ರಿಯಲ್ ಎಸ್ಟೇಟ್ ಕನ್ಸಲ್ಟಂಟ್ ನೈಟ್ ಫ್ರ್ಯಾಂಕ್ ಇಂಡಿಯಾ ಬುಡುಗಡೆ ಮಲ್ತಿನ, ಥಿಂಕ್ ಇಂಡಿಯಾ ಥಿಂಕ್ ರೀಟೇಲ್ 2023- ಹೈ ಸ್ಟ್ರೀಟ್ ರಿಯಲ್ ಎಸ್ಟೇಟ್ ಔಟ್ ಲುಕ್ ಸಮೀಕ್ಷಾ ವರದಿದ ಪ್ರಕಾರ ದೇಶದ 8 ಮಲ್ಲ ಪೇಂಟೆಡ್ 30 ಪ್ರಮುಖ, ಎಡ್ಡೆ ಗುಣಮಟ್ಟದ ಮಾರ್ಗಲೆಡ್ ಬೆಂಗ್ಲೂರ್ ದ ಮಹಾತ್ಮ ಗಾಂಧಿ ಮಾರ್ಗ ಸುರುತ್ತ ತಾನಡ್ ಉಂಡು.
ಟಾಪ್ 10 ಮಾರ್ಗಡ್ ಬೆಂಗ್ಲೂರ್ ದ 4 ಮಾರ್ಗ ಉಂಡು. ನೆಟ್ಟ್ ಕಮರ್ಷಿಯಲ್ ಮಾರ್ಗ 7, ಬ್ರಿಗೇಡ್ ಮಾರ್ಗ 9, ಬೊಕ್ಕ ಚರ್ಚ್ ಮಾರ್ಗ 10 ನೇ ತಾನಡ್ ಉಂಡು.
ಉಳ್ಳಾಲ: ರಡ್ಡ್ ವರ್ಷದ ಪಿರವು ಕುಂಪಲದ ಆಶ್ರಯ ಕಾಲನಿದ ಇಲ್ಲಲ್ ಆತ್ಮಹತ್ಯೆ ಮಲ್ತೊನ್ನ ಸ್ಥಿತಿಡ್ ಪತ್ತೆಯಾದಿತ್ತಿನ ರೂಪದರ್ಶಿ ಪ್ರೇಕ್ಷಾ ಸಾವುಗು ಪ್ರಚೋದನೆ ಕೊರ್ನ ಆರೋಪಿ ಬಲ್ಲ್ ಪಾಡೊಂದು ತೀರ್ ಪೋಯೆರ್.
ಕುತ್ತಾರುದ ಮುಂಡೋಳಿ ನಿವಾಸಿ ಯತಿರಾಜ್ ಗಟ್ಟಿ (20) ಆತ್ಮಹತ್ಯೆ ಮಲ್ತೊನ್ನ ಆರೋಪಿ. ಮೇರ್ ತನ್ನ ಇಲ್ಲದ ಪಿರವು ಇತ್ತಿನ ಚಿಕ್ಕಮ್ಮನ ಇಲ್ಲದ ಎದುರುದ ಸಿಟ್ ಔಟ್ ದ ಕರ್ಬದ ಹುಕ್ಸ್ ಒಂಜೇಕ್ಕ್ ಬಲ್ಲ್ ಪಾಡೊಂದು ತೀರ್ ಪೋತೆರ್. ಈ ಘಟನೆದ ಜಾಗೆಗ್ ಉಳ್ಳಾಲ ಪೊಲೀಸೆರ್ ಭೇಟಿ ಕೊರ್ದು ಪುನನ್ ಮರಣೋತ್ತರ ಪರೀಕ್ಷೆಗ್ ಕೊನೊತೆರ್. ಮೆರೆಗ್ ಪೊಪ್ಪ, ಅಮ್ಮ, ಮೆಗ್ಗಿ ಉಲ್ಲೆರ್.
