May 2023

ಮೇ20-23: ದಂಡ್ಯೊಟ್ಟು ಬ್ರಹ್ಮಶ್ರೀ ಮುಗೇರ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ, ನೇಮ

ಬೊಲ್ತೇರ್: ಬಡಕೋಡಿ ಗ್ರಾಮದ ದಂಡ್ಯೊಟ್ಟು ಬ್ರಹ್ಮಶ್ರೀ ಮುಗೇರ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನೇಮ ಮೇ20-23 ಮುಟ್ಟ ನಡಪರೆ ಉಂಡು.

ಶ್ರೀ ಕ್ಷೇತ್ರ ಪಡ್ಯಾರಬೆಟ್ಟುದ ಅನುವಂಶಿಕ ಆಡಳಿತ ಮೊಕ್ತೇಸರೆರ್, ಧರ್ಮದರ್ಶಿಲು ಎ.ಜೀವಂಧರ್ ಕುಮಾರ್ ಮೆರೆನ ಮಾರ್ಗದರ್ಶನಡ್, ಸಂಪಿಗೆದಡಿ ಎಸ್ ಗೋಪಾಲಕೃಷ್ಣ ಉಪಾಧ್ಯಾಯ, ಅಸ್ರಣ್ಣೆರ್ ಬಂಗಾಡಿ ಮೆರೆನ ಪೌರೋಹಿತ್ಯಡ್ ಈ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನಲು ನಡಪರೆ ಉಂಡು.

ಮೇ20 ಸನಿಯಾರ ಬೊಲ್ಪುಗು ಶ್ರೀ ಕ್ಷೇತ್ರ ಪಡ್ಯಾರಬೆಟ್ಟದ ದ್ವಾರದ ಕೈತಲ್ ರ್ದ್ ಪುದೆಕಾಣಿಕೆ ಪಿದಡುಂಡು. ರಾತ್ರೆ ವಾಸ್ತು ಪೂಜೆ, ವಾಸ್ತು ಬಲಿ ನಡಪರೆ ಉಂಡು.

ಮೇ21 ಐತಾರ ಬೊಲ್ಪುಗು ಗಣಹೋಮ, 108 ಕಲಶ ಪ್ರತಿಷ್ಠೆ, ಕ್ಷೇತ್ರಗ್ ದೈವೊಲೆನ ಭಂಡಾರ ಬರಿಯೆರೆ, ಬ್ರಹ್ಮಕಲಶಾಭಿಷೇಕ, ಮಹಾಪೂಜೆ, ಮಧ್ಯಾಹ್ನ ಸಾರ್ವಜನಿಕ ಅನ್ನಸಂತರ್ಪಣೆ, ರಾತ್ರೆ ಮನೀಶ್ ಬೊಕ್ಕ ಕೂಟದಕ್ಲೆರ್ದ್ ಕಾಮಿಡಿ ಶೋ, ಧಾರ್ಮಸಭೆ, ಧರ್ಮರಸು ನೆಲ್ಲರಾಯ ದೈವೊದ ನೇಮ, ಶ್ರೀ ಮಹಾಕಾಳಿ ದೈವೊದ ನೇಮ ನಡಪರೆ ಉಂಡು.

ಮೇ22 ಸೋಮಾರ ರಾತ್ರೆ ಕಿಶೋರ್ ಡಿ ಶೆಟ್ಟಿ ಕುಡ್ಲ ನಿರ್ದೇಶನದ ಗರುಡ ಪಂಚೆಮಿ ನಾಟಕ, ಬೊಕ್ಕ ಬ್ರಹ್ಮಶ್ರೀ ಮುಗೇರ, ತನ್ನಿಮಾನಿಗ ದೈವೊಲೆನ ನೇಮ ನಡಪರೆ ಉಂಡು.

