ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿ ಇನಿ ಬೆಂಗ್ಲೂರ್ ಡ್ ರೋಡ್ ಶೋ ಮಲ್ಪರೆ ಉಲ್ಲೆರ್.
ಚಿಕ್ಕಪೇಟೆ ಬೊಕ್ಕ ವಿಜಯನಗರ ಕ್ಷೇತ್ರದ ವ್ಯಾಪ್ತಿಡ್ ರೋಡ್ ಶೋ ಮಲ್ಪುನ ಎಐಸಿಸಿ ಪ್ರಧಾನ ಕಾರ್ಯದರ್ಶಿ ತನ್ನ ಅಭ್ಯರ್ಥಿಲೆನ ಪರ ವೋಟು ಕೆನಿಯೆರೆ ಉಲ್ಲೆರ್.
ಬೊಲ್ಪುಗು 10.30 ರ್ದ್ 11.30 ಮುಟ್ಟ ಚಿಕ್ಕಪೇಟೆ ಕ್ಷೇತ್ರ ಬೊಕ್ಕ 11.45 ರ್ದ್ 1.15 ಮುಟ್ಟ ವಿಜಯನಗರ ಕ್ಷೇತ್ರಡ್ ಸಂಚಾರ ಮಲ್ಪುವೆರ್. ರೋಡ್ ಶೋ ನಡಪುನ ಪ್ರದೇಶಡ್ ಮಾರ್ಗ ಸಂಚಾರನ್ ಒಂತೆ ಪೊರ್ತು ಉಂತಾದೆರ್.
ಬೆಂಗ್ಲೂರ್: 2022-23 ನೇ ಸಾಲ್ ದ ಎಸ್ ಎಸ್ ಎಲ್ ಸಿ ರಿಸಲ್ಟ್ ಇನಿ ಪ್ರಕಟ ಆತ್ಂಡ್.
ಈ ಸರ್ತಿ 83.89 ದಾತ್ ರಿಸಲ್ಟ್ ದಾಖಲ್ ಆತ್ಂಡ್. ನೆಟ್ಟ್ ನಾಲ್ ಕಲ್ಪಾರ್ಥಿಲು 625 ಟ್ಟ್ 625 ಮಾರ್ಕ್ ಪಡೆತೆರ್. ಈ ರಿಸಲ್ಟ್ ನ್ ಮಲ್ಲೇಶ್ವರಂಡ್ ಇಪ್ಪುನ ಪ್ರೌಢ ಶಿಕ್ಷಣ ಬೊಕ್ಕ ಮೌಲ್ಯ ನಿರ್ಣಯ ಮಂಡಳಿ (ಕೆಎಸ್ ಇಎಬಿ) ಪತ್ರಿಕಾಗೋಷ್ಟಿಡ್ ಪ್ರಕಟ ಮಲ್ದ್ಂಡ್.
ಭೂಮಿಕಾ ಪೈ ನ್ಯೂ ಮೆಕಾಲೆ ಇಂಗ್ಲಿಷ್ ಹೈಸ್ಕೂಲ್ ಹೊಸೂರು, ಯಶಸ್ ಗೌಡ ಬಾಲಗಂಗಾಧರ ಶಾಲೆ ಚಿಕ್ಕಬಳ್ಳಾಪುರ, ಅನುಪಮ ಶ್ರೀ ಶೈಲಾ ಬೆಳಗಾವಿ, ಬೀಮನ್ ಗೌಡ ಬೀರಾದಾರ್ ಆಕ್ಸ್ಫರ್ಡ್ ಇಂಗ್ಲೀಷ್ ಹೈಸ್ಕೂಲ್ ಮುದ್ದೇಬಿಹಾಳ್ 625 ಟ್ಟ್ 625 ಮಾರ್ಕ್ ಪಡೆತೆರ್.
ಈ ಸರ್ತಿ ಸುರುತ್ತ ಭಾಷೆಡ್ 14,923 ಜೋಕುಲು 125ಕ್ಕ್ 125 ಮಾರ್ಕ್ ಪಡೆತೆರ್. ರಡ್ಡನೇ ಭಾಷೆಡ್ 9754 ಜೋಕುಲು ಔಟ್ ಆಫ್ ಔಟ್ ದೆತ್ತ್ಂಡ, ಮೂಜಿನೇ ಭಾಷೆಡ್ 16170, ಗಣಿತ 2132, ವಿಜ್ಞಾನ 983, ಸಮಾಜ ವಿಜ್ಞಾನಡ್ 8311 ಕಲ್ಪಾರ್ಥಿಲು ನೂದೆಕ್ಕ್ ನೂದು ಮಾರ್ಕ್ ಪಡೆತೆರ್. ಒಟ್ಟು 8,35,102 ಕಲ್ಪಾರ್ಥಿಲು ಪರೀಕ್ಷೆಗ್ ಹಾಜರಾತೆರ್. ಆಯಿಟ್ಟ್ 7 ಲಕ್ಷದ 619 ಕಲ್ಪಾರ್ಥಿಲು ಪಾಸಾತೆರ್.
ವಾ ಜಿಲ್ಲೆಗ್ ಏತ್ನೆ ತಾನ..?