ರಾಯ್ಪುರ: ಮದಿಮೆಯೊಂಜೆತ್ತ ಚಾವಡಿದ ಮಿತ್ತ್ ಡಾನ್ಸ್ ಮಲ್ತೊಂದು ಇತ್ತಿನ ಒಂಜಿ ಜನ ತಿಗಲೆ ಬೇನೆಡ್ ತೀರ್ ಪೋಯಿನ ಘಟನೆ ಛತ್ತೀಸ್ಗಢದ ರಾಜ್ನಂದಗಾಂವ್ ಜಿಲ್ಲೆದ ಡೊಂಗರ್ಗಢಡ್ ನಡತ್ಂಡ್.
ಛತ್ತೀಸ್ಗಢದ ಬಲೋದ್ ಜಿಲ್ಲೆದ ನಿವಾಸಿ ದಿಲೀಪ್ ರೌಜ್ಕರ್ ತೀರ್ ಪೋಯಿನಾರ್. ಮೇರ್ ಎಲೆಕ್ಟ್ರಿಕಲ್ ವಿಭಾಗದ ಉದ್ಯೋಗಿಯಾದಿತ್ತೆರ್.
ಮೇರ್ ತನ್ನ ಸಂಬಂಧದ ಮದಿಮೆಡ್ ಡಾನ್ಸ್ ಮಲ್ಪುನಗ ತಿಗಲೆ ಬೇನೆ ಆತ್ಂಡ್. ಈ ಘಟನೆದ ವೀಡಿಯೋ ಕ್ಯಾಮೆರಾಡ್ ಸೆರೆಯಾತ್ಂಡ್.
ರಾಜ್ಯ ವೋಟುದ ಪ್ರಕ್ರಿಯೆಡ್ ಇಡೇ ಮುಟ್ಟ 463 ಕೋಟಿ ರೂ. ಬಿಲೆತ್ತ ನಗದು, ಪದ್ದೆಯಿ, ಡ್ರಿಂಕ್ಸ್ ಬೊಕ್ಕ ಡ್ರಗ್ಸ್ ಸೊತ್ತುಲೆನ್ ವಶಕ್ಕ್ ಪಡೆತೆರ್ ಪಂದ್ ಚುನಾವಣಾ ಆಯೋಗ ತೆರಿಪಾದ್ಂಡ್.
2018 ತ್ತ ಎಲೆಕ್ಷನ್ ತೂಂಡ ಈ ಬಿಲೆ 5 ಪಟ್ಟ್ ಎಚ್ಚ ಆತ್ಂಡ್. ವಶಕ್ಕ್ ಪಡೆಯಿನ ಸೊತ್ತುಲೆಡ್ 147.46 ಕೋಟಿ ನಗದು, 83.66 ಕೋಟಿ ಬಿಲೆತ್ತ ಮದ್ಯ, 23.67 ಕೋಟಿ ಬಿಲೆತ್ತ ಅಮಲ್ ಸೊತ್ತು, 91.06 ಕೋಟಿ ಬಿಲೆತ್ತ ಬಂಗಾರ್, ಬೊಳ್ಳಿ ಪದ್ದೆಯಿನ್ ಬೊಕ್ಕ 24.21 ಕೋಟಿ ಬಿಲೆತ್ತ ಬೇತೆ ಸೊತ್ತುಲು ಸೇರ್ ದ್ಂಡ್.
ರಷ್ಯಾದ ಪಶ್ಚಿಮ ಉರಲ್ ಪ್ರದೇಶಡ್ ತೂ ಪೊತ್ತ್ ದ್ 21 ಜನ ತೀರ್ ಪೋಯೆರ್.