ಮೇ23 ಅಂಗಾರೆ ಬೊಲ್ಪುಗು ಅಲೇರ ಪಂಜುರ್ಲಿ ದೈವೊದ ನೇಮ, ಮಧ್ಯಾಹ್ನ ಶ್ರೀ ಕೊರಗಜ್ಜ ದೈವೊದ ನೇಮ, ಬಯ್ಯಗ್ ಕುರುಸಂಬಿಲ ಸೇವೆ, ಭಂಡಾರ ಜಪ್ಪೆರೆ ಉಂಡು. ‌

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಸಮಿತಿ, ಜೀರ್ಣೋದ್ಧಾರ ಸಮಿತಿ, ಬ್ರಹ್ಮಶ್ರೀ ಮುಗೇರ ಸಮಿತಿ, ಬ್ರಹ್ಮಶ್ರೀ ಮುಗೇರ ಮಹಿಳಾ ಸಮಿತಿದ ಅಧ್ಯಕ್ಷೆರ್, ಪದಾಧಿಕಾರಿಲು, ಸರ್ವಸದಸ್ಯೆರ್ ಬೊಕ್ಕ ಬಡಕೋಡಿಗುತ್ತು, ಬರ್ಕೆ ಗುರಿಕಾರೆರ್, ಮುಗೇರ ಗುರಿಕಾರೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಜುಲೈಡ್ ಮೋದಿ ಫ್ರಾನ್ಸ್ ಗ್ ಭೇಟಿ

ಪ್ರಧಾನಿ ಮೋದಿ ಜುಲೈಡ್ ಫ್ರಾನ್ಸ್ ಗ್ ಭೇಟಿ ಕೊರಿಯೆರೆ ಉಲ್ಲೆರ್.

ಜುಲೈ 14 ಕ್ಕ್ ಪ್ಯಾರಿಸ್ ಡ್ ನಡಪರೆ ಇಪ್ಪುನ ಬಾಸ್ಟಿಲ್ ಡೇ ಪರೇಡ್ ಗ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆವೊಡು ಪಂದ್ ಅಧ್ಯಕ್ಷೆರ್ ಮ್ಯಾಕ್ರನ್, ಪ್ರಧಾನಿ ಮೋದಿನ್ ಲೈದೆರ್.

ಫ್ರೆಂಚ್ ಸೇನೆದೊಟ್ಟಿಗೆ ಭಾರತದ ಸೇನೆ ಪರೇಡ್ ಡ್ ಪಾಲ್ ಪಡೆಪುಂಡು ಪಂದ್ ಭಾರತೀಯ ವಿದೇಶಾಂಗ ಸಚಿವಾಲಯ ಪ್ರಕಟ ಮಲ್ದ್ಂಡ್. ಈ ಭೇಟಿ ಭಾರತ ಬೊಕ್ಕ ಫ್ರಾನ್ಸ್ ನಡುತ್ತ ಸಂಬಂಧ ಗಟ್ಟಿ ಮಲ್ಪರೆ ಕಾರಣ ಆಪುಂಡು.

ಇನಿ ಬ್ರಿಟನ್ ದೊರೆ 3ನೇ ಚಾರ್ಲ್ಸ್ ಗ್ ಪಟ್ಟಾಭಿಷೇಕ

1952 ತ್ತ ಬೊಕ್ಕ ಉಂದುವೇ ಸುರುತ್ತ ಸರ್ತಿ ಬ್ರಿಟನ್ ರಾಜೆಯೊರಿ ಸಿಂಹಾಸನ ಏರೊಂದು ಉಲ್ಲೆರ್.

