May 2023

ಬೋಳಿಯಾರ್ ಗ್ರಾಮದ ಜಾರದಗುಡ್ಡೆ ಶಾಲೆಡ್ ವೋಟು ಪಾಡಿನ ಶಾಸಕೆರ್ ಯು.ಟಿ.ಖಾದರ್

ಉಳ್ಳಾಲ: ರಾಜ್ಯ ವಿಧಾನಸಭೆ ವೋಟು ಇನಿ ನಡತೊಂದು ಉಂಡು.

ಬೋಳಿಯಾರ್ ಗ್ರಾಮದ ಜಾರದಗುಡ್ಡೆ ಶಾಲೆಡ್ ಕುಡ್ಲ ವಿಧಾನಸಭೆ ಕ್ಷೇತ್ರದ ಬೂತ್ ನಂಬರ್ 103 ಟ್ಟ್, ಶಾಸಕೆರ್ ಯು.ಟಿ.ಖಾದರ್ ಮೇರ್ ವೋಟು ಪಾಡಿಯೆರ್.

ಬೊಕ್ಕ ಮಾಧ್ಯಮದೊಟ್ಟಿಗೆ ಪಾತೆರ್ದ್, ಈ ಸರ್ತಿದ ವೋಟುಡು ಜನಕುಲೆನ ಬೇನೆ, ಸಮಸ್ಯೆನ್ ಮತದಾರೆರ್ ಮತಪತ್ರದ ಮುಖೇನ ತೂಪಾಯೆರೆ ಉಲ್ಲೆರ್. ಕ್ಷೇತ್ರಡ್ ಮತ ಧರ್ಮದಕುಲುಲ ಸೌಹಾರ್ದತಯುತವಾದ್ ವೋಟು ಮಲ್ತ್ ದ್, ಒಟ್ಟಾರ್ದ್ ಈ ಸರ್ತಿ ಕಾಂಗ್ರೆಸ್ ಬರೊಡು ಪನ್ಪುನ ಉದ್ದೇಶ ದೀವೊಂದು ವೋಟು ಪಾಡ್ದೆರ್. 15 ದಿನತ್ತ ಕಾರ್ಯಕರ್ತೆರೆನ ಶ್ರಮಕ್ಕ್ ಸೊಲ್ಮೆ ಸಂದಾಯೆರ್.

ಬೊಡೆದಿ ಮಗಲೆನೊಟ್ಟಿಗೆ ಬತ್ತ್ ದ್ ವೋಟು ಪಾಡಿನ ಬಿಜೆಪಿ ಅಭ್ಯರ್ಥಿ ಸತೀಶ್ ಕುಂಪಲ

ಉಳ್ಳಾಲ: ರಾಜ್ಯ ವಿಧಾನಸಭೆ ವೋಟು ಪ್ರಕ್ರಿಯೆ ನಡತೊಂದು ಉಂಡು.

ಮುಲ್ಪ ಕುಡ್ಲ (ಉಳ್ಳಾಲ) ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಸತೀಶ್ ಕುಂಪಲ ಮೇರ್ ಕುಂಪಲ ಬೂತ್ ಸಂಖ್ಯೆ 127 ಟ್ಟ್ ಬೊಡೆದಿ ಬೊಕ್ಕ ಮಗಲೆನೊಟ್ಟಿಗೆ ಬತ್ತ್ ದ್ ವೋಟು ಪಾಡಿಯೆರ್.

Arun Kumar Puttila candidate from Puttur constituency casts vote at Mundoor booth ಮುಂಡೂರು ಬೂತ್ ಡ್ ವೋಟು ಪಾಡಿಯೆರ್ ಪುತ್ತೂರ್ ಪಕ್ಷೇತರ ಅಭ್ಯರ್ಥಿ ಅರುಣ್ ಕುಮಾರ್ ಪುತ್ತಿಲ

ಪುತ್ತೂರ್: ರಾಜ್ಯ ಇಡೀ ವಿಧಾನಸಭೆ ವೋಟುದ ಪ್ರಕ್ರಿಯೆ ಸುರು ಆತ್ಂಡ್.

