ಚಾರ್ ಧಾಮ್ ಯಾತ್ರೆಗ್ ಪೋದಿತ್ತಿನ ಕುಂಪಲ ನಿವಾಸಿ ತಿಗಲೆ ಬೇನೆಡ್ ಮರಣ

ಉತ್ತರಾಖಂಡಡ್ ಚಾರ್ ಧಾಮ್ ಯಾತ್ರೆಗ್ ಪೋದಿತ್ತಿನ ಕುಂಪಲದ 53 ವರ್ಷದ ಜನ ಒರಿ ತಿಗಲೆ ಬೇನೆಡ್ ದೇವೆರೆ ಪಾದ ಸೇರಿಯೆರ್.

ಕುಂಪಲ ವಿದ್ಯಾನಗರ ನಿವಾಸಿ ರಾಜೇಶ್ ಪೂಜಾರಿ ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್.

ಸೆ.18 ಗು ತೊಕ್ಕೊಟ್ಟು ಪ್ರದೇಶದ 15 ಜನ ಸದಸ್ಯೆರ್‌ನ ಗುಂಪು ಹರಿದ್ವಾರ, ಯಮುನೋತ್ರಿ, ಗಂಗೋತ್ರಿ, ಬದರಿನಾಥ ಬೊಕ್ಕ ಕೇದಾರನಾಥಗ್ ತೀರ್ಥಯಾತ್ರೆ ಪೋದಿತ್ತೆರ್.
ಹರಿದ್ವಾರ ಭೇಟಿ ಮುಗಿತ್‌ದ್ ಯಮುನೋತ್ರಿ ಮುಟುದಿತ್ತೆರ್. ದೇವೆರ್‌ನ ದರ್ಶನ ಮುಗಿತ್‌ದ್ ದೇವಸ್ಥಾನದ ಪಿದಯಿ ವಿಶ್ರಾಂತಿ ಮಲ್ಪುನಗ ರಾಜೇಶ್ ತಿರ್ತ್ ಬೂರ್ದು ದೇವೆರೆ ಪಾದ ಸೇರಿಯೆರ್ ಪಂದ್ ಗೊತ್ತಾತ್ಂಡ್.
ದಕ್ಷಿಣ ಕನ್ನಡ ಜಿಲ್ಲಾ ಬಿಜೆಪಿ ಅಧ್ಯಕ್ಷೆರ್ ಸತೀಶ್ ಕುಂಪಲ ಮೇರ್, ರಾಜೇಶ್ ಪೂಜಾರಿ ಮೆರೆನ ಪಾರ್ಥಿವ ಶರೀರನ್ ಊರುಗು ಕನಪಾವರೆ ಉತ್ತರಾಖಂಡದ ಯಮುನೋತ್ರಿ ವಿಧಾನಸಭಾ ಕ್ಷೇತ್ರದ ಮಾಜಿ ಶಾಸಕೆರ್ ಕೇದಾರ್ ಸಿಂಗ್ ರಾವತ್ ಮೆರೆನ್ ಸಂಪರ್ಕ ಮಲ್ತ್‌ದ್, ಬಾಕಿದ ಯಾತ್ರಾರ್ಥಿಲೆಗ್ ಸಹಾಯ ಮಲ್ಪರೆ ಬಿನ್ಬಾಪು ಮಲ್ದೆರ್. ಕೂಡ್ಲೆ ಸ್ಪಂದಿಸಾಯಿನ ಮಾಜಿ ಶಾಸಕೆರ್ ಪಾರ್ಥಿವ ಶರೀರನ್ ಡೆಹ್ರಾಡೂನ್‌ ಆಸ್ಪತ್ರೆಗ್ ಕೊನೊವರೆ ಸಹಾಯ ಮಲ್ತ್‌ದ್ ಅಲ್ತ್‌ರ್ದ್ ಮಂಗಳೂರು ವಿಮಾನಡ್ ಪತೊಂದು ಬರ್ರೆ ಅಗತ್ಯ ವ್ಯವಸ್ಥೆ ಮಲ್ತೆರ್.
ರಾಜೇಶ್ ಮೇರ್ ಜೆಪ್ಪುದ ನೇತ್ರಾವತಿ ಗ್ಯಾರೇಜ್‌‌ಡ್ ಕೆಲಸ ಮಲ್ತೊಂದಿತ್ತೆರ್. ಅರೆಗ್ ಬೊಡೆದಿ, ಮಗಲ್ ಬೊಕ್ಕ ಮಗೆ ಉಲ್ಲೆರ್.