ಚಿತ್ರದುರ್ಗಗ್ 1ನೇ ತಾನ 96.8%
ಮಂಡ್ಯಗ್ 2ನೇ ತಾನ 96.74%
ಹಾಸನಗ್ 3ನೇ ತಾನ 96.68 %
ಬೆಂಗ್ಲೂರ್ ಗ್ರಾಮೀಣಗ್ 4ನೇ ತಾನ 96.48%
ಚಿಕ್ಕಬಳ್ಳಾಪುರಗ್ 5ನೇ ತಾನ 96.48%
ಕೋಲಾರಗ್ 6ನೇ ತಾನ 94.6%
ಚಾಮರಾಜನಗರಗ್ 7ನೇ ತಾನ 96.15%
ಮಧುಗಿರಿಗ್ 8ನೇ ತಾನ 93.23%
ಕೊಡಗುಗ್ 9ನೇ ತಾನ 93.19%
ವಿಜಯನಗರಗ್ 10ನೇ ತಾನ 91.41%
ವಿಜಯಪುರಗ್ 11ನೇ ತಾನ 91.23%
ಚಿಕ್ಕೋಡಿಗ್ 12ನೇ ತಾನ 91.07%
ಉತ್ತರ ಕನ್ನಡಗ್ 13ನೇ ತಾನ 90.53%
ದಾವಣಗೆರೆಗ್ 14ನೇ ತಾನ 90.43%
ಕೊಪ್ಪಳಗ್ 15ನೇ ತಾನ 90.27%
ಮೈಸೂರ್ ಗ್ 16ನೇ ತಾನ 89.75%
ಚಿಕ್ಕಮಗಳೂರ್ ಗ್ 17ನೇ ತಾನ 89.69%
ಒಡಿಪುಗ್ 18ನೇ ತಾನ 89.49%
ದಕ್ಷಿಣ ಕನ್ನಡಗ್ 19ನೇ ತಾನ 89.47%
ತುಮಕೂರುಗ್ 20ನೇ ತಾನ 89.43%
ರಾಮನಗರಗ್ 21ನೇ ತಾನ 89.42%
ಹಾವೇರಿಗ್ 22ನೇ ತಾನ 89.11%
ಶಿರಸಿಗ್ 23ನೇ ತಾನ 89.39%
ಧಾರವಾಡಗ್ 24ನೇ ತಾನ 86.55%
ಗದಗಗ್ 25ನೇ ತಾನ 86.51%
ಬೆಳಗಾವಿಗ್ 26 ನೇ ತಾನ 85.85%
ಬಾಗಲಕೋಟೆಗ್ 27 ನೇ ತಾನ 85.14%
ಕಲಬುರಗಿಗ್ 28 ನೇ ತಾನ 84.51%
ಶಿವಮೊಗ್ಗಗ್ 29 ನೇ ತಾನ 84.04%
ರಾಯಚೂರುಗ್ 30 ನೇ ತಾನ 84.02%
ಬಳ್ಳಾರಿಗ್ 31ನೇ ತಾನ 81.54%
ಬೆಂಗ್ಲೂರ್ ಉತ್ತರಗ್ 32 ನೇ ತಾನ 80.93%
ಬೆಂಗ್ಲೂರ್ ದಕ್ಷಿಣಗ್ 33ನೇ ತಾನ 78.73%
ಬೀದರ್ ಗ್ 34ನೇ ತಾನ 78.95%
ಯಾದಗಿರಿಗ್ 35ನೇ ತಾನ 75.49% ರಿಸಲ್ಟ್ ಬೈದ್ಂಡ್.
ಅಂಚೆನೆ ಕಲ್ಪಾರ್ಥಿಲು ರಿಸಲ್ಟ್ ನ್ ಅಧಿಕೃತ ವೆಬ್ಸೈಟ್: https://kseab.karnataka.gov.in/ ಅತ್ತಂಡ https://karresults.nic.in/ ತೂವೊಲಿ.
ರೋಟರಿ ಕ್ಲಬ್ ಬಂಟ್ವಾಳ ಟೌನ್ ಗವರ್ನರ್ ಭೇಟಿ ಕೊರ್ಪಿನ ಲೇಸ್ ಡ್ ರೋಟರಿ ಜಿಲ್ಲಾ ಗವರ್ನರ್ ಮೇಜರ್ ಡೋನರ್ ರೋ ಪ್ರಕಾಶ್ ಕಾರಂತ್, ಉಪ ಗವರ್ನರ್ ರೋ ಮಂಜುನಾಥ್ ಆಚಾರ್ಯ ಕ್ಲಬ್ ಗ್ ಭೇಟಿ ಕೊರ್ದು ಕ್ಲಬ್ ಅಸೆಂಬ್ಲಿ ನಡಪಾಯೆರ್.
ಬೊಕ್ಕ ಸಜೀಪ ನಡು ಪ್ರಾಥಮಿಕ ಆರೋಗ್ಯ ಕೇಂದ್ರಗ್ ಒಂಜಿ ನೀರ್ ದ ಪೂರ್ ಫೈರ್ ಉದಿಪನ ಮಲ್ತ್ ದ್ ಕೊರಿಯೆರ್. ಹುಷಾರ್ ದಾಂತೆ ನರಲೊಂದು ಇತ್ತಿನ ಸಜೀಪ ನಡು ಕೊಯಿಲ ನಿವಾಸಿ ಮೆರೆಗ್ ಕ್ಲಬ್ ವತಿರ್ದ್ 5 ಸಾರ ನಗದು ಕೊರಿಯೆರ್.
ಸಾಲೆತ್ತೂರು ಕೊಳ್ನಾಡು ಪರಿಶಿಷ್ಟ ಪಂಗಡದ ಬಡಪತ್ತ್ ಕುಟುಂಬದ ಹರೀಶ ಕುಟುಂಬಗ್ ನಿರ್ಮಾಣ ಆಯಿನ ಇಲ್ಲಲ್ ತುಡರ್ ಅರ್ಲಾದ್ ಇಲ್ಲದ ಕೀ ನ್ ಕುಟುಂಬಗ್ ಕೊರ್ದು, ಎಡ್ಡೆಪ್ಪು ಬಯಕಿಯೆರ್.