ಈ ತೂ ರ್ದ್ ಸುಮಾರ್ 5 ಸಾರರ್ದ್ ಎಚ್ಚ ಇಲ್ಲ್ ಬೊಕ್ಕ ಸುಮಾರ್ ಹೆಕ್ಟೇರ್ ಕೃಷಿ ಭೂಮಿಗ್ ತೊಂದರೆ ಆತ್ಂಡ್ ಪಂದ್ ತೆರಿದ್ ಬೈದ್ಂಡ್. ಅಂಚೆನೆ ಈ ಘಟನೆಡ್ ಪೆಟ್ಟಾಯಿನಕುಲು ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಕೆಲವೆರೆನ ಸ್ಥಿತಿ ಗಂಭೀರ ಆತ್ಂಡ್. ಇಂಚಾದ್ ಸಾವುದ ಸಂಖ್ಯೆ ಎಚ್ಚಾಪುನ ಪೋಡಿಗೆ ಪುಟ್ಟುದುಂಡು. ನನ ಈ ಘಟನೆ ನಡತಿನ ಪ್ರದೇಶಡ್ ಸರ್ಕಾರ ತುರ್ತು ಪರಿಸ್ಥಿತಿ ಘೋಷಣೆ ಮಲ್ದ್ಂಡ್.
ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಬ್ರಹ್ಮಕಲಶದ ಸುರೂತ್ತ ದಿನತ್ತ ಧರ್ಮಸಭೆ
ತೋಕೂರು : ಧಾರ್ಮಿಕ ಚಿಂತನೆ ಬೊಕ್ಕ ಸಾಂಸ್ಕೃತಿಕ ಚಿಂತನೆ ಪನ್ಪಿನವು ನಮ್ಮ ಸಮಾಜದ ರಡ್ಡ್ ಕಣ್ಣ್ ಇತ್ತಿಲೆಕ್ಕ. ನಮಕ್ಕ್ ಮಾತೆರೆಗ್ಲ ಈ ಗೇನ ಉಪ್ಪೊಡು. ಆಂಡ ಇತ್ತೆದ ಕಾಲೊಡು ಇಡೀ ಜಗತ್ತೇ ಹಳ್ಳಿದ ಲೆಕ ಆತ್ಂಡ್.ಅಂಚಾದ್ ನಮ್ಮ ಜೋಕುಲು ಬದಲಾವೊಂದುಲ್ಲೆರ್. ಅಂಚಾದ್ ನನದ ಜೋಕುಲೆಗ್ ಆ ಗೇನನ್ ಪುಟ್ಟಾವುನ ಅಂಚೆನೆ ಅವೆನ್ ದುಂಬರಿತೊಂದು ಕೊನಪಾವುನ ಜಬದಾರಿ ನಮ್ಮ ಮಿತ್ತ್ ಉಂಡು ಪಂದ್ ಆಳ್ವಾಸ್ ಶಿಕ್ಷಣ ಸಂಸ್ಥೆ ದ ಮುಖ್ಯಸ್ಥೆರ್ ಡಾ.ಮೋಹನ್ ಆಳ್ವ ಪಂಡೆರ್.
ಆರ್ ತೋಕೂರುದ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ಉಚ್ಚಯದ ನಿಲೆಟ್ಟ್ “ಸ್ಕಂದ ಮಂಟಪ”ಡ್ ಮೇ 10ಕ್ಕ್ ನಡತಿನ ಸುರೂತ್ತ ದಿನತ್ತ ಧರ್ಮ ಸಭೆಟ್ಟ್ ಸಾಂಸ್ಕೃತಿಕ ಕಾರ್ಯಕ್ರಮದ ಲೇಸ್ ಗ್ ಚಾಲನೆ ಕೊರ್ದು ಪಾತೆರಿಯೆರ್.