6ನೇ ಜಾರ್ಜ್ ತೀರ್ ಪೋಯಿನ ಬೊಕ್ಕ 70 ವರ್ಷದ ಕಾಲ ರಾಣಿ ಎಲಿಜಬೆತ್ ಪಾರುಪತ್ಯದ ಬೊಕ್ಕ ಇತ್ತೆ ಆರೆನ ಮಗೆ 3ನೇ ಚಾರ್ಲ್ಸ್ ದೊರೆ ಇನಿ ಪಟ್ಟಗ್ ಏರೊಂದು ಉಲ್ಲೆರ್. ಭಾರತದ ಕಾಲಮಾನ ಪ್ರಕಾರ ಮಧ್ಯಾಹ್ನ 3 ಗಂಟೆಗ್ ರಾಜ ಬೊಕ್ಕ ರಾಣಿಯೆರೆನ ಮೆರವಣಿಗೆ ಸುರು ಆಪುಂಡು. ಬಯ್ಯಗ್ 6 ಗಂಟೆರ್ದ್ ಪಟ್ಟಾಭಿಷೇಕ ಲೇಸ್ ಸುರು ಆಪುಂಡು. ಪಟ್ಟಾಭಿಷೇಕದ ಲೆಕ್ಕೊಡು ಬಿಟ್ರನ್ ಸಶಸ್ತ್ರ ಪಡೆಲೆಗ್ ಚಾರ್ಲ್ಸ್ 4 ಲಕ್ಷ ಮೆಡಲ್ ಕೊರಿಯೆರೆ ಉಲ್ಲೆರ್.

ಪಶ್ಚಿಮ ಜಪಾನ್‌ದ ಇಶಿಕಾವಾ ಪ್ರದೇಶಡ್ 6.3 ಬಿರ್ಸ್ ದ ಭೂಕಂಪ

ಟೋಕಿಯೊ: ಪಶ್ಚಿಮ ಜಪಾನ್‌ದ ಇಶಿಕಾವಾ ಪ್ರದೇಶಡ್ ಸುಕ್ರಾರ (ಇನಿ) 6.3 ಬಿರ್ಸ್ ದ ಭೂಕಂಪ ನಡತ್ ದ್ಂಡ್ ಪಂದ್ ಹವಾಮಾನ ಇಲಾಖೆ ತೆರಿಪಾದ್ಂಡ್.

ಭೂಕಂಪರ್ದ್ ಜಪಾನ್ ದ ಪ್ರವಾಸಿ ತಾಣವಾಯಿನ ನಾಗಾನೊ ಬೊಕ್ಕ ಕನಜಾವಾ ನಡುತ್ತ ಶಿಂಕನ್ಸೆನ್ ಬುಲೆಟ್ ರೈಲ್ ನ್ ಉಂತಾದೆರ್. ಭೂಕಂಪದ ಬೊಕ್ಕ ಒವ್ವೇ ಸುನಾಮಿ ಎಚ್ಚರಿಕೆನ್ ಕೊರ್ತಿಜಿ. ಆಂಡ ಸೂಜಿ ನಗರಡ್ ಗುಡ್ಡೆ ಜರಿದ್ಂಡ್. ಅತ್ತಂದೆ ಇಡೇ ಮುಟ್ಟ ಒವ್ವೇ ತೊಂದರೆ ಆತಿಜಿ ಪಂದ್ ತೆರಿದ್ ಬೈದ್ಂಡ್.

ಎಲ್ಲೆ ಬಿ.ಸಿ. ರೋಡ್‌ಡ್ ಯೋಗಿ ರೋಡ್‌ ಶೋ: ಗಾಡಿ ಬಂದ್?

ಬಂಟ್ವಾಳ: ಉತ್ತರಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಮೇರ್ (ಮೇ6) ಎಲ್ಲೆ ಬಯ್ಯಗ್ 4 ಗಂಟೆಗ್ ಬಿ.ಸಿ.ರೋಡ್‌ ಡ್ ರೋಡ್‌ ಶೋ ಮಲ್ಪರೆ ಉಲ್ಲೆರ್. ಈ ಬಗೆಟ್ ಭದ್ರತೆದೊಟ್ಟಿಗೆ ಸಂಚಾರಡ್ ವ್ಯತ್ಯಾಸ ಆವೆರೆ ಬಲ್ಲಿ ಪಂದ್ ಪನ್ಪುನ ದಿಟ್ಟಿಡ್ ಕುಡ್ಲ-ಬಿ.ಸಿ. ರೋಡ್‌ ಮಾರ್ಗಡ್ ಕೆಲವು ಪೊರ್ತು ಗಾಡಿ ಸಂಚಾರ ನಿಷೇಧ ಆಪಿನ ಅಂದಾಜಿ ಉಂಡು.