ಬಯ್ಯಗ್ ಬಂಟ್ವಾಳ ಬೈಪಾಸ್ ಭಂಡಾರಿ ಭವನಡ್ ಸಭಾ ಲೇಸ್ ನಡತ್ಂಡ್. ಈ ಲೇಸ್ ದ ಚಾವಡಿಡ್ ಗವರ್ನರ್, ರೊ. ಪ್ರಕಾಶ್ ಕಾರಂತ್, ರೊ. ವಾಣಿ ಕಾರಂತ್, ಉಪ ಗವರ್ನರ್, ರೋ. ಮಂಜುನಾಥ್ ಆಚಾರ್ಯ, ರೋ ಪುಷ್ಪರಾಜ್ ಹೆಗ್ಡೆ, ರೋ ರಮೇಶ್ ತುಂಬೆ, ಕಾರ್ಯದರ್ಶಿ ರೋ ನಾರಾಯಣ ಪೆರ್ನೆ ಇತ್ತೆರ್.
ಬೊಕ್ಕ ಅಂಗವಿಕಲ ಫಲಾನುಭವಿಲೆಗ್ ರಡ್ಡ್ ಗಾಲಿ ಕುರ್ಚಿ, ನಾಲ್ ಬಡಪತ್ತ್ ಕುಟುಂಬದ ಟೈಲರಿಂಗ್ ಪೊಂಜೋವ್ ನಕ್ಲೆಗ್ ನಾಲ್ ಟೈಲರಿಂಗ್ ಮಷೀನ್, ರಡ್ಡ್ ಕಲ್ಪಾರ್ಥಿಲೆಗ್ ಉನ್ನತ ಶಿಕ್ಷಣಕ್ಕಾದ್ ಸ್ಕಾಲರ್ಶಿಪ್ ಕೊರಿಯೆರ್. ಅವೆರ್ದ್ ಬೊಕ್ಕ ರಾಜ್ಯೋತ್ಸವ ಪ್ರಶಸ್ತಿ ಗೆಂದಿನ ದೈವ ನರ್ತಕೆರ್ ವೆಂಕಪ್ಪ ನಲಿಕೆ ಮೆರೆಗ್ ಮಾನಾದಿಗೆ ಮಲ್ತೆರ್.
ವಾರ್ಷಿಕ ವರದಿನ್ ಕಾರ್ಯದರ್ಶಿ ಓದಿಯೆರ್. ಪ್ರಾರ್ತನೆನ್ ತನಿಷ್ಕ ಜಯರಾಜ್ ಪಂಡೆರ್. ಗವರ್ನರ್ ಕ್ಲಬ್ ದ ಅಧ್ಯಕ್ಷೆರೆನ ಬೊಕ್ಕ ಸದಸ್ಯೆರೆನ ಬಗ್ಗೆ ಮೆಚ್ಚಿಯೆರ್. ಉಪ ಗವರ್ನರ್ ಕ್ಲಬ್ ದ ಲೇಸ್ ದ ಬಗ್ಗೆ ಬೆರಿ ಬೊಟ್ಟುದು ಪ್ರೋತ್ಸಾಹ ಕೊರಿಯೆರ್.
ಈ ಪೊರ್ತುಡು ಐಪಿಪಿ ರೋ ಶನ್ಪಥ್ ಶರೀಫ್, ರೋ ಜಯರಾಜ್ ಯಸ್ ಬಂಗೇರ, ನಿಯೋಜಿತ ಅಧ್ಯಕ್ಷೆರ್ ರೋ ಸುರೇಶ್ ಸಾಲಿಯನ್, ರೋ ಕಿಶೋರ್ ಕುಮಾರ್, ಖಜಾಂಚಿ ರೋ ವಚನ್ ಶೆಟ್ಟಿ, ಸಾರ್ಜೆಂಟ್ ಆರ್ಮ್ಸ್ ರೋ ಮನೋಜ್ ಕನಪಾಡಿ, ರೋ ಸವಿತಾ ಚಿತ್ತರಂಜನ್ ಶೆಟ್ಟಿ, ರೋ ಗಾಯತ್ರಿ ಲೋಕೇಶ್, ರೋ ರಶ್ಮಿ ವಚನ್ ಇತ್ತೆರ್.
ನರೇಂದ್ರನಾಥ ಭಂಡಾರಿ ಲೇಸ್ ದ ಸುಧಾರಿಕೆ ಮಲ್ತೆರ್. ಅಂಚೆನೆ ರಾಷ್ಟ್ರಗೀತೆದೊಟ್ಟಿಗೆ ಲೇಸ್ ನ್ ಡಿನ್ನರ್ ಬೊಕ್ಕ ಫೆಲೋಶಿಪ್ ಗ್ ದುಂಬು ದೀಯೆರ್.
ಮುಲ್ಕಿ : ಶಿಕ್ಷಕಿಯಾದ್ ಸೇವೆ ಮಲ್ತ್ ದ್ ಏತೋ ಜೋಕುಲೆಗ್ ವಿದ್ಯಾ ದಾನ ಮಲ್ದಿನ ನಿವೃತ್ತ ಶಿಕ್ಷಕಿ ವಾರಿಜಾಕ್ಷಿ ವಾಮನ ಬಂಗೇರ (82) ಐತಾರ ಕಾಂಡೆ ದೇವೆರೆ ಪಾದ ಸೇರಿಯೆರ್.
