ ಈ ಪೊರ್ತುಡು ಇತ್ತೆರ್. ಶಿಕ್ಷಕ ಶಶಿಕಾಂತ್ ಲೇಸ್ ದ ಸುದಾರಿಕೆ ಮಲ್ತೆರ್.
ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಲಿಜನ್ ಗುರ್ಕಾರ್ಲು ವಿಶ್ವನಾಥ ನಡುತೋಟ ಮೇರೆಗ್ ರಾಷ್ಟ್ರೀಯ ಸ್ಥಾಪಕರ ಪುರಸ್ಕಾರ ಪಿಪಿಎಫ್ ಕೊರ್ದು ಮಾನಾದಿಗೆ ಮಲ್ತೆರ್. ಐತಾರ ಶಿವಮೊಗ್ಗಡ್ ನಡತ್ತಿನ ಪ್ರಾಂತೀಯ ಸಮ್ಮೇಳನಡ್ ರಾಷ್ಟ್ರ ಗುರ್ಕಾರ್ಲು ಪ್ರೊ. ವರ್ಗಿಸ್ ವೈದ್ಯಾನ್ ಮಾನಾದಿಗೆ ಮಲ್ತೆರ್.
ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಲಿಜನ್ ಡ್ ನಡತ್ತಿನ ಸಮುದಾಯ ಅಭಿವೃದ್ಧಿ ಕಾರ್ಯಕ್ರಮ, ಸಾರ್ವಜನಿಕ ಸಂಪರ್ಕ ,ವ್ಯಕ್ತಿತ್ವ ವಿಕಸನ , ಸಾಮಾಜಿಕ ಚಟುವಟಿಕೆ ಬೊಕ್ಕ ಸಾರ್ವಜನಿಕೆರೆಗ್ ಮಲ್ತಿನ ಮಸ್ತ್ ಜಾಗೃತಿ ಕಾರ್ಯಕ್ರಮಲೆನ್ ಪರಿಗಣಿಸಾದ್ ಈ ಪ್ರಶಸ್ತಿನ್ ಕೊರ್ತೆರ್. ಈ ಪೊರ್ತುಡು ರಾಷ್ಟ್ರೀಯ ಉಪಾಧ್ಯಕ್ಷೆರ್ ಹರಿಪ್ರಸಾದ್ ರೈ ,ಪೂರ್ವ ರಾಷ್ಟ್ರ ಗುರ್ಕಾರ್ಲು ಡಾ.ಕೇದಿಗೆ ಅರವಿಂದ ರಾವ್, ನಿಕಟ ಪೂರ್ವ ರಾಷ್ಟ್ರ ಅಧ್ಯಕ್ಷ ಭರತ್ ದಾಸ್ , ಬೊಕ್ಕ ರಾಷ್ಟ್ರೀಯ ಪದಾಧಿಕಾರಿಲು ಇತ್ತೆರ್.
ಬೋಲ್ತೆರ್ : ಇಲ್ಲದ ಶೆಡ್ಡ್ಡ್ ಉಂತಾದ್ ಇತ್ತಿನ ಇನ್ನೋವಾ ಕಾರ್ ಕಾಣೆ ಆಯಿನ ಘಟನೆ ಬೋಲ್ತೆರ್ ತಾಲೂಕುದ ಚಾರ್ಮಾಡಿ ಗ್ರಾಮದ ಕಕ್ಕಿಂಜೆದಲ್ಪ ನಡತ್ಂಡ್. ಈ ಬಗ್ಗೆ ಧರ್ಮಸ್ಥಳ ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್ಂಡ್. ಉಳ್ಳಾಲ ನಿವಾಸಿ ಇಸಾಕ್ ಪನ್ಪುನಾರ್ನ ಕಾರ್ನ್ ಅರೆನ ಸಂಬಂಧಿ ನೌಫಲ್ ಪನ್ಪುನಾರ್ ರಾತ್ರೆ ಕಕ್ಕಿಂಜೆ ಇಲ್ಲದ ಶೆಡ್ಡ್ಡ್ ಉಂತಾದ್ ಇತ್ತೆರ್.
ಕಾಂಡೆ ತೂನಗ ಕಾರ್ ಕಂಡಿನ ಬಗೆಟ್ ತೆರಿದ್ ಬೈದ್ಂಡ್. ಕಾರ್ದ ಬಿಲೆ 2.25 ಲಕ್ಷ ರೂಪಾಯಿ ಎಂದು ಅಂದಾಜ್ ಮಲ್ತ್ದೆರ್, ಕೈತಲ್ ಮಾತ ಕಾರ್ ನಾಡ್ಡಂಲ ಕಾರ್ ಪತ್ತೆ ಆವಂದಿನ ಕಾರಣ ಈ ಬಗ್ಗೆ ಧರ್ಮಸ್ಥಳ ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್ಂಡ್.