ಸಿಎಂ ಯೋಗಿ ಮೇರ್ ಹೆಲಿಕಾಪ್ಟರ್‌ ಮುಖೇನ ಬಂಟ್ವಾಳ ವಿದ್ಯಾಗಿರಿ ಎಸ್‌ವಿಎಸ್‌ ಕಾಲೇಜ್ ದ ಕೈತಲ್ ದ ಹೆಲಿಪ್ಯಾಡ್‌ಗ್ ಬತ್ತ್ ದ್ ಅಲ್ಪರ್ದ್ ಝೀರೋ ಟ್ರಾಫಿಕ್‌ ಮುಖೇನ ಕೈಕಂಬಗ್ ಬತ್ತ್ ದ್ ಅಲ್ಪರ್ದ್ ಖಾಸಗಿ ಬಸ್‌ ನಿಲ್ದಾಣ ಮುಟ್ಟ ರೋಡ್‌ ಶೋ ಮಲ್ಪರೆ ಉಲ್ಲೆರ್.

ಅಂಚೆನೆ ರೋಡ್‌ ಶೋ ಆಪಿನ ತಾದಿ ಉದ್ದಗ್ ಬ್ಯಾರಿಕೇಡ್‌ ಪಾಡುವೆರ್. ಅಲ್ಪಲ್ಪ ಪಾಡಿನ ಮೆಟಲ್‌ ಡಿಟೆಕ್ಟರ್‌ ಮುಖೇನ ಮಾತ್ರ ಪ್ರವೇಶಗ್ ಅವಕಾಶ ಇಪ್ಪುಂಡು.

ಭದ್ರತೆದ ಹಿನ್ನಲೆಡ್ ರೋಡ್‌ ಶೋ ಗಾಡಿದ ಪಿರವು-ಎದುರು ಸುಮಾರ್ 500 ಜನ ಇಸೇಸ ಸ್ವಯಂಸೇವಕೆರ್ ಬೂರ್ದು, ಬೇತೆ ಎರ್ಲಾ ಗಾಡಿದ ಕೈತಡೇ ಪೋವಂದಿಲೆಕ್ಕ ಎಚ್ಚರಿಕೆ ವಹಿಸಾದೆರ್.

ಮೇ 8-10 ಮುಟ್ಟ ಬಾರ್ ಬಂದ್?

ವಿಧಾನಸಭೆ ವೋಟುದ ನಿಲೆಟ್ಟ್ ರಾಜ್ಯಡ್ ಮಾತ ಬಾರ್ ಬಂದ್ ಮಲ್ಪರೆ ಉಂಡು ಪಂದ್ ಚುನಾವಣಾ ಆಯೋಗ ತೆರಿಪಾದ್ಂಡ್.

ಮೇ8 ಕ್ಕ್ ಬಯ್ಯಗ್ 5 ಗಂಟೆಗ್ ರಾಜ್ಯದ ಬಾರ್ ಬಂದ್ ಆಪುಂಡು. ಮೇ10 ಕ್ಕ್ ವೋಟು ನಡಪರೆ ಉಂಡು. ಮೇ11 ಕ್ಕ್ ಬಾರ್ ಓಪನ್ ಆಪುಂಡು. ಮೇ12 ಕ್ಕ್ ಜನಕುಲೆಗ್ ಡ್ರಿಂಕ್ಸ್ ತಿಕ್ಕುಂಡು. ಮೇ13 ಕ್ಕ್ ವೋಟುದ ಲೆಕ್ಕ ಪ್ರಕಟ ಆಪಿನೆರ್ದಾವರ ಕುಡ ಬಂದ್ ಇಪ್ಪುಂಡು. ಮೇ15 ಕ್ಕ್ ಏಪದಲೆಕ್ಕನೆ ಅಂಗಡಿ ಓಪನ್ ಆಪುಂಡು.