ಸೀದಾ ನಡಕೆ, ನಿಸ್ವಾರ್ಥ ಮನೋಭಾವದ, ಮಲ್ಲ ಉಡಲ್ ದ ವಾರಿಜಾಕ್ಷಿ ಬಂಗೇರ ನನ ನಮಕ್ಕ್ ನೆಂಪು ಮಾತ್ರ.
ಹೊಸಬೆಟ್ಟು ತಂಕ ಹೌಸ್ ಮನೆತನದಾರ್ ಆಯಿನ ಮೇರ್ ಮುಲ್ಕಿದ ಅಚ್ಚುನಂದನ್ ರೆಸಿಡೆನ್ಸಿದ ಅರೆನ ಇಲ್ಲಡ್ ಒಂತೆ ದಿನತ್ತ ಅಸೌಖ್ಯಡ್ ತೀರ್ ಪೋಯೆರ್.
ಮೇರೆಗ್ ಮಗಲ್, ಮುಲ್ಕಿ ಲಯನ್ಸ್ ಕ್ಲಬ್ ಅಧ್ಯಕ್ಷೆರ್ ನೀರಜಾಕ್ಷಿ ಅಗರ್ ವಾಲ್ ಅಂಚೆನೆ ಮಗೆ ನಿತಿನ್ ಬಂಗೇರ ಉಲ್ಲೆರ್.
ಮುಲ್ಕಿಡ್ ಕನ್ನಡ ಸಾಹಿತ್ಯ ಪರಿಷತ್ ಸಂಸ್ಥಾಪನೆದ ದಿನಾಚರಣೆ
ಮುಲ್ಕಿ : ದಕ್ಷಿಣಕನ್ನಡ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ದ ಮಾರ್ಗ ದರ್ಶನೊಡು ಮುಲ್ಕಿ ತಾಲೂಕು ಘಟಕದ ವತಿರ್ದ್ ಕಸಾಪ ಸ್ಥಾಪನೆ ಆತಿನ ದಿನದ ಆಚರಣೆ ಮೇ 5 ಕ್ಕ್ ಮುಲ್ಕಿದ ಪುನರೂರು ಟೂರಿಸ್ಟ್ ಹೋಮ್ ಚಾವಡಿಡ್ ನಡತ್ಂಡ್.
ಕಸಾಪದ ಮಾಜಿ ರಾಜ್ಯಾಧ್ಯಕ್ಷೆರ್ , ಧರ್ಮದರ್ಶಿ ಹರಿಕೃಷ್ಣ ಪುನರೂರು ಮಲ್ಲ ಬಿನ್ನೆರಾದ್ ಬತ್ತಿತ್ತ್ ದ್ ಪಾತೆರ್ದ್, ತಾನ್ ರಾಜ್ಯಾಧ್ಯಕ್ಷೆ ಆದಿತ್ತ್ಂಡಲ ಕನ್ನಡದ ಕೆಲಸದ ಜಬದಾರಿದ ಒಟ್ಟುಗು ತುಳು ಬಾಸೆದ ಬಗೆಟ್ಟ್ ಬೇಲೆ ಮಲ್ತೊಂದಿತ್ತೆ. ಕನ್ನಡ ಶಾಲೆನ್ ಒರಿಪಾವರೆ ಪ್ರಯತ್ನ ಮಲ್ದೆ ಪಂದ್ ನೆಂಪು ಮಲ್ತೆರ್.
ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತಿನ ಕಸಾಪ ಮುಲ್ಕಿ ತಾಲೂಕು ಘಟಕದ ಅಧ್ಯಕ್ಷೆರ್ ಮಿಥುನ್ ಕೊಡೆತ್ತೂರು ಪಾತೆರ್ದ್, ಮೂಲ್ಕಿ ತಾಲೂಕುಡು ಸದ್ಯೊಡೇ ಸುರೂತ್ತ ಕನ್ನಡ ಸಾಹಿತ್ಯ ಸಮ್ಮೇಳನ ನಡಪರೆ ಉಂಡು. ಅಯಿಕ್ಕ್ ಮಾತೆರ್ನಲ ಸಹಕಾರ ಬೋಡು ಪಂಡೆರ್.
ಈ ಪೊರ್ತುಡು ದಕ ಜಿಲ್ಲಾ ಕಸಾಪದ ಮಾಜಿ ಅಧ್ಯಕ್ಷೆರ್ , ಪತ್ರಕರ್ತೆರ್ ಸರ್ವೋತ್ತಮ ಅಂಚನ್ ಮೆರೆನ್ ಮಾನಾದಿಗೆ ಮಲ್ತೆರ್.
ಹೊಸ ಅಂಗಣ ಪತ್ರಿಕೆದ ಸಂಪಾದಕೆರ್ ಡಾ.ಹರಿಶ್ಚಂದ್ರ ಪಿ.ಸಾಲ್ಯಾನ್, ವೆಂಕಟೇಶ್ ಹೆಬ್ಬಾರ್ ಇತ್ತೆರ್. ಸ್ವರಾಜ್ ಶೆಟ್ಟಿ ಬಿನ್ನೆರೆನ್ ಎದ್ಕೊಂಡೆರ್. ಧನಲಕ್ಷ್ಮಿ ಸೊಲ್ಮೆ ಸಂದಾಯೆರ್. ರಾಜಶೇಖರ್ ಲೇಸ್ ಸುಧಾರಿಕೆ ಮಲ್ತೆರ್.