ಕುಡ್ಲ: ಸುರತ್ಕಲ್ ಕೈತಲ್ದ ಪಣಂಬೂರು ಮಾಗಣೆ ಕುಡುಂಬೂರು ಗುತ್ತು ಶ್ರೀ ಪಿಲಿಚಾಮುಂಡಿ, ಧೂಮಾವತಿ, ಜಾರಂದಾಯ ಬಂಟ ಪಂಚಶಕ್ತಿಲೆನ ಧರ್ಮನೇಮ 2024 ಜನವರಿ 19 ದಾನಿ ಕುಡುಂಬೂರು ಗುತ್ತು ದೈವಚಾವಡಿಡ್ ನಡಪೆರೆ ಉಂಡು. ಧರ್ಮನೇಮದ ಲೆಪ್ಪೋಲೆ ಪತ್ರ ಲೇಸ್ ಐತಾರ ಪಿಲಿಚಾಮುಂಡಿ ದೈವದ ವಠಾರಡ್ ಕುಡುಂಬೂರು ಗುತ್ತು ಯಜಮಾನ ಅಡ್ಯಾರು ಮುದ್ದರ ಮನೆ ಈಶ್ವರ ನಾಯ್ಗ ಚಾವಡಿಡ್ ನಡತ್ಂಡ್. ಗುರುಪುರ ವಜ್ರದೇಹಿ ಮಠದ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಲೆಪ್ಪೋಲೆ ಪತ್ರ ಬುಡುಗಡೆ ಮಲ್ತ್ದ್ ಆಶೀರ್ವಚನ ಕೊರಿಯೆರ್. ವೇ.ಮೂ ಜ್ಯೋತಿಷಿ ಶ್ರೀರಂಗ ಐತಾಳ್ ಕದ್ರಿ ದೈವಾರಾಧನೆ ಕ್ಷೇತ್ರದ ಇತಿಹಾಸದ ಬಗ್ಗೆ ಭಕ್ತೆರೆಗ್ ವಿವರಣೆ ಕೊರಿಯೆರ್.
ಕುಡುಂಬೂರು ಗುತ್ತು ಕ್ಷೇತ್ರದ ಗುತ್ತಿನಾರ್ ಜಯರಾಮ ಶೆಟ್ಟಿ ಧರ್ಮ ನೇಮಗ್ ಮಾತೆರ್ನಲ ಸಹಕಾರನ್ ಕೇಂಡೆರ್. ಚಾವಡಿಡ್ ಆಶಿಕ್ ಕುಮಾರ್ ಕರ್ಣಂತರ ಬಲ್ಲಾಳ್ ಕೂಳೂರು ಬೂಡು, ದಿವಾಕರ ಆಳ್ವ, ತೋಕೂರು ಗುತ್ತು, ಗುತ್ತಿನಾರ್ ಬಾಲಕೃಷ್ಣ ಶೆಟ್ಟಿ ಏಳಿಂಜೆ, ಚೆನ್ನಯ್ಯ ಮಾಡ ಕಟ್ಲಬೂಡು, ಬಾಲಕೃಷ್ಣ ಶೆಟ್ಟಿ ಹೊಸಬೆಟ್ಟು ಗುತ್ತಿನಾರ್, ಗುತ್ತಿನಾರು ಬಾಬು ಬಂಡ್ರಿಯಾಲ್ ಪಡ್ರೆ, ಶೆಡ್ಡೆಗುತ್ತು ವೇಣುಗೋಪಾಲ ಅರಸು, ಮೂಕೋಡಿ ಧೂಮ ಸುಧಾಕರ ಪೂಜಾರಿ, ಆನಂದ ಶೆಟ್ಟಿ ಸಾಂತ್ರಬೈಲು, ಭಾಗ್ಯಚಂದ್ರ ಭಟ್, ನೆತ್ತಿಲ ಬಾಳಿಕೆ ಮೋಹನ್ ದಾಸ್ ಭಂಡಾರಿ ಬೊಕ್ಕ ಬೇತೆ ಗುತ್ತುದ ಪ್ರಮುಖೆರ್, ಭಕ್ತೆರ್, ಸಂಘ ಸಂಸ್ಥೆದ ಪದಾಧಿಕಾರಿಲು ಇತ್ತೆರ್. ಜಯಶೆಟ್ಟಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ನಿಡ್ಡೋಡಿ ಚಾವಡಿ ಜಗನ್ನಾಥ ಶೆಟ್ಟಿ ಮಾತೆರೆನ್ ಎದ್ಕೊಂಡೆರ್. ಸುಧಾಮ ಶೆಟ್ಟಿ ಬೊಕ್ಕ ನವೀನ್ ಶೆಟ್ಟಿ ಲೇಸ್ದ ಸುದಾರಿಕೆ ಮಲ್ತೆರ್.