ಪುತ್ತೂರ್ ವಿಧಾನಸಭೆ ಕ್ಷೇತ್ರದ ಪಕ್ಷೇತರ ಅಭ್ಯರ್ಥಿ ಅರುಣ್ ಕುಮಾರ್ ಪುತ್ತಿಲ ಮೇರ್ ಬೊಲ್ಪು ಬೊಲ್ಪುಗು ಮುಂಡೂರು ದ.ಕ.ಜಿ.ಪಂ. ಹಿರಿಯ ಪ್ರಾಥಮಿಕ ಶಾಲೆದ ಬೂತ್ ಡ್ ವೋಟು ಪಾಡಿಯೆರ್.

BJP candidate Dr Bharat Shetty casts his vote after waiting in the queue ಸಾಲ್ ಉಂತುದು ವೋಟು ಪಾಡಿನ ಬಿಜೆಪಿ ಅಭ್ಯರ್ಥಿ ಡಾ.ಭರತ್ ಶೆಟ್ಟಿ

ಕುಡ್ಲ ಉತ್ತರ ಕ್ಷೇತ್ರದ ಅಭ್ಯರ್ಥಿ ಶಾಸಕೆರ್ ಡಾ.ಭರತ್ ಶೆಟ್ಟಿ ವೈ ಮೇರ್ ಸಾಲ್ ಡ್ ಉಂತುದು ಕೆಪಿಟಿದ ಬೂತ್ ಸಂಖ್ಯೆ 132 ಟ್ಟ್ ಇನಿ ಬೊಲ್ಪುಗು ವೋಟು ಪಾಡಿಯೆರ್.

ರಾಜ್ಯ ಇಡೀ ಇನಿ ಬೊಲ್ಪುಗು 7 ಗಂಟೆರ್ದ್ ವೋಟು ಸುರು ಆತ್ಂಡ್. ಬಯ್ಯ 6 ಗಂಟೆ ಮುಟ್ಟ ನಡಪರೆ ಉಂಡು. ನೆತ್ತ ಲೆಕ್ಕ ಮೇ 13 ಗೊತ್ತಾಪುಂಡು.

ತೋಕೂರು ಸುಬ್ರಾಯ ದೇವೆರ್ನ ನಡೆಟ್ಟ್ ಸಿರಿ ತುಪ್ಪೆ

ತೋಕೂರು : ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ದೇವಲ್ಯಡ್ ಬ್ರಹ್ಮಕಲಶಾಭಿಷೇಕ ಬೊಕ್ಕ ನಾಗಮಂಡಲ ಉಚ್ಚಯದ ನಿಲೆಟ್ಟ್ ರಮೇಶ್ ದೇವಾಡಿಗ ಪಾವಂಜೆ ಬೊಕ್ಕ ಶೇಖರ್ ದೇವಾಡಿಗ ಪಾವಂಜೆ ಮೊಕ್ಲೆನ ಮುತಾಲಿಕೆಡ್ ಗ್ರಾಮಸ್ಥೆರ್ ಬೊಕ್ಕ ಸ್ವಯಂ ಸೇವಕೆರ್ ಸೇರ್ದ್ ಉಗ್ರಾಣದ ಉಲಯಿ ತುಳುನಾಡ ಸಂಸ್ಕೃತಿನ್ ನೆಗೆತ್ ತೋಜಾವುನ ಪೊರ್ಲ ಒರುತ್ತ ಸಿರಿ ತುಪ್ಪೆನ್ ಮಲ್ದೆರ್.

ಸುಮಾರ್ ನಾಲ್ ಗಂಟೆ ಶ್ರಮ ಒಯಿಸ್ ದ್ ಪೊರ್ಲುದ ಸಿರಿ ತುಪ್ಪೆ ರಚನೆ ಮಲ್ದೆರ್. ಉಂದೆಕ್ಕ್ 800 ಸೂಡಿ ಬೈ, 70 ಮುಡಿ ಬಾರ್ ಬೊಕ್ಕ ರಂಪೊನಿ ಒಯಿಪರೆ ಗಲಸುನ ಅಲಾದ್ (ಬಲ್ಲ್) ಗಲಸ್ ದೆರ್.