ಕಿನ್ನಿಗೋಳಿ : ದೇಶದ ಸುರೂತ್ತ ಮಹಿಳಾ ಪ್ರಧಾನಿ ದಿ.ಇಂದಿರಾ ಗಾಂಧಿನ ಪ್ರತಿರೂಪದಂಚ ಉಪ್ಪುನ ಎಐಸಿಸಿದ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ಎಲ್ಲೆ ( ಮೇ 7) ಕಾಂಡೆ 12 ಗಂಟೆದ ಪೊರ್ತುಗು ಮುಲ್ಕಿ ಕೃಷಿ ಸಿರಿ ಮೇಳದ ಮೈದಾನಡ್ ಸಾರ್ವಜನಿಕ ಸಭೆಟ್ಟ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಮುಲ್ಕಿ- ಬೆದ್ರ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಮಿಥುನ್ ರೈ ತೆರಿಪಾಯೆರ್.
ಆರ್ ಕಿನ್ನಿಗೋಳಿದ ತನ್ನ ಇಲ್ಲ್ ” ರಮಾ ವಿಹಾರ” ಡ್ ಶನಿಯಾರ ನಡತಿನ ಸುದ್ದಿಗೋಷ್ಠಿಡ್ ಈ ವಿಷಯ ಪಂಡೆರ್.
ಪ್ರಿಯಾಂಕಾ ಗಾಂಧಿ ಕಾಂಗ್ರೆಸ್ ಅಭ್ಯರ್ಥಿಲೆನ ಪರವಾದ್ ಪ್ರಚಾರ ಭಾಷಣ ಮಲ್ಪರೆ ಉಲ್ಲೆರ್. ಕಾಂಡೆ ಕಾರ್ನಾಡ್ ದ ನಗರಸಭೆ ಮೈದಾನಡ್ 11.30 ಗಂಟೆಗ್ ಹೆಲಿಕಾಪ್ಟರ್ ಡ್ ಬತ್ತ್ ದ್ ಅವೆರ್ದ್ ಬೊಕ್ಕ ಕಾರ್ ಡ್ ಕೊಲ್ನಾಡ್ ಕೃಷಿ ಸಿರಿ ಮೈದಾನಗ್ ಪೋದು ಜನಕ್ಲೆನ್ ಉದ್ದೇಶಿಸಾದ್ ಪಾತೆರಿಯರೆ ಉಲ್ಲೆರ್. ಅಂದಾಜಿ 30 ಸಾರ ಜನ ಲೇಸ್ ಡ್ ಪಾಲ್ ಪಡೆಯರೆ ಉಲ್ಲೆರ್. ಅಯಿಟ್ಟ್ ಲ ಪೊಂಜೊವುಲು ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆವೆರ್. ಕೇಂದ್ರ ಬೊಕ್ಕ ರಾಜ್ಯದ ಮಲ್ಲ ಮಲ್ಲ ನಾಯಕೆರ್ ಬರಿಯರೆ ಉಲ್ಲೆರ್ ಪಂದ್ ಆರ್ ಪಂಡೆರ್.
ಮೇ 10 ಕ್ಕ್ ನಡಪುನ ಓಟುದ ಕಲಟ್ಟ್ ಬಿರ್ಸ್ ಜೋರಾತ್ಂಡ್. ಈ ಪೊರ್ತುಡು ಕೈತಲ್ದ ಶಾಸಕೆರ್ ಬೊಕ್ಕ ಬಿಜೆಪಿ ನಾಯಕೆರ್ ಸೋಪುನ ಪೋಡಿಗೆಡ್ ಹತಾಶೆರಾದ್ ಎನ್ನ ಮಿತ್ತ್ ಅಪಪ್ರಚಾರ ಮಲ್ತೊಂದುಲ್ಲೆರ್. ಜನಕ್ಲೆನ್ ದಿಕ್ಕ್ ತಪ್ಪಾವೊಂದುಲ್ಲೆರ್. ಆಂಡ ಯಾನ್ ಅರೆನ ತೇಜೋವಧೆ ಮಲ್ಪರೆ ಪೋತುಜಿ ಪಂಡೆರ್.
ಜನಕುಲು ಇತ್ತೆ ಬದಲಾವಣೆ ಬಯಕೊಂದುಲ್ಲೆರ್. ಯಾನ್ ಬಳ್ಕುಂಜೆ ಬೊಕ್ಕ ಕೈತಲ್ದ ಜನಕ್ಲೆನ ಜಾಗೆ ಒರಿಪಾವರೆ ಪೊರ್ಂಬಾಟ ಮಲ್ತೊಂದುಲ್ಲೆ. ಅಕ್ಲೆನಲ ಆಶೀರ್ವಾದ ಎನ್ನ ಮಿತ್ತ್ ಉಂಡು. ಅಂಚಾದ್ ತಾನ್ ಗೆಂದ್ ದ್ ಬರ್ಪಿನ ಪೂರ್ಣ ವಿಶ್ವಾಸ ಉಂಡು ಪಂದ್ ಮಿಥುನ್ ರೈ ಪಂಡೆರ್.
ದಿ.ಅಮರನಾಥ ಶೆಟ್ರೆನ ಆಶೀರ್ವಾದಲ ಎಂಕ್ ಉಂಡು. ಅಂಚಾದ್ ಎಂಕ್ ಸಮುದಾಯದ ಓಟು ತಿಕ್ಕುಂಡು ಪನ್ಪಿನ ವಿಶ್ವಾಸ ಉಂಡು ಪಂಡೆರ್.