ನಮ್ಮ ರಾಜ್ಯೊಡು 36 ಸಾರ ದೇವಸ್ಥಾನೊಲು ಉಲ್ಲ. ಅಂಚೆನೆ ನಮ ದೇವೆರ್ನ ಜತೆಟ್ಟ್ ದೈವಾರಾಧನೆ ಬೊಕ್ಕ ನಾಗಾರಾಧನೆ ಮಲ್ತೊಂದುಲ್ಲ.ಅಂಚಾದ್ ನಮ ಧಾರ್ಮಿಕತೆತ್ತ ಒಟ್ಟುಗೇ ಜೀವನ ಮಲ್ತೊಂದುಲ್ಲ. ನಮಡ ಧಾರ್ಮಿಕ ಪ್ರಜ್ಞೆ ಜಾಸ್ತಿ ಆವೊಡು. ನನದ ಜೋಕುಲೆಗ್ ಅವೆನ್ ಕಲ್ಪಾವೊಡು ಪಂದ್ ಪಂಡೆರ್.
ಈ ಪೊರ್ತುಡು ಧಾರ್ಮಿಕ ಉಪನ್ಯಾಸ ಕೊರಿನ ಸುಬ್ರಹ್ಮಣ್ಯ ಭಟ್ ತೋಕೂರು, ಸುಬ್ರಹ್ಮಣ್ಯ ದೇವೆರ್ನ ಸಾನ್ನಿಧ್ಯ ಪಂಡ ಅವು ಸುಬ್ರಹ್ಮಣ್ಯ ಸ್ವಾಮಿ ಅಂಚೆನೆ ನಾಗ ದೇವೆರ್ನ ಪುಣ್ಯದ ಜಾಗೆ. ಇಂಚಿನ ಕ್ಷೇತ್ರಡ್ ನಮ್ಮ ಮನಸ್ ಕಲಂಕ್ ಕಳೆದ್ ಉಡಲ್ ಪ್ರಸನ್ನ ಆಪುಂಡು. ನಮ್ಮ ಧರ್ಮ ನಮ್ಮ ಮನಸ್ ಗ್ ನೆಮ್ಮದಿ ಕೊರ್ಪುಂಡು. ಪಂಡೆರ್.
ಮುಲ್ಕಿ ಸೀಮೆದ ಅರಸುಲು ದುಗ್ಗಣ್ಣ ಸಾವಂತೆರ್ ಧರ್ಮಸಭೆತ್ತ ಗುರ್ಕಾರ್ಮೆ ಒಯಿಸ್ ದಿತ್ತೆರ್.
ಮಲ್ಲ ಬಿನ್ನೆರಾದ್ ತೋಕೂರು ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ಗುತ್ತಕಾಡು ಶ್ರೀ ಮೂಕಾಂಬಿಕಾ ದೇವಸ್ಥಾನದ ಧರ್ಮದರ್ಶಿಲು ವಿವೇಕಾನಂದ, ಕಲ್ಲಾಪು ಶ್ರೀ ವೀರಭದ್ರ ಮಹಮ್ಮಾಯಿ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಶಂಕರ್ ಶೆಟ್ಟಿಗಾರ್ ಇತ್ತೆರ್.
ಗೌತಮಿ ಬೊಕ್ಕ ಕೂಟದಕುಲು ದೇವೆರೆನ್ ಸುಗಿತೆರ್. ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಸಂತೋಷ್ ಕುಮಾರ್ ಹೆಗ್ಡೆ ಬಿನ್ನೆರೆನ್ ಎದ್ಕೊಂಡೆರ್. ಜನಾರ್ದನ ಪಡುಪಣಂಬೂರು ಪ್ರಸ್ತಾವಿಕವಾದ್ ಪಾತೆರಿಯೆರ್. ರಾಮಣ್ಣ ದೇವಾಡಿಗ ಸೊಲ್ಮೆ ಸಂದಾಯೆರ್. ರಾಮದಾಸ್ ಪಾವಂಜೆ ಸಭೆ ಸುಧಾರಿಕೆ ಮಲ್ತೆರ್. ಬೊಕ್ಕ ನರೇಶ್ ಕುಮಾರ್ ಸಸಿಹಿತ್ಲು ನಿರ್ದೇಶನದ “ಬಿತ್ತ್ ಲ್ದ ಅಪ್ಪೆ ಭಗವತಿ” ತುಳು ನಾಟಕ ನಡತ್ಂಡ್.