PM Narendra Modi requests all eligible persons in Karnataka to cast their votes ಎಲ್ಲೆ ಕರ್ನಾಟಕದ ಪ್ರತಿಯೊರಿಲ ವೋಟು ಪಾಡ್ ಲೆ ಪಂದ್ ಪ್ರಧಾನಿ ಮೋದಿ ಬಿನ್ನಾಪು

ವಿಡಿಯೋ ಸಂದೇಶದ ಮುಖೇನ ಕರ್ನಾಟಕದ ಜನಕುಲೆಗ್ ಪ್ರತಿಯೊರಿಲ (ಮೇ10) ಎಲ್ಲೆ ತಪ್ಪಂದೇ ವೋಟು ಮಲ್ಪೊಡು ಪ್ರಧಾನಿ ನರೇಂದ್ರ ಮೋದಿ ಬಿನ್ನಾಪು ಮಲ್ದೆರ್.

ನಿಕುಲು ಎಂಕ್ ಏಪಲ ಮೋಕೆ ಕೊರ್ತರ್. ಅವು ಎಂಕ್ ಈಶ್ವರನ ಆಶೀರ್ವಾದ ಇತ್ತಿನಂಚ, ಭಾರತ ಜಗತ್ ದ 5ನೇ ಮಲ್ಲ ಆರ್ಥಿಕ ವ್ಯವಸ್ಥೆ ಆತ್ಂಡ್. ಆಯಿನಾತ್ ಬೇಗ ಕರ್ನಾಟಕನ್ ದೇಶದ ಆರ್ಥಿಕತೆದ ನಂಬರ್​ 1 ರಾಜ್ಯವಾದ್ ಮಲ್ಪೊಡು. ಮಾತೆರ್ನಾ ಲಕ್ಷ್ಯಲ ಕರ್ನಾಟಕದ ಆರ್ಥಿಕತೆನ್ 1 ಟ್ರಿಲಿಯನ್ ಡಾಲರ್ ಎಕಾನಮಿದಡೇ ಕೊನೊಪುನವು ಆವೊಡು ಪಂಡೆರ್.

Elections in 224 constituencies of Karnataka; 58,282 polling stations all set ಎಲ್ಲೆ 224 ವಿಧಾನಸಭೆ ಕ್ಷೇತ್ರಡ್ ವೋಟು; 58,282 ಮತಗಟ್ಟೆಗ್ ಬಂದೋಬಸ್ತ್

ಬೆಂಗ್ಲೂರ್: ಕರ್ನಾಟಕ ವಿಧಾನಸಭೆ ಚುನಾವಣೆದ ವೋಟು ಎಲ್ಲೆ (ಮೇ 10) ಕ್ಕ್ ನಡಪರೆ ಉಂಡು. ಅಂಚಾದ್ ರಾಜ್ಯ ಇಡೀ ಪೊಲೀಸ್​ ಬಂದೋಬಸ್ತ್​ ಮಲ್ದೆರ್.

ರಾಜ್ಯದ 224 ವಿಧಾನಸಭೆ ಕ್ಷೇತ್ರಲೆಡ್ 58,282 ಮತಗಟ್ಟೆ ಉಂಡು. ಭದ್ರತೆಗಾದ್ 1.56 ಲಕ್ಷ ಪೊಲೀಸೆರೆನ್ ನಿಯೋಜನೆ ಮಲ್ದೆರ್.

ರಾಜ್ಯದ 84,119 ಪೊಲೀಸೆರೆನೊಟ್ಟಿಗೆ ಕೈತಲ್ ದ ರಾಜ್ಯದ ಪೊಲೀಸೆರೆನ್ ಲೈದೆರ್. ಪಿದಯಿ ರಾಜ್ಯರ್ದ್ 8,500 ಪೊಲೀಸೆರ್, 650 ಸಿಆರ್​ಪಿಎಫ್​ ತುಕಡಿನ್ ಲೈದೆರ್. 304 ಡಿವೈಎಸ್​​ಪಿ, 991 ಇನ್ಸ್​​ಪೆಕ್ಟರ್ಸ್​, 2,610 ಪಿಎಸ್​ಐ, 108 ಬಿಎಸ್​ಎಫ್​, 75 ಸಿಐಎಸ್​​ಎಫ್​, 70 ಐಟಿಬಿಪಿ, 35 ಆರ್​ಫಿಎಫ್​ ಬಂದೋಬಸ್ತ್ ಗ್ ನಿಯೋಜನೆ ಮಲ್ದೆರ್.