ಪ್ರಶ್ನೆಯೊಂಜೆಕ್ಕ್ ಉತ್ತರ ಕೊರಿನ ಆರ್, ಹಿಂದುತ್ವದ ಮಿತ್ತ್ ಎಂಕ್ ಗೌರವ ಉಂಡು. ಭಜರಂಗ ದಳತ್ತಕುಲು ಎಡ್ಡೆ ಕೆಲಸ ಮಲ್ತ್ಂಡ ಬೆಂಬಲ ಕೊರ್ಪೆ. ಕಾಂಗ್ರೆಸ್ ದ ಪ್ರಣಾಳಿಕೆಡ್ ಭಜರಂಗದಳ ನಿಷೇಧ ಮಲ್ಪುವ ಪಂದ್ ಪನ್ತ್ ಜಿ. ಕಾನೂನು ಉಲ್ಲಂಘನೆ ಮಲ್ತ್ಂಡ ನಿಷೇಧ ಮಲ್ಪುವ ಪಂದ್ ಎಚ್ಚರಿಕೆ ಕೊರ್ತಿನಿ ಮಾತ್ರ ಪಂದ್ ಮಿಥುನ್ ರೈ ಪಂಡೆರ್.
ಸುದ್ದಿಗೋಷ್ಠಿಡ್ ಕೆಪಿಸಿಸಿ ಕೋ ಆರ್ಡಿನೇಟರ್ ವಸಂತ ಬೆರ್ನಾಡ್, ಆದಿ ದ್ರಾವಿಡ ಸಮಾಜದ ಮುಖಂಡೆರ್ ಗಣೇಶ್ ಪ್ರಸಾದ್ ಇತ್ತೆರ್.
ರಾಜ್ಯಡ್ ಚಂಡಮಾರುತದ ಪರಿಣಾಮ ಮೇ8 ಬೊಕ್ಕ 9 ಕ್ಕ್ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.
ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ, ಕೊಡಗು, ಮೈಸೂರ್ ಬೊಕ್ಕ ಚಾಮರಾಜನಗರ ಜಿಲ್ಲೆಡ್ 2 ದಿನ ಯೆಲ್ಲೋ ಅಲರ್ಟ್ ಘೋಷಣೆ ಆತ್ಂಡ್. ಉತ್ತರ ಒಳನಾಡ್ ಬೊಕ್ಕ ತುಳುನಾಡ್ ಭಾಗಡ್ ಸಾಧಾರಣ ಬರ್ಸ ಬರ್ಪುಂಡು. ಬಂಗಾಲಕೊಲ್ಲಿಡ್ ಮೇಲ್ಮೈ ಸುಳಿಗಾಳಿ ಮೇ8 ಕ್ಕೆ ಚಂಡಮಾರುತವಾದ್ ಪರಿವರ್ತನೆ ಆಪುಂಡು. ಕರ್ನಾಟಕ, ತಮಿಳುನಾಡ್, ಪುದುಚೇರಿ ಬೊಕ್ಕ ಆಂಧ್ರಡ್ ಬರ್ಸ ಬರ್ಪುಂಡು ಪಂದ್ ಐಎಮ್ ಡಿ ತೆರಿಪಾದ್ಂಡ್.
ಬಿರುವ ಜವನೆರ್ ಮಸ್ಕತ್ ಮೊಕುಲು ಮೇ19 ಕ್ಕ್ ಸುಕ್ರಾರ ಮಸ್ಕತ್ ಒಮಾನ್ ಡ್ “ಸ್ವಾಮಿ ಕೊರಗಜ್ಜ” ಬೊಕ್ಕ “ಶ್ರೀ ಶನೀಶ್ವರ ಮಹಾತ್ಮೆ” ತುಳು ಯಕ್ಷಗಾನ ತಾಳಮದ್ದಳೆನ್ ಆಯೋಜನೆ ಮಲ್ದೆರ್.
ದಾರ್ ಸೈಟ್ ಶ್ರೀ ಕೃಷ್ಣ ದೇವಸ್ಥಾನಡ್ ಶ್ರೀ ಶನೀಶ್ವರ ಭಕ್ತ ವೃಂದ ಪಕ್ಷಿಕೆರೆ ಕುಡ್ಲ ಮೊಕ್ಲೆರ್ದ್ ನವರಸ ಇಪ್ಪುನ ರಡ್ಡ್ ತುಳು ಆಟದ ಪ್ರಸಂಗಲು ಒಂಜೇ ದಿನ ಪ್ರದರ್ಶನ ಅವೆರೆ ಉಂಡು ಪಂದ್ ಬಿರುವ ಜವನೆರ್ ಸಂಘಟನೆದ ಮಾಧುರಿ ಸುವರ್ಣ ಸುದ್ದಿಗೋಷ್ಠಿಡ್ ತೆರಿಪಾದೆರ್.
ಮಸ್ಕತ್ ದ ಬಿರುವ ಜವನೆರ್ ಸಂಘಟನೆ ಕರಿನ ಒಂಜಿ ದಶಕರ್ದ್ ಮಸ್ಕತ್ ಡ್ ಸಾಮಾಜಿಕ, ಧಾರ್ಮಿಕ, ಸೇವಾ ಚಟುವಟಿಕೆಲೆನ್ ನಡಪಾವೊಂದು ಬೈದ್ಂಡ್. ನೇರ್ದ್ ದುಂಬು ಈ ಕೂಟನ್ ಲೆತ್ತಿನ ಒಮಾನ್ ರಾಷ್ಟ್ರಡ್ ಸುರುತ್ತ ಪೂಜೆದೊಟ್ಟಿಗೆ “ಶನೀಶ್ವರ ಮಹಾತ್ಮೆ” ಯಕ್ಷಗಾನ ತಾಳಮದ್ದಳೆನ್ ಆಯೋಜ ಮಲ್ತ್ ದಿತ್ತೆರ್. ಒಮಾನ್ ಬಿಲ್ಲವಾಸ್, ಬಂಟ್ಸ್ ಒಮಾನ್, ವಿಶ್ವಕರ್ಮ, ಗೌಡ ಸಾರಸ್ವತ ಬ್ರಾಹ್ಮಣ, ಮೊಗವೀರ ಒಮಾನ್ ಬೊಕ್ಕ ತುಳು ಭಾಷೆ ಸಂಘಟನೆದ ಸಹಕಾರದ ಒಟ್ಟುಸೇರಿಗೆಡ್ ಈ ಲೇಸ್ ನ್ ಆಯೋಜನೆ ಮಲ್ದೆರ್.