ಒಡಿಪು : ಒಡಿಪು ಜಿಲ್ಲೆಡ್ ಬಯ್ಯ 5 ಗಂಟೆ ಮುಟ್ಟ ಶೇ.73.75% ದಾತ್ ವೋಟು ಪಾಡ್ದೆರ್ ಪಂದ್ ಚುನಾವಣಾ ಆಯೋಗ ಪೊಲಬು ಕೊರ್ತುಂಡು.
ಬೈಂದೂರ್-71.83%,
ಕುಂದಾಪುರ-75.61%,
ಒಡಿಪು- 71.26%,
ಕಾಪು- 71.16%,
ಕಾರ್ಲ-75.54%, ದಾತ್ ಮತದಾನ ಆತ್ಂಡ್.
ಕುಡ್ಲ: ಕುಲಶೇಖರ ಶ್ರೀ ವೀರನಾರಾಯಣ ದೈವೊಲ್ಯಡ್ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶ ಉಚ್ಚಯ ಮೇ14-24 ಮುಟ್ಟ ನಡಪರೆ ಉಂಡು.
ಕ್ಷೇತ್ರದ ತಂತ್ರಿಲು ಅನಂತ ಉಪಾಧ್ಯಾಯ ಮೆರೆನ ಮುತಾಲಿಕೆಡ್ ಈ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನ ನಡಪರೆ ಉಂಡು.
ಮೇ14 ಐತಾರ ಬೊಲ್ಪುಗು ಗಣಯಾಗ, ಉಗ್ರಾಣ ಮೂರ್ತ, ಬಯ್ಯಗ್ ಪುದೆಕಾಣಿಕೆ ಮೆರೆವಣಿಗೆಡ್ ಕೊನೊಯೆರೆ ಉಂಡು.
ಮೇ21 ಐತಾರ ಬೊಲ್ಪುಗು ಶ್ರೀ ವೀರನಾರಾಯಣ ದೇವೆರೆನ ಪ್ರತಿಷ್ಠೆ, 108 ತಾರಾಯಿದ ಗಣಪತಿ ಹೋಮ, ಶ್ರೀ ಮಹಾಗಣಪತಿ ದೇವೆರೆನ ಪ್ರತಿಷ್ಠೆ, ಕಲಶಾಭಿಷೇಕ, ಮಹಾಪೂಜೆ, ಮಧ್ಯಾಹ್ನ ಪುತ್ತೂರ್ ಜಗದೀಶ್ ಆಚಾರ್ಯ ಬೊಕ್ಕ ಕೂಟದಕ್ಲೆರ್ದ್ ಸಂಗೀತ ಗಾನ ಸಂಭ್ರಮ, ಬಯ್ಯಗ್ ಕವಾಟ ಬಂಧನ, ಸಭಾ ಲೇಸ್ ನಡಪರೆ ಉಂಡು.
ಮೇ 22 ಸೋಮಾರ ಬೊಲ್ಪುಗು ಆಶ್ಲೇಷಾ ಬಲಿ, ನಾಗಪ್ರತಿಷ್ಠೆ, ದೈವ ಪ್ರತಿಷ್ಠೆ, ಗಣಪತಿ ದೇವೆರೆಗ್ 108 ಪರಿಕಲಶದ ಬ್ರಹ್ಮಕಲಶಾಭಿಷೇಕ, ಮಧ್ಯಾಹ್ನ ಭಜನೆ, ಬಯ್ಯಗ್ ನಾಗತನುತರ್ಪಣ ಪ್ರಸನ್ನ ಪೂಜೆ, ಬೊಕ್ಕ ಮಸ್ಕಿರಿ ಕುಡ್ಲ ಕೂಟದ ತುಳುನಾಡ ಕಲಾಬಿರ್ಸೆ ದೀಪಕ್ ರೈ ಪಾಣಾಜೆ, ಜೆ.ಪಿ ತುಮಿನಾಡ್, ಪಿಕ್ಚರ್ ನಟೆ ಪ್ರಕಾಶ್ ತುಮಿನಾಡ್, ರಾಜೇಶ್ ಮುಗುಳಿ ಅಭಿನಯದ ತೆಲಿಕೆ ಬಂಜಿನಿಲಿಕೆ ಕಾಮಿಡಿ ಶೋ, ಅವೆರ್ದ್ ಬೊಕ್ಕ ಸಭಾ ಲೇಸ್ ನಡಪರೆ ಉಂಡು.