ಒಡಿಪು: ದ.ಕ ಬೊಕ್ಕ ಒಡಿಪು ಜಿಲ್ಲಾ ಸಹಕಾರಿ ಮೀನ್ ಮಾರಾಟ ಫೆಡರೇಶನ್ ನಿ. ಕುಡ್ಲದ ಮುತಾಲಿಕೆಡ್, ಜಲಾನಯನ ಅಭಿವೃದ್ಧಿ ಇಲಾಖೆ, ಮೀನುಗಾರಿಕೆ ಇಲಾಖೆ ಬೊಕ್ಕ ಸ್ಕೋಡೈಸ್ ಸಂಸ್ಥೆ ಶಿರಸಿ ಮೊಕ್ಲೆನ ಒಟ್ಟುಸೇರಿಗೆಡ್ ರಚನೆ ಆಯಿನ ಮಲ್ಪೆ ಮೀನುಗಾರೆರೆನ ಉತ್ಪಾದಕೆರೆನ ಕಂಪನಿ ಡಿ.2 ಬೊಕ್ಕ 3 ಕ್ಕ್ ಅಟ್ಟಣೆ ಮಲ್ದಿನ ಮೀನ್ ಮೇಳ-2023 ತ್ತ ಪೋಸ್ಟರ್ ನ್ ಒಡಿಪು ಶಾಸಕೆರ್ ಯಶ್ ಪಾಲ್ ಸುವರ್ಣ ಬೊಕ್ಕ ಬೈಂದೂರು ಶಾಸಕೆರ್ ಗುರುರಾಜ್ ಗಂಟಿಹೊಳೆ ಮೇರ್ ಬುಡುಗಡೆ ಮಲ್ತೆರ್.
ಬೊಕ್ಕ ಪಾತೆರ್ನ ಮೇರ್, ಮತ್ರ್ಯಮೇಳ-2023 ಭಾರೀ ಯಶಸ್ವಿಯಾದ್ ನಡಪಡ್, ಒಡಿಪುದ ಬೊಕ್ಕ ಸುತ್ತಮುತ್ತದ ಊರುದ ಜನಕ್ಲೆಗ್ ಸಾಗರೋತ್ಪನ್ನಲೆನ ಕುಷಿ ಪಡೆಯೆರೆ ಮಲ್ಪೆ ಮೀನುಗಾರೆರೆನ ಉತ್ಪಾದಕೆರೆನ ಕಂಪನಿ ಆಯೋಜನೆ ಮಲ್ತಿನ ಲೇಸ್ ಯಶಸ್ವಿ ಆವಡ್ ಪಂದ್ ಎಡ್ಡೆಪ್ಪು ಬಾಮಿಯೆರ್.
ಈ ಪೊರ್ತುಡು ಮಲ್ಪೆ ಮೀನುಗಾರೆರೆನ ಉತ್ಪಾದಕೆರೆನ ಕಂಪನಿದ ಗುರ್ಕಾರ್ದಿ ವನಜ ಪುತ್ರನ್, ನಿರ್ದೇಶಕೆರ್ ಜಯಂತಿ ಸಾಲಿಯಾನ್, ನಿರ್ಮಲ ಸಾಲಿಯಾನ್, ವೇದಾವತಿ ಪುತ್ರನ್ ಬೊಕ್ಕ ರೇಣುಕಾ, ಮುಖ್ಯ ಕಾರ್ಯನಿರ್ವಾಹಕೆರ್ ವಿಷ್ಣುಪ್ರಸಾದ್ ಕಾಮತ್ ಇತ್ತೆರ್.
ಕಾರ್ಲ: ಶ್ರೀ ಬ್ರಹ್ಮಬೈದರ್ಕಳ ಗರಡಿ, ಬೋಳ ದೈವಸ್ಥಾನಡ್ ನ.25 ರ್ದ್ 28 ಮುಟ್ಟ ವರ್ಷಾದಿದ ನೇಮೋತ್ಸವ ನಡಪೆರೆ ಉಂಡು. ಅನ್ನನೈವೇದ್ಯ ಸೇವೆ, ಸತ್ಯನಾರಾಯಣ ಪೂಜೆ, ಪ್ರಸಾದ ವಿತರಣೆ, ಅನ್ನಸಂತರ್ಪಣೆ, ಬೇತೆ ಬೇತೆ ಭಜನಾ ಮಂಡಳಿರ್ದ್ ಭಜನೆ ಕಾರ್ಯಕ್ರಮ, ಸೋಮವಾರ ಬ್ರಹ್ಮಬೈದರ್ಕಳ ದರ್ಶನ ನಡಪೆರೆ ಉಂಡು.
ನ.28 ದಾನಿ ಮದ್ಯಾಹ್ನ ಮಾಯಿಂದಲೆ ಮಾನಿಬಾಲೆ ನೇಮೋತ್ಸವ, ಬೊಕ್ಕ ಪಿಲಿಚಾಮುಂಡಿ ದೈವದ ನೇಮೋತ್ಸವ ನಡಪೆರೆ ಉಂಡು. ಈ ಲೇಸ್ಡ್ ಮಾತಾ ಭಕ್ತೆರ್ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್ ಶ್ರೀ ಬ್ರಹ್ಮಬೈದರ್ಕಳ ದೈವದ ಶ್ರೀಮುಡಿ ಗಂಧ ಪ್ರಸಾದ್ ಸ್ವೀಕಾರ ಮಲ್ಪೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