ಮೇ19 ಕ್ಕ್ ಬೊಲ್ಪುಗು 8.30 ರ್ದ್ 12.30 ಮುಟ್ಟ ಹರೀಶ್ ಶೆಟ್ಟಿ ಸೂಡ ರಚನೆದ “ಅಜ್ಜ ಕೊರಗಜ್ಜ” ತುಳು ತಾಳಮದ್ದಳೆ, ಬೊಕ್ಕ ಪ್ರಸಾದ ಭೋಜನ ಆದ್ ಮಧ್ಯಾಹ್ನ 2.30 ರ್ದ್ ಬಯ್ಯ 7 ಗಂಟೆ ಮುಟ್ಟ ಚಿನ್ಮಯ ದಾಸ ವಿರಚಿತ “ಶ್ರೀ ಶನೀಶ್ವರ ಮಹಾತ್ಮೆ” ವಿಕ್ರಮಾದಿತ್ಯ ಚರಿತ್ರೆ ಪನ್ಪುನ ಪುಣ್ಯ ಪ್ರಸಂಗ, ಪೂಜೆದೊಟ್ಟಿಗೆ ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು.
ಕರಿನ ಮೂಜಿ ದಶಕರ್ದ್ ಶನಿ ಪೂಜೆದೊಟ್ಟಿಗೆ ತಾಳಮದ್ದಳೆನ್ ಮಸ್ಕತ್, ದುಬೈ, ಅಬುದಾಬಿ, ಬೊಂಬೈ, ಸಾಂಗ್ಲಿ ಸೇರಿನಂಚನೆ ದೇಶ ವಿದೇಶಡ್ ನೂದೆರ್ದ್ ಎಚ್ಚ ಲೇಸ್ ನ್ ಕೊರಿನ ತುಳುನಾಡ್ ದ ಪುಗರ್ತೆದ ಯಕ್ಷಗಾನ ಕೂಟ ಶ್ರೀ ಶನೀಶ್ವರ ಭಕ್ತ ವೃಂದ ಪಕ್ಷಿಕೆರೆ ಇತ್ತೆ ರಡ್ಡನೇ ಸರ್ತಿ ಮಸ್ಕತ್ ಡ್ ಖ್ಯಾತ ಅರ್ಥಧಾರಿಲೆನ ಸಮ್ಮಿಲನದೊಟ್ಟಿಗೆ ಲೇಸ್ ಕೊರಿಯೆರೆ ತಯಾರ್ ಆತ್ಂಡ್.
ತೆಂಕು ತಿಟ್ಟುದ ಪುಗರ್ತೆದ ಭಾಗವತೆರ್ ರವಿಚಂದ್ರ ಕನ್ನಡಿಕಟ್ಟೆ ಮೆರೆನ ಭಾಗವತಿಕೆಡ್ ರಡ್ಡ್ ಪ್ರಸಂಗಲು ನಡಪರೆ ಉಂಡು. ಹಿಮ್ಮೆಳಡ್ ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ, ಭಾಸ್ಕರ ಭಟ್ ಕಟೀಲ್ ಸಹಕಾರ ಮಲ್ಪರೆ ಉಲ್ಲೆರ್. ಪಕ್ಷಿಕೆರೆ ಪದ್ಮನಾಭ ಶೆಟ್ಟಿಗಾರ್ ಮೆರೆನ ಕೂಟದ ಪ್ರಧಾನ ಸಂಚಾಲಕೆರಾದುಲ್ಲೆರ್.
ಅರ್ಥಧಾರಿಯಾದ್ ಕದ್ರಿ ನವನೀತ ಶೆಟ್ಟಿ, ಶ್ರೀಪತಿ ಭಟ್ ಸಸಿಹಿತ್ಲು, ವಿಜಯ ಕುಮಾರ್ ಶೆಟ್ಟಿ ಮೊಯಿಲೊಟ್ಟು, ಸೀತಾರಾಮ್ ಕುಮಾರ್ ಕಟೀಲ್, ಸದಾಶಿವ ಆಳ್ವ ತಲಪಾಡಿ, ಕಾವಳಕಟ್ಟೆ ದಿನೇಶ್ ಶೆಟ್ಟಿ, ದಯಾನಂದ ಜಿ ಕತ್ತಲ್ ಸಾರ್, ಪ್ರಸನ್ನ ಶೆಟ್ಟಿ ಅತ್ತೂರು, ಪುಷ್ಪರಾಜ ಕುಕ್ಕಾಜೆ, ರಾಮಚಂದ್ರ ಮುಕ್ಕ ಪಾಲ್ ಪಡೆಯೆರೆ ಉಲ್ಲೆರ್.