ಇಸೇಸವಾದ್ 2,930 ಪೊಲೀಸ್ ಮೊಬೈಲ್​ ಸೆಕ್ಟರ್ ದ ಕಾರ್ಯಾಚರಣೆ, ಮೊಬೈಲ್ ಸೆಕ್ಟರ್​ ಮೇಲ್ವಿಚಾರಣೆಗ್ 749 ಸೂಪರ್​ವೈಸರ್​, ರಾಜ್ಯದ ಗಡಿ ಭಾಗಡ್ ಗಾಡಿಲೆನ ತಪಾಸಣೆ ಮಲ್ತ್ ದ್ ಬುಡಿಯೆರೆ ಸೂಚನೆ ಕೊರ್ತುಂಡು.

Persons can cast vote even without voter ID ವೋಟರ್ ಐಡಿ ಇಜ್ಜಿಡಲ ಈ ದಾಖಲೆ ತೋಜಾದ್ ವೋಟು ಪಾಡೊಲಿ

ಎಲ್ಲೆ (ಮೇ 10) ನಡಪುನ ಕರ್ನಾಟಕ ವಿಧಾನಸಭೆ ಚುನಾವಣೆಗ್ ವೋಟುದ ಪಟ್ಟಿಡ್ ನಿಕಲೆನ ಪುದರ್ ಇತ್ತ್ ದ್, ವೋಟರ್ ಐಡಿ ಇಜ್ಜಿಂಡಲ ವೋಟು ಪಾಡಿಯೆರೆ ಆಪುಂಡು.

ಅವು ಎಂಚ?

ನಿಕುಲು ಆಧಾರ್ ಕಾರ್ಡ್, ನರೇಗಾ ಜಾಬ್ ಕಾರ್ಡ್, ಪೋಟೋ ಇಪ್ಪುನ ಬ್ಯಾಂಕ್ ಅತ್ತಂಡ ಪೋಸ್ಟ್ ಆಫೀಸ್ ಪಾಸ್ ಬುಕ್, ಕಾರ್ಮಿಕ ಸಚಿವಾಲಯದ ಆರೋಗ್ಯ ವಿಮೆತ್ತ ಸ್ಮಾರ್ಟ್ ಕಾರ್ಡ್, ಡ್ರೈವಿಂಗ್ ಲೈಸೆನ್ಸ್, NRR ನಡಿಟ್ ಕೊರ್ತಿನ ಸ್ಮಾರ್ಟ್ ಕಾರ್ಡ್, ಪಾಸ್ ಪೋರ್ಟ್, ಪೋಟೋ ಇಪ್ಪುನ ಪಿಂಚಣಿ ದಾಖಲೆ, ಪ್ಯಾನ್ ಕಾರ್ಡ್, ಸರ್ಕಾರಿ, ಸಾರ್ವಜನಿಕ ಕಂಪೆನಿದ ಐಡೆಂಟಿಟಿ ಕಾರ್ಡ್, ಸಾಮಾಜಿಕ ನ್ಯಾಯ ಇಲಾಖೆದ ವಿಕಲಚೇತನರೆನ ಐಡೆಂಟಿಟಿ ಕಾರ್ಡ್ ಗ್ ಒವೊಂಡಾಲ ಒಂಜಿ ದಾಖಲೆ ಇತ್ತ್ಂಡ ಕಾರ್ಡ್ ತೂಪಾದ್ ವೋಟು ಪಾಡೊಲಿ.

Former PM of Pakistan Imran Khan arrested ಪಾಕಿಸ್ತಾನದ ಮಾಜಿ ಪ್ರಧಾನಿ ಅರೆಸ್ಟ್

ಪಾಕಿಸ್ತಾನದ ಮಾಜಿ ಪ್ರಧಾನಿ, ಪಿಟಿಐ ಮುಖ್ಯಸ್ಥೆರ್ ಇಮ್ರಾನ್ ಖಾನ್ ನ್ ಇಸ್ಲಾಮಾಬಾದ್ ಹೈಕೋರ್ಟ್ (ಐಎಚ್ ಸಿ) ಪಿದಯಿರ್ದ್ ರೇಂಜರ್ ನಕುಲು ಅರೆಸ್ಟ್ ಮಲ್ದೆರ್.

ಈ ಬಗೆಟ್ ಪಾಕಿಸ್ತಾನದ ಡಾನ್ ನ್ಯೂಸ್ ವರದಿ ಕೊರ್ತುಂಡು.