ಎ.26-ಮೇ8: ಮಿತ್ತೂರ್ ಉಳ್ಳಾಕ್ಲು ನಾಯರ್ ದೈವೊಲೆನ ಕಾಲಾಧಿದ ಜಾತ್ರೆ

ಸುಳ್ಯ ಸೀಮೆದ ಉಬರಡ್ಕ ಮಿತ್ತೂರ್ ಗ್ರಾಮದ ಉಳ್ಳಾಕ್ಲು ನಾಯರ್ ದೈವೊಲೆನ ಕಾಲಾಧಿದ ಜಾತ್ರೆ ಎ.26-ಮೇ8 ಮುಟ್ಟ ನಡಪರೆ ಉಂಡು.

ಮೇ2 ಅಂಗಾರೆ ಬಯ್ಯಗ್ ಮಿತ್ತೂರ್ ಮೂಲ ಸನ್ನಿಧಿರ್ದ್ ಉಳ್ಳಾರೆನ ಭಂಡಾರ ಬತ್ತ್ ದ್ ಓಲಸರಿಡ್ ದೇವೆರೆಗ್ ಸ್ವಸ್ತಿಕೆ ನಡತ್ಂಡ್. ಬೊಕ್ಕ ಬಲ್ಲಾಳರೆನ ಕಾಣಿಕೆ ಆದ್ ಅಡ್ತೆಲೆ ಕಿರುಚಾವಡಿಗ್ ಭಂಡಾರ ಬತ್ತ್ ದ್ ಉಳ್ಳಾರೆನ ದರ್ಶನ ನಡತ್ಂಡ್.

ಮೇ3 ಬುಧಾರ ಬಯ್ಯಗ್ ಮಿತ್ತೂರ್ ನಾಯರ್ ಭಂಡಾರ ಬತ್ತ್ ದ್ ಬಂದ್ಯತ್ತ ಒಲಸರಿ, ಮಿತ್ತೂರ್ ನಾಯರೆಗ್ ಕಿರೀಟವಾದ್ ಅಡ್ತಲೆ ಕಿರುಚಾವಡಿಗ್ ಬತ್ಂಡ್.

ಮೇ7 ಐತಾರ ರಾತ್ರೆ ಒಲಸರಿ, ಉಳ್ಳಾರೆಗ್ ಸಿರಿಮುಡಿ ನಾಯರ್ ಗ್ ಕಿರೀಟವಾದ್ ಪಡಂಪಾಳಿ ಮಾಳಿಗೆಗೆ ಭಂಡಾರ ಬರಿಯೆರೆ ಉಂಡು. ಬೊಕ್ಕ ಉಳ್ಳಾರೆನ ದರ್ಶನ ನಡಪರೆ ಉಂಡು.

ಮೇ8 ಸೋಮಾರ ಬೊಲ್ಪುಗು ನಾಯರ್ ನೇಮ, ಮೇಲ್ಮಂಚಗ್ ಕಾಯಿ ಹಾಕಿಯೆರೆ, ರೂಳುಕಾಯಿ, ಅಂಬುಕಾಯಿ, ಸ್ನಾನ, ಮಧ್ಯಾಹ್ನ ಚಾಕಟೆ ಅಡಿಟ್ಟ್ ಬಟ್ಟಲ್ ಕಾಣಿಕೆ, ಪರಕೆ, ಪೀಡೆ ಬುಡ್ಪಾಯೆರೆ, ತೊಡಕ-ಮಡಕ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಮಾಣಿಬೆಟ್ಟು ಪುರುಷೋತ್ತಮ ಗೌಡ, ಆಡಳಿತ ಮೊಕ್ತೇಸರೆರ್ ಕೆದಂಬಾಡಿ ವೆಂಕಟ್ರಮಣ ಗೌಡ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮೇ8 ಕ್ಕ್ ಎಸ್‌ಎಸ್‌ಎಲ್‌ಸಿ ರಿಸಲ್ಟ್