ಉಂದು ತುಳು ಭಾಷೆದ ಸೊಗಡು, ಅಜ್ಜ ಕೊರಗಜ್ಜದ ಸಂದಿ ಪಾರ್ದನದ ತಿರ್ಲ್, ಪುರಾಣ ಪುಣ್ಯ ಕಥಾನಗ್ ಪೊಸ ದೇಖಿ ಕೊರ್ಪಿನ ನವರಸ ಇಪ್ಪುನ ಲೇಸ್ ಆತ್ಂಡ್. ಮಸ್ಕತ್ ಡ್ ಇಪ್ಪುನ ಮಾತ ಸಮುದಾಯದ ಕಲಾ ಆಸಕ್ತೆರ್ ಪಾಲ್ ಪಡೆದ್ ಸಹಕಾರ ಮಲ್ಪೊಡು ಪಂದ್ ಬಿರುವ ಜವನೆರ್ ಮಸ್ಕತ್ ಬಿನ್ನಾಪು ಮಲ್ದೆರ್.
ಈ ಪೊರ್ತುಡು ದಾಮೋದರ್ ಕುಂದರ್ ಮಸ್ಕತ್, ಸುಹಾನ್ ಸುವರ್ಣ ಮಸ್ಕತ್, ಕದ್ರಿ ನವನೀತ ಶೆಟ್ಟಿ, ಪದ್ಮನಾಭ ಶೆಟ್ಟಿಗಾರ್ ಪಕ್ಷಿಕೆರೆ ಸುದ್ದಿಗೋಷ್ಠಿಡ್ ಇತ್ತೆರ್.
ದಾಮೋದರ್ ಕುಂದರ್ 9353141939
ಕದ್ರಿ ನವನೀತ ಶೆಟ್ಟಿ
944813061
ವರದಿ: ಮುಲ್ಕಿ ಕರುಣಾಕರ ಶೆಟ್ಟಿ
ಬಂಟ್ವಾಳ: ಕೊಡಂಬೆಟ್ಟು ಗ್ರಾಮದ ಉರುಡಾಯಿ ಶ್ರೀ ಮುಖ್ಯಪ್ರಾಣ ಸ್ವಾಮಿ ದೇವಲ್ಯಡ್ ಮೇ20-22 ಮುಟ್ಟ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಬೊಕ್ಕ ನಾಗದೇವೆರೆನ, ದೈವೊಲೆನ ಪ್ರತಿಷ್ಠೆ ನಡಪರೆ ಉಂಡು.
ಒಡಿಪು ಸೋದೆ ವಾದಿರಾಜ ಮಠತ್ತ ವಿಶ್ವವಲ್ಲಭ ತೀರ್ಥ ಸ್ವಾಮೀಜಿನ ಆಶೀರ್ವಾದೊಟ್ಟಿಗೆ, ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ ವೀರೇಂದ್ರ ಹೆಗ್ಗಡೆರೆನ ಮಾರ್ಗದರ್ಶನಡ್, ನಡ್ವಂತಾಡಿ ಬಾಲಕೃಷ್ಣ ಪಾಂಗಾಣ್ಣಾ ಮೆರೆನ ಮುತಾಲಿಕೆಡ್ ಈ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನಲು ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಗಂಧ ಪ್ರಸಾದ ದೆತೊಂದು, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಜೀರ್ಣೋದ್ಧಾರ ಸಮಿತಿದ ಗೌರವಾಧ್ಯಕ್ಷೆರ್ ರಾಜೇಶ್ ನಾಯ್ಕ್ ಉಳಿಪ್ಪಾಡಿ, ಅಧ್ಯಕ್ಷೆರ್ ಅಮ್ಮು ರೈ ಹರ್ಕಾಡಿ, ಬ್ರಹ್ಮಕಲಶ ಉಚ್ಚಯ ಸಮಿತಿದ ಗೌರವಾಧ್ಯಕ್ಷೆರ್ ವ್ಯಾಸರಾವ್ ಕುಡ್ಲ, ಎಂ. ತುಂಗಪ್ಪ ಬಂಗೇರ ಪುಂಜಾಲಕಟ್ಟೆ, ಅಧ್ಯಕ್ಷೆರ್ ಗೋಪಾಲಕೃಷ್ಣ ಭಟ್ ವಾಮದಪದವು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ನ್ಯೂಜಿಲೆಂಡ್ ದ ಎದುರು ಪಾಕಿಸ್ತಾನ ನಾಲ್ ನೇ ಒಂಜಿದಿನತ್ತ ಪಂತೊನ್ ಗೆಂದ್ ದ್ಂಡ್.
335 ರನ್ ದ ಗುರಿ ಪಡೆಯಿನ ಕಿವೀಸ್ 235 ರನ್ ಡ್ ಆಲೌಟ್ ಆಂಡ್. ಕಿವೀಸ್ ಬ್ಯಾಟ್ಸ್ಮನ್ ಲೆಡ್ ಲಾಥಮ್ 60 ಬೊಕ್ಕ ಚಾಪ್ ಮನ್ 46 ರನ್ ಮಲ್ತೆರ್. ನೆರ್ದ್ ದುಂಬು ಬ್ಯಾಟ್ ಮಲ್ತಿನ ಪಾಕಿಸ್ತಾನ ಬಾಬರ್ ಅಜಮ್ 107, ಅಘಾ ಸಲ್ಮಾನ್ 58 ಬೊಕ್ಕ ಮಸೂರ್ 44 ರನ್ ದೊಟ್ಟಿಗೆ 334/6 ರನ್ ಮಲ್ತೆರ್. 5 ಒಂಜಿದಿನತ್ತ ಪಂತೊಡು ಪಾಕಿಸ್ತಾನ 4-0 ಡ್ ಗೆಂದ್ ದ್ಂಡ್.