ಅಂಚೆನೆ ಮೇ16-24 ಮುಟ್ಟ ಪ್ರತೀ ದಿನಲ ಬೊಲ್ಪುಗು ಗಣಹೋಮ ಮಧ್ಯಾಹ್ನ ಮಹಾಪೂಜೆ, ಬೊಕ್ಕ ಬಯ್ಯಗ್ ಶ್ರೀ ದುರ್ಗಾ ನಮಸ್ಕಾರ ಪೂಜೆ ನಡಪರೆ ಉಂಡು.
ಬೊಕ್ಕ ಮೇ15-24 ಮುಟ್ಟ ಪ್ರತೀ ದಿನಲ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನಸಂತರ್ಪಣೆ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಪ್ರಸಾದ ದೆತೊಂದು, ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಬಿ.ಪ್ರೇಮಾನಂದ ಕುಲಾಲ್ ಕೋಡಿಕಲ್, ಗೌರವಾಧ್ಯಕ್ಷೆರ್ ಮಯೂರ್ ಉಳ್ಳಾಲ್, ಗೌರವ ಸಲಹೆಗಾರೆರ್ ಪುರುಷೋತ್ತಮ ಕುಲಾಲ್ ಕಲ್ಬಾವಿ, ದಾಮೋದರ ಎ., ಸಂಚಾಲಕೆರ್ ಕೆ.ಸುಂದರ ಕುಲಾಲ್ ಶಕ್ತಿನಗರ, ಗೀತಾ ಮನೋಜ್ ಮರೋಳಿ ಲೆಪ್ಪೋಲೆಡ್ ತೆರಿಪಾದೆರ್.
ರಾಜ್ಯ ವಿಧಾನಸಭೆತ್ತ ಸಾರ್ವತ್ರಿಕ ವೋಟುಗು ಸಂಬಂಧಪಟ್ಟಿನಂಚೆನೆ ಜಿಲ್ಲೆದ 8 ವಿಧಾನಸಭೆ ಕ್ಷೇತ್ರಡ್ ವೋಟು ಇನಿ ಬೊಲ್ಪುಗು ಸುರು ಆತ್ಂಡ್.
ಕುಡ್ಲ ದಕ್ಷಿಣ ವಿಧಾನಸಭೆ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಜೆ.ಆರ್ ಲೋಬೊ ಪೇಂಟೆದ ಬೆಂದೂರ್ ದ ಸಂತ ಸಬೆಸ್ಟಿಯನ್ ಹಿ.ಪ್ರಾ. ಶಾಲೆಡ್ ವೋಟು ಪಾಡಿಯೆರ್.
ಕುಡ್ಲ: ರಾಜ್ಯ ಇಡೀ ಇನಿ ವಿಧಾನಸಭೆ ವೋಟು ನಡತ್ಂಡ್.
ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಮೇರ್ ಲೇಡಿಹಿಲ್ ಉರ್ವಡ್ ಇಪ್ಪುನ ಸಂತ ಅಲೋಶಿಯಸ್ ಆಂಗ್ಲ ಮಾಧ್ಯಮ ಹಿರಿಯ ಪ್ರಾಥಮಿಕ ಶಾಲೆಡ್ ವೋಟು ಪಾಡಿಯೆರ್.