ಬೆಂಗ್ಲೂರ್: ಈ ಸರ್ತಿದ ಎಸ್‌ಎಸ್‌ಎಲ್‌ಸಿ ಪರೀಕ್ಷೆದ ರಿಸಲ್ಟ್ ಮೇ8 ಕ್ಕ್ ಪ್ರಕಟ ಆಪುನ ಅಂದಾಜಿ ಉಂಡು.

ಕರ್ನಾಟಕ ಶಾಲೆದ ಪರೀಕ್ಷೆ ಬೊಕ್ಕ ಮೌಲ್ಯಮಾಪನ ಮಂಡಳಿ (KSEAB) ಎಸ್‌ಎಸ್‌ಎಲ್‌ಸಿ ರಿಸಲ್ಟ್ ಪ್ರಕಟ ಮಲ್ಪರೆ ಮತ ತಯಾರ್ ಮಲ್ತ್ ದ್ಂಡ್. ರಿಸಲ್ಟ್ ಪ್ರಕಟ ಆಯಿನ ಬೊಕ್ಕ ಕಲ್ಪಾರ್ಥಿಲು ಮಂಡಳಿದ ಅಧಿಕೃತ ವೆಬ್‌ಸೈಟ್– kseab.karnataka.gov.in ಅತ್ತಂಡ karresults.nic.in ಗ್ ಭೇಟಿ ಕೊರ್ದು, ಕರ್ನಾಟಕ SSLC ರಿಸಲ್ಟ್ 2023ನ್ ತೂವೊಲಿ.

ಕೆಎಸ್‌ಇಎಬಿ ಪ್ರಧಾನ ಕಾರ್ಯದರ್ಶಿ ರೇವಣಸಿದ್ದಪ್ಪ ಮೇರ್ ಕ್ಯಾರಿಯರ್‌ 360 ದೊಟ್ಟಿಗೆ ಪಾತೆರ್ದ್, ಎಕುಲು ಎಸ್‌ಎಸ್‌ಎಲ್‌ಸಿ ರಿಸಲ್ಟ್ ನ್ ಮೇ8 ಕ್ಕ್ ಪ್ರಕಟ ಮಲ್ಪುನ ಅಂದಾಜಿ ಉಂಡು. ರಿಸಲ್ಟ್ ಪ್ರಕಟ ಮಲ್ಪುನ ಬಗೆಟ್ ನಿರ್ಧಾರ ದೆತೊನಿಯೆರೆ ಇನಿ ಸಭೆ ನಡಪಾಯೆರೆ ಉಲ್ಲ. ಸಭೆತ್ತ ಬೊಕ್ಕ ತಾರೀಕ್ ಘೋಷಣೆ ಮಲ್ಪುವ ಪಂದ್ ಪಂಡೆರ್.