Seva Bharath renders financial assistance to a family in need of medical aid ಸೇವಾ ಭಾರತ್ ಮುತಾಲಿಕೆಡ್ ಹುಷಾರ್ ದಾಂತಿನ ಕುಟುಂಬೊಗು ಪನವುದ ಸಕಾಯ

ಪಂಜ ಕೊಯಿಕುಡೆ : ಕ್ಯಾನ್ಸರ್ ಸೀಕ್ ದ ಚಿಕಿತ್ಸೆಗಾದ್ ಸೇವಾ ಭಾರತ್ ಕೂಟದಕುಲು ದಾನಿಲೆರ್ದ್ ಒಟ್ಟು ಮಲ್ತಿನ ಪನವುದ ಸಕಾಯೊನು ಬಡಪತ್ತ್ ದ ಕುಟುಂಬೊಗು ಕೊರ್ಪಿನ ಲೇಸ್ ಇಂಚೊಗು ನಡತ್ಂಡ್.

ಕೆಮ್ರಾಲ್ ಗ್ರಾಮ ಪಂಚಾಯಿತಿ ವ್ಯಾಪ್ತಿದ ಪಂಜ ಪಕೀರ್ ತೋಟ ದಾಮು ಪೂಜಾರ್ತಿ ಮೆರೆನ ಮಗಲ್ ಶಿವಾನಿ ಮೆರೆಗ್ ಕ್ಯಾನ್ಸರ್ ಆಪರೇಶನ್ ಆದಿತ್ತ್ ದ್ ಚಿಕಿತ್ಸೆ ನಡತೊಂದುಂಡು. ಅರೆನ ಕಂಡನಿಗ್ ಹಾರ್ಟ್ ದ ಸಮಸ್ಯೆ. ರಡ್ಡ್ ಎಲ್ಯ ಪೊಣ್ಣು ಜೋಕುಲು ಉಲ್ಲೆರ್. ಶಿವಾನಿ ಮೇರ್ ಬೀಡಿ ಕಟ್ ದ್ ಜೀವನ ದೆತ್ತೊಂದಿತ್ತೆರ್. ಆಂಡ ಅರೆನ ಆರೋಗ್ಯ ಸಮಸ್ಯೆರ್ದಾತ್ರ ಅಕಲೆನ ಬದ್ ಕ್ ಭಾರಿ ಕಷ್ಟ ಆತ್ಂಡ್. ಈ ಪೊರ್ತುಡು ಸಮಾಜಸೇವಕೆರ್ ಉಮೇಶ್ ಪಂಜ ಮುತಾಲಿಕೆದ ಸೇವಾ ಭಾರತ್ ಕೂಟದಕುಲು ಪನವು ಒಟ್ಟು ಮಲ್ತ್ ದ್ ಅಕ್ಲೆಗ್ ಸಹಾಯ ಮಲ್ದೆರ್.

ಶಿವಾನಿ ಕುಟುಂಬದ ಕಷ್ಟದ ಕತೆ ಕೇಂಡಿನ ಮಲ್ಲ ಉಡಲ್ ದ ದಾನಿಲು ಕೊರ್ತಿನ 1,07,260 ₹ ( ಒಂಜಿ ಲಕ್ಷದ ಏಳ್ ಸಾರದ ಇರ್ನೂತ್ತ ಅಜಿಪ ರೂಪಾಯಿ) ದ ಚೆಕ್ ನ್ ಶಿವಾನಿ ಕುಟುಂಬಗ್ ಕೊರಿಯೆರ್.

ಸೇವಾ ಭಾರತ್ ದ ಈ ಸೇವೆಡ್ ಪಾಂಡುರಂಗ ವಿಠಲ ವಾಟ್ಸಾಪ್ ಗ್ರೂಪ್, ಶಿವಾಯ ಫೌಂಡೇಶನ್ ಮುಂಬಯಿ, ಪಂಜ ಕೊಯಿಕುಡೆ ಶ್ರೀ ವಿಠೋಬ ಭಜನಾ ಮಂದಿರ, ಶನೀಶ್ವರ ಮಂಡಲಿ, ನವಜ್ಯೋತಿ ಮಹಿಳಾ ಮಂಡಳಿದ ಸರ್ವ ಸದಸ್ಯೆರ್ ಕೈ ಜೋಡಿಸಾದೆರ್.