ಪರೀಕ್ಷಾ ಮಂಡಳಿ ಕರ್ನಾಟಕ SSLC ಪರೀಕ್ಷೆನ್ ಮಾರ್ಚ್ 31 ರ್ದ್ ಏಪ್ರಿಲ್ 15 ಮುಟ್ಟ ನಡಪಾದ್ಂಡ್‌. ಕರ್ನಾಟಕ ಎಸ್‌ಎಸ್‌ಎಲ್‌ಸಿ ಉತ್ತರ ಪತ್ರಿಕೆದ ಮೌಲ್ಯಮಾಪನ ಪ್ರಕ್ರಿಯೆ ಏಪ್ರಿಲ್ 21 ರ್ದ್ ಸುರು ಅಪುಂಡು. ಮೇ 10 ಕ್ಕ್ ರಾಜ್ಯಡ್ ಕರ್ನಾಟಕ ವಿಧಾನಸಭೆ ವೋಟು ನಡಪರೆ ಉಂಡು. ನೆಕ್ಕ್ ರಡ್ಡ್ ದಿನ ದುಂಬೇ ಎಸ್‌ಎಸ್‌ಎಲ್‌ಸಿ ರಿಸಲ್ಟ್ ಘೋಷಣೆ ಆಪುಂಡು. ಈ ಸರ್ತಿ ಸುಮಾರ್ 8 ಲಕ್ಷ ಕಲ್ಪಾರ್ಥಿಲು ಪರೀಕ್ಷೆ ಬರೆತೆರ್.

ಕರ್ನಾಟಕ SSLC ರಿಸಲ್ಟ್ (Karnataka SSLC Result 2023) ತೂಪುನೇ ಎಂಚ?

1. ಕಲ್ಪಾರ್ಥಿಲು ತನ್ನ ರಿಸಲ್ಟ್ ಗಾದ್ karresults.nic.in ಡ್ ಅಧಿಕೃತ ವೆಬ್‌ಸೈಟ್‌ಗ್ ಭೇಟಿ ಕೊರೊಡು.
2. ಮುಖಪುಟಡ್ ಇಪ್ಪುನ ‘ಕರ್ನಾಟಕ SSLC ರಿಸಲ್ಟ್ 2023’ ಲಿಂಕ್ ನ್ ಒತ್ತೊಡು.
3. ಉಂದು ನಿಕುಲೆನ್ KSEAB SSLC ರಿಸಲ್ಟ್ 2023 ಲಾಗಿನ್ ವಿಂಡೋಗ್ ಮರುನಿರ್ದೇಶ ಮಲ್ಪೊಂಡು.
4. ಬೊಕ್ಕ ನಿಕುಲು ದುಂಬುದ ಪುಟಡ್, ನೋಂದಣಿ ಸಂಖ್ಯೆ ಬೊಕ್ಕ ಪುಟ್ಟುನ ತಾರೀಕ್ ಪಾಡೊಡು.
5. ಪೊಲಬುನ್ ಸಂದಾದ್ ಬೊಕ್ಕ SSLC ರಿಸಲ್ಟ್ 2023 ಕರ್ನಾಟಕ ಪರದೆದ ಮಿತ್ತ್ ತೋಜುಂಡು.
6. ರಿಸಲ್ಟ್ ದ PDF ನ್ ಡೌನ್‌ಲೋಡ್ ಮಲ್ತ್ ದ್ ಬೊಕ್ಕ ಭವಿಷ್ಯದ ಉಲ್ಲೇಖಗಾದ್ ಕರ್ನಾಟಕ SSLC ರಿಸಲ್ಟ್ 2023 ತ್ತ ಮುದ್ರಣನ್ ದೆತೊನೊಲಿ.

ಬೊಕ್ಕ 10ನೇ ಕ್ಲಾಸ್ ಕಲ್ಪಾರ್ಥಿಲು ರಿಸಲ್ಟ್ ಆಧಾರದ ಮಿತ್ತ್ 11ನೇ ಕ್ಲಾಸ್ ಗ್ ತನ್ನ ಆದ್ಯತೆದ ಕೋರ್ಸ್ ಗ್ ಸೇರ್ಪಡೆ ಆಯೆರೆ ಸಹಕಾರಿ ಆಪುಂಡು. 2022ಟ್ಟ್ ಒಟ್ಟು 8.73 ಲಕ್ಷ ಕಲ್ಪಾರ್ಥಿಲು ಎಸ್‌ಎಸ್‌ಎಲ್‌ಸಿ ಪರೀಕ್ಷೆಗ್ ಹಾಜರಾದಿತ್ತೆರ್. ನೆಟ್ಟ್ ಶೇ. 85.63 ದಾತ್ ರಿಸಲ್ಟ್ ಬೈದ್ಂಡ್.

ವೋಟುದ ಪಟ್ಟಿಡ್ ನಿಕ್ಲೆನ ಪುದರ್ ಉಂಡ ಪಂದ್ ತೂವೊಲಿ?

ಕರ್ನಾಟಕ ವಿಧಾನಸಭೆ ವೋಟು ಮೇ10 ಕ್ಕ್ ನಡಪರೆ ಉಂಡು.

ಇಂಚಾದ್ ವೋಟುದ ಪಟ್ಟಿಡ್ ನಿಕ್ಲೆನ ಪುದರ್ ಉಂಡ ಇಜ್ಜ ಪಂದ್ ಸಂಶಯ ಇತ್ತಿನಕುಲು ಭಾರತದ ಚುನಾವಣಾ ಆಯೋಗ ನಿಯಮಿತವಾದ್ ನವೀಕರಣೆ ಮಲ್ತಿನ ಅಧಿಕೃತ ವೆಬ್ ಸೈಟ್ ಡ್ ಆನ್ ಲೈನ್ ಮುಖೇನ ತೂವೊಲಿ.

ಸುರುಕು https://electoralsearch.in ಸೈಟ್​ ಗ್ ಭೇಟಿ ಕೊರ್ದು, ಸರ್ಚ್​ ಬೈ ಡೀಟೇಲ್ಸ್ ನ್ ಆಯ್ಕೆ ಮಲ್ಪಿ. ಬೊಕ್ಕ ನಿಕ್ಲೆನ ಪುದರ್, ಪ್ರಾಯ, ರಾಜ್ಯ, ಜಿಲ್ಲೆ ಬೊಕ್ಕ ಕ್ಯಾಪ್ಚಾ ಕೋಡ್​ ಪಾಡ್ಲೆ. ಅತ್ತನಗ ನಿಕ್ಲೆನ ಪುದರ್ ವೋಟುದ ಪಟ್ಟಿಡ್ ಇತ್ಂಡ ಪರದೆದ ತಿರ್ತ್ ಪೊಲಬು ಕೊರ್ದಿಪ್ಪುವೆರ್.

ಅಂಚೆನೆ ಕೊಡೊಂಜಿ ರೀತಿಡ್ಲಾ ತೂವೊಲಿ. ಮುಲ್ಪ ನಿಕುಲು ಸುರುಕು https://electoralsearch.in ಸೈಟ್​ಗ್ ಭೇಟಿ ಕೊರ್ದು, ಸರ್ಚ್​ ಬೈ ಎಪಿಕ್ ಆಯ್ಕೆ ಮಲ್ಪಿ. ಬೊಕ್ಕ ನಿಕ್ಲೆನ ವೋಟರ್ ಐಡಿ ನಂಬರ್, ರಾಜ್ಯ, ಕ್ಯಾಪ್ಚಾ ಕೋಡ್​ ಪಾಡ್ಲೆ. ಅತ್ತನಗ ನಿಕ್ಲೆನ ಪುದರ್ ಪಟ್ಟಿಡ್ ಇತ್ಂಡ ಪರದೆದ ತಿರ್ತ್ ಜಿಲ್ಲೆ, ವಿಧಾನಸಭೆ ಕ್ಷೇತ್ರದ ಪೊಲಬು ತಿಕ್ಕುಂಡು. ನೆನ್ ನಿಕುಲು ವೋಟುಗು 10 ದಿನ ದುಂಬು ಇಪ್ಪುನಗ ತೂವೊಡಾಪುಂಡು.